Mota̱a̱ 20

Wila̱ Kupa

1Reve A̱sula̱ a yuwan adanshi a nda suru:

2<<A̱mu ɗa A̱sulazuva, A̱sula̱ a̱ ɗu, za na uta̱a̱ nɗu a̱tsuma̱ a Masar diga e iɗa i tsugbashi.

3<<Ya̱a̱ da̱na̱ na̱ musula̱ n ro shi, she a̱mu.

4<<She vu yuwaan aciya̱wu a̱ma̱li tso oroci e ili i ro zuva ko o uvaɗi ko a̱ mini za̱la̱ vu uvaɗi wan. 5She vu kingyowa̱ le ko vu yuwaan le a̱ga̱nda̱ wan, adama a na a̱mu A̱sulazuva, A̱sula̱ a̱ wu, A̱sula̱ a̱ tsushu'un a ɗa. Nna̱ vu 'yuwan mu, n ta̱ ge'eto ugundo wa̱ wu diga a̱ muwun ma̱ wu a̱ 'ya̱wa̱ a̱ muwun n tsukaya ma̱ wu hali a̱ tyo a̱ muwun n tsukaya m muwun n tsukaya n le. 6Agba n tsu roco ta̱ aza a na a ciga numu waru aa yuwusan tsutoni na̱ wila̱ u va̱ icigi i na i tsu vadala shi hali mantsa ukpakukupa.

7<<She i yuwan ulinga na ala a̱ A̱sulazuva A̱sula̱ a̱ ɗu pere m pere wan, adama a na A̱sulazuva aa lyawa za na yuwain ulinga na ala a̱ yi pere m pere fa̱a̱n shi.

8<<I cuwan nu urana wa Ashibi, i tara yi na akiza, cine A̱sulazuva A̱sula̱ a̱ ɗu a zuwa nɗu. 9Vu ta̱ na̱ rana ta̱li, vu yuwan linga va̱ wu suru a̱tsuma̱ a rana'a. 10Agba urana we cindere Ashibi a ɗa e ekere a̱ A̱sulazuva A̱sula̱ a̱ wu a ɗa. O urana u ndolo, ko za she u yuwan ulinga wan. Muwun me esheli ma̱ wu na̱ muwun mo olobo ma̱ wu a yuwan ulinga wan. Waru agbashi e esheli na agbashi o olobo a̱ wu a yuwan ulinga wan. Iliyamunga ya̱ wu, ko mocin na ri pe nden a̱tsuma̱ o u'wa wa̱ wu a yuwan ulinga wan. 11Adama a na a rana ta̱li ɗa A̱sulazuva a yuwain ili suru zuva ni iɗa, na̱ mala, ni ili i na i ri pe a̱tsuma̱ e le suru. Reve o urana we cindere wi ivuwan. A̱vu u zuwaa urana wa Ashibi aba'un, reve wo o'woto yi na akiza.

12<<Vu yuwan tsutoni na̱ dada na̱ mma va̱ wu, adama vu yuwan a'wan a̱ a̱bunda̱ e iɗa i na A̱sulazuva A̱sula̱ a̱ wu aa ca wu.

13<<She vu una vuma nu ucigu wa̱ wu wan.

14<<She vu yuwan tsipere wan.

15<<She vu yuwan wivu wan.

16<<She vu usuwa̱ nanza ili i na vu revei shi wan.

17<<She vu zuwa esu a̱ wu o u'wa, ko a ka va̱ yi wan, ko a aagbashi a vali ko a aagbashi a ka a̱ yi, ko e inan, ko o nloli, ko e ili i ta̱ i moron ma̱ nden ma̱ wu wan.>> 18Ana ama suru e enei tsata ni imaɗatsu na̱ mesun ma avana a̱ a̱giri'i na̱ masasa'an o utusa̱ mikyon, reve a uwwa wovon a̱vu e reme meje'en ma̱ lipu. A̱vu e isawan alanga. 19A̱vu a damma Musa, <<Yuwaan tsu adanshi, tsu ta uwwa wu. Amma she vu lyawa A̱sulazuva a yuwaan tsu adanshi wan, adama tsu kuwa̱ wan.>> 20Reve Musa damma ama'a, <<She yu uwwa wovon wan, A̱sula̱ a̱ ta̱wa̱ ta̱ adama u lyungwa̱ ɗu, adama i da̱na̱ na̱ wovon wa̱ yi tsa̱ra̱ i yuwan unusu wan.>> 21A̱vu ama'a e isawan alanga, a mantsa ma na Musa da̱shi rawai zuzu ni irumbu lon uba̱ta̱ u na A̱sula̱ a̱ ri. 22Reve A̱sulazuva a damma Musa, <<Apa ili i na vaa damma ama a Isra'ila, <Ye ene ta̱ na aciya̱ɗu a na n yuwain adanshi na̱ a̱ɗu diga zuva. 23She i yuwan musula̱ n ro n azurufa ko n zinariya n na oo ɓolo na̱ a̱mu wan. 24I suwaa mu masa'a ma̱ ci'in, zuva va̱ yi ɗa yaa ca mu kucci vu ukula̱tosu ɗu na̱ kucci muwwulai vi ikyon i ɗu na̱ vi inan i ɗu. Uba̱ta̱ u na suru n zuwai a cuwan na ala a̱ va̱, n ta̱ ta̱wa̱ lo n zuwaa ɗu aba'un. 25Ni i yuwaan mu masa'a ma atali, she i yuwan yi na atali a na e she'ein wan, adama a na ni i she'en yi na̱ rumu yo o'woto yi ta̱ idaba. 26Agba she i kumba masa'a ma̱ va̱ nu udasata wan adama ene ataɓu a̱ ɗu zuva va̱ yi wan.> >>

Currently Selected:

Mota̱a̱ 20: TSW

Highlight

Copy