Mota̱a̱ 12
12
Adanshi adama a mapasa
1Reve A̱sulazuva a yuwan adanshi na̱ Musa na̱ Haruna ele pe a̱tsuma̱ e iɗa ya Masar, 2diga gogo a̱ 'ya̱wa̱, woto u nda u to o'wo ɗu woto wu ufaru wa aa'wan. 3I damma ama a Isra'ila suru a na o urana wa kupa u woto u nda, vuma suru u zami mokyokyon ko megbgbele, adama a ama o u'wa a̱ yi, u'wa u ta̱ suru iliyamunga i ta̱. 4Nna̱ u'wa'a u ri a̱bunda̱ a na waa gura tama kyo'on ma̱ɓula̱ shi, to o ɓolo na̱ moron me nden me le, reve e ne'eshen ma̱giri'i'i o una̱ wa̱ a̱bunda̱ o u'wa suru. I ta̱ ka̱lyuwa̱ a̱bunda̱ a ama a na aa tama ma̱giri'i'i. 5Na a 'yuwan a ciga ma̱giri'i'i u da̱na̱ na̱ mɓa̱la̱ wan, waru u da̱na̱ za va aa'wan a̱ ta̱. I ta gura tara a̱tsuma̱ e ikyon ko mgbele'e. 6I gutsu le ulobonu, hali a̱ tyo o urana wa kupa na̱ a̱za̱ a̱ na̱shi u woto'o. Reve suru nɗu oɓolo a ama'a i paɗa le nu ulivu, kafu uba̱ta̱ u rumba̱na̱. 7Reve e kene mpasa'a o kikyo'onu e eɓele na̱ gon vu na̱ntsu vu 'wa na aa tama inama i mugiri'i'i. 8<<A̱tsuma̱ a ayin a nda, a ciga a 'yuwan a̱ zun inama'a na akina. A ta tama le oɓolo na̱ a̱vu'un o okono no opopofu a na a̱ ri na̱ wolilo shi. 9She i tama inama'a igishi wan, ko a ralu yi wan. I zun inama'a suru na akina, oɓolo na aaci na ana ni ili ya̱ a̱tsuma̱. 10She i lyawa akapi aa asa wan. Ili i na a tamai a̱tsuma̱ a ayin o ndolo shi, i 'yuwan i ciga i kula̱to le kafu usana u tawa. 11Apa cine yaa tama yi: yo oto a̱tugu a mmalu, yo oto atan, reve i guza̱ aɗanga a̱ ɗu e ekere. A̱vu i jika̱ utamu, adama a na urana wa̱ A̱buki a Mapasa ma̱ A̱sulazuva a ɗa.
12<<A̱tsuma̱ a ayin o ndolo a ɗa maa uwulai a̱tsuma̱ e iɗa ya Masar, reve mu una muwun mo olobo mu ufaru va ama na̱ vi inama a̱tsuma̱ a Masar. Waru n ta̱ ge'eto musula̱ mi iɗa ya Masar suru. A̱mu ɗa A̱sulazuva. 13Amma mpasa n na yi kyo'onuyi a̱ na̱ntsu vu 'wa ɗu u to roco mu uba̱ta̱ u na i ri nden. Na̱ me ene mpasa'a, n ta pasa ɗu. Na̱ n zuwa iɗa ya Masar a̱tsuma̱ a̱ a̱tsuma̱lima̱, ko mɓa̱la̱ n na moo kototo ma̱a̱ ju'wa̱n ɗu shi.
14<<I ta̱ n cuwusan nu urana u nda kuci. I ta̱ a̱ ri n yuwusan a̱buki'i a̱ tyo e ekere a̱ A̱sulazuva a mantsa ma̱ ɗu. Wila̱ u na wa̱a̱ da̱na̱ lo kukuci. 15I ta tama opopofu a na a̱ ri na̱ wolilo shi, hali rana cindere. O urana wu ufaru i ko'o wolilo a 'wa ɗu suru. Za na tamai ili i na a yuwain na̱ wolilo biti diga o urana wu ufaru a̱ tyo o urana we cindere wa̱ a̱buki'i, a̱ to uta̱a̱ yi a̱tsuma̱ a ama a Isra'ila. 16O urana wu ufaru i yuwan iɓolo ya akiza na̱ o urana we cindere wa̱ a̱buki'i. Aa yuwan ulinga a̱tsuma̱ a rana ndolo shi. Ili i na vuma suru a lyuwa ɗa goon woo foɓo.
