Mota̱a̱ 3

Musa ene ta̱ molopu a madala

1Urana u ro, Musa guɓusaa ta̱ a̱sha̱wa̱le Jeturo mgbele, za na da̱na̱i ganu va Midiya. Ana u guɓa nle a̱ 'ya̱wa̱ a̱tsumona alanga, reve u rawa Horeb masasan ma̱ A̱sula̱. 2Uba̱ta̱ u ndolo u ɗa malingata ma̱ A̱sulazuva mo roco niyi aciya̱yi e elentsu a akina o utusa̱ e memere mo molopu. Musa ene yi ta̱ a madala, agba a̱yi ɗa nda u kula̱ shi.#3:2 Ili i na Musa enei cu'un vu uɗanga u na u tsu kungwa ɗa shi. 3Ɗaɗa u dammai, <<N ta̱ 'ya̱wa̱ zuzu, me ene ili i nda, ili i na i zuwai molopu'u u kula̱ shi.>>

4Ana A̱sulazuva e ene niyi a rawusa zuzu tsa̱ra̱ we ene molopu'u, reve u ɗe yi pe e memere mo molopu'u, <<Musa! Musa!>>

Reve u usu, <<Apa mu.>>

5Reve u damma yi, <<She vu da̱shi rawa zuzu wan. Foɗo atan a̱ wu, adama a na vu ta̱ mishin uba̱ta̱ wa akiza. 6A̱mu ɗa A̱sula̱ a nkaya ma̱ wu: A̱sula̱ a Ibrahim na̱ A̱sula̱ a Ishiyaku na̱ A̱sula̱ a Yakubu.>> Ana Musa uwwai ne, reve u tawa esu a̱ yi adama o wovon ta̱wa̱ we ene A̱sula̱ wan.

7Reve A̱sulazuva a damma yi, <<Me ene ta̱ cu'un va̱ a̱tsuma̱lima̱ a na ama a̱ va̱ oo sowuso e iɗa ya Masar. Waru mu uwwa ta̱ mesun ma̱ a̱tsuma̱lima̱ a na oo sowuso e ekere a azagbain o ulinga u le. N reve ta̱ na̱ a̱tsuma̱lima̱ e le. 8N cipa̱ ta̱, tsa̱ra̱ n wawa le e ekere a aza a Masar. N to uta̱a̱ le a̱tsuma̱ e iɗa i ndolo a̱ tyo e iɗa i gbain i sa'ani, i na yee yeneshe na̱ maani ni ishiki#3:8 maani ni ishiki Urevu wi idanshi i nda a̱yi ɗa, <<Iɗa i sa'ani i na i ri nu umili lon>>. A̱yi ɗa iɗa ya aza a Ka'ana na aza a Hitiya na aza a Amoriya na aza a Periziya na aza a Hiviya na aza a Jebusiya. 9Mu uwwa ta̱ mesun ma ama a Isra'ila, waru me ene ta̱ cine aza a Masar o ɓongishi le. 10Adama o ndolo, n ta̱ lyungu wu ya Firi'awuna gogo. 'Ya̱wa̱ vu tara ama a̱ va̱ aza a Isra'ila, tsa̱ra̱ vu uta̱a̱ le a̱tsuma̱ a Masar.>>

11Reve u usu, <<A̱mu ɗa zane a na ma̱a̱ 'ya̱wa̱ uba̱ta̱ wa Firi'awuna, reve mu uta̱a̱ aza a Isra'ila e iɗa ya Masar?>>

12Reve A̱sula̱ a damma, <<N ta̱ da̱na̱ oɓolo na̱ a̱vu. Nda to o'wo iroci e ekere a̱ wu a na a̱mu ɗa za na lyungu nuwu. Ne ɗa waru vee reve nna̱ vu uta̱a̱ ama a̱ va̱ e iɗa ya Masar, i ta yuwaan mu a̱ga̱nda̱ a masasan ma nda.>>

