Lukasi 23
23
Yesu o yambo ya mokondzi pilato
(Mt. 27:2,11-34; Mt. 15:1-5; Yn. 18:28-38)
1Nsima, bato babèebe ba bayuda bakei na Yesu o mokondzi pilato. 2Babandaka boebisi mokondzi pilato bifundeli baba mpo ya Yesu, balobi: totaniki moto'obo akainya mobulu o mboka ya biyo; akapekisa bato ba biyo bayuda 'te ba nakofuta ntako ya César te, mpe akamiteidza 'te, yo alo Klisto masiya mokondzi. 3Pilato amotuni 'te: "we olo mokondzi wa bayuda?" Yesu amoyanodzi "we mpendza osi'olobi. 4Nampino Pilato alobelaka bakondzi ba banganga ba Nyaamolo mpe ebele ya bato 'te: naèniko bobe boko o moto obo te! 5Kasi bàbatingamaka bè nande mpe balobaka: Moto obo akainya mobulu o mboka ya yudea mobimba na mateya mande, abandaka nama o galileya mpe akomi nama waboo yelusaleme. 6Ntango'eyabaokaka mokondzi pilato abatunaka 'te: Yesu alo moto wa galileya?
Yesu o yambo ya mokondzi Elode
7Ntango eyaèneke pilato 'te Yesu autaka o galileya, o mboka ekeyangelaka Elode antipasi. Abatomaka 'te bake nande o Elode, mpoo ntango enena erode abaka o yelusaleme. 8Elode asepelaka waike ntango eyeneke yo Yezu. Pamba te, banda kala aba akawa 'te amweene mpo aoka nsango yande mpe elikya ya motema mwande yaba'te Yesu aala makamwisi o mio mande. 9Amotunaka mituna miike; Kasi Yesu akolodzaka eyano yoko te. 10Bakondzi ba banganga ba Nyaamolo mpe balakisi ba mibeko ya Moize baba o maana mpo ya bofundzi Yesu na bokudzi. 11Elode yo na basoda bande baba bakatiola Yesu mpe baka moekè; bamolaidza etobo ya bokondzi mpe nsima Elode amoolodza o mokondzi Pilato. 12Elode na Pilato bakoba bakaokana te, kasi banda mokolo mununa bakomaka bakaokana.
Etumbu ekatami mpo ya Yezu
(Mt. 27:15-26; Mk. 15:6-15; Yn. 18:39-40; 19:4-16)
13Pilato atomaka maloba o bakondzi ba banganga ba nyaamolo, bankumu ba bayuda mpe bato baboko: 14Alobaka naba: boyeiki na moto obo 'te namo sambisa mpe bomofundziki 'te elo yo, moto okosenginya bato 'te bainyaka mobulu o mboka ya biyo, mpe namotuni nga menyi o miyo ma bino, kasi nga namwèniko mpe namodziiko na bobe boko o efundeli ya bino te. 15Elode koto amodziiko na bobe boko boboadzi yo te, yango enena amoolodzaka o biyo olibo! Nakaloba solo Yesu ako na bobe boko boadzi yo mpo 'te adziya etumbu ya liwa te. 16Yango enena nainya mitindo bamobete fimbo, nsima namolème." 17O binyanga bibèebe bya eyenga ya pasika, yaengelaka 'te Pilato abatokolelaka mokangami wawi o boloko bokokani na momeseno mwa bayuda. 18Nampino bato babèebe ba bakombolaka monoko mwawi 'te: Omoboma! Ototokolela Barnabasi! 19Barabasi aingelaka o boloko mpo abomaka moto o ngonga eyaalamaka mobulu o ntei ya engumba Yelusaleme. 20Pilato aongeaka bolobi naba, mpo aba akawa 'te atokolo Yezu. 21Kasi bakombolaka liyu: O mobaka o ekulusu! 22Pilato abatunaka liyu mbala ya iyato: Bobe baa bu boadzi yo? Nga namodziko na bobe boko te mpo 'te adziya etumbu ya liwa o ekulusu. Namobetè fimbo nsima namolème akè bonsomi. 23Dza owaba babaka beka na mongongo mokudzi bèè te baonga liwa lande o ekulusu, nsuka-nsuka Bobeki bwaba bwalongaka. 24Mokondzi Pilato akoaka mokano 'te abaalela mposa yaba. 25Dza owaongaka ba, Pilato atokoloko moto na nkombo balabas, owalaka o boloko mpo abaka akala mobulu mpe bobomi bato. Nsima, Pilato ainya mitindo 'te bakanga Yezu mpe baala elobi boike bwa bato.
Bobakami bwa Yesu o ekulusu
(Mt. 27:32-44; Mk. 15:21-32; Yn. 19:17-22)
26Ntango'eyaba ba bakakè nande, bakpeelaka Simona moto moko wa mboka kulene#23:26 Kulene Sirène: Elo o nord y'Afrique, aba akauta o nganda yande, mpe bamotomaka na bokudzi 'te atota ekulusu o elele ya Yezu. 27Bato baike babaka bakamobenga, na balibato baba bakalela, mpe bamitungisaka waike mpo yande. 28Kasi Yezu adzongidzaka boo mpe alobi naba: Balibato ba Yelusaleme, bino nakolela mpo yanga te kasi bolela mpo ya makambo maekomela bino mpe mpo ya banaba bino. 29Mpamba te, mikolo mikiya, bato baaloba 'te: Esengo na balibato ba baakobotaka te, mpe ba baakomweidza bana te. 30Baaloba na bangomba inene 'te: Botokpeela! Mpe na bangomba inkeke: Otodziba! 31Mpamba te, baloala lolenge lubo mpo yanga mwete mu mobeu, yaba'edzabo mpo ya bino ndzete inkoku?
