Mota̱a̱ 22

Megeshe me itana

1Nna̱ vuma iva̱ oogono a nan ko kyon reve u paɗa yi ko u wina yi, u ta tsupa ogono o ton o una̱ wu nan ta̱, waru u ta tsupa ikyon i na̱shi o una̱ wu kyon ta̱. 2Nne e reme vivu a̱yi a̱ wivu, reve a̱ ga̱la̱ yi hali u kuwa̱, aa tara za na una niyi'i nu unusu shi. 3Amma nna̱ a̱ ga̱la̱ ta̱ vivu'u cina urana wu uta̱, a ta tara za na una niyi'i nu unusu. Vivu'u gba nu u ciga u 'yuwan u ka̱mbuwa̱ ili i na wi iva̱i. Agba nnu u ri ni ili i na waa tsupa shi, a̱vu a wina yi a tsupa ili i na wi iva̱i. 4Agba nna a cina ili i na wi iva̱i'i o ukere wa̱ yi wuma, ko a̱a̱ba̱jini a nan ko mololi ko kyon, nnu u ciga u 'yuwan u tsupa toto ure.

5Na̱ vuma tara iliyamunga ya̱ yi a̱ 'ya̱wa̱ alyuna o uɗuma̱ ko o uɗuma̱ u inabi, reve u lyawa iliyamunga'a a uwa o uɗuma̱ wu za ro, nu u ciga u 'yuwan u tara a̱tsuma̱ e itana yu uɗuma̱ ya̱ yi ko yu uɗuma̱ i ina̱bi ya̱ yi i na i la'ai ulobonu u tsupa. 6Nna̱ vuma ro zuwa akina o uɗuma̱ wa̱ yi reve akina'a a uwa o uɗuma̱ wu za ro hali u kula̱to ishina i na u ɓolotoi ko aza a na a̱ ri mishin, za na zuwai akina'a na a ciga a 'yuwan u tsupa ili i na i kula̱i'i. 7Nna̱ vuma ca moron ma̱ nden ma̱ yi ikebe ko itana u zuwaa yi, a̱vu e iva̱ itana'a e ekere a̱ yi, ne e reme vivu'u nu u ciga u 'yuwan u tsupa toto ure. 8Ne e reme vivu'u gba shi, na a 'yuwan a ciga za vu u'wa'a u 'ya̱wa̱ uba̱ta̱ wu za vu uge'etosu adama e reve ko wu pe nu ukere a̱ wivu wi itana i na e iva̱i'i shi. 9Na adanshi o ro a̱ 'yon e memere ma ama e re adama e ili i na e revei zane ɗa za vi ili shi, ko adama a̱ a̱a̱ba̱jini a nan, ko mololi, ko kyon, ko adama o utugu, ko adama e ili i ro i na i puwa̱yin i na za suru a dansa, <<A̱yi nda za va̱ ɗa,>> she ele ra a tara adanshi'i a̱ tyo uba̱ta̱ wa̱ a̱za̱ o uge'etosu. Za na za vu uge'etosu tsura̱i nu unusu u ta tsupa moron ma̱ nden ma̱ yi toto ure.

10Na̱ vuma ca moron ma̱ nden ma̱ yi izuwa i mololi ko a̱a̱ba̱jini a nan ko kyon ko iliyamunga i ro, reve gba u kuwa̱, ko a amaton yi ko e iva̱ yi agba za ro e ene ili i na i farai shi, 11akucunu a̱ ma̱ka̱ka̱n ma̱ A̱sulazuva a ɗa a kasa le adanshi'i na̱ za vi izuwa'a wu pe nu ukere e itana i moron ma̱ nden ma̱ yi shi. Na a ciga a 'yuwan za vi itana'a u usu akucunu'u, agba aa tsupa yi shi. 12Amma nna̱ wivu u ɗa e iva̱i iliyamunga'a, na a ciga a 'yuwan za vi izuwa'a u tsupa ili i na a paɗaa niyi. 13Amma nni inama yu una i ɗa yi kara niyi, u ta̱wa̱ na akapi o una̱ wu urotsu, agba a zuwa yi u tsupa iliyamunga i na a karai'i shi.

