Mota̱a̱ 21

1Apa nda wila̱ u na vaa ca le.

Agbashi a mmaci ma Ibrahim

2Na̱ vu tsula aagbashi a mmaci ma Ibrahim, u ta yuwan tsugbashi a'wan a̱ ta̱li, reve a aa'wan e cindere u ka̱ra̱ fa̱a̱n, waa tsupa ili shi. 3Nu u ta̱wa̱ ta̱ a̱yi a̱ nde'en, u to uta̱ a̱ nde'en. Amma nnu u ta̱wa̱ ta̱ na̱ ka, ka va̱ yi to uta̱ oɓolo na̱ a̱yi. 4Na̱ zagbain va̱ yi ca yi ta̱ ka, reve u matsaan yi olobo ko esheli, ka'a na̱ muwu'un o to o'wo a aza a zagbain va̱ yi. Reve a̱yi u ka̱ra̱ o uta̱ a̱yi a̱ nde'en. 5<<Amma na aagbashi'i a damma e eteshe, <N ciga ta̱ zagbain va̱ na̱ ka va̱ na̱ muwun n va̱, ma̱a̱ ka̱ra̱ fa̱a̱n shi,> 6reve zagbain va̱ yi ta̱wa̱ na̱ a̱yi uba̱ta̱ wa̱ A̱sula̱. A̱vu u ta̱wa̱ na̱ a̱yi o una̱ntsu ko a̱ nge'en mu una̱ntsu. Reve u ba̱ma̱ utsuvu wa̱ yi na̱ bele, a̱vu wo o'wo aagbashi a zagbain va̱ yi hali hali hali. 7Na̱ vuma wina usheli wa̱ yi wo o'wo aagbashi, woo uta̱ cine agbashi o olobo a̱ tsu uta̱ fa̱a̱n shi. 8Na̱ zagbain va̱ yi na tara niyi wo o'wo ka va̱ yi ciga yi shi, reve u lyawa a tsupaa yi. U ri nu ucira u na waa winaa omocin shi, ana wo o'wo u yuwaan niyi ili i na yi ntsayi shi. 9Nnu nu u tsula yi ta̱ adama wo o'wo ka vu ulobo wa̱ yi, u ta tara yi tsu usheli wa̱ yi. 10Nnu u zuwa ka ro, waa putsa yi ni ilyalya ni itana ko u 'yuwan o von na̱ a̱yi shi. 11Nu u yuwaan yi ili i ta'atsu i nda shi, u to uta̱ fa̱a̱n, waa tsupa kebe shi.>>

Mawwa mo usa̱n

12<<Za na suru lapai vuma hali vuma'a u kuwa̱, a̱yi fo gba a̱ to una yi. 13Amma nnu u yuwan yi nu ucigu wa̱ yi shi, amma A̱sula̱ a lyawa ta̱ ili fara, u ta suma a̱ tyo uba̱ta̱ u na moo foɓo. 14Amma na̱ vuma foɓo a̱vu wu una za ro nu ugbozu, a̱ to uta̱a̱ vuma'a a masa'a ma̱ va̱, a̱vu o una yi.

15<<Za na suru lapai dada va̱ yi ko mma va̱ yi, a̱ to una yi.

16<<Za na suru iva̱i vuma a̱vu u wina yi ko a cina yi na̱ a̱yi, a̱ to una yi.

17<<Za na suru isulai dada va̱ yi ko mma va̱ yi, a̱ to una yi.

18<<Na ama e re a yuwan mawasan, reve za ta̱ lapa za va̱ yi na aatali ko nu ukere amma vuma'a u kuwa̱ shi, agba a̱vu u von ubanakun a̱ a̱ga̱da̱, 19na̱ vuma'a u 'yon a̱vu u reme mmalu na aɗanga, za na faba niyi ta la'a, agba u ta tsupa adama a na u lungusa̱ niyi mantsa, reve waru u reve a̱ ka̱lyuwa̱ ta̱ vuma nda hali u ka̱mba̱ gbaga suru suru.

