Lawana Nani 65
65
LAWANA 65 (64)
Mayunra nani ba Gâd briaia aitani sa
Aiwani nani tâ bri wina. Debit lawana, aiwananka.
1Man Saion Gâdka,
man ra mamyunaia aitani sa,
aitani sa man ra pramis daukan ba daukaia.
2Bamna pura sunra ba walisma.
Tasba aiska ba man ra aula.
3Wan watawanka nani ba mita,
taibi wan munisa;
sakuna man wan saurka nani ba
ban swih tikisma.
4Yamni pali sa, baha uplika man bâk saki briram ba;
brih wama man lamara bâra iwi kaia,
man tempelkam rumka bîla nani ra.
¡Banhki wan dauks,
man wamtla ra diara kau pain brisma ba ni,
man tempelkam watla holikira bilara ba wal sin!
5Gâd bara wan sasakra,
man sika yang nani ra pana aisisma ba,
diara kasak aihkakira daukisma ba wal;
naha tasba aiska ba man ra kasak lukisa,
baku sin kabu lamara iwi nani ba sut.
6Man mita sika,
il tara nani ba alki takaski brisma,
karnikam brisma ba ni,
bahara man karnikam ba marikisma.
7Man bui kabu binka tara ba lamni daukisma,
bara uplikam nani yakabrira ba sin asla dauki lamni brisma.
8Baha nani tasba laihura iwi nani ba sin
man bui diara aihkakira daukram ba wali tatatwisa,
man dukiamra upla nani ba, ai lilia mita ai
pura winisa, lalma ba wina, laih muna tani ba kat.
9Man bui tasba ba main kaiki brisma,
lî bliki yaram ai mâ ailal sakisa,#Law 104.10-16.
man bui tingni kârma laya ba yaram
plapisa, bara yaram plawar mâ nani alkisa.
Baku sika tasba ba ridi daukisma,
mâ nani pâwaia dukiara.
10Plun mangkaia tasbaya nani
salhkan ba, man bui buskisma bara tasba kakawa
ba libil daukisma; bara lî ailal yaram
auhi tasba ba swapni daukisma
bara plun mâ nani ba yamni munisma.
11Man yamnikam ni,
mani nani ba diara banhki daukisma,
bara kasbrika nani ba wina,
yamnikam tara pali laikisma.
12Twi upla iwras tasbaya ba sangni sa,
bara dus wahia nani ba pranakira pali sa.
13Twi langni nani ba,
sîp nani ailal ni banhwan sa,
twi langni il bîla nani kata ba,
plawar mâ baman pâwan sa,
bara upla sut aiwani, winisa lilia ba mita.
Currently Selected:
Lawana Nani 65: MSKTU
Highlight
Share
Compare
Copy
Want to have your highlights saved across all your devices? Sign up or sign in
© 2010 Bible Society in Nicaragua
