Lawana Nani 50
50
LAWANA 50 (49)
Dawan ba lâ wihtka kum kasak sa
Asaf lawana.
1Dawan ba gâd nani sut Gâdka, witin aisin;
tasba ra iwi uplika nani sut ra paiwan
lalma wina lui, muna tani kat.
2Dawan ba bui laih Saion wina ai ingnika blikisa,
baha tawanka pranakira kasakkira pali ba wina.
3Wan Gâdka ba aula,
sakuna sâp lika balras sa;
witin aula ba,
ai kainara pauta klauhi, skwal baku diara
sauhki tiki balbia.
4Laih purara pali ba wina,
Gâd ba wini aula kasbrika purara ba wina tasba ra,
witin ba, ai uplika nani lâka daukaia aula:
5“Baha nani, yang ra kasak ba asla dauks,
baha nani yang wal lâ kum daukan ba,
yang ra sakripais dauki aiki ba wal sin.”
6Bara kasbrika nani ba tânka param aisisa
Gâd ba lâ wihta kasak sa.
7“Israel, upliki nani sma ba, wals;
yang bui man nani ra diara tânka param sakaisna.
¡Yang sika Gâd! ¡Yang sika man Gâdkam!
8Man sakripaiskam nani ba tâwan
lawi mai daukamna apia;
man daiwram nani aiska angkan ba tâwan sin apia.
9Yang sîpkam makabras,
bîpkam wainhka ba sin apia,
guts wainhka nani ba sin apia,
man kralkam nani ra bâra ba wina.
10Daiwan nani sut unta biara ra nani ba,
yang duki sa;
il tilara daiwan wapi ba bara bîp nani sin sut.
11Il nani ra piawira nani ba,
yang duki sa;
bara tasba ra daiwan aiawi nani ba sin,
yang duki sa.
12Yang plun ai dauki kaka,
man ra mai wiaia apia kapri;
tasba aiska ra dîa bâra ba sut
yang duki sa bamna.
13¿Yang na bîp wainhka nani wîna pimna,
sîp wainhka nani tâlia sin dimna ki?
14¡Tingki wiaia lâka ba, Gâd ra prisantka yas;
Laih Purara ba ra pain kulkan yaia pramiskam ba yas!
15Yang ra ai wins kupiam wirha brima ba ra;
yang pri mai sakamni,
bara man bui yang ra kulkanka aikma.”
16Sakuna upla watawikira ra, Dawan naku wisa:
“¿Dîa muni lâika nani nahki daukaia ba, man nani mita aisisma,
apia kaka, lâka ba man aisisma,
17lawi mai daukisma ba yamni kaikras sma ba,
baku sin yang bîli nani ra sin kulkanka yaras sma ba?
18Man âimplikra nani ra lika
yamni bri banhwisma;
marit lâka sasauhkra nani wal sin asla takisma.
19Saura aisaia ba dukiara, bara kunin aisaia
nani luki sakaia mata lika,
twisam bara unam ba lanhwisa.
20Man muihkam dahra kwahkisma;
¡muihkam pali ba mapara bîla wirha nani wisma!
21Man nani naha sut daukram,
sakuna yang sâp kapri;
ba mita kupiam ra lukram
yang lika man wal baku sna.
Sakuna yang bui man mamwan kat damhra kwahkaisna,
dîa daukram klala maiki wapni daukaisna.
22“Man nani naha tânka na pain bris,
man nani Gâdkam ra âmya tikisma ba,
yang wînam ba yuya baman mai daukras sna ba ra,
baha mai daukamna bara upla kumi sin
mai dakbi mai sakaia âpu kabia.
23Ani uplika ai tingkika lâka dauki aiki ba,
kulkanka lâka aikisa.
¡Bamna yang bui baha nani yabalki ra watauki nani ba swaki sakisna!”
Currently Selected:
Lawana Nani 50: MSKTU
Highlight
Share
Compare
Copy
Want to have your highlights saved across all your devices? Sign up or sign in
© 2010 Bible Society in Nicaragua