20<<Na̱ za vu u'wa faba aagbashi a̱ yi na aaɗanga, ko vali ɗa ko usheli, a̱vu aagbashi'i a̱ kuwa̱ o ukere wa̱ yi, a ciga a 'yuwan a ca yi oforo. 21Amma na aagbashi'i u kuwa̱ o urana'a ko urana we ire shi, aa ca yi oforo shi, adama a na aagbashi'i itana ya̱ yi i ɗa.

22<<Na ama e re a̱ ri a̱ nla̱ngi a̱vu a uwwato ka va̱ a̱a̱tsuma̱ usa̱n, hali a̱a̱tsuma̱'a̱ a̱ zuɗa̱, amma babu waru ili i ro, za na uwwato niyi usa̱n a ta lyuwa yi ugana, cine vali va̱ yi paɗai o ure u na a̱za̱ o uge'etosu a zuwai. 23Amma na̱ wu uwwa usa̱n, atsupu o to o'wo wuma na̱ wuma, 24lyusu na̱ lyusu, anga na anga, ukere nu ukere, anana na anana, 25ukulu o una̱ wu ukulu, a̱bi'in o una̱ wa̱ a̱bi'in, wuntsu o una̱ u wuntsu.

26<<Na̱ vuma faba lyusu va aagbashi a̱ yi, vali ko ka, a̱vu u lungusa̱ yi i ɗa, u lyawa aagbashi'i a̱ ka̱ra̱ fa̱a̱n o una̱ u lyusu va̱ yi. 27Nu u ga̱la̱ anga a aagbashi a̱ yi, vali ko ka, u lyawa aagbashi'i a̱ ka̱ra̱ fa̱a̱n o una̱ wa anga a̱ yi.>>

28<<No ogono a nan a̱ zuma̱ vali ko ka hali u kuwa̱, a ciga a 'yuwan a vara nan ndolo hali ukwa̱, she a tama nama va̱ yi wan, she e ece za vi ili, ili i ro wan. 29No oogono'o u tsu yuwusan ta̱ ne, waru o rono ta̱ za vi ili atsuvu, agba u gbedege yi shi, reve wu una vali ko ka, a ta vara na'an, a̱yi fo za vi ili'i o una yi. 30Na a paɗaa yi ugana u na waa tsupa, u ciga u 'yuwan u tsupa ili i na a paɗaa niyi suru adama u wawa wuma wa̱ yi. 31Na̱ na'an u zuma̱ ulobo ko usheli u vuma ro, a ta yuwaan yi cine wila̱ u dammai. 32Amma nu u zuma̱ aagbashi vali ko ka, a̱yi za vo oogono u ta tsupa zagbain va aagbashi a vali ko ka'a shekel#21:32 Shekel a̱yi ɗa makundatsun mo ume ma na a yuwusayin ulinga a mantsa ma aza Isra'ila azurufa mata'atsu, reve waru a vara na'an na atali hali ukwa̱.

33<<Na̱ vuma ka̱pa̱ ko u ka̱ca̱ra̱ a̱ka̱ri agba u ciɗo yi shi, reve oogono a nan ko mololi ma̱ riya̱ pe, 34a̱yi za na ka̱pa̱i a̱ka̱ri o ndolo u ta tsupa za vu nama ndolo a̱tyo a na u paɗaa niyi adama a nama'a, reve za va̱ a̱ka̱ri'i wo o'wo na̱ za na kuwa̱i'i.

35<<No oogono a nan o ro a̱ zuma̱ oogono a nan a vuma ro hali u kuwa̱, a ta wina ogono a nan a na a̱ ri wuma reve e ne'eshen ikebeꞌe na̱ a̱kwa̱kwa̱ a na'an una̱ta̱. 36Amma ne e reve oogono'o u tsu zumusa̱ ta̱ a̱za̱ a̱ yi, agba za vi ili u gbedege yi shi, a̱yi za vo oogono o ndolo u ta̱ tsupa za vo oogono o ndolo no oogono o ro, reve a̱yi za vo oogono o ndolo u tara a̱kwa̱kwa̱ o oogono'o.>>

Currently Selected:

Mota̱a̱ 21: TSW

Highlight

Copy