Mota̱a̱ 38

Masa'a ma̱ kucci vu ukula̱tosu

1U yuwan ta̱ masa'a ma̱ kucci vu ukula̱tosu na̱ ɗanga akashiya, uga'an wa̱ yi u rawa ta̱ udasuwu ana e cindere na akapi, washin wa̱ yi waru u rawa ta̱ udasuwu ana e cindere na akapi, mishin ma̱ yi n rawa ta̱ udasuwu ana a̱ na̱shi na akapi. Washin nu uga'an u masa'a'a una̱ta̱ u ɗa a̱ da̱na̱i. 2U yuwan ta̱ avana o obolu mu pasu na̱shi'i suru, avana'a na̱ masa'a'a ili i ta̱ i ɗa uɓoluloi reve a sura masa'a'a na̱ rumushili. 3Reve u yuwan itana i masa'a'a suru, na̱ pondo ni isheburu na ataɗa, ni ikune ya akatsu, na ayimba a̱ ma̱pura̱ ma akinkina. Itana'a suru u yuwan le ta̱ na̱ rumushili. 4U yuwaan ta̱ masa'a'a uzatsuwata wu rumushili, reve waru a zuwa rumushili'i e memere ma masa'a. 5Reve a̱ zuɗa̱ nkawani n na̱shi mu rumushili o obolu a̱ na̱shi o uzatsuwata wu rumushili'i adama e reme aɗanga'a. 6Reve a yuwan aɗanga na̱ ɗanga akashiya reve a sura le na̱ rumushili. 7Reve wo oto aɗanga'a a nkawani adama a̱ da̱na̱ a̱ nge'en m masa'a'a adama o utanusu. A yuwan yi ta̱ no oko'un na akpata a washin.

Aasa'atsu adama a masa'a

8A̱vu u yuwan aasa'atsu a̱ rumushili oɓolo na̱ wisawatan wu rumushili u ma̱suka̱ci wa̱ a̱ma̱ci a na a yuwusan ulinga o una̱ntsu wo Oogodo o Uga'asusan.

Agalaci o Oogodo

9Reve waru u yuwaan ukowo amuna no okoro a sa'ani o uɗavu o upasu wu uyagi, uga'an wu umuna'a u da̱na̱ ta̱ udasuwu ana ukpaku na̱ kupoton (150). 10Atsura ushin na̱ nda̱na̱ta̱ ushi'in a yuwan le ta̱ na̱ rumushili, agba nkoroto ma atsura'a na̱ wunla̱ta̱ u le aza a azurufa a ɗa. 11Upasu wu ugana waru u da̱na̱ ta̱ nu umuna uga'an wa̱ yi udasuwu ana ukpaku na̱ kupoton (150), atsura e le na̱ nda̱na̱ta̱ n le ushin a̱za̱ a̱ rumushili a ɗa. Agba nkoroto ma atsura'a na̱ wunla̱ta̱ u le aza a azurufa a ɗa.

12Upasu wu nge'en ma̱ a̱livu wu ukowo'o, a yuwaan yi ta̱ umuna wu uga'an udasuwu ana kupocindere no ozo o ton, atsura kupa a̱ yi na̱ nda̱na̱ta̱ kupa n le na̱ nkoroto ma atsura'a na̱ wunla̱ta̱ n le aza a azurufa a ɗa. 13Waru upasu wa asana elime, washin wa̱ yi u da̱na̱ ta̱ ana kupocindere no ozo o ton. 14Umuna wu upasu u ta̱ wu una̱ntsu'u, uga'an wa̱ yi u rawa ta̱ ana ushin ne ejere na akapi, na atsura a ta'atsu na̱ nda̱na̱ta̱ n ta'atsu.

15Ne ɗa a yuwain na akapi o upasu u ndeɗe. A pasu vu una̱ntsu vu ukowo'o suru u da̱na̱ ta̱ nu umuna wu uga'an udasuwu ana ushin ne ejere na akapi, na atsura a ta'atsu na̱ nda̱na̱ta̱ n ta'atsu. 16Amuna o ukowo u na a yuwain suru, a yuwan le ta̱ na̱ a̱punda̱ o okoro a sa'ani. 17Reve a yuwan nda̱na̱ta̱ n le na̱ rumushili, agba nkoroto na̱ wunla̱ta̱ u le a yuwan le ta̱ na̱ azurufa. Reve a sura aci a atsura'a na̱ azurufa. Atsura'a a na a̱ ka̱nda̱ruwa̱i ukowo'o a yuwaan le ta̱ wunla̱ta̱ u azurufa.

