Mota̱a̱ 5

Musa na̱ Haruna yuwain adanshi na̱ Firi'awuna

1Ana a yuwain ne, a̱vu Musa na̱ Haruna a̱ ka̱ra̱ a̱ tyo ya Firi'awuna. Reve a damma yi, <<Apa ili i na A̱sulazuva A̱sula̱ a Isra'ila a dammai, <Vu lyawa ama a̱ va̱ a̱ ka̱ra̱, adama a yuwaan mu a̱buki a̱tsumona.> >>

2A̱vu Firi'awuna damma, <<Zane ɗa gba A̱sulazuva a nda hali na maa yuwan yi ntoniloi, na maa lyawa aza a Isra'ila a̱ ka̱ra̱? N reve A̱sulazuva'a shi, waru maa lyawa le a̱ ka̱ra̱ shi.>>

3Reve Musa na̱ Haruna a̱ usu yi, <<A̱sula̱ a Mmaci ma Ibrahim a ga'an ta̱ na̱ a̱tsu. Vu yuwan ankuri vu lyawa tsu tsu yuwan mmalu mu rana ta'atsu a̱ 'ya̱wa̱ a̱tsumona adama tsu yuwaan A̱sulazuva A̱sula̱ a̱ tsu kucci. Adama a na na̱ tsu ka̱ra̱ shi u ta lapa tsu na̱ mɓa̱la̱ mu uwuyanu ko na̱ matsun me pe'eni.>>

4Reve mogono'o ma damma Musa na̱ Haruna, <<Adama a̱ nye yaa putsusaa ama'a na̱ mayan ma linga le? Ka̱mba̱i o una̱ wu ulinga u ɗu.>> 5A̱vu Firi'awuna damma, <<Ama a nda a bala ta̱. A̱vu gogo i ciga i putsa le a yuwan ulinga u le.>>

6A̱tsuma̱ o urana u ndolo reve Firi'awuna damma azagbain o ulinga na aza a na a̱ ka̱lyuwusa̱ ulinga a na, 7<<I da̱shi ca ama a nda tsu'yuwa̱ tsa̱ ma̱zuɗa̱ me iponu cine i tsu yuwusan wan. I zuwa le a̱ 'ya̱wa̱ a zami tsu'yuwa̱'a̱ na aciyele. 8Agba i zuwa le a̱ zuɗa̱ a̱bunda̱ e iponu i na a̱ tsu zuɗa̱, she i jebe ili wan, adama a na a̱ ta̱ nu ukuɗu a̱yi ɗa i zuwai a damatosun mu n lyawa le a̱ ka̱ra̱ a̱ 'ya̱wa̱ a yuwaan A̱sula̱ kucci. 9I da̱shi zuwa le ulinga wu usa̱n lon adama a lyuwa elime nu ulinga a̱ tsura̱ mantsa ma na o poloo epen atsuvu wan.>>

10A̱vu aza a tsugbai'in oɓolo na aza a na a̱ ka̱lyuwusa̱ ulinga o uta̱ a̱vu a damma ama'a, <<Apa ili i na Firi'awuna dammai, <Ma̱a̱ da̱shi ca ɗu tsu'yuwa̱ shi. 11I 'ya̱wa̱ i zami tsu'yuwa̱ na aciya̱ɗu uba̱ta̱ u na ya̱a̱ tsura̱ le biti, agba aa jibaa ɗu ulinga shi ko ke'en.> >> 12Reve ama'a e bete'we a̱tsuma̱ e iɗa'a e izami ya̱ a̱'yuwa̱ adama a̱ tsu'yuwa̱. 13Reve azagbagbai'in a̱ ka̱ra̱ a gbagbusa a dansa, <<Shitoyin ulinga u na wu ntsayi i yuwan urana suru, tsa mantsa ma na tsu'yuwa̱ tsa̱ shi lo.>> 14Reve a kada azagbain a Isra'ila o uka̱lyuwusa̱ wu ulingaꞌa na a dammi, <<Nye i zuwai yon na ana'an i gura zuɗa̱i iponu ya̱ a̱bunda̱ cine i tsu yuwusan shi?>>

15Reve azagbain a Isra'ila o uka̱lyuwusa̱ wu ulingaꞌa a̱ ta̱wa̱a̱ Firi'awuna na̱ mesun me ele a dansa, <<Adama nye vee le'eshe agbashi a̱ wu tsunda? 16A̱ da̱shi ta̱wa̱a̱ tsu na̱ tsu'yuwa̱ shi, waru a̱vu a damma tsu, <Yuwain iponu!> A faba tsu ta̱ agbashi a̱ wu agba unusu wa ama a̱ wu u ɗa.>>

17A̱vu Firi'awuna gba usu, <<A̱ɗu a̱za̱ o ukuɗu a ɗa, ili i ro yi lo shi a̱ɗu a̱za̱ o ukuɗu a ɗa. A̱yi ɗa i zuwai i ri a dansa, <Lyawa tsu ka̱ra̱ adama tsu 'ya̱wa̱ tsu yuwaan A̱sulazuva kucci.> 18Gogo, i ka̱ra̱ a̱ ka̱mba̱ o una̱ wu ulinga, ko tsu'yuwa̱ a̱a̱ ta̱wa̱a̱ ɗu shi, agba i 'yuwan i ciga i zuɗa̱ iponu ya̱ a̱bunda̱ i na a cigai.>>

19Reve gba azagbain o uka̱lyuwusa̱ wu ulingaꞌa a gura reve a na a uwai a adamma lon ana a damma nle a̱ zuɗa̱ iponu a̱bunda̱ a na a̱ tsu zuɗa̱ usana suru. 20Ana a lyawai Firi'awuna, a̱vu a ga'an na̱ Musa na̱ Haruna, aza a na a̱ da̱na̱i e ipiri i le. 21A̱vu azagbagbai'in a damma Musa na̱ Haruna, <<Lyawa A̱sulazuva e ene ɗu u ge'eto ɗu, adama a na i zuwa tsu ta̱ tso o'wo ili yu ushamu e ekere a Firi'awuna na azagbain a̱ yi. I zuwaa le ta̱ matsun me pe'eni o ukere u le adama o una tsu.>>

Nzuwulai mi iwawi

22Reve Musa vadala uba̱ta̱ wa̱ A̱sulazuva a̱vu u damma, <<A̱sulazuva adama a̱ nye vu ta̱wa̱yi ama na̱ a̱tsuma̱lima̱? Adama a̱ nye vu lyungu numu pa? 23Diga a mantsa ma na n 'ya̱wa̱i ya Firi'awuna n yuwain adanshi o una̱ wa̱ wu, u da̱shi ta̱ zuwa ama a̱ wu a̱tsuma̱lima̱ lon. A̱vu gba vu yuwan ili i ro adama vu wawa ama a̱ wu shi ko ke'en.>>

Currently Selected:

Mota̱a̱ 5: TSW

Highlight

Copy