Mota̱a̱ 14
14
Mapasa ma Mala ma̱ shili
1Reve A̱sulazuva a damma Musa, 2<<Vu damma ama a Isra'ila a vadala a̱ ka̱mba̱ a̱ca̱pa̱ a̱ va̱la̱ zuzu na̱ Pi Hahiro e memere ma Migadola na̱ Mala. A̱ va̱la̱ a̱ nge'en m mala a̱ nka̱la̱la̱i na̱ Ba'al Zefun. 3Ne ɗa Firi'awuna a yuwan majiyan u damma, <A̱ ta̱ a̱ ka̱nda̱riya̱ a̱tsuma̱ e iɗa'a. A̱tsumona a̱ guza̱ le ta̱.> 4Reve waru n zuwaa Firi'awuna aciyogbamu, a̱vu u saɓa le, reve a̱mu n tsura̱ ala a aci a Firi'awuna no oɓolo a̱ a̱soja a̱ yi. Ne ɗa ama a Masar ee reve na a̱mu ɗa A̱sulazuva.>> Reve gba ama a Isra'ila a yuwan ne.
5Ana a dammai Firi'awuna a na ama'a a suma ta̱, a̱yi na azagbain a̱ yi a vadala ta̱ okolo e le reve a damma, <<Nye i ɗa tsu yuwain tsunda? Tsu lyawa ta̱ aza a Isra'ila a̱ ka̱ra̱, waru tsu lamba ta̱ tsugbashi tsa na aa yuwusaan tsu!>> 6Reve u zuwa o foɓo ikeke yi ido ya̱ yi, a̱vu u tara a̱soja a̱ yi. 7A̱vu u tara ikeke yi ido ukpakuta̱li (600) aza a na a la'ai ucira na akapi a na a buwai a̱tsuma̱ a Masar suru. Keke vu do suru ta̱ na̱ yali i na i tsu ronuso yi. 8Reve A̱sulazuva a zuwa Firi'awuna mogono ma Masar ma yuwan aciyogbamu, tsa̱ra̱ u saɓa aza a Isra'ila aza a na o utusa̱ babu wovon. 9Reve aza a Masar, ido ni ikeke yi ido na akumbi e le na̱ a̱soja suru a saɓa le, reve a cina le ele uva̱lu a̱ nge'en m Mala ma̱ Shili zuzu na̱ Pi Hahiro a̱ nka̱la̱la̱i na̱ Ba'al Zefun.
10Ana aza a Isra'ila e enei mogono na̱ a̱soja a̱ yi zuzu ne ele, reve a uwwa wovon lon, reve e showen A̱sulazuva tsura̱ u kamba le. 11Reve a damma Musa, <<Nye i ɗa vu yuwaan ntsu tsunda? Cine vu uta̱a̱ ntsu a̱tsuma̱ a Masar tsa̱ra̱ tsu ta̱wa̱ tsu kuwa̱ a̱tsumona? Tsu shi ta̱ na ason a na a̱ shi a̱ ciɗo tsu na̱ a̱bunda̱ a̱tsuma̱ a Masar. 12Ashe tsu damma wu a̱tsu pe a̱tsuma̱ a Masar, <Vu lyawa tsu, tsu yuwaan aza a Masar tsugbashi shi?> Gogo a̱tsu ɗa nda a dansaa wu waru, u shi ta̱ la'aa tsu tsu yuwaan aza a Masar tsugbashi ana tsa̱a̱ kuwa̱ a̱tsumona a nda.>>
13A̱vu Musa damma ama'a, <<She yu uwwa wovon wan. Isawain uba̱ta̱ u na i ri ye ene, A̱sulazuva a ta wawa ɗu ana'an. Ya̱a̱ da̱shi ene aza a Masar a nda shi, diga ana'an. 14A̱sulazuva a ta yuwan nla̱ngi adama a̱ ɗu, a̱ɗu de isawain kuci.>> 15Reve A̱sulazuva a damma Musa, <<Adama a̱ nye vu showen numu? Vu damma ama a Isra'ila a wala e elime. 16Vu 'ya̱sa̱n aaɗanga a aguɓa a̱ wu zuva, vu canana ukere wa̱ wu zuva mala vu ɓatsalai mini'i, adama ama a Isra'ila a̱ ka̱ra̱la̱i pe e memere ma mala'a e iɗa yu 'yewu. 17Waru n ta zuwaa ama a Masar aciyogbamu cine oo toni le pe, reve n yuwan ala a aci a Firi'awuna no oɓolo a̱ a̱soja a̱ yi suru, ni ikeke yi ido ya̱ yi na akumbi e le. 18Ɗaɗa aza a Masar ee reve a na a̱mu ɗa A̱sulazuva, a mantsa ma na n tsura̱i tsugbain a aci a Firi'awuna no oɓolo a̱ a̱soja a̱ yi, ni ikeke yi ido ya̱ yi na akumbi e le.>>
19A̱vu malingata ma̱ A̱sula̱, za na tsu wala elime a̱ a̱soja a aza a Isra'ila ma̱ ka̱mba̱ a̱ca̱pa̱ e le. A̱vu waru oɓolo e eleshe a̱ 'yon elime e le, a̱vu u ka̱mba̱ a̱ca̱pa̱ e le. 20A̱vu u uwa e memere ma aza a Isra'ila no oɓolo a̱soja a aza a Masar. Reve eleshe'e u ca irumbu. Tsundolo tsa ɗa eleshe'e wu kasa nle ayin ma̱ɓula̱ ko za rawa zuzu na̱ za va̱ yi shi.
