Mota̱a̱ 9

A̱tsuma̱lima̱ e iliyamunga

1Reve A̱sulazuva a damma Musa, <<Vu 'ya̱wa̱ ya Firi'awuna, a̱vu vu damma yi, <Apa ili i na A̱sulazuva a dammai, A̱sula̱ a Mmaci ma Ibrahim a dammai: <<Vu lyawa ama a̱ va̱ a̱ ka̱ra̱, tsa̱ra̱ a̱ 'ya̱wa̱ a yuwaan mu a̱ga̱nda̱.>> 2Nna̱ vu 'yuwan a lyawa le a̱ ka̱ra̱, a̱vu vu lyuwa elime na̱ makpada me ele, 3Uwwai, ukere wa̱ A̱sulazuva u ta̱ lapa ɗu na̱ a̱tsuma̱lima̱ o uwuyanu e iliyamunga i na i ri a atsusa: ido na̱ nloli oɓolo na arakumi a̱ ɗu ni inan ni ikyon na̱ mgbele n ɗu. 4Agba n ta kakasa iliyamunga ya ama a Isra'ila na aza a Masar, adama a na ko nama ta̱ a̱tsuma̱ e inama ya ama a Isra'ila a̱a̱ kuwa̱ shi.> >>

5Reve A̱sulazuva a zuwa mantsa, a̱vu u damma, <<Nfa'an A̱sulazuva a ta yuwan ili i nda a̱tsuma̱ e iɗa i nda.>> 6O urana we ire, reve A̱sulazuva a yuwan ne. Iliyamunga ya aza a Masar suru a̱ kuwa̱, agba ko za ta̱ va aza a Isra'ila kuwa̱ shi. 7A̱vu Firi'awuna lyungu a̱ ka̱lyuwa̱, reve e ene agba ko iliyamunga i ta̱ ya aza a Isra'ila kuwa̱ shi. Agba reve mogono'o u gbamisa aci, u lyawa ama'a a̱ ka̱ra̱ shi.

A̱tsuma̱lima̱ a Amicin

8Reve gba A̱sulazuva a damma Musa na̱ Haruna, <<Kenei okomo e ekere a̱ ɗu o una̱ wu uruma. Reve a̱vu Musa, vu kusha'wa yi o upepu a̱ ma̱ka̱ka̱n ma Firi'awuna. 9Okomo'o gba u ta baza tsa̱ a̱ ma̱buta̱ a̱tsuma̱ e iɗa ya Masar suru. U ta zuwa amicin o uta̱, reve o o'wo antsu a̱ lipu va ama ni inama a̱tsuma̱ e iɗa suru.>>

10Reve e kene okomo o una̱ wu uruma, reve e isawan elime a Firi'awuna. A̱vu Musa kusha'wa okomo'o o upepu, a̱vu okomo'o wo o'wo amicin o utusa̱ a̱ lipu va ama ni inama. 11Agba ozo o tsuboci e le a gura isawan a̱ ma̱ka̱ka̱n ma̱ Musa shi, adama a amicin a na a̱ ri ne ele fo, cine aza a Masar suru a̱ ri. 12A̱vu A̱sulazuva a zuwa mogono'o aciyogbamu, agba u zuwa atsuvu a adanshi a Musa na̱ Haruna shi, cine A̱sulazuva a dammai Musa.

A̱tsuma̱lima̱ a Atayan

13Reve A̱sulazuva a damma Musa, <<Vu 'yon na̱ wasasa i ga'asan na̱ Firi'awuna, reve vu damma yi, <Apa ili i na A̱sulazuva A̱sula̱ a Mmaci ma Ibrahim a dammai: Vu lyawa a ama a̱ va̱ a̱ ka̱ra̱, adama a yuwaan mu a̱ga̱nda̱. 14Adama a na a mantsa ma nda n ta̱ lyungu a̱tsuma̱lima̱ o ucira a̱ va̱ suru a aci a̱ wu na azagbain a̱ wu na ama a̱ wu, tsa̱ra̱ vu reve na za lo vadamma a̱mu a̱tsuma̱ o uvaɗi u nda shi. 15Adama a na gogo tsunda na̱ n shi ta̱ ɗe mu ba̱ruwa̱ ekere a̱ va̱ n faba wu oɓolo na ama a̱ wu na̱ a̱tsuma̱lima̱ o usuɗuwu lon, a na a̱ shi ta̱ ɗe a tasa wu a̱tsuma̱ o uvaɗi u nda. 16Agba reve n 'ya̱sa̱n wu zuva adama n roco ucira u va̱ tsa̱ra̱ a uwwa aɗa a ala a̱ va̱ a̱tsuma̱ o uvaɗi suru. 17Suru na̱ ne a̱vu ɗa nda vu buwai a̱ 'ya̱sa̱sa̱n aci a̱ wu e ekere a ama a̱ va̱ hali vu 'yuwan a lyawa le a̱ ka̱ra̱. 18Adama o ndolo gba, a̱ tyo a mantsa ma nda nfa'an, n ta zuwa atayan a̱tsuma̱ a Masar cu'un na koto a yuwain a̱tsuma̱ Masar shi diga a mantsa ma na a yuwan niyi hali a̱tyo ana'an. 19Gogo vu zuwa a̱ ta̱wa̱a̱ ni iliyamunga ya̱ wu a̱tsuma̱ o oogodo a̱ wu oɓolo ni ili suru i na vu ri na̱ a̱yi ba̱ta̱ ro. Adama a na atayan a̱ ta̱ riya̱a̱ vuma suru na̱ nama na ri a aatsusa na koto a̱ ta̱wa̱yi na̱ a̱yi o u'wa shi reve a̱ kuwa̱.> >>

