Mota̱a̱ 30

Masa'a ma̱ a̱tsuka̱ a̱ ma̱guru

1<<Vu yuwan masa'a nu uɗanga u na a̱ tsu ɗe akashiya adama o ukula̱tosu wa̱ a̱tsuka̱ a̱ ma̱guru. 2Uga'an wa̱ yi udasuwu anana a̱ ta̱ na akapi, washin wa̱ yi waru udasuwu anana a̱ ta̱ na akapi, washin wa̱ yi nu uga'an wa̱ yi'i u da̱na̱ una̱ta̱, mishin ma̱ yi waru u da̱na̱ udasuwu ana a ta'atsu. Avana a̱ yi na̱ a̱yi a yuwan le ili i ta̱ uɓoluloi. 3Reve vu sura zuva va̱ yi ne eɓele a̱ yi na avana a̱ yi na̱ zinariya can, reve vu ginda̱la̱ nge'en ma̱ yi na̱ zinariya a̱ ka̱nda̱ruwa̱. 4Reve vu yuwaan yi nkawani n zinariya n re za̱la̱ vu uginda̱lu'u, vu yuwan le e eɓele e re a̱ nka̱la̱la̱i adama a̱ guza̱ aɗanga o utanusu wa̱ yi. 5Vu yuwan aɗanga a akpata o uɗanga u akashiya, reve vu sura le na̱ zinariya. 6Reve vu zuwa masa'a'a elime o umuna u na u ri elime a Akpati a Nzuwulai elime e kpa̱ta̱tsu i matara mo ume mo unusu za na ri zuva vi ikpa̱ta̱tsu vi ili yi Nzuwulai uba̱ta̱ u na maa ga'an na̱ a̱vu. 7Usana u na suru Haruna uwai adama u lapula ifitila, u ta̱ kula̱to a̱tsuka̱ a̱ ma̱guru a masa'a'a. 8Nu ulivu waru a mantsa ma na waa daɓa ifitila'a reve u kula̱to a̱tsuka̱ a̱ ma̱guru'u adama u da̱na̱ a̱ ma̱kula̱ a̱ ma̱ka̱ka̱n ma̱ A̱sulazuva hali a̱ tyo mantsa me elime ma̱ ɗu. 9She vu ca a̱tsuka̱ a̱ ma̱guru o ro a masa'a ma nda wan, ko kucci vu ukula̱tosu ko gba kucci vi ishina, waru she vu tsuwa̱n yi ucasu wi ili yo oso wan. 10U ta̱ u ɗa goon a aa'wan Haruna a yuwan a̱ga̱nda̱ a matara mo ume mo unusu a avana a masa'a'a. A ta yuwan a̱ga̱nda̱ a matara mo ume mo unusu wa aa'wan a nda'a na̱ mpasa m matara mo unusu hali a̱ tyo mantsa me elime. Ne ɗa masa'a'a wa̱a̱ da̱na̱ na akiza suru suru e ekere a̱ A̱sulazuva.>>

Ikebe ya atsupu i matawa mo unusu

11Reve A̱sulazuva a damma Musa, 12<<A mantsa ma na vee kece aza a Isra'ila, vuma suru ta ca A̱sulazuva atsupu adama a aciya̱yi a mantsa ma na e kece niyi, adama mɓa̱la̱ n reme le a mantsa ma na vee keceshe le wan. 13Apa nda ili i na za na suru a ɗanai a̱tsuma̱ e mekece aa tsupa: uɓatsulai u makundatsu ma̱ shekel va̱ a̱a̱'isa̱ za na ri nu ume gera#30:13 Gera a̱yi ɗa ume u na u la'ai uka̱la̱mu ushin uɓatsulai u makundatsu ma̱ shekel kucci va̱ A̱sulazuva. 14Za na e kecei suru za na la'ai a'wan ushin, u ta ca A̱sulazuva kucci nda. 15A mantsa ma na yaa ca A̱sulazuva kucci matara mo unusu u ɗu adama a wuma u ɗu, she za vu utsuru ca ili i na i la'ai uɓatsulai u makundatsu ma̱ shekel wan, waru she za vu ulambu ca ili i na i ka̱la̱ma̱i ne wan. 16Vu ushi ikebe i kucci i matara mo unusu i nda e ekere a aza a Isra'ila, reve a yuwan ulinga ne ele adama o ulapulu wo Oogodo o Uga'asusan. U to o'wo ili yu ucuwusan e ekere a aza a Isra'ila a̱ ma̱ka̱ka̱n ma̱ A̱sulazuva kucci matara mo unusu adama a wuma u le.>>

