Mota̱a̱ 37

Akpati a Nzuwulai

1Bezale yuwan ta̱ aakpati'i na̱ ɗanga akashiya. Uga'an wa̱ yi u ta rawa ana uta̱li na akapi, washin wa̱ yi u ta rawa ana ushin na akapi, mishin ma̱ yi u rawa ta̱ ana e re na akapi. 2A̱vu wu sura a̱tsuma̱ na alanga na̱ zinariya can. U ginda̱la̱ ta̱ nge'e'en suru na̱ zinariya. 3U zuɗa̱a̱ ta̱ aakpati'i nkawani n na̱shi n zinariya, reve u zuwa le za ta̱ suru a anana a aakpati'i, na̱ nkawani n re a̱ nge'en n ta̱ ejere waru a̱ nge'en n ro. 4U yuwan ta̱ aɗanga na̱ ɗanga akashiya, reve wu sura le na̱ zinariya. 5A̱vu wo otoloi aɗanga'a a̱ wungu wu nkawani n re a̱ nge'en ma akpati adama o utanusu.

6U yuwan ta̱ ikpa̱ta̱tsu ya akpati'i, za na a̱yi ɗa uba̱ta̱ u na a tsu tara ume wu unusu na̱ zinariya can. Uga'an wa̱ yi u rawa ta̱ udasuwu ana a ta'atsu na̱ mudaɓi kupocindere no ozo o ton, washin wa̱ yi u rawa ta̱ udasuwu ana e re na̱ mudaɓi ushin no ozo o ton. 7U yuwan ta̱ nan kerobobi e re a zinariya na a rumai a̱ nge'en n re mi ikpa̱ta̱tsu'u m matara mo ume mo unusu.#37:7 Vadalasa ro yuwan ta̱ ulinga ni ikpa̱ta̱tsu i matara mo ume mo unusu. 8U yuwan ta̱ kerobi ta̱ upasu u ta̱ za ta̱ waru upasu u na u buwai. U ruma le ta̱ ili i ta̱ e ikpa̱ta̱tsu'u. 9Ele ikerobobi'i a̱ ta̱ a̱ nka̱la̱la̱i, a̱ ka̱lyuwusa̱ ikpa̱ta̱tsu'u, evelu e le waru mishin uvapu e ikpa̱ta̱tsu i matara mo ume mo unusu.

Apada

10U yuwan ta̱ apada'a na̱ ɗanga akashiya, uga'an wa̱ yi u rawa ta̱ ana a ta'atsu, washin wa̱ yi u rawa ta̱ udasuwu anana a̱ ta̱ na akapi, mishin ma̱ yi n rawa ta̱ udasuwu ana e re na akapi. 11U sura yi ta̱ na̱ zinariya can, reve waru wu ginda̱la̱ nge'en ma̱ yi na̱ zinariya a̱ ka̱nda̱ruwa̱. 12Reve u yuwaan apada'a akpata o una̱ntsu washin wu ukere, waru wu kala yi ta̱ na̱ zinariya a̱ ka̱nda̱ruwa̱. 13U zuɗa̱ ta̱ nkawani n na̱shi n zinariya, a̱vu wo oto le o obolu a̱ na̱shi uba̱ta̱ wa ana a̱ na̱shi a̱ yi. 14A zuwa ta̱ nkawani zuzu na akpata'a, aza na e remei aɗanga'a adama o utanusu wa apada'a. 15U yuwan ta̱ aɗanga'a na̱ ɗanga akashiya, adama o utanusu wa apada'a, reve u sura le na̱ zinariya. 16Reve a yuwan itana yu ulinga adama a apada'a na̱ zinariya can. Ataɗa na̱ ntaɗa na̱ munda na̱ ndele, adama a yuwan ulinga ne ele uba̱ta̱ u kucci vi ili yo oso.