21A̱tsuma̱ a ayin o ndolo, a̱vu Musa 'ya̱sa̱n ukere wa̱ yi a̱ tyo a mala'a, a̱vu A̱sulazuva a zuwa upepu wa asana u lapa ayin suru a̱vu mini ma ɓatsalai, hali uba̱ta̱'a̱ u 'yewe. A̱vu mini'i me ne'eshen. 22A̱vu aza a Isra'ila a wala e memere ma mala'a a pasa e iɗa yu u'yewu nu uɓaɓu u mini o ukere usa'ani nu ukere wu ugula̱.
23Reve aza a Masar a̱ kuru le pe a mala'a ni ido ya Firi'awuna suru, na akumbi e ido'o ni ikeke yi ido. 24Agba na̱ wasasa, a̱vu A̱sulazuva a̱tsuma̱ o oɓolo a akina'a ne eleshe u ka̱lyuwa̱ a̱soja a aza a Masar, a̱vu u zuwa le a̱ ra̱pula̱. 25A̱vu u zuwa a̱ga̱nda̱mu e ikeke yi ido o sovuro. Wo o'wo ta̱ usa̱n e reme mmalu. Adama o ndolo, a̱vu aza a Masar a dammulai va̱ni le, <<Tsu sumai ama a nda'a! A̱sulazuva ta yuwusan uvon na̱ a̱tsu, u ta yuwusaan le uvon.>>
26A̱vu A̱sulazuva a damma Musa, <<Canana ukere wa̱ wu a̱ tyo a mala'a, adama mini'i u ka̱mba̱, reve u lyuwa aza a Masar na̱ a̱soja ni ido ni ikeke yi ido i le.>> 27A̱vu Musa canana ukere wa̱ yi a̱ tyo a mala'a. Na̱ wasasa a̱vu mini ma̱ ɓoliso cine u shi. Reve aza a Masar a ciga a suma, a̱vu A̱sulazuva e keɓe le pe a̱tsuma̱ a mala'a. 28Reve mini mo ɓoluloi, a̱vu u lyuwa ido ni ikeke yi ido, na̱ a̱soja suru, aza a na o toniyi aza a Isra'ila a̱ tyo a mala'a. Suru nle ɗe ɗa a̱ kuwa̱i. Ko vuma ta̱ la'a shi.
29Aza a Isra'ila gba a pasalai ta̱ mala'a e iɗa yu u'yewu, nu uɓaɓu u mini o ukere u sa'ani no ukere wu ugula̱ u le. 30Ne ɗa A̱sulazuva a wawai ama a Isra'ila e ekere a ama a Masar o urana u ndolo. A̱vu aza a Isra'ila e ene a̱kwa̱kwa̱ a aza a Masar lakatala a̱ nge'en m mala. 31Ana aza a Isra'ila e enei ucira u gbain u na A̱sulazuva o rocoi a̱ tyo e ekere a aza a Masar, reve a uwwa wovon wa̱ A̱sulazuva. A̱vu a̱ usu A̱sulazuva na aagbashi a̱ yi Musa.
Currently Selected:
Mota̱a̱ 14: TSW
Highlight
Share
Copy
Want to have your highlights saved across all your devices? Sign up or sign in
©️2025 Language Development and Translation Initiative (LDTI)
