Lawana Nani 146—147
146—147
LAWANA 147 (146—147)
Nisan nani sut aikuki sim sât daukras kan
1¡Dawan nina ba mayunan kabia!
¡Nahki painkira sa wan Gâd ra lawana aiwanaia!
¡Witin ra sika,
yawan lawana painkira aiwani mayunaia sa!
2Dawan Jerusalem ba kli paskisa;
Israel luhpia nani yakaban ba kli brih aula.
3Kupia kriwan nani ba witin rakisa,
insauhkanka nani ba witin wilkisa.
4Witin slilma nani ba sut nu sa, an bâra ba;
kumi bani sin nina mâkisa.
5Wan Gâdka ba tara pali sa,
ai karnika ba sin tara sa;
witin diara tânka bri ba tnata âpu sa.
6Dawan umpira nani ba bukisa;
watawikira nani ba witin tasba kat batakisa.
7Man nani bui Dawan ra aiwans tingki lâka ba wal;
arp kangbi wal aiwani,
wan Gâdka nina mayuns,
8witin kasbrika pura ba mukus ni bikisa,
lî ba blikisa tasba ra auhbia dukiara,
il biara nani ra twi nani ba yaban pâwisa;
9witin daiwan nani ra pata yabisa,
kuskuspiram luhpia nani ra sin,
baha nani ini ba ra.
10Witin aras nani karnika kulkras;
witin lika upla klahkla nani karnika ba sin kulkras,
sakuna ya witin ra luki ba kulkisa.
11Dawan baha nani witin ra sibrin luki ba,
yamni kaikisa,
baha nani ai kupia yamni lâka bîla kaiki ba.
12Jerusalem, man bui Dawan ra mayuns;
Saion, man bui Gâdkam ba mayuns.
13Witin bui man getkam nani karna daukisa bamna;
luhpiam nani baha bilara ba sin yamni munisa.
14Witin bui man tasbayam ra kupia kumi lâka brih aula;
bara witin sin plawar mâ painkira ba ni âuyapah maikisa.
15Witin ai bîla ba tasba kat blikisa;
ai bîla ba karna plapi tawisa tasba ra.
16Witin mukus ba wahmuk baku daukisa;
witin diwas klaswan nani ba,
pukpuka baku yakabisa.
17Witin bui ais klaswan ba paskisa;
witin kauhla blikisa, lî ba klaswisa.
18Witin ai bîla blikisa, bara baha nani ba slilkisa;
witin pâsa ba yan krawisa, bara lî sin yan plapisa.#Job 37.9-11.
19Witin bui Jekob ra yaban kaikan;
ai bîla lâka mangkan nani ba,
lâ daukan nani ba sin Israel ra.#Ro 3.2.
20Nisan wala nani aikuki sim baku daukras kan,
bara ai lâka daukan nani ba, witin nani kaikras sa.
¡Dawan ba mayunan kabia!
Currently Selected:
Lawana Nani 146—147: MSKTU
Highlight
Share
Compare
Copy
Want to have your highlights saved across all your devices? Sign up or sign in
© 2010 Bible Society in Nicaragua