Mota̱a̱ 2

Limatan va Musa

1A̱tsuma̱ a mantsa mo ndolo, vali na̱ ka ro a̱tsuma̱ o ugundo wa̱ Levi a yuwan ta̱ lolo. 2Reve ka'a u tsura̱ a̱a̱tsuma̱, a̱vu u matsan ulobo. Ana we enei mawun ma sa'ani ma ɗa, ɗaɗa u sokosu niyi hali woto ta'atsu. 3Ana waa gura soko yi waru shi, ɗaɗa u ɗavai aasaka a anlya wa ashinshini, reve u sura yi na̱ kwalta#2:3 Kwalta a̱yi ɗa erepu a̱ lima̱ a na a̱ tsu tsun o ure u gbain adama a lapula ure. ne erepu. A̱vu u zuwa pe mawu'un. Reve u zuwa aasaka'a a̱tsuma̱ a apumpu a̱ nge'en mu Uɗolu wa̱ Nilu. 4Reve zakpara vu ulobo'o usheli wi isawan makasu, wee ene ili i na yaa yuwan yi.

5Reve usheli wa Firi'awuna u ta̱wa̱ o uɗolu'u adama u sumba̱. Esheli o ushewusun a̱ yi e igaru a̱ nge'en mu uɗolu'u, a̱vu usheli wa Firi'awuna'a we ene aasaka a̱tsuma̱ a apumpu. Reve u zuwa usheli u ta̱ u tara yi. 6Ana usheli wa Firi'awuna'a u kpa̱tu'wa̱i aasaka'a, ɗaɗa we enei pe mawun mo ulobo'o. Reve we ene yi iliyali adama a na u ri e mesun. A̱vu u damma, <<Nda mawun ma maci ma Ibrahim ma ɗa ma yuwan.>>

7Reve zakpara ba̱ba̱'a̱ u rawa zuzu, a̱vu we ece, <<N 'ya̱wa̱ n zamiya wu ka ta̱ a̱tsuma̱ a mmaci ma Ibrahim za na aa kungwatowo wu a̱yi?>>

8Reve usheli wa Firi'awuna u usu, <<Ee, wala.>> Ɗaɗa usheli'i u jika̱i u 'ya̱wa̱ u ɗeyi mma mawu'un. 9A̱vu usheli wa Firi'awuna u damma yi, <<Tara mawun ma nda vu kungwatowo mu a̱yi. Na a yuwan n ta tsupa wu.>> Reve mma mawu'un u tara mawu'un u kungwato yi. 10Ana mawun u gbozoi, reve u tara yi u tyowe usheli wa Firi'awuna. A̱vu u tara yi tsa mawun ma̱ yi. A̱vu u ca yi aala Musa#2:10 A̱yi aala <<Musa>> shon ta̱ gashi danshi na̱ Tsuyahuda, <<o rono a alanga.>> a na, <<M papa yi ta̱ a̱ mini.>>

Musa suma ta̱ a̱ tyo Midiya

11Ana Musa kungwai, reve urana u ro u bura a̱za̱ a̱ yi. Reve we ene cu'un vu ulinga wa̱ a̱tsuma̱lima̱ na aa yuwusan. Reve we ene vuma va Masar a lulapusa vuma ta̱ a̱tsuma̱ a mmaci ma Ibrahim ama a̱ yi. 12Ana u ka̱lyuwa̱i uba̱ta̱ suru, adama we ene ko vuma ro lo ee inda yi shi, a̱vu Musa una za va Masar'u. Reve u ciɗo yi a̱ wuyun.

13Ana wu utisa̱i ana usana u tawai, a̱vu u cina mmaci ma Ibrahim ama e re a̱ nla̱ngi. Reve we ece za vi igishi, <<Adama a̱ nye vaa lulapusa za va̱ wu?>>

14Reve vuma'a u usu, <<Zane ɗa zuwa nuwu zagbain na̱ za vu uge'etosu u tsu? Vu ciga ta̱ vu una mu cine vu unai vuma va Masar ndeɗe?>>

Ɗaɗa Musa uwwai wovon lon, a̱vu u damma, <<Ama suru e reve ta̱ ili i na n yuwain.>>

15Ana Firi'awuna uwwai ili i na i farai, reve u zami ure u na woo una yi. Reve Musa suma e ekere a Firi'awuna a̱ tyo e iɗa ya Midiya. Reve u da̱nu e ikyun yo ooko'o o ro. 16A yuwan ta̱ ganu ro e iɗa ya Midiya. U shi ta̱ ne esheli e cindere, reve esheli'i a rawa adama o rono mini o shiton ara'atsu adama a ca ikyon i le. 17Ɗaɗa aza a aguɓa o ro a rawai reve a̱ gba̱ra̱ le. A̱vu Musa 'yon a̱vu u kambaa le. Reve u ronoo ikyon ye esheli'i mini.

18Ana a̱ ka̱mba̱i uba̱ta̱ wa dada le Reyuwe#2:18 Reyuwe a̱ tsu ɗe yi ta̱ waru Jeturo., a̱vu we ece le, <<Cine i ka̱mbushi gogogo ana'an?>>

19Reve a̱ usu, <<Aza a aguɓa o ro a̱ shi ta̱ o lo tsu. A̱vu vuma va Masar ro kambaa tsu. Hali gba u ronoo tsu ta̱ mini a̱vu u ca ikyon i tsu.>>

20Reve we ece le, <<Te ɗa vuma'a u ri? Adama a̱ nye i lyawa niyi ɗe? 'Ya̱wa̱i i damma yi u ta̱wa̱ tsa̱ra̱ u lyuwa ilyalya.>>

21A̱vu Musa usu u da̱nu na̱ a̱yi. A̱vu u ca Musa usheli wa̱ yi Zipura wo o'wo ka va̱ yi. 22Reve Zipura matsan ulobo. Reve Musa ca yi aala Gashum,#2:22 A̱yi aala <<Gashum>> na̱ Tsuyahuda u ta dansa <<mocin ɗe ndeɗe.>> a dansa, <<Mo o'wo ta̱ mocin e iɗa i ro.>>

Muwun ma Isra'ila m pati ta̱ A̱sula̱

23Ana a yuwain a'wan a̱ a̱bunda̱, a̱vu mogono ma Masar ma̱ kuwa̱. A̱vu aza a Isra'ila a̱ a̱nga̱ adama a tsugbashi tse le reve a saala. Reve mesun me ele me izami yi ikambi adama a tsugbashi tse le tsa rawa uba̱ta̱ wa̱ A̱sula̱. 24A̱sula̱ a uwwa ta̱ ma̱nga̱ me le. Reve u cuwan na akucunu a na u yuwayin Ibrahim na̱ Ishiyaku na̱ Yakubu. 25Reve A̱sula̱ a̱ ka̱lyuwa̱ aza a a Isra'ila, a̱vu we ene a̱tsuma̱lima̱ e le.

Currently Selected:

Mota̱a̱ 2: TSW

Highlight

Copy