Lawana Nani 66
66
LAWANA 66 (65)
Man warkkam nani ba pranakira sa
Aiwani na tâ bri wina. Lawana, aiwananka.
1Man nani, Gâd ra liliakira aiwani bas,
upla nani sut tasba aiska ra iwisma ba.
2Lawana aiwans ai nina pranakira ra;
aiwans ai nina mayuni prana dauki ba wal.
3Man nani bui Gâd ra wis:
“¡Man warkkam nani ba aihkakira sa!
Man karnikam tara ba mita
man waihlam nani ba sirang iwi mamwanra kauhi banhwisa.
4Tasba aiska ba man ra mai mamyunisa
ninam ra lawana nani aiwanisa.”
5Man nani bal kaiks Dawan warkka na,
diara aihkakira nani upla dukiara daukan na.
6Kabu ba tasba lâwan daukan,#Imp St 14.21; Law 114.3,5.
bara wan damika nani awala ba wapi luan;#Jas 3.14-17.
¡bamna yawan bui Gâd ra lilia daukpi!
7Witin ai karnika ba wal ban kaia ra wihta aimakisa;
ai nakra nani ba nisan nani ba aihwaki kaikisa,
mapara babura nani ba ai mapara buaia apia.
8¡Nisan nani, wan Gâd ra yamni wis!
¡Lilia binka aiwani, witin ra mayuns!
9Kan witin raya wan brisa bamna,
witin sin wan swin kauhras.
10Wan Gâdka, man mita wan tânka laki kaikaia swiram sa,
¡silbar klin daukan ba baku sunu wan daukisma!
11Tân ra kauhaia wan daukram;
wirhika tara twilkaia wan purara sunram.
12Wan swiram ya ya bui ai mina ni wan taibaia,
yawan lî bâk bara pauta bâk luan,
sakuna baha, ningkara wan wingka puhbaia wankram.
13Man tempelkam ra dimamni,
bara prisant nani angki maikamna;
baku lika pramiski nani ba aiska daukamna;
14pramis nani man ra daukri ba
yang trabil ra dimri piua ra.
15Altarkam purara, daiwan batana nani angkamna;
bîp wainhka tara, guts wainhka prisantka angki maikamna,
bara sîp wainhka, man yamni kaikisma ba kîa angki maikamna.
16¡Man nani sut nâra bali banhs,
man nani sut Gâd ra sibrin lukisma ba!
¡Man nani ai wals,
mai wiaisna Gâd maita dîa daukan ba!
17Yang bîli bara uni wal,
mai winri bara mamyunri.
18Yang lukanka saura briri kata kaka,
Dawan ba ai walaia apia kan;
19¡sakuna witin, yang ra ai walan,
puri sunra ba sin walan!
20¡Dawan ba yamni pali kabia,
witin puri sunra ba bahki kulkras,
ai latwanka ba sin ai marikan!
Currently Selected:
Lawana Nani 66: MSKTU
Highlight
Share
Compare
Copy
Want to have your highlights saved across all your devices? Sign up or sign in
© 2010 Bible Society in Nicaragua
