Lawana Nani 144
144
LAWANA 144 (143)
King kum Dawan ra tingki wisa
Debit lawana.
1¡Dawan ba yamni pali kabia,
witin kaini kakahbra sa bamna!
Witin mita sika ai smalkisa
bara ridi ai daukisa
war aiklabaia;
2witin sika upliki kasak ba,
yang kaini kahbaika ba,
yukuwaiki kau purara ba, pri ai sasakra;
kaini kahbaika sa,
witin ra sin yukuwaiki brisni;
witin upliki banhwi ba,
karnika mununhtara mangkisa.
3Dawan, ¿upla ba dîa sa,
man bui witin dukiara luki kaia?
¿Dîa kan man upla ra latwan sma,
upla ba dîa?#Job 7.17-18; Law 8.4.
4Upla ba wan wingka puhbra kumi baku sa;
upla raya ba dista kumi baku lui auya sa.
5Dawan,
kasbrika purara durka kwalka nani ba,
saki bal iws;#2 Sa 22.8-17; Law 18.7-16.
il nani ba mihtam kangs,
bara kiasma takbia;
6trisbaikam nani lulks, imyula takbia,
bara waihlam nani ba tanis man plapi tiwbia.
7Pura pali ba wina mihtam sakbi bris,
bara kabu tihuka ba wina dakbi ai sâks;
karnikam ni dakbi ai sâks,
upla tringsar nani mihta wina;
8baha nani kunin aisi banhwisa,
bara ai mihta aihkika buki,
kunin swer aisisa sika.
9Dawan, lawana raya kum aiwanisna;
lawana kum man ra aiwani maikaisna arp sâtka ba wal.
10Pura luaia ba, man mita king nani ra yabisma;
man sika napakankam Debit pât wina dakbi sakram ba,
11prura sordka wina dakbi sâks;
dakbi ai sâks upla tringsar nani karnika mihta wina,
kunin aisi nani ba wina,
witin nani ai mihta aihkika bukisa kunin swer taki aisaia.#Law 18.50.
12Wan luhpia waitna nani ba pâwisa
giadin ra mangkan pain pâwi ba baku;
wan luhpia mairin nani ba lika
tempel playka karbi paskan ba baku sa,
tempel tâ baiki alki buki bri bûi ba baku.
13Wan pata watla nani ba banhki sa;
banhki sa plun sâtka nani wal.
Wan daiwra daknika nani ba tausin nani sahwisa
wan nasla nani ba tausin bara tausin brisa.
14Wan bîpka mairin nani ba kwihra tiwi banhwisa,
bara ai luhpia nani ba, piua kau kan baikisa.
Wan yabalka nani ra sibrin mita
wan pura winanka âpu kabia.#Lib 26.3-6.
15¡Lilia pali kabia
baha uplika nani naha diara sut bri ba!
¡Lilia pali kabia
baha uplika nani Gâd ba witin nani ai Dawanka ba!#Law 33.12.
Currently Selected:
Lawana Nani 144: MSKTU
Highlight
Share
Compare
Copy
Want to have your highlights saved across all your devices? Sign up or sign in
© 2010 Bible Society in Nicaragua
