Mota̱a̱ 24

Aza a Isra'ila a̱ usu ta̱ akucunu a̱ A̱sulazuva

1<<Reve A̱sulazuva a damma Musa, gawain a̱ ta̱wa̱ ya̱'a̱ va̱ a̱vu na̱ Haruna na̱ Nadab na̱ Abihu oɓolo na azagbain kupocindere a Isra'ila. A̱vu i ka̱ɗa̱to i yuwaan mu a̱ga̱nda̱ a̱ɗu ubuwu alanga. 2Agba Musa a̱ nde'en ɗa a rawa zuzu na̱ A̱sulazuva; akapi a na a buwai gba she a rawa zuzu wan. Waru she akapi a ama a na a buwai waru a kumba oɓolo na̱ a̱yi wan.>> 3Ana Musa dammai ama ili i na A̱sulazuva a dammai ni ili i na u zuwai suru, reve ama suru a̱ usu nu uɗyo u ta̱ a damma, <<Tsu ta yuwan ili i na A̱sulazuva a dammai suru.>> 4Reve Musa ɗana ili i na A̱sulazuva a dammai'i suru. Ana usana u tawai reve u 'yon nu usana, reve u suwa masa'a e ikyun i masasa'an, reve u shuwa̱ aatsura kupa ne ejere a atali o una̱ wu gundo kupa ne ejere va aza a Isra'ila. 5Reve u lyungu olobo a Isra'ila o ro a yuwan kucci vu ukula̱tosu reve waru a ca kucci muggono mi inan kucci muwwulai a̱ tyo e ekere a̱ A̱sulazuva. 6Reve Musa kene uɓatsulai wu mpasa'a reve u tsun a ataɗa, reve wu kyo'onu akapi a na a buwai a masa'a. 7A̱vu u tara Aatagada a Akucunu, a̱vu u ɗenuna̱ a atsuvu a ama. A̱vu suru nle a̱ usu, <<Tsu ta̱ yuwan ili i na A̱sulazuva a dammai suru, waru tsu ta yuwan tsutoni na̱ a̱yi.>> 8Reve Musa tara mpasa'a reve wu kyo'onuwo ama reve u damma, <<A̱yi nda a̱yi ɗa mpasa ma akucunu n na A̱sulazuva a yuwain na̱ a̱ɗu o una̱ wa adanshi a nda suru.>> 9Reve Musa na̱ Haruna na̱ Nadab na̱ Abihu, oɓolo na azagbain kupocindere a Isra'ila a kumba masasa'an. 10Reve e ene A̱sula̱ a Isra'ila. Za̱la̱ va apata va ana a̱ yi she damma ura̱'a̱ u na a yuwain na atali a na a̱ tsu ɗe safaya#24:10 Safaya cu'un va aatali o ro a ɗa a na a̱ ri na̱ mini ma̱ bulu cine vu revei zuva, kelu kelu tsa zuva. 11Agba A̱sula̱ a̱ 'ya̱sa̱n ukere wa̱ yi u ju'wa̱n azagbain a aza a Isra'ila shi. E ene ta̱ A̱sula̱, reve a lyuwa o sowo.

12Reve A̱sulazuva a damma Musa, <<Kumba a masasan ya̱'a̱ va̱. A̱vu vu piri, n ta ca wu aɓaci a atali ushe'un. N ɗana ta̱ wila̱ ni ili i na ama a̱ va̱ a̱a̱ kuru a atali'i, adama o rito ama'a.>>

13Ɗaɗa Musa 'yoyin oɓolo na̱ Josuwa za vi ikambi va̱ yi, a̱vu u kumba masasan ma̱ A̱sula̱. 14A̱vu Musa damma azagbai'in, <<Isawain pa i piri tsu, she tsu ka̱mba̱. Haruna na̱ Huru ta̱ da̱na̱ pa oɓolo na̱ a̱ɗu. Za na suru ri na̱ mawasan na̱ za va̱ yi u 'ya̱wa̱ ya̱'a̱ le.>>

15Ana Musa rawai a masasa'an, reve eleshe a̱ ɓa̱ru masasa'an. 16Tsugbain tsa̱ A̱sulazuva tsa̱ va̱la̱ ta̱ a Masasan ma Sinai, reve eleshe a pupala yi rana ta̱li. O urana we cindere, reve A̱sulazuva e ɗe Musa pe a̱tsuma̱ e eleshe'e. 17E yeni ya ama a Isra'ila tsugbain tsa̱ A̱sulazuva tso rotso ta̱ akina o ukula̱tosu zuva masasa'an. 18Reve Musa kumba a masasa'an a uwa pe e eleshe'e. Ɗe ɗa u shi a masasa'an rana na ayin amunga.

Currently Selected:

Mota̱a̱ 24: TSW

Highlight

Copy