Mota̱a̱ 32

A̱a̱ma̱li a̱ ma̱dindim ma zinariya

1Ana ama e enei Musa jimai ɗe a masasan u ka̱mba̱i shi, reve ama o ɓoloto uba̱ta̱ wa Haruna, a̱vu a damma yi, <<Yuwaan tsu musula̱ n na maa walaa tsu elime, adama a na tsu reve ili i na i yuwain Musa za na uta̱a̱ ntsu a̱tsuma̱ a Masar shi.>>

2A̱vu Haruna damma le, <<Foɗoo numu nkawani n zinariya ma atsuvu n na a̱ma̱ci a̱ ɗu no olobo a̱ ɗu ne esheli a̱ ɗu oo otosu.>> 3Reve ama'a suru o fufoɗo nkawani n zinariya ma atsuvu e le, reve a̱ ta̱wa̱a̱ Haruna. 4Reve u ushi nkawani'i e ekere e le a̱vu wu jeruweto le, a̱vu u zuɗa̱ a̱a̱ma̱li oroci a̱ ma̱dindim. Reve ama'a a damma, <<Nda ma̱sula̱ ma̱ ɗu, Isra'ila, ma na mo uta̱a̱ nɗu diga a̱tsuma̱ e iɗa ya Masar!>>

5Ana Haruna enei ne, reve u suwa masa'a a̱ ma̱ka̱ka̱n ma̱ ma̱dindim'm, reve u saala, <<Nfa'an u to o'wo urana u na tsaa yuwaan A̱sulazuva a̱buki.>> 6Ana usana u tawai, nu usana-usana, reve a̱ ta̱wa̱a̱ na̱ kucci vu ukula̱tosu, na̱ kucci muwwulai waru. Ana o kotoi, reve ama'a a yuwan mere reve a yuwan a̱buki a vanvama nu uje'en.

7Reve A̱sulazuva a damma Musa, <<Jika̱ vu cipa̱ a masasan! Ama a̱ wu a na vu uta̱yi e iɗa ya Masar a̱ lungusa̱ ta̱ aciyele. 8A lyawashi ta̱ itoni yu ure u na n damma nle, a yuwaan ta̱ aciyele a̱a̱ma̱li oroci a̱ ma̱dindim. A̱ ka̱ɗa̱towa̱ yi ta̱, reve a ca kucci na a dammi, <Apa nda ma̱sula̱ ma na mo uta̱a̱ nɗu a̱tsuma̱ a Masar.> >>

9Reve A̱sulazuva a damma Musa, <<N ka̱lyuwa̱ ta̱ ama a nda, waru ele ɗa nda a̱ ta̱ na aciyogbamu. 10Gogo nda, she vu geshe mu wan adama a na upan u va̱ u puna̱ a aci e le adama n kototo le. A̱vu n yuwan iɗa i gbain i ro na̱ a̱vu.>>

11Agba a̱vu Musa pati A̱sulazuva A̱sula̱ a̱ yi u damma, <<A̱sulazuva, adama a̱ nye upan wa̱ wu wa̱a̱ puna̱ a aci a ama a̱ wu, aza a na vu uta̱yi diga e iɗa ya Masar nu ucira lon nu ukere wu ucira? 12Adama a̱ nye aza a Masar aa damma, <Ni ifoɓi yi iwuya i ɗa wu uta̱a̱ nle, adama wu una le a nsasan u tasa le a̱tsuma̱ o uvaɗi?> Vu vadala o usuɗuwu wu upan wa̱ wu, lyawa she vu ta̱wa̱a̱ ama a̱ wu ni iwuya i nda wan. 13Cuwan na̱ Ibrahim na̱ Ishiyaku na̱ Isra'ila#32:13 Isra'ila aala o ro a ɗa a Yakubu aza a na vu yuwayin akucunu na aciya̱wu vu damma nle, <N ta zuwa ugundo u ɗu u yuwan a̱bunda̱ tsi italyo'o ya zuva, waru n ta ca ugundo u ɗu iɗa i nda suru i na n yuwaan nle nzuwulai, reve wo o'wo agadu e le hali hali hali.> >> 14Reve A̱sulazuva a̱ bula̱ u ta̱wa̱a̱ ama a̱ yi na̱ meleshe ma na u shi a zama u ta̱wa̱a̱ shi.

15Reve Musa vadala, u cipa̱ a masasa'an. A̱yi a̱ cipa̱ u shi ta̱ uguzu na aɓaci a atali e re na̱ Nzuwulai uɗanu ɗe. A yuwan ta̱ ɗe iɗana a pasu va atali'i ra elime na̱ a̱ca̱pa̱. 16Atali'i ulinga wa̱ A̱sula̱ u ɗa, waru iɗana'a iɗana ya̱ A̱sula̱ i ɗa i na a ɗanai ɗe.