20Reve azagbain a Firi'awuna a na a uwwai wovon wa adanshi a̱ A̱sulazuva a̱ jika̱ a̱ ta̱wa̱a̱ na agbashi e le ni iliyamunga i le a 'wa. 21Agba aza ana o poloi atsuva adanshi a̱ A̱sulazuva shi a lyawa agbashi e le ni iliyamunga i le a alanga.

22Ana a yuwain ne, reve A̱sulazuva a damma Musa, <<Vu 'ya̱sa̱n ukere wa̱ wu a̱ 'ya̱wa̱ zuva a̱ tyo e eleshe, adama atayan a̱ riya̱ a̱tsuma̱ e iɗa ya Masar. A̱ ta̱ riya̱a̱ ama fo ni iliyamunga ni ili i na a̱ cu'wa̱in a̱ a̱ɗuma̱ suru e iɗa ya Masar.>> 23Ana Musa sapiyi aaɗanga a̱ yi a̱ tyo e eleshe, a̱vu A̱sulazuva a̱ lyungu tsata na atayan reve imaɗatsu i maɗatsa a̱ tyo e iɗa. Reve A̱sulazuva o ro'o atayan a̱tsuma̱ a Masar. 24O oco ta̱ atayan a̱vu a yuwusan imaɗatsu ya akina a̱tsuma̱ a ataya'an cu'un na koto a yuwain shi a̱tsuma̱ a Masar suru hali na wo o'woi iɗa. 25Ataya'an a̱ rukutsa̱ ta̱ ili suru i na i da̱na̱i a atsusa a̱tsuma̱ e iɗa ya Masar, vuma na̱ nama suru. Reve ataya'an a̱ rukutsa̱ ca̱'a̱n suru reve a kuɗa ɗanga suru. 26Agba a̱tsuma̱ a̱ Goshen, uba̱ta̱ u na aza a Isra'ila a̱ da̱na̱i goon ɗa atayan a̱ riya̱i shi.

27Reve Firi'awuna lyungu e ɗewe yi Musa na̱ Haruna a̱vu u damma, <<A mantsa ma nda n yuwan ta̱ unusu, A̱sulazuva a̱ ta̱ mejege, a̱mu oɓolo na ama a̱ va̱ tsu nusan ta̱. 28I pati A̱sulazuva, adama a na tsata na atayan a̱ A̱sula̱ a ntsa tsu ta̱. Gogo tsunda n ta lyawa ɗu i ka̱ra̱, ye isawan pa shi.>>

29Reve Musa damma yi, <<A̱mu a̱ mota̱a̱ a̱tsuma̱ a̱ lyuci, n ta̱ ba̱ruwa̱ ukere u va̱ a̱ tyo uba̱ta̱ wa̱ A̱sulazuva. Tsata'a tsu ta lyawa waru a̱a̱ da̱shi yuwan atayan shi, adama i reve a na uvaɗi za va̱ A̱sulazuva a ɗa. 30Amma a̱vu na azagbain a̱ wu, n reve ta̱ hali n gogo yaa uwwusa wovon wa̱ A̱sulazuva A̱sula̱ shi.>>

31A̱ lungusa̱ ta̱ oroci o ototopi no oloɗo e itana yu una, adama a na yitabo i pusa̱ ta̱ ɗe, waru ototopi o ɓoso ta̱. 32Agba yitabo no oroci a yitabo yu una a̱ la̱nga̱ shi, adama a na a tsu kutsa go'o shi.

33Reve Musa lyawa Firi'awuna, reve u ka̱ra̱ o uta̱ a̱tsuma̱ a̱ lyuci'i. Reve u sapi ekere a̱ yi a̱ tyo uba̱ta̱ wa̱ A̱sulazuva, reve tsata'a na ataya'an e isawan, waru iro'i i riyisa̱ o uvaɗi shi. 34Amma a na Firi'awuna enei iro'i na atayan na̱ tsata tsa lyawai, reve u yuwisan unusu, a̱vu a̱yi na azagbagbain a̱ yi a gbamisa aci. 35Reve mogono'o u gbamisa aci, reve u 'yuwan a lyawa aza a Isra'ila a̱ ka̱ra̱, cine A̱sulazuva a dammai o una̱ wa Musa.

Currently Selected:

Mota̱a̱ 9: TSW

Highlight

Copy