Mota̱a̱ 34

Aɓaci a atali a sa'avu

1Reve A̱sulazuva a damma Musa, <<She'en aɓaci a atali e re tsa̱ a̱za̱ o ufaru. N ta ɗana ɗe idanshi i na i shi a atali o ufaru a na vu ɓosoi. 2Vu foɓo nu usana, nfa'an nu usana vu ta̱wa̱ a Masasan ma Sinai. Vi isawan a̱ ma̱ka̱ka̱n ma̱ va̱ ɗe zuva masasa'an.>> 3She ko za ta̱wa̱ oɓolo na̱ a̱vu wan ko e ene za uba̱ta̱ u ro lo a masasa'an wan, ko oɓolo e inan ko e ikyon a alyuna zuzu na̱ masasa'an wan.

4Reve Musa she'en atali e re tsa̱ a̱za̱ o ufaru. Reve u 'yon na̱ wasasa, reve u tara aɓaci a atali'i e ekere a̱ yi, a̱vu u kumba a masasa'an cine A̱sulazuva a damma niyi. 5Reve A̱sulazuva a̱ cipa̱ a̱tsuma̱ e eleshe, wi isawan oɓolo na̱ Musa uba̱ta̱'a̱, u yuwan adanshi a ala'a A̱sulazuva. 6Reve A̱sulazuva a̱ ka̱ra̱ a̱ ma̱ka̱ka̱n ma Musa a̱vu u damma, <<A̱mu ɗa A̱sulazuva, a̱mu ɗa A̱sulazuva, za na tse ene iliyali waru za vi isa'ani, za na tsu yuwan upan go'o shi, za vi icigi i na i ka̱ra̱la̱i, na̱ za va̱ a̱ɓula̱ a amayun, 7za na tsu guza̱ icigi a̱ tyo mantsa ukpakukupa kupa, za na tsu yuwan gafura vi iwuya nu unusu u na vuma yuwain nu ucigu wa̱ yi, na̱ cu'un vu unusu suru. Waru wa̱a̱ kuɗa̱ ca unusu a̱tsuma̱lima̱ shi. Waru za na tsu guza̱ muwun o unusu u nan dada le mantsa ma ta'atsu hali mantsa ma̱ na̱shi.>>

8Reve Musa ka̱ɗa̱toshi urewesu wa̱ yi hali e iɗa u yuwan a̱ga̱nda̱. 9A̱vu u damma, <<A̱sulazuva, na̱ n tsura̱ ta̱ isa'ani e ekere a̱ wu, lyawa A̱sulazuva a̱ 'ya̱wa̱ oɓolo na̱ a̱tsu. Ko na wo o'woi ama a nda a̱ ta̱ na aciyogbamu. Vu yuwaan tsu gafura vi iwuya i tsu nu unusu u tsu, vu usu tsu tso o'wo ama a agadu a̱ wu.>>

10Reve A̱sulazuva a damma, <<Uwwai nda, mi isawatoin akucunu na̱ a̱ɗu. A̱ ma̱ka̱ka̱n ma ama a na a̱ ri nden na̱ a̱ɗu suru ɗa maa yuwan ili ya asalama i na koto a yuwain e iɗa i ro shi a̱tsuma̱ o uvaɗi. Ama a na i ri oɓolo ne ele suru e te ene ulinga wa̱ A̱sulazuva adama a na ili i na maa yuwan na̱ a̱ɗu ili i wovon i ɗa. 11Vu toni ili i na n damma nuwu ana'an. N ta̱ gba̱ra̱ a̱ ma̱ka̱ka̱n ma̱ ɗu aza a Amoriya na aza a Ka'ana na aza a Hitiya na aza a Periziya na aza a Hiviya oɓolo na aza a Jebusiya. 12Vu yuwan ugbozu she vu tara akucunu na aza a na va̱a̱ da̱nu oɓolo ne ele e iɗa i na va̱a̱ 'ya̱wa̱ wan, adama wo o'wo ɗu maza wan. 13Amma o una̱ u ndolo, yi ɓoso musa'a n le, i lungusa̱ atali a na a yuwusaan a̱ga̱nda̱ a̱vu yi gasa atsura a Ashera. 14She i yuwaan ma̱sula̱ mo ro a̱ga̱nda̱ wan, adama a na a̱mu A̱sulazuva za na aala a̱ yi Tsushu'un tsa ɗa, A̱sula̱ a̱ tsushu'un a ɗa. 15Vu yuwan ugbozu she vu tara akucunu na aza a na va̱a̱ da̱nu oɓolo ne ele e iɗa'a wan, adama a na a mantsa ma na aa yuwan tsushakala#34:15 A̱sula̱ na ama a Isra'ila a yuwan ta̱ akucunu tsa ka na̱ vali, amma na aza a Isra'ila a lyawa A̱sula̱ a̱vu o toni ma̱sula̱ mo ro u yuwan ta̱ gashi a ta yuwusan tsushakala. a̱ tyo a̱ musula̱ n le, reve a yuwaan le a̱ga̱nda̱, a ta banu ɗu a̱vu i lyuwa a̱ kucci le. 16Na̱ vu ɗangwaa olobo a̱ wu a̱ma̱ci a̱tsuma̱ e esheli e le, a na aa yuwusan tsushakala na̱ musula̱ n le, a ta zuwa olobo a̱ wu a yuwan ne.>>

