Ufaru 19
19
Unusu wo Sodom#19 Vu te ene a̱a̱ɗiva̱ a 15 oo tono ukosu wa̱ a̱a̱ɗiva̱ a nda.
1A̱vu nlingata ma̱ A̱sula̱ n re'e a rawa Sodom nu ulivu, Lutu lo nden o una̱ntsutsu wo Sodom. Ana we ene nle, a̱vu u 'yon u raba le. A̱vu u kingyo nu urewesu wa̱ yi a̱ tyo e iɗa a̱ ma̱ka̱ka̱n me le. 2A̱vu u damma, <<Azagbain a̱ va̱, ɓatsai ya asa o u'wa wa aagbashi a̱ ɗu, i sa'a ana a̱ ɗu reve na̱ wasasa i reme ure.>> Reve a̱ usu, <<O'o, tsu ta asa a agalaci.>> 3Reve gba u gbagbaa le ɗaɗa a ɓatsai a uwai o u'wa wa̱ yi. U foɓoo le ta̱ ilyalya i sa'ani no opopofu a na a̱ ri na̱ wolilo shi, reve a tama. 4Amma kafu o von, reve ali a̱ lyuci o Sodom, mbara no olobo suru a̱ ka̱nda̱ruwa̱ u'wa'a. 5Reve a damma Lutu, <<Te ɗa gba ama a na a cuwain o u'wa wa̱ wu na ayin a nda? Uta̱a̱ tsu ele a alanga adama tsu von ne ele.>> 6Reve Lutu uta̱ uba̱ta̱ wa ama'a, a̱vu u ɓa̱ru una̱ntsu, 7reve u damma, <<N ta patishi ɗu a̱za̱ a̱ va̱, she i yuwan iwuya i nda wan. 8Uwwai nda, n ta̱ ne esheli e re a na koto e revei vali shi. Lyawai mu uta̱a̱ ɗu ne ele, i yuwan ili i na i cigai ne ele. Amma she i ju'wa̱n ama a nda wan, adama a na a uwa ta̱ o ululu u va̱.>> 9Agba reve a̱ usu, <<Buwaa tsu ure!>> Reve waru a damma, <<Vuma nda ta̱wa̱ ta̱ tsumocin, agba gogo u ciga ta̱ wo o'wo za vu uge'etosu! Gogo nda tsu ta yuwaan wu ili i na i la'ai i na tsaa yuwaan le uwuyanu.>> Reve a̱ ca̱co Lutu nu ucira a̱vu a rawa zuzu nu una̱ntsu adama o ɓoso una̱ntsu'u. 10Reve gba omoci'in a canana ukere a̱vu a uwato Lutu pe a̱tsuma̱ o u'wa uba̱ta̱ u na a̱ ri reve a̱ ɓa̱ru una̱ntsu. 11Reve a lapa ama a na a̱ ri o una̱ntsu wu u'wa'a na̱ tsurumba̱, zagbain na̱ mawun hali a̱ ta̱ka̱lyuwa̱ a lamba uba̱ta̱ u na una̱ntsu u ri.
12Reve a damma Lutu, <<Vu ta̱ pe na̱ vuma va̱ wu pe nda'a, ko ototo, ko muwun mo olobo ko esheli, ko vuma ro pe a̱tsuma̱ a̱ lyuci gbain? Vu uta̱a̱ le pe. 13Adama a na tsu ta̱ lungusa̱ uba̱ta̱'a̱. A̱sulazuva a uwwa ta̱ mesun ma̱ a̱bunda̱ adama o unusu u na ama a nda aa yuwusan, ɗaɗa u lyungu ntsu, tsa̱ra̱ tsu ta̱wa̱ tsu lungusa̱ uba̱ta̱'a̱.>> 14Reve Lutu uta̱ reve u damma egeɓe e esheli a̱ yi aza a na aa zuwa le, <<'Yoyin i lyawa uba̱ta̱ u nda; adama a na A̱sulazuva a ciga ta̱ ma̱lungusa̱a̱ ma̱ lyuci'i.>> Agba reve ototo a̱ yi a tara gashi uro u ɗa yi.
