Mota̱a̱ 13

Matawa ma mawun mo ufaru

1Reve A̱sulazuva a damma Musa, 2<<Tawaa mu mawun mo ufaru za na ri vali suru. Umatsun wu ufaru suru a̱tsuma̱ a aza a Isra'ila za va̱ ɗa, ko vuma, ko inama.>>

3Reve Musa damma ama'a, <<I cuwan nu urana u nda u na yu uta̱i a̱tsuma̱ e iɗa ya Masar, iɗa i tsugbashi, a na yu uta̱i a̱tsuma̱ o u'wa u tsugbashi. Nu ukere wu ucira u ɗa A̱sulazuva o uta̱ nɗu a̱tsuma̱ o uba̱ta̱ u nda. She i tama opopofu a na a yuwain na̱ wolilo wan. 4Ana'an nda a̱tsuma̱ o woto wa Abib#13:4 woto wa Abib Abib a̱yi ɗa u shi woto wu ufaru wa aa'wan wa aza a Isra'ila za na ri una̱ta̱ na̱ woto wa ta'atsu a̱ tyo za na̱shi wo gogo, a̱ tsu ɗe yi ta̱ waru Nisan ɗa yoo uta̱ a̱tsuma̱ e iɗa ya Masar. 5Agba nna̱ A̱sulazuva a̱ ta̱wa̱to ɗu a̱tsuma̱ e iɗa ya aza a Ka'ana na aza a Hitiya, na aza a Amoriya, na aza a Hiviya na aza a Jebusiya, aza a na A̱sulazuva a kucinayi nkaya ma wu na wa ca wu, iɗa i na yee yeneshe maani ni ishiki. I yuwusan a̱ga̱nda̱ a nda a̱tsuma̱ o woto u nda. 6I tamusa opopofu a na a yuwain na̱ wolilo shi hali rana cindere, amma o urana w cindere reve i yuwaan A̱sulazuva a̱buki. 7I tama opopofu a na a yuwain na̱ wolilo shi hali rana cindere. She ee ene opopofu a na a yuwain na̱ wolilo e ekere a̱ ɗu wan waru she ee ene wolilo o upasu wi iɗa i ɗu wan. 8O urana u ndolo, vu damma ulobo wa̱ wu, <N ta yuwusan ili i nda adama e ili i na A̱sulazuva a yuwaan numu ana wu uta̱a̱ numu a̱tsuma̱ e iɗa ya Masar.> 9A̱buki a nda o to o'wo tsu urotsu e ekere a̱ wu waru tsi ili yu cuwusan a̱ cin va̱ wu. Adama uritosu wa̱ A̱sulazuva u da̱na̱ o una̱ wa̱ wu. Waru adama a na nu ucira wu ukere wa̱ A̱sulazuva a ɗa wu uta̱a̱ nɗu a̱tsuma̱ e iɗa ya Masar. 10I yuwan ili i nda a mantsa ma na a zuwai aa'wan suru a mantsa ma nda.

11<<Na̱ A̱sulazuva a̱ ta̱wa̱to ɗu e iɗa ya Ka'ana cine u kucinaa nuwu na̱ nkaya ma̱ wu reve waru u ca wu a̱yi, 12vu ta ca A̱sulazuva umatsun wu ufaru suru. Umatsun wu ufaru wi iliyamunga ya̱ wu suru ogono a̱za̱ a̱ A̱sulazuva a ɗa. 13Umatsun wu ufaru u mololi suru vu ta gura tsupaa yi na̱ ma̱giri'i. Agba nna̱ vu ciga vu tsupaa molloli mo ndolo shi, vu ta kuɗa yinlu ya̱ yi. Muwun mo olobo mu ufaru n ɗu suru i ta tsupaa le.

14<<Diga gogo no olobo a̱ ɗu e ece wu, <Nye i ɗa urevu wi ili i nda?> Vu damma le, <Nu ukere wu ucira wa̱ yi, ɗaɗa A̱sulazuva o uta̱a̱ ntsu Masar, diga e iɗa i tsugbashi. 15Firi'awuna da̱na̱ ta̱ na aciyogbamu, a̱vu u 'yuwan a lyawa tsu tsu ka̱ra̱. Ɗaɗa A̱sulazuva o unai mawun mo ufaru mo ulobo a̱tsuma̱ a Masar suru, vuma na̱ nama. A̱yi ɗa i zuwai tsaa yuwusan kucci mawun mo ufaru me inama suru e ekere a̱ A̱sulazuva. A̱yi ɗa waru i zuwai maa tsupusa adama a mawun mo ufaru ma vuma suru e ekere a̱ A̱sulazuva.> 16Waru u to o'wo wu tsu urotsu o ukere wa̱ wu nu urotsu a̱ cin va̱ wu a na A̱sulazuva o uta̱a̱ tsu ta̱ a̱tsuma̱ a Masar nu ukere wu ucira wa̱ yi.>>

Aza a Isra'ila a̱ nge'en m Mala ma̱ Shili

17Ana Firi'awuna lyawai ama'a a̱ ka̱ra̱i, A̱sula̱ a tara le u kuru ne ele nu ure wi iɗa ya aza a Filistiya shi, ko na wo o'woi a̱yi ɗa u la'ai mokoɗi mo ure. Adama a na A̱sula̱ a damma ta, <<Na a ga'an nu uvon, a ta vadala okolo e le a̱ ka̱mba̱ Masar.>> 18A̱vu A̱sula̱ a̱ kuru ne ele nu ure wa̱ a̱tsumona a̱ tyo a Mala ma̱ Shili. Aza a Isra'ila a̱ da̱na̱ ta̱ ufoɓu u na a yuwan uvon, ana o uta̱i e iɗa ya Masar.

19Reve Musa tara etele a̱ Isuhu adama a na Isuhu zuwa ta̱ aza a Isra'ila a tara akucunu, u damma, <<Na amayun A̱sula̱ a ta bura ɗu, reve ni i ciga i 'yuwan i tara etele a̱ va̱ diga pa a̱ ka̱ra̱.>>

20Reve a̱ 'yon diga Suko, a̱vu a̱ va̱la̱ a Etam o ukosu wa̱ a̱tsumona. 21Nu urana u tsu wala ta̱ elime e le a̱tsuma̱ o oɓolo e eleshe. Na ayin waru u ta̱ pe a̱tsuma̱ o oɓolo a akina tsa̱ra̱ u ca le ekan. Adama a gura yuwan mmalu nu urana na ayin. 22Oɓolo e eleshe'e nu urana, no oɓolo a akina na ayin, a kasa na ama'a shi.

Currently Selected:

Mota̱a̱ 13: TSW

Highlight

Copy