Mota̱a̱ 33

1Reve A̱sulazuva a damma Musa, <<Lyawa uba̱ta̱ u nda a̱vu na ama a na vu uta̱yi a gawan diga e iɗa ya Masar, reve i ka̱ra̱ a gawan a̱ tyo e iɗa i na n yuwayin Ibrahim akucunu na̱ Ishiyaku na̱ Yakubu a na, <Ugundo wa̱ wu u ɗa maa ca iɗa i nda.> 2N ta̱ lyungu malingata ma̱ A̱sula̱ elime a̱ ɗu, reve n lo aza a Ka'ana na aza a Amoriya oɓolo na aza a Hitiya, na aza a Periziya na aza a Hiviya na aza a Jebusiya. 3I ka̱ra̱ a gawan a̱ tyo e iɗa i na yee yeneshe maani ni ishiki. Amma a̱mu gba ma̱a̱ 'ya̱wa̱ oɓolo na̱ a̱ɗu shi, adama a na a̱ɗu ama a aciyogbamu a ɗa, ta̱wa̱ n kototo ɗu o ure wan.>>

4Ana ama a uwwai alabari a vama o ndolo, ɗaɗa a yuwain a̱tsumola̱ngu, waru babu vuma na otoi itana i sa'ani. 5Adama a na A̱sulazuva a damma ta̱ ɗe Musa, <<Damma ama a Isra'ila, <A̱ɗu ama a na a̱ ri na aciyogbamu a ɗa. Na̱ maa yuwan mmalu na̱ a̱ɗu ko wa'a ɗa, n to kototo ɗu babu usa̱n. Adama o ndolo, gogo yi foɗo itana i tsulolobo tsa̱ ɗu, a̱vu n reve ili i na maa yuwan na̱ a̱ɗu.> >> 6Ɗaɗa aza a Isra'ila o foɗoi itana i tsulolobo i le ɗe a Masasan ma Horeb a̱ da̱shi oto le shi.

Oogodo o Uga'asusan

7Musa shi ta̱ tsu tara oogodoꞌo reve u shuwa̱ yi a alanga o uva̱la̱ta̱ akasu, reve u ɗe yi Oogodo o Uga'asusan. Za na suru cigai u reve ili i na A̱sulazuva a cigai, u ta̱ 'ya̱wa̱ uba̱ta̱ wo Oogodo o Uga'asusan za na ri a alanga o uva̱la̱ta̱'a̱. 8Mantsa ma na Musa 'ya̱wa̱i o Oogodoꞌo suru, ama suru a̱ tsu 'yon ta̱ mishin lo o u'uwata wo ogodo e le, a̱ a̱ka̱nla̱ a Musa hali mantsa ma na u uwai pe o Oogodoꞌo. 9Mantsa ma na Musa uwai o Oogodoꞌo, oɓolo e eleshe a̱ tsu cipa̱ ta̱ wi isawan o una̱ntsu wo Oogodoꞌo, a̱vu A̱sulazuva e reme a yuwusan adanshi na̱ Musa. 10Mantsa ma na suru ama e enei oɓolo e eleshe'e u cipa̱ wi isawain o una̱ntsu'u, a̱vu ama'a suru a̱ ka̱ɗa̱to a yuwan a̱ga̱nda̱, za suru o una̱ntsu wo oogodo a̱ yi. 11Tsundolo tsa ɗa A̱sulazuva a tsu yuwan adanshi na̱ Musa esu esu, cine vuma tsu yuwan adanshi ni i'utsa̱ ya̱ yi. A̱vu Musa ka̱mba̱ a̱tsuma̱ o Oogodoꞌo, amma Josuwa ulobo kambi va̱ yi ulobo wa̱ Nun tsu uta̱ o oogodoꞌo shi.

Musa na̱ tsugbain tsa̱ A̱sulazuva

12Musa damma ta̱ A̱sulazuva, <<Vu ta dansaa mu, <Rono ama a nda aɗanga,> amma koto vu damma mu vuma na va̱a̱ lyungu oɓolo na̱ a̱mu shi. Vu damma mu ta̱, <N reve wu ta̱ urevu waru vu tsura̱ ta̱ isa'ani e ekere a̱ va̱.> 13Adama o ndolo na̱ vu yuwan ma̱za̱nga̱ na̱ a̱mu, roco mu re va̱ wu adama n tsura̱ isa'ani ya̱ wu. Vu cuwan iɗa i nda ama a̱ wu a ɗa.>>

14A̱vu A̱sulazuva a̱ usu, <<A̱mu aciya̱va̱ n ta̱ 'ya̱wa̱ oɓolo na̱ a̱vu, waru n ta ca wu wivuwun.>>

15Reve Musa damma yi, <<Na̱ a̱vu aciya̱wu va̱a̱ 'ya̱wa̱ oɓolo na̱ a̱tsu shi, she vu 'ya̱sa̱n tsu diga pa uba̱ta̱ u nda wan. 16Cine tsa ɗa ee reve a̱mu na ama a̱ wu tsu tsura̱ ta̱ isa'ani e ekere a̱ wu, na̱ vu 'ya̱wa̱ oɓolo na̱ tsu shi? Ili i ne i ɗa gba yaa kasa a̱mu na ama a̱ wu na akapi a ama a na a̱ ri o uvaɗi?>>

17Reve A̱sulazuva a̱ usu Musa, <<N ta yuwan cine vu patiyi'i, adama a na vu tsura̱ ta̱ isa'ani e ekere a̱ va̱, waru n reve wu ta̱ urevu.>>

18Reve Musa usu, <<Yuwan ankuri, vu roco mu ekan a tsugbain tsa̱ wu.>>

19Reve A̱sulazuva a̱ usu, <<N ta zuwa isa'ani i va̱ i ka̱ra̱ a̱ ma̱ka̱ka̱n ma̱ wu, waru n ta yuwan adanshi a ala a̱ va̱ <A̱sulazuva> a̱ ma̱ka̱ka̱n ma̱ wu, n to roco za na n ɗangwai biti isa'ani, waru n te ene iliyali yi za na n ɗangwai me ene.>> 20Reve u damma, <<Vaa gura ene urewesu u va̱ shi, adama a na babu vuma na ee ene mu reve u da̱na̱ wuma.>>

21Reve A̱sulazuva a damma, <<Uba̱ta̱ u ɗa nda zuzu na̱ a̱mu u na vee isawan a aatali. 22Mantsa ma na tsugbain tsa̱ va̱ tsa̱a̱ ka̱ra̱ a̱ ma̱ka̱ka̱n ma̱ wu, n ta zuwa wu a mpakatalai ma aatali waru n ta pala wu nu ukere u va̱ she mantsa ma na n ka̱ra̱i. 23Reve n tawa ukere u va̱, reve ve ene ucina̱ u va̱, amma babu za na ee ene urewesu u va̱.>>

Currently Selected:

Mota̱a̱ 33: TSW

Highlight

Copy