Mota̱a̱ 10
10
A̱tsuma̱lima̱ a apapari
1Reve A̱sulazuva a damma Musa, <<Ka̱ra̱ a̱ ka̱mba̱ uba̱ta̱ wa̱ Firi'awuna, adama a na n zuwa yi ta̱ u yuwan aciyogbamu a̱yi na azagbain a̱ yi, tsa̱ra̱ n roco iroci ya asalama i va̱ e memere me le. 2Waru tsa̱ra̱ vu gura damma muwun ma̱ wu na̱ muwun n tsukaya ma̱ wu cine n zuwai aza a Masar o o'wo ili yu ulamu adama e iroci i va̱ i na n yuwain a̱tsuma̱ e le, tsa̱ra̱ a̱ɗu fo i reve a na a̱mu ɗa A̱sulazuva.>>
3Reve Musa na̱ Haruna ka̱ra̱ a̱ 'ya̱wa̱ uba̱ta̱ wa Firi'awuna reve a damma yi, <<Apa ili i na A̱sulazuva A̱sula̱ a Mmaci ma Ibrahim a dammai, hali a̱ tyo mantsa ma̱ ne ma ɗa vaa tara na vaa 'yuwan voton aciya̱wu uba̱ta̱ u va̱? Vu lyawa ama a̱ va̱ a̱ ka̱ra̱ tsa̱ra̱ a yuwaan mu a̱ga̱nda̱. 4Nna̱ gba vu 'yuwan a lyawa ama a̱ va̱ a̱ ka̱ra̱, nfa'an n ta̱ ta̱wa̱a̱ na apapari a̱tsuma̱ e iɗa ya̱ wu. 5Waru a̱ ta̱ ɓa̱ru urewesu wi iɗa'a suru cine vuma aa gura ene iɗa shi. Waru a ta tama ili suru i na i pasai i na atayan a̱ lyungusa̱i shi, waru a ta tama ɗanga na o uta̱sa̱ a̱tsuma̱ a atsusa'a. 6Waru o to shiton u'wa wa̱ wu na̱ 'wa va azagbain a̱ wu na̱ 'wa va ama a Masar suru icu'un i na nan dada ɗu ko nkaya n ɗu me enei shi diga o urana u na a̱ ta̱wa̱i o uvaɗi a̱ ta̱wa̱ ana'an.>> Reve u vadala u ka̱ra̱ u lyawa Firi'awuna.
7Reve azagbain a Firi'awuna a damma yi, <<Hali mantsa ma ne ma ɗa vuma nda wa̱ da̱na̱ a̱ ta̱wusa̱ tsu na̱ maza? Vu lyawa ama'a a̱ ka̱ra̱ tsa̱ra̱ a yuwaan A̱sulazuva A̱sula̱ e le a̱ga̱nda̱. Hali n gogo koto vu reve a na iɗa ya Masar i la̱nga̱i shi?>>
8Ɗaɗa e ɗewishei Musa na̱ Haruna a̱ ka̱mba̱ uba̱ta̱ wa Firi'awuna. A̱vu u damma le, <<Ka̱ra̱i, i 'ya̱wa̱ i yuwaan A̱sulazuva A̱sula̱ a̱ ɗu a̱ga̱nda̱. Amma zane na̱ zane ɗa a̱a̱ ka̱ra̱?>>
9Reve Musa damma yi, <<Suru ntsu ɗa tsa̱ ka̱ra̱ zagbain na̱ mawun. Tsu ta̱ ka̱ra̱ no olobo ne esheli a̱ tsu suru. Hali no oɓolo e inan i tsu no oɓolo e ikyon i tsu suru, adama a na na̱ tsu 'yuwan tsu ciga tsu yuwaan A̱sulazuva a̱buki.>>
10Reve Firi'awuna damma le, <<Nna̱ hali maa lyawa ɗu na̱ muwun nɗu i ka̱ra̱, she na̱ A̱sulazuva a̱ ri oɓolo na̱ a̱ɗu, adama a na i ta̱ ni ifoɓi yi iwuya. 11Waa yuwan shi! Ali a ɗa goon a̱a̱ ka̱ra̱ a yuwaan A̱sulazuva a̱ga̱nda̱, adama a na ili i na i cigai i ɗa ndolo.>> A̱vu o loso le a̱ ma̱ka̱ka̱n ma Firi'awuna.
12A̱vu A̱sulazuva a damma Musa, <<Buba̱ruwa̱ ukere wa̱ wu a̱ tyo e iɗa ya Masar adama apapari a̱ a̱bunda̱ o uta̱. A̱vu a lyaɓa uba̱ta̱ suru a̱tsuma̱ e iɗa'a, waru a ta tama akapi a̱ ca̱'a̱n na atayan a pasai a̱tsuma̱ e iɗa'a.>>
13Ɗaɗa Musa sapiyi aaɗanga a̱ yi a̱ tyo e iɗa ya Masar, a̱vu A̱sulazuva a̱ ta̱wa̱a̱ nu upepu wa asana e iɗa'a a̱tsuma̱ a ayin nu urana u ndolo suru. Ana usana u tawai, reve wo o'wo upepu wa asana'a u ta̱wa̱a̱ ta̱ ɗe na apapari'i.