Wisawatan u fitila

17U yuwan ta̱ wisawatan u fitila na̱ zinariya can. Aaɗanga ni ikyun na̱ mukkoto n kekeꞌen na u rumai oroci a̱ yipa̱lu na̱ a̱kutsu a̱ yipa̱lu no ototopi a̱ yi ili i ta̱ uɓoluloi. 18Akatsu a̱ ta̱li'i a̱ ba̱ruwa̱ ta̱ o uta̱ a̱ nge'en n wisawatan u fitila'a, aza a ta'atsu e eɓele a nda, aza a ta'atsu waru e eɓele a̱ ndeɗe. 19Mukotto n ta'atsu nu uruma wo oroci a̱ yipa̱lu na̱ a̱a̱kutsu a̱ yipa̱lu yu uɗanga u na a̱ tsu ɗe alumo n da̱na̱ ta̱ a aakatsu a̱ ta̱, mukkoto n ta'atsu waru a aakatsu a na buwai, ne ɗa a yuwayin akatsu a̱ ta̱li a na a ba̱ruwa̱i o uta̱ a wisawatan u fitila'a suru. 20A wisawatan u fitila'a a yuwan ta̱ ɗe mukkoto n na̱shi nu uruma wo oroci a̱ yipa̱lu na̱ a̱kutsu no ototopi o uɗanga u na a̱ tsu ɗe alumo. 21A̱a̱kutsu a̱ ta̱ a̱ da̱na̱ ta̱ za̱la̱ va akatsu e re a na a̱ ri a aaɗanga a wisawatan u fitila'a, a̱a̱kutsu e ire waru za̱la̱ va akatsu e re e ire, a̱a̱kutsu a ta'atsu waru za̱la̱ va za ta'atsu, suru suru a̱ da̱na̱ ta̱ akatsu a̱ ta̱li. 22A̱a̱kutsu'u na akatsu'u na̱ wisawatan u fitila'a a̱ da̱na̱ ta̱ ili i ta̱, a ruma le ta̱ uɓoluloi na̱ zinariya can.

23U yuwan ta̱ ifitila i cindere na̱ mutaɗa na̱ makkana mo ukimususa̱n wa akina u zinariya can. 24U yuwan ta̱ wisawatan u fitila'a ni itana yu ulinga ya̱ yi suru, a yuwan le ta̱ na̱ zinariya can ukunzuwu wu ume mata'atsu no ozo o ton.

Masa'a ma̱ a̱tsuka̱ a̱ ma̱guru

25U yuwan ta̱ masa'a ma̱ a̱tsuka̱ a̱ ma̱guru nu uɗanga u na a̱ tsu ɗe akashiya. Uga'an wa̱ yi u rawa ta̱ udasuwu anana a̱ ta̱ na akapi, washin wa̱ yi u rawa ta̱ udasuwu anana a̱ ta̱ na akapi, washin wa̱ yi nu uga'an wa̱ yi una̱ta̱ u ɗa a̱ ri. Mishin ma̱ yi waru u rawa ta̱ ana uta'atsu. Avana a̱ yi na̱ a̱yi a yuwan le ta̱ ili i ta̱ uɓoluloi.

26U sura ta̱ zuva va̱ yi ne eɓele a̱ yi na avana a̱ yi na̱ zinariya can. Reve u ginda̱la̱ nge'en ma̱ yi na̱ zinariya a̱ ka̱nda̱ruwa̱. 27U yuwan ta̱ nkawani n re n zinariya za̱la̱ vu uginda̱lu'u. U yuwan le ta̱ e eɓele e re a̱ nka̱la̱la̱i adama a̱ guza̱ aɗanga o utanusu wa̱ yi. 28U yuwan ta̱ aɗanga'a nu uɗanga u akashiya reve u sura le na̱ zinariya. 29Waru u yuwan ta̱ mani'in mo utsusun ma akiza na aturare a̱ ma̱guru can, u yuwan le ta̱ cine za mayan ma aturare ma tsu yuwan le.

Currently Selected:

Mota̱a̱ 37: TSW

Highlight

Copy