Ufaru 21
21
Limatan va Ishiyaku
1A̱sulazuva a cuwan ta̱ na̱ Saratu cine u dammai. 2Saratu yuwan ta̱ a̱a̱tsuma̱, a̱vu u matsaan Ibrahim mawun mo ulobo na̱ tsukutsa tsa̱ yi mantsa ma na A̱sula̱ a damma niyi gan. 3A̱vu Ibrahim zuwaa mawun ma na Saratu matsaan niyi aala Ishiyaku. 4A̱vu Ibrahim paɗa Ishiyaku mawun ma̱ yi uryumbu a̱yi rana kunla̱ nu umatsun ununa A̱sula̱ a damma niyi. 5Ibrahim na a'wan ukpaku (100) ɗaɗa a matsaan niyi mawun ma̱ yi Ishiyaku.
6A̱vu Saratu damma, <<A̱sula̱ a zuwa ta̱ n zo'oso, za na uwwai suru u to zo'oso oɓolo na̱ a̱mu.>> 7A̱vu u damma, <<Zane ɗa shi aa damma Ibrahim, Saratu ta apato muwun maani? Na̱ ne suru m matsaan yi ta̱ mawun mo ulobo.>>
O lo ta̱ Hajara na̱ Isma'ila
8Ana mawu'un u kungwai, a̱vu a kasa yi maani. Ana a kasa niyi maani, a̱vu Ibrahim yuwan a̱ba̱jini a̱ a̱buki. 9A̱vu Saratu ene ulobo wa Hajara za va Masar za na u matsayin Ibrahim a yuwusaan Ishiyaku mawun ma̱ yi ulamu. 10A̱vu u damma Ibrahim, <<Vu gba̱ra̱ aagbashi a ka ndolo na̱ mawun ma̱ yi. Mawun ma aagbashi mo ndolo mee ne'eshen agadu na̱ mawun ma̱ va̱ Ishiyaku shi.>>
11Ili'i i lungusa̱ ta̱ Ibrahim okolo adama a mawun ma̱ yi. 12Amma a̱vu A̱sula̱ a damma Ibrahim, <<She okolo a̱ wu a̱ la̱nga̱ adama a mawun ma aagbashi o usheli a̱ wu o ndolo wan. Vu zuwa atsuvu e ili i na Saratu aa damma wu suru, vu yuwan ununa u damma nuwu, adama a na na aala a Ishiyaku a ɗa a̱a̱ da̱na̱ e ɗesu ugundo wa̱ wu. 13N ta zuwa ulobo wa aagbashi o usheli'i wo o'wo iɗa fo, adama a na a̱yi fo mawun ma̱ wu ma ɗa.>>
14Reve Ibrahim 'yon nu usana usana a̱vu u tara ilyalya na̱ medele ma̱ mini, a̱vu u ca Hajara. A̱vu u zuwaa yi o uvangaci, reve u gba̱ra̱ yi nu ulobo'o. Reve u ka̱ra̱ u reme agara a̱ a̱tsumona a Biyasheba. 15Ana mini'i mo kotoi reve u zuwa mawu'un o ululu u molopu mo ro. 16Reve u 'ya̱wa̱ u da̱nu makasu, u ta rawa alanga o utewiyin wu liya. U jiyan ta̱, <<Maa gura ka̱lyuwa̱ mawu'un a̱ kuwa̱ shi.>> Ana u da̱nuyi makasu na̱ mawu'un reve u ɓosho na̱ mesun. 17Reve gba A̱sula̱ a uwwa mesun ma mawu'un, reve malingata ma̱ A̱sula̱ me ɗe Hajara diga zuva reve u damma yi <<Nyen i ɗa ya̱a̱ ɓa̱la̱ wu Hajara? She vu uwwa wovon wan, A̱sula̱ a uwwa ta̱ mesun ma mawu'un uba̱ta̱ u na u ri nven. 18'Yon vu reme ukere u mawu'un vu 'ya̱sa̱n yi, adama a na n ta zuwa yi wo o'wo iɗa i gbain.>> 19Reve A̱sula̱ a̱ kpa̱tu'wa̱ esu a̱ yi, ɗaɗa we enei ooko'o a̱ mini, reve u 'ya̱wa̱ u shiton medele ma̱ mini'i, a̱vu u ca mawu'un u sowo. 20Reve gba A̱sula̱ a̱ da̱na̱ oɓolo na̱ mawu'un, reve u kungwa. U da̱nu ta̱ a̱tsumona, a̱vu wo o'wo meten ma amayun. 21Reve u da̱nu a̱tsumona wa Faran, a̱vu mma va̱ yi taraa yi ka e iɗa ya Masar.
Nzuwulai na̱ Biyasheba
22A mantsa'a reve Abimele na̱ Fiko yali ya̱ a̱soja a̱ yi damma Ibrahim, <<A̱sula̱ o to oɓolo na̱ a̱vu a̱tsuma̱ e ili i na vaa yuwusan suru. 23Adama o ndolo, vu kucinaa mu na̱ A̱sula̱ vaa paala mu shi na̱ a̱mu na̱ muwun n va̱ na̱ muwun n tsukaya n va̱. Vu roco mu ni iɗa i va̱ uba̱ta̱ u na vu ri a̱ nden n limocin n isa'ani cine n roco nuwu.>> 24A̱vu Ibrahim damma, <<N kucina ta̱.>> 25A̱vu Ibrahim ta̱wa̱a̱ Abimele na adanshi adama o ooko'o a̱ mini a na agbashi a Abimele a usai. 26A̱vu Abimele damma, <<N reve za na yuwain ili i ndolo shi. Waru a̱vu vu damma mu shi, agba koto mu uwwa a ɗa shi she ana'an.>> 27Reve Ibrahim tara ikyon ni inan reve u ca Abimele, reve ele ra a yuwunlai akucunu. 28Reve Ibrahim uta̱a̱ mukyokyon n cindere a̱tsuma̱ o oɓolo a̱ nge'en. 29Reve Abimele ece Ibrahim, <<Nyen vu cigai a na vu uta̱i mukyokyon n cindere n nda a̱ nge'en?>> 30A̱vu Ibrahim usu, <<Ushi mukyokyon n cindere'e adama wo o'wo iroci a na a̱mu ɗa n ka̱pa̱i ooko'o a nda.>> 31Adama o ndolo a ɗa e ɗeyi uba̱ta̱'a̱ Biyasheba, adama a na ɗe ɗa ele ra yuwunlai akucunu. 32Ana o kotoi akucunu reve Abimele na̱ Fiko yali ya̱ a̱soja ya̱ yi a̱ 'yon a̱ ka̱mba̱ e iɗa ya aza a Filistiya. 33Reve Ibrahim shuwa̱ Uɗanga u na a̱ tsu ɗe tamari a Biyasheba, lo ɗa u ɗeyi a ala a̱ A̱sulazuva, A̱sula̱ a babu ukotu a̱tsuma̱ a̱ a̱ga̱nda̱. 34Reve Ibrahim yuwan nden e iɗa ya aza a Filistiya mantsa ma̱ a̱bunda̱.
Currently Selected:
Ufaru 21: TSW
Highlight
Share
Compare
Copy
Want to have your highlights saved across all your devices? Sign up or sign in
©️2025 Language Development and Translation Initiative (LDTI)
