Mota̱a̱ 36

1<<Bezale na̱ Oholiyabu na aza a na suru A̱sulazuva a cayi uguru nu urevu wu ulinga wu ukere tsa̱ra̱ e reve cine a yuwan cu'un vu ulinga u masuwa ma̱ A̱a̱'isa̱'a̱ suru a ta yuwan ulingaꞌa tsoyi cine a̱yi A̱sulazuva a damma nle.>> 2Reve Musa ɗe Bezale na̱ Oholiyabu na aza a na A̱sulazuva a cayi urevu waru aza a na a zuwai okolo a na a̱a̱ ta̱wa̱ a yuwan ulingaꞌa. 3Reve Musa ca le kucci na ama a Isra'ila a̱ ta̱wa̱yi suru adama a suwaa A̱a̱'isa̱'a̱. A̱vu ama a̱ ka̱ra̱ a̱ ta̱wusa̱ nu une'e wu ucigu wo okolo usana suru. 4Aza a na suru a̱ shi nu uguru nu urevu wu ulinga wu ukere a na a̱ shi a yuwusan ulinga a̱ A̱a̱'isa̱'a̱ a lyawa ta̱ linga le a̱vu a̱ ta̱wa̱, 5reve a damma Musa, <<Ama a̱ ta̱ ta̱wusa̱ nu uneꞌe adama o ulinga u na A̱sulazuva a zuwai hali u la'a ili i na a cigai.>>

6A̱vu Musa zuwa adanshi, a̱vu adanshi'i u rawa uba̱ta̱ u na a̱ va̱la̱i suru, <<She vali ko ka da̱shi ta̱wa̱a̱ ni itana adama a̱ A̱a̱'isa̱'a̱ wan.>> Reve a putsa ama'a a̱ ta̱wusa̱a̱ na̱ kucci. 7Itana i na a̱ ta̱wa̱yi u la'a ta̱ ili i na a cigai hali na oo koto ulingaꞌa.

