Mota̱a̱ 4

Iroci yu ucira ya̱ A̱sulazuva

1Reve Musa usu, <<Na̱ a̱ usu ko a zuwa atsuvu e ili i na maa damma le gba shi? A̱vu a damma, <A̱sulazuva o roco wu aciya̱yi shi.> >>

2A̱vu A̱sulazuva e ece yi, <<Nye i ɗa gba vu ri na̱ a̱yi o ukere?>>

Reve u usu, <<Aaɗanga.>>

3Reve A̱sulazuva a damma yi, <<Vari yi e iɗa.>> A̱vu u vari yi e iɗa, ɗaɗa wo o'woi yo! Ɗaɗa u takatsuwai. 4Reve u damma yi, <<Canana ukere wa̱ wu vu reme yi a wizan.>> Ɗaɗa Musa cananai ukere wa̱ yi a̱vu u reme yi, a̱vu wo o'wiso aaɗanga o ukere wa̱ yi. 5Reve A̱sulazuva a damma, <<Yuwan ne, tsa̱ra̱ a̱ usu A̱sulazuva A̱sula̱ a nkaya n le, A̱sula̱ a Ibrahim na̱ A̱sula̱ a Ishiyaku na̱ A̱sula̱ a Yakubu o roco ta̱ aciya̱yi ya̱'a̱ wu.>>

6A̱vu u yuwisaan yi adanshi a na, <<Zuwa ukere wa̱ wu a wupayan wa̱ wu.>> Reve u yuwan ne. Ana wu uta̱yi ukere wa̱ yi'i, a̱vu wo o'wo nu ukutu u'uri puwu.

7Reve u dammisa, <<Zuwisa ukere wa̱ wu a wupa'an.>> A̱vu u yuwan ne. Ana wu uta̱a̱ niyi, a̱vu wo o'wo gbaga, cine akapi a̱ lipu va̱ yi ri.

8Reve A̱sulazuva a damma, <<Na̱ a̱ usu wu shi ko ili ya asalama yu ufaru i na e enei shi, a̱yi za va gogo ta zuwa le a̱ usu. 9Agba na̱ a̱ usu wu adama e ili ya asalama i re i na e enei shi, ko a zuwaa wu atsuvu shi, vu kene mini o Uɗolu wa̱ Nilu, a̱vu vo oco yi e iɗa yu u'yewu. Mini'i u to o'wo mpasa nu u ju'wa̱n iɗa.>>

10A̱vu Musa usu yi, <<A̱sulazuva, a̱mu ɗa nda n tsu gura adanshi shi, ko ɗe ko diga a mantsa ma na vu yuwaan numu adanshi aagbashi a̱ wu. Ben ɗa n tsu yuwan adanshi, u tsu jima ta̱ kafu n reve ili i na maa damma.>>

11Reve A̱sulazuva a damma yi, <<Zane ɗa yuwain una̱ u vuma? Zane ɗa yuwain aagulani ko agbawi, ko ozo o ro a̱ kuɗa̱ yuwan adanshi? Zane ɗa tsu ca yeni, ko a̱ kuɗa̱ ene? A̱mu A̱sulazuva, a̱mu ɗa shi? 12Gogo 'ya̱wa̱ vu yuwan ili i na n damma nuwu. N ta kamba wu vu yuwan adanshi mejege, waru n to roco wu ili i na vaa damma.>>

13A̱vu u damma, <<A̱sulazuva, yuwan ankuri vu lyungu za ro.>>

14A̱vu A̱sulazuva a yuwan upan na̱ Musa. Reve u damma, <<Zakpara va̱ wu gba Haruna Levi u gura ta̱ adanshi. U ta̱ lo a̱ ta̱wa̱ u ga'an na̱ a̱vu, u ta yuwan ma̱za̱nga̱ na̱ we ene wu. 15Vu yuwaan Haruna adanshi, a̱vu vu roco yi ili i na waa damma. N ta kamba ɗu ra a̱tsuma̱ a adanshi, waru n to roco ɗu ili i na yaa yuwan. 16Haruna ɗa a̱ da̱na̱ za va adanshi o una̱ wa̱ wu a̱ tyo a ama, reve vu da̱na̱ tsa̱ A̱sula̱ e ekere a̱ yi, a dansaa yi ili i na waa damma. 17Vu guza̱ aaɗanga a nda o ukere wa̱ wu adama vu yuwan ili ya asalama na̱ a̱yi.>>