17<<I ta yuwan a̱buki o opopofu a na a̱ ri na̱ wolilo shi, adama a na a̱tsuma̱ o urana u nda u ɗa gan mu uta̱ nɗu oɓolo oɓolo a̱tsuma̱ e iɗa ya Masar. Adama o ndolo i guza̱ urana u nda diga gogo hali a̱ tyo a̱ muwun mu gundo mu gundo ɗu. 18A̱tsuma̱ o woto wu ufaru, diga o urana wa kupa na̱ a̱za̱ a̱ na̱shi nu ulivu, i tama opopofu a na a̱ ri na̱ wolilo shi hali a̱ tyo o urana wu ushin na̱ za ta̱ u woto'o nu ulivu. 19A̱tsuma̱ a rana cindere nda, she a̱ tsura̱ wolilo a 'wa ɗu wan. Za na tamai ili i na i ri na̱ wolilo suru, a̱ to uta̱a̱ yi a̱tsuma̱ a ama a Isra'ila, ko na̱ a̱yi omocin ɗa ko umatsun wi iɗa. 20She i tama ili i na i ri na̱ wolilo wan, uba̱ta̱ u na i da̱nuyi suru, i tama opopofu a na i ri na̱ wolilo wan.>>
21Reve Musa ɗe azagbain a ama a Isra'ila, a̱vu u damma le, <<'Ya̱wa̱i i ɗangula mugiri'i o una̱ wu gundo ɗu reve i paɗa mugiri'i m Mapasa. 22Reve i tara makata ma̱ hiso i tsupu a̱tsuma̱ a mpasa'a, a̱vu yi kyo'onu e eɓele na̱ gon vu na̱ntsu vu 'wa ɗu. She nanza uta̱ o u'wa wa̱ yi wan, she usana. 23Adama a na A̱sulazuva a ta uwulai wu ga̱la̱ aza a Masar. Agba na̱ we ene mpasa'a gon ne eɓele a̱ na̱ntsu ɗu, A̱sulazuva a ta pasa una̱ntsu'u. Waa lyawa za vu ukototosu u uwa a 'wa ɗu wu ga̱la̱ ɗu shi.
24<<I kuru adanshi a nda wo o'wo ɗu ili i na ya̱a̱ da̱na̱ a̱ kurusu hali hali, na̱ a̱ɗu na̱ limatan ɗu. 25Ni i uwa e iɗa i na A̱sulazuva a yuwaan nɗu nzuwulai nna waa ca ɗu, i ta̱ da̱na̱ a̱ kurusu ili i nda. 26Reve nna̱ muwun n ɗu me ece ɗu, <Nye ili i nda i ri e ekere a̱ ɗu?> 27Reve i damma le, <A̱buki a Mapasa a̱ tyo e ekere a̱ A̱sulazuva, za na pasai 'wa va aza a Isra'ila a̱tsuma̱ a Masar a̱vu u lyawa 'wa tsu ana u ga̱la̱i aza a Masar.> >> Reve ama suru a̱ ka̱ɗa̱to a yuwan a̱ga̱nda̱. 28Reve ama a yuwan cine A̱sulazuva a damma nle o una̱ wa Musa na̱ Haruna tsoyi.
29Na ayin uɓatsu, reve A̱sulazuva a̱ ga̱la̱ umatsun wu ufaru wa Masar; diga a mawun mo ufaru ma Firi'awuna mogono a̱ tyo a mawun mo ufaru ma za na ri a̱tsuma̱ o u'wa wa ali. Ne ɗa fo wu ga̱la̱i umatsun wu ufaru vi iliyamunga'a suru. 30Reve Firi'awuna na azagbain a̱ yi na ama a Masar suru a̱ 'yon na ayin adama a na o u'wa biti a lamba vuma na kuwa̱i shi. A̱vu mesun na̱ yisaali lon i da̱na̱ uba̱ta̱ suru a̱tsuma̱ a Masar adama a̱ a̱tsumola̱ngu.