Oogodo o Uga'asusan

8A̱vu aza a na a gurai ulinga lon a̱tsuma̱ e le, a yuwan Oogodo o Uga'asusan na amuna kupa, aza a na a yuwain no okoro a sa'ani upundu, na̱ a̱punda̱ a na a̱ ri mini ma̱ bulu nu ushili u ma̱ɗiya̱, na̱ mini ma̱ shili san. A amuna'a a̱vu a̱ za̱la̱ ɗe ikerobobi, ulinga wa aza a na a gurai ulinga. 9Amuna'a suru a yuwan le ta̱ una̱ta̱ umuna suru uga'an wa̱ yi u rawa ta̱ ana amunga ne ejere, washin wa̱ yi waru u rawa ta̱ ana a̱ ta̱li. 10Reve o ɓolo amuna o ton uba̱ta̱ u ta̱, ne ɗa waru a yuwain na akapi o ton a na a buwai. 11A̱vu a yuwaan oɓolo o umuna wu ufaru a̱la̱ta̱ na̱ mini ma̱ bulu a̱ nge'en, ne ɗa waru a yuwayin oɓolo e ire'e. 12A̱vu a̱ zula̱a̱ umuna suru nwo'oto kupoton, a̱vu waru a̱ zulisa̱ nwo'oto kupoton a za ve ire na buwai. Nwo'oto a̱ da̱na̱ ta̱ a̱ nka̱la̱la̱i. 13Reve a yuwan wunla̱ta̱ wu zinariya kupoton, reve a̱ nla̱ amuna'a na̱ wunla̱ta̱ adama oogodoꞌo wo o o'wo ili i ta̱. 14A yuwan ta̱ amuna kupa na̱ za ta̱ e eleme e mgbele aza a na o o'wo aapalutsu o oogodoꞌo. 15Amuna kupa na̱ za ta̱'a̱ suru a̱ da̱na̱ ta̱ una̱ta̱ uga'an wu za ta̱ suru ana amunga no ozo o ton, washin u le waru u rawa ta̱ ana a̱ ta̱li. 16Reve o ɓolo amuna o ton uba̱ta̱ u ta̱, amuna a̱ ta̱li a na a buwai waru uba̱ta̱ u ta̱. 17Reve a yuwan a̱la̱ta̱ kupoton o tono ukosu wu nge'en wu umuna wo oɓolo o ufaru, ne ɗa waru a yuwain nu umuna wo oɓolo e ire a na a buwai. 18Reve a yuwan koroto vu rumushili kupoton adama o ɓoluloi oogodoꞌo wo o'wo ili i ta̱. 19Reve a yuwaan oogodoꞌo aapalutsu na̱ kwa̱n va̱ a̱giri'i mini ma̱ shili. Reve waru a yuwan aapalutsu o ro wa alanga na̱ kwan sa'ani. 20A yuwan ta̱ akpata a̱ nge'en adama a aagalaci o oogodoꞌo mishin na akpata a ɗanga akashiya. 21Aakpata a̱ nge'en suru uga'an wa̱ yi u rawa ta̱ ana gendu, washin wa̱ yi waru u rawa ta̱ ana e re na akapi o uɓatsulai. 22Aakpata a̱ nge'en suru a yuwan yi ta̱ na akatsu e re adama o moɓolo. Tsundolo tsa ɗa a yuwain akpata a̱ nge'en mo oogodoꞌo suru. 23A yuwan ta̱ akpata a̱ nge'en ushin mo uyagi a aagalaci o oogodoꞌo. 24Reve a yuwan nda̱na̱ta̱ amunga n azurufa nda̱na̱ta̱ ma akpata'a, aakpata a̱ nge'en suru na̱ nda̱na̱ta̱ n re akatsu a̱ ta̱ a̱ wungu wu nda̱na̱ta̱'a̱. 25Reve a yuwaan upasu u na u buwai upasu wu ugana wa aagalaci o oogodoꞌo akpata a̱ nge'en ushin, 26na̱ nda̱na̱ta̱ n azurufa amunga, ejere za̱la̱ va aakpata a̱ nge'en a̱ ta̱ suru. 27Reve waru a yuwan akpata a̱ nge'en a̱ ta̱li adama o ucina̱ wa aagalaci o oogodo we eɓele a̱ a̱livu. 28Reve a yuwan akpata a̱ nge'en e re adama o obolu o oogodoꞌo o ucina̱. 29Akpata a̱ nge'en e re o obolu'u o ɓolo le diga e ikyun hali a̱ tyo zuva reve o oto le a makawani ma̱ ta̱, tsundolo tsa ɗa a yuwan nle ra. 30Tsundolo tsa ɗa a yuwain akpata a̱ nge'en kunla̱ na̱ nda̱na̱ta̱ n le n azurufa kupa na̱ a̱za̱ a̱ ta̱li, akpata a̱ nge'en suru a yuwaan yi ta̱ nkyun ejere re. 31Reve a yuwan aɗanga na̱ ɗanga akashiya, aɗanga o ton adama a akpata a̱ nge'en n ta̱ ma aagalaci o oogodoꞌo, 32ozo o ton o ro adama akpata a̱ nge'en o ro. Reve a yuwan aɗanga o ton adama a akpata a̱ nge'en ma alanga ma̱ a̱livu. 33Reve a yuwan aaɗanga a na o utula̱i e memere diga a̱ nge'en n ndeɗe a̱ tyo a̱ nge'en n ro. 34Reve a sura akpata a̱ nge'e'en na̱ zinariya, reve waru o foɓoo le nkawani n zinariya n na ma̱a̱ guza̱ aaɗanga'a. Reve waru a sura aɗanga'a na̱ zinariya. 35Waru a yuwan ta̱ umuna na̱ a̱punda̱ a̱ mini ma̱ bulu, nu ushili u ma̱ɗiya̱, na̱ mini ma̱ shili san, na̱ a̱punda̱ o okoro a sa'ani o uɗavu. A̱vu a yuwaan le ulinga wi ikerobobi, ulinga wu za na gurai. 36Reve a yuwaan yi aɗanga a̱ na̱shi wu uɗanga akashiya a̱vu a sura le na̱ zinariya. Reve a yuwaan le nkoroto n zinariya, a̱vu a̱ zuɗa̱a̱ le nda̱na̱ta̱ n na̱shi n azurufa. 37A̱vu waru a yuwan umuna wu una̱ntsu adama o u'uwata uba̱ta̱ wo oogodo u mini ma̱ bulu, nu ushili u ma̱ɗiya̱, na̱ mini ma̱ shili san, na̱ a̱punda̱ o okoro a sa'ani o uɗavu. Reve a yuwaan umuna'a ulinga wu ukere. 38Reve waru a yuwan a̱shuwutsu o ton na̱ nkoroto n le. Reve a sura aci e le na̱ zinariya, waru wunla̱ta̱ u le aza a zinariya a ɗa. Agba nda̱na̱ta̱ n ton le a̱za̱ a̱ rumushili ɗa.

Currently Selected:

Mota̱a̱ 36: TSW

Highlight

Copy