17Ana Josuwa uwwai uɗyo u yorori wa ama, a̱vu u damma Musa, <<Elemu o uvon a̱ ta̱ ɗe o uva̱la̱ta̱!>>

18Agba Musa damma ta̱, <<Elemu a na a lyuwai uvon u ɗa shi, ko elemu a na a̱ riya̱i uvon shi, elemu e ishipa a ɗa maa uwwusa.>>

19Ana Musa rawai zuzu nu uba̱ta̱ u na a̱ va̱la̱i'i, reve we ene ma̱dindim'm na ama o uje'en lo. Reve wu uwwa upan lon, a̱vu u vari aɓaci a atali'i. Reve a ɓuɓatsa muɓaci muɓaci lo e ikyun i masasan. 20Ɗaɗa u tarai ma̱dindim ma na a yuwai'in, a̱vu wu jeruweto yi na akina. Reve u tara yi wi ira yi, u luɓa̱tsa̱ yi, a̱vu u bula̱nu yi a̱ mini. Reve u zuwa le o sowo yi.

21A̱vu u damma Haruna, <<Nye ama a nda a yuwain na̱ a̱vu tsunda, hali na vu ta̱wa̱yi ama a nda na̱ cu'un vu unusu u vama u nda?>>

22Reve Haruna usu, <<She vu uwwa upan wan, zagbain va̱. Vu reve ta̱ ama a nda a a zuwa ta̱ okolo e le a mayan me iwuya. 23A damma mu ta̱, <Yuwaan tsu musula̱ n na maa walaa tsu elime, adama a na tsu reve ili i na i yuwain Musa za na uta̱a̱ ntsu a̱tsuma̱ a Masar shi.>

24<<Ɗaɗa gba n damma nle, <Za na suru ri ni ili i na a yuwain na̱ zinariya u foɗoo mu ele.> Ana a ca numu, ɗaɗa mo oco nle a akina, a̱vu ma̱dindim ma nda mo uta̱!>>

25Reve ana Musa enei ama'a a ɓatsa ta̱ adama a na Haruna lyawa ta̱ a ɓatsa, a̱vu gba o o'wo ili yi izo'oshi e ekere a n'yuwatan n le, 26ɗaɗa Musa isawain o u'uwata wu uva̱la̱ta̱ a̱vu u damma, <<Zane ɗa ri upasu wa̱ A̱sulazuva? U ta̱wa̱ ya̱'a̱ va̱.>> Reve nan Levi suru o ɓoloto uba̱ta̱ wa̱ yi.

27Reve u damma le, <<Apa nda i na A̱sulazuva A̱sula̱ a Isra'ila a dammai, <Koyan ɗa wu nla̱ matsun me pe'eni ma̱ yi a aagutsu a̱ yi. A̱vu i 'ya̱wa̱ ni i ta̱wi diga o u'uwata a̱ tyo o u'uwata o uva̱la̱ta̱'a̱, za suru wu una za va̱ yi ni i'utsa̱ ya̱ yi na̱ moron ma̱ nden ma̱ yi.> >> 28Reve nan Levi a yuwan cine Musa damma nle. O urana u ndolo ama a na a̱ kuwa̱i a ta rawa ama ukpakukupa uta'atsu (3,000). 29Reve Musa damma, <<Ana'an a tawa ɗu ta̱ adama o ulinga wa̱ A̱sulazuva, za suru o una̱ wu ulambu u mawun ma̱ yi na̱ za va̱ yi, waru u zuwaa ɗu ta̱ aba'un ana'an.>>

30Ana usana u tawai, a̱vu Musa damma ama'a, <<I yuwan ta̱ unusu u gbain. Agba gogo n ta gawan uba̱ta̱ wa̱ A̱sulazuva u ta gura o'wo n tara ume wu unusu u ɗu.>>

31Ɗaɗa Musa ka̱mba̱i uba̱ta̱ wa̱ A̱sulazuva a̱vu u damma, <<O'o, ama a nda a yuwan ta̱ unusu u vama. A yuwaan ta̱ aciyele musula̱ n zinariya. 32Amma gogo vu yuwaan le gafura vu unusu u le, agba na̱ ne ɗa shi, to, vu tasa aala a̱ va̱ diga a̱tsuma̱ a aatagada a na vu ɗanai.>>

33Amma A̱sulazuva a̱ usu ta̱ Musa, <<Za na yuwaan numu unusu suru, a̱yi ɗa maa tasa diga a̱tsuma̱ a aatagada a̱ va̱. 34Agba gogo vu 'ya̱wa̱ vu rono ama aɗanga a̱ tyo uba̱ta̱ u na n damma nuwu, waru malingata ma̱ va̱ ma ta walaa wu elime. Suru na̱ ne nu urana u na maa ca oforo a rawa, n ta ca le oforo adama o unusu u le.>>

35Reve A̱sulazuva a lapa ama na̱ a̱tsuma̱lima̱, adama e ili i na a yuwain na̱ ma̱dindim ma na Haruna yuwain.

Currently Selected:

Mota̱a̱ 32: TSW

Highlight

Copy