18A yuwaan ta̱ una̱ntsu u ma'uwa a̱tsuma̱ a agalaci'i umuna wu uga'an udasuwu ana mata'atsu nu ulinga wu ukere u mini ma̱ bulu nu ushili u ma̱ɗiya̱, nu ushili u san na̱ a̱punda̱ okoro a sa'ani upundu. Mishin ma̱ yi udasuwu ana ucindere na akapi, una̱ta̱ nu umuna wu ukowo'o. 19Atsura a̱ yi waru a̱za̱ a̱ na̱shi a ɗa. Nda̱na̱ta̱ n na̱shi ma̱ yi mu rumushili n ɗa, nkoroto ma̱ yi waru na̱ wunla̱ta̱ wa̱ yi aza a azurufa a ɗa. A̱vu a sura aci e le na̱ azurufa. 20Irumu i na a̱ shuwa̱yi Oogodo a agalaci'i nu ukowo suru a̱za̱ a̱ rumushili a ɗa.

Itana i na a yuwayin ulinga wo Oogodo wa agalaci

21Apa a̱bunda̱ e itana i na a yuwayin ulinga wo Oogodo a agalaci'i, Oogodo e ili yi Nzuwulai, aza a na a̱ ri uɗanu cine Musa dammai, ulinga u nan Levi aza a na a̱ da̱na̱i za̱la̱ tsugbain tsa Itama ulobo wa Haruna ganu'u. 22Bezale ulobo wa̱ Uri, ulobo wa̱ Huru, a̱tsuma̱ o ugundo wa Yahuza, u yuwan ta̱ ili i na A̱sulazuva a dammai Musa suru. 23Oholiyabu ulobo wa Ahisamaka, a̱tsuma̱ o ugundo wa Dan, a̱yi vuma ɗa na gurai ulinga wu ukere a̱bunda̱ lon na̱ vuma na tsu she'en atali, ni iɗana i sa'ani i na a ɗavai ne ekere na ri na̱ mini ma̱ bulu nu ushili u ma̱ɗiya̱ na̱ mini ma̱ shili san na̱ a̱punda̱ o okoro a sa'ani o uɗavu. 24A̱bunda̱ a zinariya na a̱ ushiyi vu kucci vu u'ya̱susa̱n na a yuwain ulinga wa̱ A̱a̱'isa'a̱ suru u rawa ta̱ ukunzuwu ukpakukucci na̱ kupakucci na̱ a̱za̱ e cindere (997) u makundatsu ma̱ a̱a̱'isa̱.

25Azurufa na a̱ ushiyi a̱tsuma̱ a ama na e kecei u rawa ta̱ ukunzuwu ukpakukupa uta'atsu nu ukpakuna̱shi na̱ mata'atsu (3,430) u makundatsu ma na a yuwain ulinga na̱ a̱yi a̱ a̱a̱'isa̱'a̱. 26Vuma na e kecei suru, za na a'wan a̱ yi a rawai ushin a̱ tyo zuva, u ca ta̱ akapi a makundatsu ma na a yuwusan ulinga na̱ a̱yi a̱ a̱a̱'isa̱. Ama'a a ta rawa ama ukpakukupa ukpaku uta̱li nu ukpakukupa uta'atsu nu ukpakuton na̱ kupoton (603,550). 27A̱tsuma̱ a azurufa'a a yuwan ta̱ ulinga nu ukunzuwu ukpakukupa uta'atsu nu ukpakuna̱shi, (3,400) a yuwaan ta̱ nda̱na̱ta̱ ma̱ A̱a̱'isa̱'a̱ ukpaku (100) na̱ nda̱na̱ta̱ mu umuna'a. A yuwan ta̱ ulinga nu ukunzuwu mata'atsu na̱ a̱za̱ a̱ na̱shi a yuwaan nda̱na̱ta̱ n ta̱ suru. 28Ukunzuwu mata'atsu u azurufa u na u buwai suru, ɗaɗa Bezale yuwain nkoroto ma atsura'a na aa sura aci e le a̱vu u yuwaan le wunla̱ta̱. 29Rumushili na a cayi kucci'i, u rawa ta̱ ukunzuwu ukpakukupa ure nu ukpakuna̱shi nu ushin no ozo o ton (2,425). 30A yuwan ta̱ ne ele nda̱na̱ta̱ mu una̱ntsu wu u'uwata wo Oogodo o Uga'asusan, na̱ masa'a mo ukula̱tosu wa̱ a̱tsuka̱ wu rumushili oɓolo nu uzatsuwata wu rumushili wa̱ yi, oɓolo ni itana yu ulinga u masa'a'a, 31na̱ da̱na̱ta̱ a̱ ka̱nda̱ruwa̱ ukowo'o, oɓolo na̱ nda̱na̱ta̱ mu ununa̱ntsu u ma'uwaa o ukowo'o, ni irumu i na a̱a̱ shuwa̱ oogodoꞌo oɓolo ni irumu i na a̱a̱ shuwa̱ a̱ ka̱nda̱ruwa̱ ukowo'o.

Currently Selected:

Mota̱a̱ 38: TSW

Highlight

Copy