Lawana Nani 73
73
LAWANA 73 (72)
LAWANA WAUHKATAYA YUMHPA
(Lawana 73—89)
Dawan kupia yamnika lâka ba
Asaf lawana.
1¡Gâd ba nahki pain pali sa,
Israel luhpia nani ra,
baha nani ai kupia klin bri nani ba kira!
2Kau wiria kata, yang kauhaia kapri;
mini nani ba pat lalalwaia baila kan.
3Prautkira nani bara watawikira nani ra tumri,
nahki ai tâura pâwi bamna.#Job 21; Jir 12.1-4; Ab 1.
4Witin nani ba pruaia lukras kata,
ai wîna tara ba pain sa bamna;
5witin nani ra upla bui saura munras,
upla bui sin aihni munras,
wala nani ra muni ba baku.
6Bahamna, witin nani prautka lâka ba,
ai nana ra lilura baku paman sa;
upla ra saura munaia lâka ba,
ai prâka baku diman sa.
7Witin nani nakra nani ba sulhwi ulisa
ai kupia lukra saura ba,
pura lui brin dauki bamna.
8Lawaska kikisa, praut lâka ni
bara sinska lâka wal
upla ra watawi munaia man plikisa;
9kasbrika purara ba kat,
mapara aisisa ai bîla ni;
bara ai twisa ni tasba aiska ra plapi tawisa.
10Baha mita upla nani bui witin nani ra mayunisa,
bara witin nani ra diara saura sakras sa.
11Witin nani makabi walisa:
“¿Baha ba Dawan nu takbia ki?
¿Laih Purara iwi Dawanka ba
ai dahra walbia ki?”#Law 10.4,11; 14.1; 53.1; Job 22.13-14; Ais 29.15.
12¡Kaiks,
naha watawikira nani na!
Witin nani ai âuyapah kira,
yuyaka tara dauki auya.
13¡Kupi klin briaia ba bahki sa,
bara mihti ba sin bahki sa, sikbi klin
briaia watawika lâka ba wina!
14Awar bani ai prukisa
bara titan bani sin klala aikisa.
15Yang na, witin nani luki baku lukri kata,
ai luhpia nani ba atkrika waia kan.
16Naha na tânka briaia lukri,
sakuna yang maipara karna pali ai munan.
17Sakuna Gâd watla ra dimri ba kat
witin nani auya ba, ani kat wih takaskuya ba tânka briri:
18witin nani mina ba yaram lalalwisa,
bara platukbi sauhki tikaia ra lulkisma.
19¡Witin nani ba, wan nakra klipan baku sauhki tikma!
¡Sibrin ba bui âpu daukbia!
20Dawan, man mahka buma ba ra upla kum yapi si buya baku,
bara witin nani kuninkira mawan ba
saura misbara kaikma.
21Yang kupi ba tahpla pali kan
bara kupi ba latwan ai muni kata,
22kan yang tanis kum diara tânka sin briras;
¡yang na man mamwanra daiwan kum baku katna!
23Ban sakuna, man wal ban tauki kapri.
Man bui yang mihti aihkika ra ai alkram,
24man sins lâka mairiki, ai brih taipahkram
naha diara sut lubiara, man kulkanka aikma.
25¿Yang ba laih kasbrika purara ya brisna ki?
¡Man baman mai brisna!
¡Man wal sna bara naha tasba wina diara brin ai daukras!
26Yang wîni aiska ba âpu takisa,
ban sakuna, Dawan ba sika
yang prapatiki ban kaia ra
bara witin sika yang kupi alki bri ba.
27Ani uplika nani man wina tnaya ra tawi ba sut lika,
prui tiwbia;
ani uplika man wal kasak apia ba sut sauhki tikma.
28Sakuna yang lika Dawan lamara wamna,
kan baha ba kau pain sa yang maipa ra.
Man, Dawan Gâd, man sika
yang yukuwaiki aihwa sma ba,
bara yang bui man bui diara tara daukram ba aisi kamni.
Currently Selected:
Lawana Nani 73: MSKTU
Highlight
Share
Compare
Copy
Want to have your highlights saved across all your devices? Sign up or sign in
© 2010 Bible Society in Nicaragua