32Bakowaka koto bato boko babale elongo na Yesu, bababa bato ba mobulu, mpo bababoma elongo nande. 33Ntango eyakoma ba o elele ekebelenga ba: "Monkuwa mwa moto," Babakaka Yesu o ekulusu o maana elongo na baibi babale: wawi o eboko ya elomi o moko o eboko ya engembe. 34Nsima, Yezu abondelaka mpo ya bato ba bamobakaka o ekulusu: "Tata, nakaeyonga bolimbisi mpo baebiko iyoma ikiala ba te." Nsima bakabolaka bitobo ba Yesu, basoda babibètèlèkè mbèse. 35Bato batelemeke o maana mpe bakaeka. Nampino bakondzi ba bayuda baba bakamoèke, mpe bakaloba: Yo moto owaba'akabikisa bato baboko, amibikisa yo menyi ebeiki 'te alo Klisto masiya, moponami wa Nyaamolo! 36Basoda koto baba bakamwèke. Baupamaka mpe bamoinyaka vinyo ya bololo; 37Baba bakaloba nande 'te: Ebeiki 'te olo mokondzi wa bayuda, o mibikisa we menyi! 38O likolo dza ekulusu, bakowaka mwa eteni ya libaya balibaki o likolo dza moto mwande mpe bakomi 'te: "Obo alo mokondzi wa bayuda." 39Moto mobe moko owa mobakaka ba nande o'ekulusu abaka akaloba mpo ya bomotiodzi 'te: Wale'edzabo! Oko Klisto masiya te? O mibikisa we mpendza, otobikisa koto biyo. 40Kasi moibi o moko abekelaka ona wande alobi nande 'te: We! Olo na bolokobanu, okobanga Nyaamolo te? Mpo odzii etumbu ndenge yawi nande? 41Etumbu edzii biyo toedzi mpo ya bobe boboadzi biyo, mpe tokofuta mpo ya bidzaleli bya biyo bibe, Noka yo aadziko ata bobe boko te. 42Nampino alobaka na Yezu 'te: Onkanisaka ntango eyayangela we o bokondzi bwao! 43Yesu amololedzaka 'te: Nakaloba nao ndoo-ndoo 'te: bè lelo ebo waba nanga ntei yawi o likolo.
Liwa dza Yezu
(Mt. 27:45-56; Mk. 15:33-41; Yn. 19:25-30)
44Owa kakoma upe na ngonga ya dzomi na ibale, dzombi dza ingelaka o mboka mobimba bobengi ngonga iyato o nsima ya ndzanga 45Moi mwalemeke bongengi, mpe rido o ntei ya tempelo yakakeaka banda o likolo kino'o nsina na bibambo bibale. 46Nampino Yezu akombolaka na mongongo mokudzi mpendza o Nyaamolo 'te: Tata naolodza molimo mwanga o maboko mao! Wailidza yo bolobi maloba manana, akai motema mpe awei. 47Ntango eyaène mokondzi wa basoda monkama wa baloma ndenge eyaalemaka makambo manana, akumisaka Nyaamolo mpe alobaka 'te: Ya solo moto obo abaka moto molamu! 48Ntango'eyanganaka bato baike mpenza mpo 'te baeka ndenge'eyatuba mana makambo, wayaène ba likambo lisalemi, baolodzaka o ndako yaba na mawa manene mpe bakabète muba maba. 49Bato babaebaka Yesu, mpe balibato ba bamobengaka banda o galileya, batelemeke iluka mpe baba bakaeka ndenge'eyaba makambo mamèeme makaalama.
Bokundami bwa Yesu
(Mt. 27:57-61; Mk. 15:42-47; Yn. 19:38-42)
50Moto moko nkombo yande Zozefu, moko wa lisanga dza bayuda autaka o mboka alimatayo o engumba ya Yudea; Abaka moto molamu mpe wa bosembo. 51Yo Atèeke mokano mpe misala mya bankumu baboko ba lisanga mpe makambo mamaalaka ba. Aba moto wa mboka alimatayo o engumba ya bayuda; mpe aba akadzila bokondzi bwa Nyaamolo. 52Yozefu akèeke 'te akaonga ebembe ya ndzoto ya Yezu o mokondzi Pilato. 53Amokowaka o likolo dza ekulusu mpe amoolidzaka o nsina, amodzingi na bolangiti bwa ntalo, mpe amokundi o dzombo dzoko balitimolaka o ntei ya libanga, mpe bakolikundaka niino ata na moto moko te. 54Yaba mokolo mwa bomilengedzi, mpe mokolo mwa boemi mwa bayuda mwaupamaka.
55Balibato ba bautaka na Yezu o galileya, babengaka Zozefu, baekaka dzombo mpe baèneke ndenge eyalangeyaka ba ndzoto ya Yesu. 56Nsima baolodzaka o bandako yaba, mpe balengeleke nsadzi ya nsolo mpimbo, mpe malasi. Nampino o mokolo mwa boemi mwa bayuda, baemaka mpo ya botosi mobeko mwa Nyaamolo Mpe bakoalaka mosala te.
Currently Selected:
Lukasi 23: LIZ
Highlight
Share
Compare
Copy
Want to have your highlights saved across all your devices? Sign up or sign in
Libinza Bible by Beyond Translation is licensed under Creative Commons Attribution-ShareAlike 4.0 License.