Aasa'atsu a masa'a

17Reve A̱sulazuva a damma Musa, 18<<Vu yuwan aasa'atsu a̱ rumushili, na̱ wisawatan wa̱ yi wu rumushili adama a masa'a. Reve vu zuwa yi e memere mo Oogodo o Uga'asusan na̱ masa'a, a̱vu vu tsun pe mini. 19Na̱ mini ma ɗaɗa Haruna no olobo a̱ yi aa sa'a ekere na ana e le. 20Mantsa ma na suru aa uwa o Oogodo o Uga'asusa'an ko aa rawa zuzu na̱ masasa'a'a adama a ca kucci va akina na a tsu ca A̱sulazuva, a sa'a ne'en adama a̱ kuwa̱ wan. 21A sa'a ekere na ana e le adama a̱ kuwa̱ wan. A̱yi nda u to o'wo wila̱ e ekere a Haruna nu ugundo wa̱ yi we elime hali hali hali.>>

Mani'in mo utsusun

22Reve A̱sulazuva a damma Musa, 23<<Vu tara itana yu ucita i nda: makundatsu ma̱ shekel mur mini ukpaku uton (500) nu uɓatsulai wi ili i ma̱guru i sinamon#30:23 Sinamon ma̱luɓa̱ mo ro ɗa ma na ma̱ ri ma̱guru ukpakure na̱ kupoton (250) na̱ makundatsu ma̱ shekel wunlya u ma̱guru ukpaku ure na̱ kupoton (250). 24Waru nu ukunzuwu u shekel u kashiya#30:24 Kashiya ma̱luɓa̱ mo ro ɗa ma na ma̱ ri ma̱guru tsa sinamon ukpaku uton (500) u makundatsu ma̱ A̱a̱'isa̱ oɓolo na̱ medele ma̱ ta̱ ma mani'in ma̱ zetun. 25Vu yuwan mani'in mo utsusun ni itana i nda, za na a lapulai tsi ili i ma̱guru ma na za na a yuwusan aturare a yuwain. U to o'wo mani'in ma akiza mo utsusun. 26A̱yi ɗa va̱a̱ tsuwa̱n Oogodo o Uga'asusan na Akpati a Nzuwulai, 27na apada ni itana ya̱ yi suru na̱ wisawatan u fitila ni itana ya̱ yi suru na̱ masa'a mo ukula̱tosu wa̱ a̱tsuka̱ a̱ ma̱guru. 28Na̱ masa'a ma̱ kucci vu ukula̱tosu ni itana ya̱ yi suru na aasa'atsu na aakatamu a̱ yi. 29Vu tawa le adama o o'wo ili i na i ri na akiza lon, waru ili i na i ju'wa̱in nle suru u to o'wo na akiza.>> 30<<Vu tsun Haruna no olobo a̱ yi mani'in vu katala le tsuganu adama a yuwaan mu ulinga u tsuganu. 31Vu damma aza a Isra'ila, <A̱yi nda a̱yi ɗa woo o'wo mani'in ma akiza ma̱ va̱ mo utsusun hali a̱ tyo mantsa me elime. 32She a̱ tsun yi a̱ lipu vuma ro wan, waru she a yuwan mani'in mo ro tsa̱ yi wan. U ta̱ na akiza, waru ni i ciga i 'yuwan i tara yi na akiza. 33Za na suru yuwain mani'in tsa̱ yi, waru za na suru tsun niyi a vuma ro ko'o na̱ ganu, na a ciga a 'yuwan a tawa yi a̱tsuma̱ a ama a̱ yi.> >>

A̱tsuka̱ a̱ ma̱guru

34Reve A̱sulazuva a damma Musa, <<Vu tara ili yu ucita i ma̱guru ele ɗa erepu a na a̱ tsu ɗe sitake na̱ onika na̱ galabanum oɓolo na̱ furenkisen can vu kunzu le una̱ta̱. 35Reve vu yuwan a̱tsuka̱ a̱ ma̱guru ne ele tsu za na gurai. A̱ tsun yi akpaɗi, a̱tsuka̱ e cece waru na̱ za va akiza. 36Reve vu ira akapi ulobonu, reve vu zuwa yi elime e ili yi Nzuwulai o Oogodo o Uga'asusan uba̱ta̱ u na maa ga'an na̱ a̱ɗu. I tara a̱tsuka̱ a̱ ma̱guru a nda ili i na i la'ai akiza e ekere a̱ ɗu. 37She i yuwaan aciya̱ɗu cu'un va a̱tsuka̱ a̱ ma̱guru a nda wan; I guza̱ yi na akiza e ekere a̱ A̱sulazuva. 38Za na suru yuwain a̱tsuka̱ a̱ ma̱guru cu'un va̱ yi adama a aciya̱yi, a ta tawa yi a̱tsuma̱ a ama a̱ yi.>>

Currently Selected:

Mota̱a̱ 30: TSW

Highlight

Copy