Mota̱a̱ 23

Ure u na aa yuwan mejege na amayun

1She vu uwa a garasa na adanshi e epen wan. She vu ɓolo aci na ama e iwuya adama vo o'wo esu e ili na vu revei shi wan. 2She vu kuru ama a mayan me iwuya wan. A mantsa ma na e ɗe nuwu vu damma ili i na vu revei uba̱ta̱ wu uge'etosu, she vu kuru a̱bunda̱ adama i vadala amayun wan. 3Waru gba she vu roco aɗangulu a̱ tyo e ekere a alambi uba̱ta̱ o uge'etosu wan.

4Na̱ vu ga'an na̱ a̱a̱ba̱jini a nan ko mololi ma ma'yuwatan ma̱ wu ma na ma̱ pusa̱yin, vu reve vu ka̱mba̱to yi ta̱ ya̱'a̱ yi. 5Nna̱ ve ene mololi ma za na 'yuwan nuwu riya̱ ni itana ya̱ yi, she vu lyawa yi lo wan, na̱ vu ciga vu 'yuwan vu kamba i 'ya̱sa̱n yi.

6She vu vadala amayun e ekere a za vu ulambu uba̱ta̱ wu uge'etosu wan. 7She vu usu adanshi e epen a na a̱ ta̱wa̱yi a aci nanza wan, waru she vu una za na ri nu unusu shi wan ko za va̱ a̱ɓula̱ wan, adama a na a̱mu maa lyawa za vu unusu u ndolo fa̱a̱n shi.

8She vu ushi utowusu wu una̱ wan, adama a na utowusu wu una̱ u tsu rumba̱na̱to ta̱ aza a na e inda ulobonu, waru u tsu punda̱ra̱ ta̱ adanshi a aza a na a̱ ri mejege.

9She vu ɓongi mocin wan; a̱ɗu na aciya̱ɗu i reve ta̱ ili i na e ɗeyi limocin, adama a na i yuwan ta̱ nden n limocin e iɗa ya Masar.

Wila̱ wa Ashibi

10A'wan a̱ ta̱li a ɗa vaa cimba uɗuma̱ wa̱ wu a̱vu vu gasa itana yu uɗuma̱ wa̱ wu. 11Agba a aa'wan e cindere vu lyawa uɗuma̱'a̱ wi ivuwan she vu luma yi wan adama ama a̱ wu a̱za̱ o ulambu a̱ tsura̱ ilyalya pe. Reve inama yu una waru a̱ tsura̱ ili i na aa lyuwa a akapi a na a lyawai. Ne ɗa fo vaa yuwan nu uɗuma̱ u ina̱bi na̱ za zetun va̱ wu. 12Vu ta yuwan ulinga wa̱ wu a̱tsuma̱ a rana ta̱li, amma o urana we cindere reve vi ivuwan; adama inan yi iluma ya̱ wu na̱ nloli ma̱ wu mi ivuwan. Adama waru agbashi a̱ wu a na a matsain o u'wa wa̱ wu na agbashi a na a̱ ri omocin a̱ tsura̱ ucira. 13I ka̱mbuwa̱ ugbozu e ili i na n damma nɗu suru. She i ɗe ala a̱ musula̱ n ro wan; she i lyawa a uwwa le o una̱ u ɗu wan. 14Uta'atsu u ɗa yaa yuwaan mu a̱buki a̱ a̱ga̱nda̱ a aa'wan. 15I ta yuwan A̱buki o Opopofu a na a̱ ri na̱ wolilo shi. I ta tama opopofu a na a̱ ri na̱ wolilo'o shi hali ayin e cindere cine n damma nɗu. I ta yuwan a̱buki a nda aa'wan suru a mantsa ma na n zuwai o woto wa Abib, adama a na o woto u ɗaɗa yu uta̱i e iɗa ya Masar. She za ta̱wa̱ a̱ ma̱ka̱ka̱n ma̱ va̱ ekere lya̱nga̱ wan.

16I yuwan A̱buki o Ugasa nu umatsun wu ufaru wi itana yu uɗuma̱ i ɗu.#23:16 A̱yi nda waru a̱ tsu ɗe yi ta̱ <<A̱buki Ajuma ajuma na̱ Tsuyahuda.>> <<I yuwan A̱buki o ukosu wu Ugasa o ukosu wa aa'wan, a mantsa ma na i kotoi uɓolotosu wi itana yu uɗuma̱ i ɗu.

17<<A aa'wan uta'atsu u ɗa muwun ma ali suru mo ɓoloto a̱ ma̱ka̱ka̱n mo Mogono ma̱ A̱sulazuva.