Musa ka̱mba̱ ta̱ e iɗa ya Masar

18Reve Musa ka̱mba̱ o u'wa u 'ya̱wa̱ u damma a̱sha̱wa̱le Jeturo, <<Yuwan ankuri lyawa mu n ka̱ra̱ a̱ ka̱mba̱ uba̱ta̱ wa̱ a̱za̱ a̱ va̱ a̱tsuma̱ e iɗa ya Masar, tsa̱ra̱ n reve ko a buwa ta̱ wuma.>>

Reve Jeturo damma Musa, <<Vu ka̱ra̱ na asuvu nden.>>

19A̱sulazuva a yuwan ta̱ ɗe adanshi na̱ Musa e iɗa ya Midiya a na, <<Vu ka̱mba̱ e iɗa ya Masar, adama a na a aza a na a cigai o una wu suru a̱ kuwa̱ ta̱ ɗe.>> 20Reve gba Musa tara ka va̱ yi na̱ muwun mo olobo ma̱ yi, a̱vu u zuwa le o mololi, reve u reme ure wa̱ yi a̱ tyo e iɗa ya Masar. Reve u guza̱ aaɗanga a na A̱sula̱ a damma niyi u guza̱ o ukere wa̱ yi.

21Reve A̱sulazuva a dammisa Musa, <<Na̱ vu ka̱mba̱ a̱tsuma̱ a Masar, vu reve vu yuwan ta̱ linga va asalama na n ca nuwu ucira vu yuwan suru a̱ ma̱ka̱ka̱n ma Firi'awuna. Agba n ta zuwaa yi aciyogbamu, adama u lyawa ama'a a̱ ka̱ra̱ wan. 22Reve a̱vu gba vu damma yi, apa ili i na A̱sulazuva a dammai, <Isra'ila mawun mo ufaru mo ulobo ma̱ va̱ ma ɗa.> 23N damma wu ta̱ vu lyawa mawun ma̱ va̱ ma̱ ka̱ra̱, tsa̱ra̱ u 'ya̱wa̱ u yuwaan mu a̱ga̱nda̱, agba na̱ vu 'yuwan a lyawa yi u ka̱ra̱, n to una mawun mo ulobo mo ufaru ma̱ wu.>>

24A̱tsuma̱ a mmalu uba̱ta̱ u na Musa cu'wain a asa, reve A̱sulazuva a cina yi, a̱vu u shi u ciga wu una yi. 25Amma a̱vu Zipora ka va̱ yi tara aaɓaci a aatali reve u paɗa mawun ma̱ yi uryumbu, reve u ju'wa̱in ana a Musa na̱ a̱yi a̱vu u damma, <<Ili i ro yi lo shi, na̱ mpasa nda a̱vu ɗa vali va̱.>> 26Reve gba A̱sulazuva a lyawa yi. Reve ka'a u damma, <<Vali vu kasa'avu vu mpasa adama a mapaɗa mo uryumbu.>> 27A̱sulazuva a damma ta̱ ɗe Haruna, <<'Ya̱wa̱ a̱tsumona, tsa̱ra̱ vu cina ɗe Musa.>> Reve u ka̱ra̱ a̱ 'ya̱wa̱ a masasan ma̱ A̱sula̱. Ana u rawai, a̱vu u cina Musa ɗaɗa u katala niyi. 28Reve Musa damma yi ili i na A̱sulazuva a damma niyi suru, aza a na u lyungu niyi u damma. Waru u damma yi ta̱ ili ya asalama i na A̱sulazuva a damma niyi u yuwan suru.

29A̱vu Musa na̱ Haruna a̱ ka̱ra̱, reve o ɓoloto azagbagbain a Isra'ila suru. 30Reve Haruna damma le ili i na A̱sulazuva a dammai Musa suru. A̱vu Musa yuwan ili ya asalama'a a̱ ma̱ka̱ka̱n me le. 31Ana ama a Isra'ila e enei, reve a̱ usu. Ana a uwwai A̱sulazuva a̱ ta̱ a ɗa e le, waru we ene ta̱ a̱tsuma̱lima̱ e le, a̱vu a̱ kingyo a yuwaan yi a̱ga̱nda̱.

Currently Selected:

Mota̱a̱ 4: TSW

Highlight

Copy