Mota̱a̱ 31

Bezale na̱ Oholiyabu

1Reve A̱sulazuva a damma Musa, 2<<Nlo n ɗangwai Bezale mawun ma̱ Uri mawun ma tsukaya ma̱ Huru diga o ugundo wa Yahuza, 3waru n shiton yi ta̱ na̱ Ruhu va̱ A̱sula̱, nu urevu nu ugbozu nu uguru wu ulinga we ekere icu'un icu'un, 4adama u yuwan yiɗanishi i na aa yuwaan ulinga u zinariya na̱ azurufa na̱ rumushili, 5u te she'en atali a na oo oto, nu ushe'en wa akpata na̱ cu'un vu ulinga vu ukere suru. 6Uwwai, n zuwa ta̱ Oholiyabu mawun ma Ahisamaki o ugundo wa Dan u kamba yi. Waru n ca ta̱ aza a na a gurai ulinga wu ukere suru uneꞌe u na aa gura yuwan ili i na n damma nuwu vu yuwan. 7Oogodo o Uga'asusan, ni ili yi Nzuwulai ni ikpa̱ta̱tsu yi ili yi Nzuwulai ni itana yo oogodoꞌo suru, 8na apada ni itana ya̱ yi, na̱ wisawatan u fitila u zinariya can na akapi e itana ya̱ yi suru, masa'a ma̱ a̱tsuka̱ a̱ ma̱guru, 9masa'a ma̱ kucci vu ukula̱tosu na akapi e itana yu ulinga ya̱ yi suru, na aasa'atsu a gbain na akatamu, 10na̱ a̱tugu a na a ɗavai ne ekere na̱ a̱tugu a akiza adama a Haruna ganu, oɓolo na̱ a̱tugu o olobo a̱ yi adama a̱ a̱ga̱nda̱ e le a tsuganu, 11na̱ mani'in mo utsusun na̱ a̱tsuka̱ a̱ ma̱guru adama o Uba̱ta̱ wa Akiza. A yuwan le cine n damma nuwu tsoyi.>>

Urana wa Ashibi

12Reve A̱sulazuva a damma Musa, 13<<Vu damma aza a Isra'ila, <I ciga i 'yuwan i toni urana wa Ashibi. A̱yi nda u to o'wo tsu urotsu a̱ɗu na̱ a̱mu a̱ tyo a limatan ve elime a na a̱ ta̱wa̱, tsa̱ra̱ i reve a̱mu ɗa A̱sulazuva, za na ka̱mba̱to nɗu aza a akiza 14I kuru urana wa Ashibi, adama a na urana wa akiza u ɗa e ekere a̱ ɗu. Za na suru tara niyi ili shi a ciga a 'yuwan o una yi; za na suru yuwain ulinga o urana u ndolo a ciga a 'yuwan a tawa yi a̱tsuma̱ a ama a̱ yi. 15A ta yuwan linga a̱tsuma̱ a rana ta̱li, amma urana we cindere u to o'wo urana wa akiza, Ashibi urana u wivuwun e ekere a̱ A̱sulazuva. Vuma na suru yuwain ulinga o urana u ndolo a̱ to una yi. 16Aza a Isra'ila a̱ ta̱ kuru urana wa Ashibi, a yuwusan yi hali a̱ tyo a limatan ve elime wo o'wo akucunu a babu ukotu. 17U to o'wo urotsu ya̱'a̱ va̱ na̱ a̱ɗu ama a Isra'ila babu ukotu, a̱tsuma̱ a rana ta̱li ɗa A̱sulazuva a yuwain zuva ni iɗa, reve o urana we cindere u lyawa ulinga u na u yuwusain reve wi ivuwan.> >> 18Ana A̱sulazuva o kotoi adanshi na̱ Musa a Masasan ma Sinai, a̱vu u ca yi aɓaci a atali e re a na u ɗanai ɗe Nzuwulai'i na akatsu a̱ yi.

Currently Selected:

Mota̱a̱ 31: TSW

Highlight

Copy