Lawana Nani 44
44
LAWANA 44 (43)
Gâd hilpka makabi pura sunra
Aiwani nani tâ bri ba wina. Coré luhpia nani aisin, mayuni aisa bîla nani.
1Dawanki, yang nani pali walri,
damiki nani baha dahra ai win,
baha warkka man bui witin nani yua nani ra daukram ba
patitara yua nani ra.
2Man mihtam pali ni,
idan nani tasbaya wina kangbi sakatma;
nisan nani, upla sât wala nani ra klala yaram,
bara damiki nani ra yaram,
witin nani iwi kan ba tasbaya ra iwaia.
Witin nani ra yaram manis sahwan.
3Klamhkla bara sordkam sin apia,
pura lui buaia karnika yaban ba;
witin nani mita
upla wala nani tasbaya ba pura luras kan.
Man diara daukaia karnika brisma ba,
man karnikam ba mita baha sut daukram.#Kli S 8.17-18; Jas 24.12; Wih 7.2.
¡Man bui witin nani lamara
mamwan ingnika marikram bamna,
latwan kaiki kapram ba mita daukram!
4¡Yang kingki! ¡Yang Gâdki!
Man uplikam nani ra yaram pura luaia;
5man karnikam ni,
waihli nani pura lui taibri;
¡man ninam brih mapara aiklabi nani kan ba,
mini ra taibri!#Law 60.12.
6Kan yang pantamangka brisna bara luki tniwaia apia katni;
sordki ba sin, pura luaia karnika aikaia apia kan.
7Man sika yang nani ra sip ai daukram
waihli nani pura luaia;
misbara ai kaiki nani kata ba,
upla wala mita witin nani pura winaia daukram.
8¡Gâdki, yang nani piua sut tara sna
daira wali kamna,
ninam ba yang nani mayuni ban kamni!
9Ban sakuna, man lika yang nani ra wan lulki wan swiram;
swira lâka tara, yang nani purira bri balram.
Yang nani upliki war aiklaklabra nani ba man brih waras kapram.#Law 60.10; 108.11.
10Man wan munram, waihli nani mawanra nini tawi plapri;
misbara wan kaiki nani bal
wan dukia nani implikan,
witin nani dîa brin dauki kan ba daukan.
11Sîp nani baku, sîp âikra nani mihta ra wan mangkram;
idan nani tilara sin wan yakabram.
12Man uplikam nani, sirpi mana atkram,
baha atkram wina,
man lika diara pura praki briras katma.
13Laimara iwi nani ra yaram,
yang nani ra laihtubisa;
yang nani kir iwi nani ra yaram
laiwaska kiki bahki pali ai kulkisa.
14Idan nani ba, yang nani laiwaska kikisa,
upla nani ba yang nani ra ai kaiki ai lal wauhisa.
15Yu aiska yang maiwan swiri paskisa,
bahki ai kulkan lâka, swira ni maiwan bikan sa;
16upla laihtubi, saura aisi ba bîla tâka mita,
waihli nani pana ai munaia,
saura aisi mini pruki ba mita.
17Baha pâtka nani sut yang nani ra ai alkan ba,
yang nani bui man ra âiya mai tikri tâka apia.
¡Yawan wal lâ daukan lâka ba krikras!
18Yang nani lukras katna mai lulki mai swiaia,
baku sin yang nani lika man yabalkam ba sin swiaia wiras.
19Ban sakuna, man mita minam ni wan taibram,
pât nani briaia pliska nani ra wan swiram,
¡tihmia tara ni sin yang nani puri bikram!
20Gâd, yang nani âiya lap mai tikri kaka,
bara man ra mamyunaia watlika ra
gâd bahki ra kra mayunri.
21Man pat baha ba damra walaia katma,
kan man sika diara yukuwan ra bâra ba,
sut pali kaikisma.
22Sakuna man mamta pruaia ra ai lakan sa,
sîp nani mahka ikaia
watla ra bri ridi dauki ba baku.#Ro 8.36.
23Dawan, ¿dîa kan man yapisma?
¡Mahka bus! ¡Mahka bus!
¡Yapisma ba, lulki wan swipara ban kaia ra!
24¿Dîa kan man ba yang wina yukuwisma?
¿Dîa kan yang nani ra âmya wan tikisma?
¡Yang nani pât ailal wahwi banhwisna!
25Yang nani swapi banhri
bara upla mawanra kauhi banhri sa,
yang nani na tasbak ai raski ai brih auya.
26¡Bus, bal hilp wan muns,
swaki wan sâks, man lamtwanka lâka tara ba ni!
Currently Selected:
Lawana Nani 44: MSKTU
Highlight
Share
Compare
Copy
Want to have your highlights saved across all your devices? Sign up or sign in
© 2010 Bible Society in Nicaragua