15Na̱ wasasa, a̱vu nlingata ma̱ A̱sula̱ n zuwa Lutu jika̱, adansa, <<'Yon vu tara ka va̱ wu, na̱ muwun me esheli n re ma̱ wu, she o una ɗu adama a̱tsuma̱lima̱ a na aa ca lyuci gbai'in wan.>> 16A̱vu Lutu tara le mantsa. A̱vu A̱sulazuva e ene yi iliyali, reve ama'a e reme yi ukere na̱ ka va̱ yi, ne esheli e re a̱ yi. A̱vu o uta̱a̱ le a̱tsuma̱ a̱ lyuci gbai'in. 17A̱vu malingata ma̱ ta̱ a̱tsuma̱ e le u damma le, <<Sumai adama a wuma a̱ ɗu! She i ka̱lyuwa̱ a̱ca̱pa̱ wan, waru she yi isawan a̱tsuma̱ o uɓaa wan. Sumai a̱ tyo a agaɗi, tsa̱ra̱ i kuwa̱ wan.>> 18Reve Lutu damma, <<Ne ɗa shi, azagbain a̱ va̱. 19Agbashi a̱ ɗu a̱ tsura̱ ta̱ isa'ani e ekere a̱ ɗu, waru i yuwaan mu ta̱ ili ya̱ a̱ɓula̱ lon a na i wawai wuma u va. Agba maa gura suma a rawa a agaɗi shi, adama o wovon meleshe'e ma ta cina mu reve n kuwa̱. 20Lyuci ndeɗe la'a ta̱ zuzu na maa gura rawa, waru ma̱lyuci ma ɗa. Lyawai n suma a̱ tyo ɗe, ma̱lyuci ma ɗa shi? Adama n da̱na̱ wuma!>> 21Reve malingata ma̱ ta̱ ma damma yi, <<U lobono ta̱, waru n usu ta̱ ili i na vu dammai, moo kototo lyuci na vu yuwain adanshi a̱ yi shi. 22Jika̱, vu suma a̱ tyo ɗe, agba maa yuwan ili shi she vu rawa ɗe.>> Adama o ndolo a ɗa e ɗeyi lyuci'i Zowa.#19:22 Urevu wa zowa na Tsuyahuda a̱yi ɗa <<Ke'en.>> 23Alanzu a̱ shi ta̱ a yuwan a mantsa ma na Lutu rawai Zowa.
Ulungusu wo Sodom na̱ Gomora
24A̱vu A̱sulazuva o ocowo Sodom na̱ Gomora na akina a̱ fa̱rinwuta a̱ ma̱kula̱ diga zuva tsi iro'i. 25A̱vu u kula̱to ilyuci i gbagbain i ndolo na̱ ka̱ri'i suru na aza a na a̱ ri pe nden a̱tsuma̱ e ilyuci'i suru, no ototopi a na a̱ ri pe e iɗa'a. 26A̱yi gba ka va̱ Lutu na oo tono le a̱ca̱pa̱, a̱vu u ka̱lyuwa̱ a̱ca̱pa̱, ɗaɗa wo o'woi a̱a̱kutsu a akpaɗi. 27Nu usana usana reve Ibrahim 'ya̱wa̱ wi isawan uba̱ta̱ u na u shi wi isawain a̱ ma̱ka̱ka̱n ma̱ A̱sulazuva; 28reve u ka̱lyuwa̱ a̱ cipa̱ upasu wo Sodom na̱ Gomora, nu upasu wi iɗa yu uka̱ri, reve we ene mikyon n 'yon zuva tsa̱ mikyon tso uba̱ta̱ wu ukula̱tosu. 29Agba ne ɗa wo o'woi a mantsa ma na A̱sula̱ a̱ kula̱toi ilyuci yu uka̱ri'i, u cuwan ta̱ na adanshi a na u yuwain na̱ Ibrahim a̱vu u wawa Lutu.
Ugundo wa aza a̱ Mowa na aza a Ammo
30Reve Lutu 'yon a̱ lyuci va Zowa a̱vu u da̱nu a agaɗi na̱ a̱yi ne esheli e re a̱ yi, adama a na u shi a uwwusa wovon u na wa̱a̱ da̱nu Zowa; reve u da̱nu a̱ a̱a̱ba̱nu ne esheli e re a̱ yi. 31Reve usheli wu ufaru u damma zawa'a, <<Dada tsu kutsa ta̱, waru babu vali na aa zuwa tsu cine aa yuwusan o uvaɗi ma̱ɓula̱. 32Ta̱wa̱, tsu sowoto dada tsu ma̱ra̱, reve tsu von na̱ a̱yi, adama ugundo wa dada tsu u koto wan.>> 33Reve o sowoto dada le ma̱ra̱ na ayin o ndolo. Reve za vu ufaru uwa u von na̱ dada le. Agba u reve mantsa ma na u voyin shi ko mantsa ma na u 'yoyin shi. 34Ana usana u tawai, reve usheli wu ufaru'u u damma zawa'a, <<Ve ene, yon na ayin n von ta̱ na̱ dada tsu, lyawa na ayin a ana'an waru tsu zuwisa yi u sowo. Reve a̱vu fo vu uwa vu von na̱ a̱yi, adama ugundo wa dada tsu u koto wan.>> 35Ɗaɗa a zuwisai dada le sowoi na ayin o ndolo. Reve zawa'a uwa u von na̱ a̱yi, agba u reve mantsa ma na u voyin shi ko mantsa ma na u 'yoyin shi. 36Ne ɗa esheli e re a̱ Lutu'u a yuwain a̱tsuma̱ e ekere a dada le. 37Reve usheli wu ufaru u matsan ulobo, reve u ca yi aala Mowa. A̱yi ɗa akaya a aza a̱ Mowa hali a̱ tyo ana'an nda. 38Reve zawa'a fo u matsan ulobo, a̱vu u ca yi aala Benami. A̱yi ɗa akaya a aza a Amon hali a̱ tyo ana'an nda.
Currently Selected:
Ufaru 19: TSW
Highlight
Share
Compare
Copy
Want to have your highlights saved across all your devices? Sign up or sign in
©️2025 Language Development and Translation Initiative (LDTI)
