Ufaru 20
20
Ibrahim na̱ Abimele
1Reve Ibrahim 'yon diga Mamure reve u saɓa a̱ tyo upasu we Nege, reve u da̱nu e memere ma Kedesh na̱ Shur. A̱yi a̱ nden n tsumocin e iɗa ya Gera, 2reve u damma a na ka va̱ yi Saratu, <<Zawa'a va̱ ɗa.>> Reve gba Abimele mogono ma Gera ma̱ lyungu a taraa yi Saratu. 3Agba reve A̱sula̱ a̱ ta̱wa̱ uba̱ta̱ wa Abimele a alavu na ayin. A̱vu u damma yi, <<Vu ta̱ kuwa̱ adama a ka na vu tarai, adama a na a̱yi ka vu za ro ɗa.>> 4Reve wo o'wo koto shi Abimele von na̱ a̱yi shi. Ɗaɗa u tsu damma, <<Zagbain, vu to una aza a na a̱ ri nu unusu shi? 5A̱yi na aciya̱yi a ɗa u damma numu, <A̱yi mawun ma̱ a̱na̱wun ma̱ va̱ ma ɗa shi>? Reve a̱yi ka'a fo u damma, <A̱yi mawun ma̱ a̱na̱wun ma̱ va̱ ma ɗa.> A̱tsuma̱ a majiyan ma sa'ani waru babu ulinga wi iwuya i ɗa n yuwain ili i nda.>> 6Reve A̱sula̱ a damma yi a̱tsuma̱ a alavu'u, <<Ee, n reve ta̱ vu yuwan ta̱ ne na̱ majiyan ma sa'ani o okolo a̱ wu. Agba a̱mu ɗa m putsa nuwu adama vu yuwaan mu unusu wan. Adama o ndolo a ɗa n lyawa nuwu vu ju'wa̱n niyi shi. 7Gogo nda, tara ka vuma'a vu ka̱mbuwa̱ yi. A̱yi vumava̱sula̱ ɗa, u ta yuwaan wu avasa adama vo o'wo wuma. Amma na̱ vu 'yuwan a̱ ka̱mbuwa̱ yi, vu reve gba vu ta̱ kuwa̱ na amayun, na̱ a̱vu na ama a̱ wu suru.>>
8Ɗaɗa Abimele 'yoyin nu usana, reve u ɗe agbashi a̱ yi suru reve u damma le ili i nda suru. Reve ama'a a uwwa wovon lon. 9Ɗaɗa Abimele ɗeyi Ibrahim reve u damma yi, <<Nye i zuwai vu yuwan ntsu ne tsunda? Unusu u ne u ɗa n yuwaan nuwu hali na va̱a̱ ta̱wa̱a̱ mu na̱ meleshe ma wuya ma nda na̱ a̱mu nu uba̱ta̱ u tsugbain tsa̱ va̱? Vu yuwaan mu ta̱ ili i na u lobonoi vu yuwan shi.>> 10Reve u damma Ibrahim, <<Nye vu shi a majiyan, ɗaɗa vu yuwain ili i nda?>>
11A̱vu Ibrahim damma, <<N yuwan ta̱ ne adama a na n shi ta̱ a dansa, wovon wa̱ A̱sula̱ wu pa shi ko ke'en. A ta gura una mu adama a ka va̱. 12Ko na̱ ne waru shi, na amayun a̱yi zawa'a va̱ ɗa, mawun ma̱ a̱sha̱wu ma̱ va̱ ma ɗa, a̱yi gba mawun ma̱ a̱na̱wun ma̱ va̱ ma ɗa shi, reve wo o'wo ka va̱. 13Ana A̱sula̱ a zuwa numu n lyawa u'wa wa dada va̱ n reme igaru, reve n damma yi, <Apa nda isa'ani i na voo roco mu: uba̱ta̱ u na tsu 'ya̱wa̱i biti vu damma a̱mu zakpara va̱ wu ɗa.> >>
14Reve Abimele tara ikyon ni inan, na agbashi ali na̱ a̱ma̱ci reve u ca Ibrahim, reve u ka̱mbuwa̱ yi ka va̱ yi Saratu. 15Reve u damma Ibrahim, <<Nlo iɗa i va̱, vu da̱nu uba̱ta̱ u na vu cigai biti.>> 16Reve u damma Saratu, <<Nlo n cayi zakpara va̱ wu azurufa ukpakukupa, (1,000) wo o'wo ta̱ iroci a̱ ma̱ka̱ka̱n ma aza a na a̱ ri oɓolo na̱ a̱vu suru na vu ri nu unusu shi ko ke'en.>>
17Reve Ibrahim yuwan avasa a̱ tyo A̱sula̱, reve A̱sula̱ a̱ ka̱mba̱to Abimele gbaga. Reve waru u ka̱mba̱to ka va̱ yi gbaga, na agbashi e esheli a̱ yi, ɗaɗa gba a matsain. 18Ana wo o'woi A̱sulazuva a̱ shi ta̱ a̱ ɓa̱ru matsutsun vu u'wa wa Abimele suru adama a Saratu, ka va Ibrahim.
Currently Selected:
Ufaru 20: TSW
Highlight
Share
Compare
Copy
Want to have your highlights saved across all your devices? Sign up or sign in
©️2025 Language Development and Translation Initiative (LDTI)