Mota̱a̱ a̱tsuma̱ a Masar
31Reve Firi'awuna lyunguwa̱ Musa na̱ Haruna a̱tsuma̱ a ayi'in, a̱vu u damma, <<Uta̱i! I lyawaa mu ama a̱ va̱. Na̱ a̱ɗu na ama a̱ ɗu, 'ya̱wa̱i i yuwaan A̱sulazuva a̱ga̱nda̱ cine i dammai. 32Tarai ikyon na̱ mgbele n ɗu ni inan i ɗu cine i dammai, i ka̱ra̱, reve gba i zuwaa mu aba'un.>>
33Reve ama a Masar a zuwa aza a Isra'ila'a elime a̱ jika̱ a lyawaa le iɗa i le. A yuwusan ta̱ majiyan, <<Na ama a nda o uta̱ shi, suru ntsu tsu ta̱ kuwa̱i!>> 34Reve ama'a a tara yira i na koto a̱ ja̱mba̱ra̱i na̱ wolilo shi. Reve a̱ kutsulu ebelu e le a̱ a̱tugu e le reve o wo'o a avangaci e le. 35Reve aza a Isra'ila a yuwan ili i na Musa damma nle a yuwan. Ɗaɗa a patiyi ama a Masar e ne'e le ili i na a yuwain na̱ azurufa na̱ zinariya ni itana yu uritosu. 36Reve A̱sulazuva a zuwa aza a Isra'ila a̱ tsura̱ isa'ani e ekere aza a Masar. A̱vu a ca le ili i na a patiyi. Ne ɗa ama a Isra'ila a̱ pura̱i utsuru wa ama a Masar.
37Reve ama a Isra'ila a̱ 'yon diga Ramase a̱ ka̱ra̱ a̱ tyo Suko. Waru a̱ da̱na̱ ta̱ ali zuzu nu ukpakukupa ukpakuta̱li (600,000) agba e kece a̱ma̱ci na̱ muwun shi. 38Oɓolo a ama a̱ a̱bunda̱ aza a na ama a Isra'ila a ɗa shi o toni le ta̱ fo oɓolo no oɓolo e inan ni ikyon na̱ mgbele n le suru. 39Reve a yuwan emeshen a na a̱ tsuyin wolilo shi na̱ yira i na o umbai a̱tsuma̱ a Masar, a̱ da̱na̱ na̱ wolilo shi adama a na ugba̱ru u ɗa a̱ gba̱ra̱ nle o uta̱ a̱tsuma̱ a Masar. A̱ tsura̱ mantsa ma na o foɓoo aciya̱le ilyalya shi.
40Ama a Isra'ila a̱ da̱nu ta̱ a̱tsuma̱ a Masar a'wan ukpakuna̱shi na̱ mata'atsu (430). 41A̱tsuma̱ o urana wu ukosu wa aa'wan o ukpakuna̱shi na̱ mata'atsu gan (430), ɗaɗa ama a̱ A̱sulazuva o uta̱i a lyawai iɗa ya Masar. 42A̱tsuma̱ a ayin o ndolo a ɗa A̱sulazuva a zuwai esu e ipiri ya ama a̱ yi, adama wu uta̱a̱ le a̱tsuma̱ e iɗa ya Masar. Adama o ndolo a ɗa ama a Isra'ila aa tawaa A̱sulazuva ayin a nda diga lo hali a̱ tyo a̱ muwun n tsukaya n le.
Wila̱ wa̱ A̱buki a Mapasa
43Reve A̱sulazuva a damma Musa na̱ Haruna, a̱yi nda a̱yi ɗa wila̱ wa̱ A̱buki a Mapasa, <<She a lyawa takpaci tama yi wan. 44Amma aagbashi a na a tsulai waru a paɗai uryumbu u ta gura tama. 45Mocin ko aagbashi a na a tarai ulinga wa atsupu waa tama yi shi.
46<<O u'wa u ta̱ u ɗa aa tama yi suru. Yaa tara nama a̱ 'ya̱wa̱ o u'wa u ro shi, waru she i kuɗa ko eetele a̱ ta̱ a̱ yi wan. 47Ama a Isra'ila suru a ta yuwan A̱buki a Mapasa'a.
48<<Amma takpaci na ri nden a̱tsuma̱ a̱ ɗu waru u cigai u yuwaan A̱sulazuva A̱buki a Mapasa, a ta paɗa muwun mo olobo ma̱ yi uryumbu suru. Ɗaɗa waa gura yuwan a̱buki'i tsu umatsun wi iɗa'a. Agba za na a paɗai uryumbu shi waa tama yi shi. 49Wila̱ u ta̱ u ɗa adama o umatsun wi iɗa na̱ takpaci na ri nden oɓolo na̱ a̱ɗu.>>
50Reve ama a Isra'ila suru a yuwan cine A̱sulazuva a dammai Musa na̱ Haruna tsoi. 51A̱tsuma̱ o urana u ndolo u ɗa gan A̱sulazuva o uta̱yi ama a Isra'ila a̱tsuma̱ a Masar oɓolo oɓolo.
Currently Selected:
Mota̱a̱ 12: TSW
Highlight
Share
Copy
Want to have your highlights saved across all your devices? Sign up or sign in
©️2025 Language Development and Translation Initiative (LDTI)