14Reve oɓolo apapari a̱ ta̱wa̱ a̱ va̱la̱ uba̱ta̱ suru a̱tsuma̱ e iɗa i Masar. Agba koto a yuwan cu'un va̱ a̱tsuma̱lima̱ a apapari tsundolo shi, waru a̱a̱ da̱shi yuwan cu'un va̱ yi shi. 15A̱ ɓa̱ru ta̱ urewesu wi iɗa'a suru, hali iɗa'a yo o'wo ulima̱. Reve a tama ototopi e iɗa'a na̱ muwun mu ɗanga suru n na atayan a pasai. Ko a̱vu'un o uta̱nu a pasa shi, ko uɗanga ko wunlya wa atsusa, a̱tsuma̱ e iɗa ya Masar suru. 16Reve Firi'awuna jika̱ u ɗe Musa na̱ Haruna a̱vu u damma, <<N yuwaan ta̱ A̱sulazuva A̱sula̱ a̱ ɗu na̱ a̱ɗu unusu. 17Gogo yuwan ankuri vu da̱shi yuwaan mu gafura vu unusu u va̱ u ta̱ goon, reve i pati A̱sulazuva A̱sula̱ a̱ ɗu tsa̱ra̱ u tawaa mu ukwa̱ u nda.>>
18Reve Musa lyawa Firi'awuna, a̱vu u pati A̱sulazuva. 19Reve A̱sulazuva a vadala upepu'u u ka̱mba̱ upepu wa̱ a̱livu wu ucira za na pura̱i apapari'i a̱ tyo a̱tsuma̱ a Mala ma̱ Shili. Ko aapapari a̱ ta̱ a pasa shi a̱tsuma̱ e iɗa ya Masar suru. 20A̱vu A̱sulazuva a zuwaa Firi'awuna aciyogbamu waru, reve u 'yuwan a lyawa aza a Isra'ila a̱ ka̱ra̱.
A̱tsuma̱lima̱ e irumbu
21Reve A̱sulazuva a damma Musa, <<Vu ba̱ruwa̱ ukere wa̱ wu a̱ tyo zuva adama irumbu i cipa̱ a̱tsuma̱ e iɗa ya Masar, irumbu i na aa gura ji'wa̱n.>> 22Reve wu ba̱ruwa̱ ukere wa̱ yi a̱ tyo zuva, a̱vu irumbu pici i ɓa̱ru Masar kpa̱ra̱-kpa̱ra̱ hali rana ta'atsu. 23Ko za gura ene za va̱ yi shi ko za gura lyawa uba̱ta̱ wu nden wa̱ yi shi hali rana ta'atsu. Aza a Isra'ila gba shi a̱ da̱na̱ ta̱ ne ekan uba̱ta̱ u na a̱ da̱na̱i nden suru.
24Reve Firi'awuna ɗe Musa reve u damma, <<Ka̱ra̱i i 'ya̱wa̱ i yuwaan A̱sulazuva a̱ga̱nda̱, waru i ka̱ra̱ fo na̱ muwun n ɗu, amma i lyawa lo oɓolo e inan ni ikyon i ɗu.>>
25Reve Musa damma, <<Vu 'yuwan ciga vu lyawa tsu tara iliyamunga adama a̱ kucci na̱ kucci vu ukula̱tosu, i na tsaa yuwaan A̱sulazuva A̱sula̱ a̱ tsu. 26Waru na̱ tsu 'yuwan tsu ciga tsu ka̱ra̱ ni iliyamunga i tsu, ko ookotsu a ta̱ tsaa lyawa shi, adama a na a̱tsuma̱ e le a ɗa tsaa tara tsu yuwaan A̱sulazuva A̱sula̱ a̱ tsu a̱ga̱nda̱. Waru tsu reve ko na̱ nye i ɗa tsaa yuwaan A̱sulazuva'a a̱ga̱nda̱ shi, she na̱ tsu rawa ɗe.>>
27Agba reve A̱sulazuva a zuwaa Firi'awuna aciyogbamu, reve u 'yuwan a lyawa le a̱ ka̱ra̱. 28Reve Firi'awuna damma yi, <<Vu takatsuwa mu lo, vu ka̱mbuwa̱ ugbozu she vu lyawa vu da̱shi ene urewesu u va̱ wan. O urana u na vu da̱shi enei urewesu u va̱ vu ta̱ kuwa̱.>>
29A̱vu Musa damma, <<Cine vu dammai ɗa, ma̱a̱ da̱shi ene urewesu wa̱ wu shi.>>
Currently Selected:
Mota̱a̱ 10: TSW
Highlight
Share
Copy
Want to have your highlights saved across all your devices? Sign up or sign in
©️2025 Language Development and Translation Initiative (LDTI)