17<<She vu yuwaan aciya̱wu musula̱ mi irumu wan.>>

18<<Vu yuwusan A̱buki o Opopofu a na a̱ ri na̱ Wolilo shi. A̱tsuma̱ a rana cindere i tama opopofu a na a̱ ri na̱ wolilo shi, cine n damma nuwu. A aa'wan suru i yuwan ne a mantsa ma na n zuwai o woto wa Abib, adama a na o woto u ɗaɗa mu uta̱a̱ nuwu e iɗa ya Masar.>>

19<<Mawun mo ufaru mo ulobo ma na a matsain suru za va̱ ɗa, hali na̱ muwun mu ufaru mi iliyamunga, ko inan ko ikyon.>> 20Vu tsupaa mawun mo ufaru mo mololi na̱ ma̱giri'i, amma na̱ vaa tsupaa yi shi, vu kuɗa yi yinlu. Vu tsupaa muwun mo olobo mu ufaru n ɗu suru. She za ta̱wa̱ a̱ ma̱ka̱ka̱n ma̱ va̱ ekere lya̱nga̱ wan.

21<<Vu ta yuwan ulinga a̱tsuma̱ a rana ta̱li, amma o urana we cindere vu te ivuwan, ko hali na a mantsa me iluma na a mantsa mo ugasa, ciga 'yuwan vu ivuwan.>>

22<<Vu yuwusan A̱buki a Ajuma ajuma,#34:22 Ka̱lyuwa̱ ucuɗuwu wa̱ yi a̱ a̱a̱ɗiva̱ 23:16. a̱yi ɗa a̱buki a mapaɗa ma̱ kucci. Waru vu ta yuwan a̱buki a magasa mo ukosu, a̱yi ɗa a̱buki o mokoto mo uɓolotosu me itana yu una, o ukosu wa aa'wan.>>

23<<A aa'wan uta'atsu u ɗa muwun ma ali suru mo ɓoloto a̱ ma̱ka̱ka̱n ma̱ A̱sulazuva, A̱sula̱ a aza a Isra'ila. 24N ta̱ gba̱ra̱a̱ ɗu n'yuwatan n na n ri elime a̱ ɗu reve n da̱shi iɗa i ɗu mgbain, babu waru vuma na a yuwan tsushu'un ni iɗa i ɗu, ni i 'ya̱wa̱ a̱ ma̱ka̱ka̱n ma̱ A̱sulazuva A̱sula̱ a̱ ɗu uta'atsu aa'wan suru.>>

25<<She vu ca mpasa oɓolo ni ili i ro i na i ri na̱ wolilo a̱ tyo e ekere a̱ va̱ wan, waru she i lyawa kucci na i cayi adama a̱ A̱buki a Mapasa waa asa she usana wan.>>

26<<I ta̱wa̱a̱ na̱ kucci na la'ai ulobonu vu umatsun wu ufaru wa̱ a̱ɗuma̱ a̱ ɗu o u'wa wa̱ A̱sulazuva A̱sula̱ a̱ ɗu.>> <<She i su'wan megbgbele a maani ma mma va̱ yi wan.>>

27Reve A̱sulazuva a damma Musa, <<Vu ɗana idanshi i nda, adama a na ni idanshi i nda i ɗa mi isawatoin akucunu a̱ va̱ na̱ a̱vu oɓolo na aza a Isra'ila.>>

28Ɗe ɗa Musa da̱na̱i a masasan uba̱ta̱ wa̱ A̱sulazuva rana na ayin amunga. A̱tsuma̱ a rana'a u lyuwa shi, agba u sowo shi. Reve u ɗana wila̱ ɗe a aɓaci a atali'i. Ele ɗa Wila̱ Kupa.

Urewesu wa Musa e ikanasa

29Ana u cipa̱i a Masasan ma Sinai uguzu na aɓaci a atali e re a Nzuwulai'i, u shi u reve a na urewesu wa̱ yi wee ikanasa shi adama a na u shi ta̱ u yuwan adanshi na̱ A̱sulazuva. 30Ana Haruna na aza a Isra'ila suru e enei Musa urewesu wa̱ yi e ikanasa, a̱vu a uwwa wovon u na aa rawa zuzu na̱ a̱yi. 31Agba a̱vu Musa ɗe le, ɗaɗa Haruna na azagbain a ama suru a̱ ka̱mba̱i ya̱'a̱ yi. A̱vu u yuwaan le adanshi. 32Na̱ a̱ca̱pa̱, reve ama a Isra'ila suru a rawa zuzu, reve u zuwa le a yuwan ili na A̱sulazuva a damma niyi a Masasan ma Sinai suru.

33Reve ana Musa kotoi adanshi ne ele, a̱vu u pala urewesu wa̱ yi na̱ mamuna. 34A mantsa ma na suru Musa a uwa uba̱ta̱ wa̱ A̱sulazuva u yuwan adanshi na̱ a̱yi u tsu tawa ta̱ aapalutsu'u, she na̱ wu uta̱. Reve na̱ wu uta̱ u damma aza a Isra'ila ili i na a zuwa niyi, 35a̱vu e ene urewesu wa̱ yi e ikanasa. Reve Musa palisa urewesu wa̱ yi na̱ aapalutsu, hali she na̱ wa̱a̱ ka̱mba̱ u yuwan adanshi na̱ A̱sulazuva.

Currently Selected:

Mota̱a̱ 34: TSW

Highlight

Copy