18<<She vu ca mpasa oɓolo ni ili i ro i na i ri na̱ wolilo a̱ tyo e ekere a̱ va̱ wan. She i lyawa mani'in n me ili ma na i ca numu waa asa wan.

19<<I ta̱wa̱a̱ na̱ kucci na la'ai ulobonu vu umatsun wu ufaru wa̱ a̱ɗuma̱ a̱ ɗu o u'wa wa̱ A̱sulazuva A̱sula̱ a̱ ɗu.

<<She i su'wan megbgbele a maani ma mma va̱ yi wan.>>

Nzuwulai m ma'uwa e iɗa ya Ka'ana

20N ta̱ lyungu malingata elime a̱ ɗu adama u tiga̱ ɗu o ure, reve u rawato ɗu uba̱ta̱ u na n foɓoi. 21I poloo yi atsuvu yu uwwa ili i na waa damma. She i yuwaan yi aciyogbamu wan; waa yafa aciyogbamu a̱ ɗu shi adama a na u ta̱ nu ucira wa ala a̱ va̱. 22Nni i polo atsuvu ulobonu yu uwwa ili i na waa damma reve i yuwan ili i na n dammai suru, n to o'wo ma'yuwatan ma n'yuwatan n ɗu. Reve waru n 'yuwan aza a na a 'yuwan nɗu. 23Malingata ma̱ va̱ ma ta walaa ɗu elime reve u rawato ɗu e iɗa ya aza a Amoriya na aza a Hitiya na aza a Periziya na aza a Ka'ana na aza a Hiviya na aza a Jebusiya, reve n kototo le suru suru. 24She i ka̱ɗa̱ta̱wa̱ musula̱ n le wan, waru she i yuwaan le a̱ga̱nda̱ ko i kuru i ili i na a yuwusan wan. Ni i ciga i 'yuwan i mumula̱ le reve yi ɓoso atali a̱ a̱ga̱nda̱ e le miri miri. 25A̱sulazuva A̱sula̱ a̱ ɗu a ɗa yaa yuwaan a̱ga̱nda̱, reve u zuwaa ilyalya na̱ mini ma̱ ɗu aba'un. Reve waru u tawa ubanakun a̱tsuma̱ a̱ ɗu. 26Waru a̱a̱tsuma̱ a̱a̱ zuɗa̱ ko ka o o'wo idari a̱tsuma̱ a̱ ɗu shi. Waru n ta ca ɗu wuma wa a'wan a̱ a̱bunda̱.

27N ta zuwa ama'a a uwwa wovon kafu i rawa, reve u zuwa ama a na yaa ga'an ne ele a̱ ra̱pula̱, ee reve ili i na aa yuwan shi. N ta zuwa n'yuwatan n ɗu n vadala reve a suma. 28N ta̱ lyungu ili i wovon elime a̱ ɗu u gba̱ra̱ aza a Hiviya na aza a Ka'ana na aza a Hitiya elime a̱ ɗu. 29Agba ma̱a̱ gba̱ra̱ le elime a̱ ɗu a aa'wan a̱ ta̱ shi, adama a na iɗa'a u to o'wo lya̱nga̱ reve inama yu una i la'a ucira u ɗu. 30Wa'a wa'a ɗa ma̱a̱ da̱na̱ a̱ gba̱rusa̱ le elime a̱ ɗu, hali she ni i yuwan a̱bunda̱ a na yaa gura o'woto iɗa'a za ɗu. 31<<N ta zuwa utyo u ɗu diga a Mala ma̱ Shili a̱ tyo a Mala ma Gbain, waru diga a̱tsumona'a a̱ tyo o Uɗolu'u#23:31 Uɗolu u na aa yuwusan adanshi a̱ yi pa nda a̱yi ɗa Uɗolu wa Yufireti. N ta ca ɗu ama a na a̱ ri nden e iɗa'a o ukere u ɗu, reve i gba̱ra̱ le a̱ ma̱ka̱ka̱n ma̱ ɗu. 32She i yuwan akucunu ne ele ko na̱ musula̱ n le wan. 33She i lyawa le a̱ da̱nu e iɗa i ɗu wan. Nni i lyawa le a ta zuwa ɗu i yuwaan mu unusu, i ta yuwaan musula̱ n le a̱ga̱nda̱ adama a na ili i ro yi lo shi o to o'wo ɗu maza.

Currently Selected:

Mota̱a̱ 23: TSW

Highlight

Copy