Lawana Nani 72
72
LAWANA 72 (71)
King tâwan pura sunra
Salaman lawana.
1Man, Gâd, king ra kasakka lâka bara
diara wapni daukaia ba yas,
2baha wapni daukaia bara kasakka lâka wal ba mita,
man uplikam umpira nani ba pura wihta aimakbia.
3Unta tara nani bara il sirpi nani ba wal,
kupia kumi bara wapni kaia lâka
uplikam nani ra yabi banhs.
4King ba mita kasakka lâka daukbia,
umpira nani ra.
¡Diara luha luhpia nani ra sin swaki sâkbia,
upla tataibra nani ba ai mina ra taibia!
5¡Kati bara lapta ba ban bâra sa kaka,
king ba man ra sibrin luki ban kabia!
6Lî auhi bara diwas laya iwi
tasba, twi lâwan ra buski ba baku kabia.
7Kupia kumi lâka bara wapni kaia lâka,
king aimaki piua nani ba sut ra,
kati ba kasbrika purara âpu takbia ba kat ban kabia.
8Kabu kum wina, kabu wala kat,
bara Éufrates wina,
tasba paski takaskan ba kat purara
ai karnika bribia.#1 Ki 4.21; Sak 9.10.
9¡Waihlam nani upla iwras tasbaya ra iwi ba,
witin ai mawanra bal bawbia!
10¡Prisant nani bara lal mana nani bri balbia,
Tarsis kingka nani,
kî dakura kingka nani wina,
Sabá bara Sebá kingka nani sin!
11¡King nani sut ba bal
witin ai mawanra ai lula krikbia!
¡Nisan nani sut ba, witin warkka daukbia!
12Witin bui swaki sâkbia
baha umpira nani makabi ba
bara diara luha nani upla bui hilp munras nani ba.
13Bawikira nani ra ai kupia swapni bribia,
bara umpira nani rayaka ba swaki sakan kabia.
14Witin nani ai rayaka ba mana tara sa,
baha mita taibi, saura muni nani ba mihta wina
swaki sakan kabia.
15¡King ba raya ban kabia!
Bamna witin ra, Sabá gulka nani ba yan kabia.
Bara witin dukiara,
aima bani ra pura suni kabia.
Bara ban Dawan ai yamnika ba yabi kabia.
16Naha kuntrika ra plawar mâ ailal bâra kabia,
¡il bahna nani ba sut plun pali man kabia!
Pata mâ nani ba, Líbano ra dus nani pâwi baku kabia;
plawar kura ailal inma nani tasba ra pâwi ba baku kabia.
17¡King nina ba ban kaia ra ban bâra kabia!
¡Ai sturka ba wan yu ingnika baku kabia!
Nisan nani sut tasba aiska ra ba witin wina yamnika bribia.
Bara nisan nani sut ba wibia lilia pali sa.
18Gâd ba yamni pali sa,
Dawan Israel Gâdka ba,
witin yakan man sika diara tara nani daukisa;
19yamni pali win kabia ai nina pranakira ba.
¡Tasba aiska ba prana ni banhbia!
¡Baku kabia!
20Naha kat Debit, Jesé luhpia pura sunra ba prakisa.
Currently Selected:
Lawana Nani 72: MSKTU
Highlight
Share
Compare
Copy
Want to have your highlights saved across all your devices? Sign up or sign in
© 2010 Bible Society in Nicaragua