13Reve u damma A̱sula̱, <<Nna̱ n 'ya̱wa̱ uba̱ta̱ wa aza a Isra'ila a̱vu n damma le, <A̱sula̱ a nkaya n ɗu a̱ lyungu mu ta̱ ya̱'a̱ ɗu.> Na ama e ece gba, <Cine tsa ɗa aala a̱ yi?> Cine ma̱a̱ usu le?>>

14Reve u damma Musa, <<A̱MU ƊA ZA NA RI CINE N RI. Vu damma le, <A̱MU ƊA u lungu mu ta̱ ya̱'a̱ a̱ ɗu.> >>#3:14 A̱yi danshi Tsuyahuda gashi aala a <<Yaweh.>> A̱yi aala a̱ A̱sula̱ na̱ Tsuyahuda ɗa, na a̱ tsu ɗesu <<A̱sulazuva>> u to rocosu A̱sula̱ o ta̱ lo kucci waru u to oɓolo na ama a̱ yi. A̱yi nda ili i yu ulobonu i ɗa a̱tsuma̱ a Adanshi a̱ A̱sula̱ suru. 15Reve A̱sula̱ damma Musa waru, <<Vu damma aza a Isra'ila, <A̱sulazuva, A̱sula̱ a nkaya n ɗu, A̱sula̱ a Ibrahim na̱ A̱sula̱ a Ishiyaku na̱ A̱sula̱ a Yakubu u lyungu mu ta̱ ya̱'a̱ ɗu!> A̱yi nda a̱yi ɗa woo o'wo aala a̱ va̱ hali hali hali, a na ama o gogo a̱ 'ya̱wa̱ elime ee revee mu.>> 16<<'Ya̱wa̱ vu ɓoloto azagbain a Isra'ila uba̱ta̱ u ta̱, a̱vu vu damma le, <A̱sulazuva, A̱sula̱ a nkaya n ɗu, A̱sula̱ a Ibrahim A̱sula̱ a Ishiyaku, A̱sula̱ a Yakubu u roco mu ta̱ aciya̱yi a dansa, n ka̱lyuwa̱ ɗu ta̱ a̱vu me ene ili i na a yuwusaan ɗu e iɗa ya Masar. 17Waru n yuwan ta̱ nzuwulai n to uta̱a̱ ɗu a̱ a̱tsuma̱lima̱ a Masar a̱ tyo e iɗa ya aza Ka'ana na aza a Hitiya na aza a Amoriya na aza a Periziya na aza a Hiviya na aza a Jebusiya, iɗa i na yee yeneshe na̱ maani ni ishiki.> >> 18<<A ta uwwa adanshi a̱ wu. Reve a̱vu na azagbain a Isra'ila i 'ya̱wa̱ uba̱ta̱ u mogono ma Masar, a̱vu i damma yi, <A̱sulazuva A̱sula̱ a mmaci ma Ibrahim a̱ ta̱wa̱ ta̱ ya̱'a̱ tsu. Lyawa tsu tsu yuwan mmalu mu rana ta'atsu a̱tsumona adama tsu yuwaan A̱sulazuva A̱sula̱ a̱ tsu kucci.> >> 19Amma n reve ta̱ mogono ma Masar maa lyawa ɗu i ka̱ra̱ shi, she nu ukere wu ucira u zuwa yi u lyawa nu ucira. 20Adama o ndolo, n ta̱ ba̱ruwa̱ ukere u va̱ n lapa Masar ni ili ya asalama i na maa yuwan suru e memere me le. Ni ili i ndolo i koto u ta lyawa ɗu i ka̱ra̱. 21<<Agba n ta zuwa i tsura̱ isa'ani e ekere a aza a Masar, adama a mantsa ma na ya̱a̱ ka̱ra̱, i ka̱ra̱ ekere lya̱nga̱ wan. 22Ka suru u ta pati moron ma̱ nden ma̱ yi na̱ ka na ri nden o u'wa wa̱ yi itana i azurufa na aza a zinariya na̱ a̱tugu, i tanu olobo ne esheli a̱ ɗu ele. Ne ɗa ya̱a̱ pura̱ utsuru wa aza a Masar.>>

Currently Selected:

Mota̱a̱ 3: TSW

Highlight

Copy