14Nna̱ vuma kopo iliyamunga uba̱ta̱ u moron ma̱ nden ma̱ yi reve wu uwwa usa̱n ko gba shi u kuwa̱ agba za vi ili wu lo shi, na a ciga a 'yuwan za na kopoi'i u tsupa ma̱ɓula̱. 15Amma nna̱ za vi ili'i u shi ta̱ lo, za na kopoi'i u ri n na waa tsupa shi. Nnu u tara yi ta̱ o una̱ wa atsupu, ikebe ya atsupu'u u la'a ta̱ ulambu'u.

Nden n sa'ani

16Nna̱ vuma pura̱ ugbozu wu usheli u na koto u revei vali shi za na koto za ro cigai zuwa shi, reve gba u von na̱ a̱yi, na a ciga a 'yuwan u tsupa ikebe i lolo reve wo o'wo ka va̱ yi. 17Na̱ dada va̱ yi 'yuwan suru suru a ca yi usheli'i, vuma'a u ta tsupa ikebe i lolo yi usheli u na koto u revei vali shi. 18<<She vu lyawa ka na a yuwusan tsuboci wuma wan.

19<<Vuma na suru voyin na̱ nama, na a ciga a 'yuwan o una yi.

20<<Vuma na suru cayi ma̱sula̱ mo ro kucci ko'o na̱ A̱sulazuva, na a ciga a 'yuwan o kototo yi.

21<<She vu ɓongi ko vu tara alaki o mocin wan, adama a na a̱ɗu fo omocin a ɗa i shi e iɗa ya Masar.

22<<She vu tara alaki a̱ ma̱runa̱ ko makpa'an wan. 23Ni i tara alaki e le, reve e showen mu n ta̱ gba a uwwa mesun me ele. 24Reve gba upan u va̱ u 'yon nu usuɗuwu a aci a̱ ɗu, reve mu una ɗu na̱ matsun me pe'eni. A̱vu a̱ma̱ci a̱ ɗu o o'wo nruna̱ muwun n ɗu waru mo o'wo mkpa'an.

25<<Nna̱ vu ca za ro okopu e ikebe a̱tsuma̱ a ama a̱ va̱ za na ri za vu ulambu, she vo o'wo tsu za vu ucasu wo okopu e ikebe wan; she zuwa yi u ca wu uda̱shiyi a aci wan. 26Nna̱ vu ushi utugu u moron ma̱ nden ma̱ wu o una̱ wi ili i na voo tono yi, vu ka̱mbuwa̱a̱ yi nu ulivu. 27Adama a na a̱yi ɗa niyi aapalutsu goon na waa palaa lipu va̱ yi. Na̱ nye waa lantsaa? Nnu u showen mu n ta uwwa yi, adama a na n tse ene ta̱ iliyali.

28<<She vu yuwaan A̱sula̱ adanshi a vama wan, waru she vi isula zagbain va ama a̱ wu wan.

29<<She vu tara mantsa ni itana yu uɗuma̱ ko masayan ma̱ ina̱bi ma̱ wu na vaa ca A̱sula̱ wan. Ni i ciga i 'yuwan i ca mu muwun mu ufaru n ɗu mo olobo. 30Ne ɗa waru vaa yuwan nu umatsun wu ufaru wi inan na̱ za vi ikyon ya̱ wu. Vu lyawa yi u yuwan rana cindere na̱ mma va̱ yi, reve o urana wa̱ kunla̱ vu ca mu a̱yi.

31<<I to o'wo ama a akiza a̱ va̱, adama o ndolo she i tama nama vu nama na nama vu una vu karai wan, vu variya musa̱n.>>

Currently Selected:

Mota̱a̱ 22: TSW

Highlight

Copy