Lukasi 24
24
YESU ASEKOI O BAWA
(Mt. 28:1-9; Mk. 16:1-8; Yn. 20:1-10)
1Nakutu ya mokolo mwa yenga, balibato bakèeke 'te bakaeka dzombo dza Yesu, bakèeke na nsadzi ya nsolo elamu mpe na malasi ma malengeleke ba. 2Ntango eyakomaka ba omoo, batani libanga liladzibaka ba o libulu lidziboi. 3Kasi waingela ba o ntei ya dzombo, bakoèneke ndzoto ya nkolo Yezu te. 4Ntango'eyaba ba niino bakamituna mpo ya lina likambo, baèneke bato babale balai bitobo ba mpembe mpe bikingenge wakundzi, batelemi o mpembeni yaba. 5Babangaka wakudzi mpe baumbamaka moo maba o nsina, nampino banà bato babatuni 'te: boyei liyawaa moto olo na bomoi o elele ya bawei? 6Akowabo te, Nyaamolo amolodza na bomoi. Asi'asekoi! Bokanisa makambo ma maba yo akaelobela niino waba yo na bino o galileya: 7Ekoki 'te bankaba nga mwana wa moto o maboko ma bato ba masumu, bamboma o ekulusu mpe nasekowa owakoka mikolo miyato! 8Nampino bakanisaka maloba ma Yesu. 9Nsima banà balibato, baolodzaka o bantoma dzomi na moko, babalobedzi nsango mpe balobedzi koto bato baboko baike likambo lilatubaka naba lidzèedze. 10Nkombo ya balibato banana yabaka: Malia Mandeleni, Jane, Malia mama wa Yakobo mpe na balibato baboko, bakalobeka bantoma nsango. 11Kasi bantoma bakokimidzaka maloba maba te, bakanisaka 'te bakabakosa. 12Kasi petelo akulomoaka mbango o dzombo, aingedzi mpe aèni bè bitobo ba lino bilangi kasi moto ako'o moi te, aolodzaka mbango mpe akamoi na makambo ma maalemaka mpe ma maèneke yo.
Yesu aeneni bayekoli babale
13Bè o muna mokolo, bayekoli babale baba bakakè o mboka yoko nkombo 'te Emau, ena mboka yaba Yelusaleme naba kilo-mètre penepene dzomi na moko. 14O mokanga, baba bakasolola mpo ya makambo mamatubaka o yelusaleme. 15Waba ba bakasolola mpe bakawelana na ntembe mpo ya makambo mei, Yezu abatokoledzi, bakalandinya nande mokanga mwawi. 16Bapekisamaka bomoebi 17Yesu abatuni 'te: bokobète ntembe o mokanga wabo'enalôo baa? Batelemeke mpe moo maba makomaka mawa-mawa! 18Kasi moko o ntei yaba nkombo yande 'te: Kleyopasi, amolooledza 'te: Eeee, we mpo ikituba o yelusaleme we okoiyeba te? O bato babèebe ba badzadzi o yelusaleme, obungi likambo libo elo bè we mpenza! 19Yezu abatuni'te: elo' makambo baa? Bamoololedza 'te: makambo mamaalemi na Yesu moto owautaka o Nazarete? Yo aba mosakoli owaba akasakola mpe akaloba na ngwiya iyèye! Makambo ma Nyaamolo o yambo ya bato bèebe. 20Kasi bakondzi ba banganga ba Nyaamolo mpe bakondzi ba mboka ya biyo bamokabi, bamokatedzi etumbu ya liwa, mpe bamobaki o likolo dza mwete mwa'Ekulusu. 21Biyo, takanisaka'te: elo yo moto owaba biyo tokodzila na elikya 'te, aumola biyo bato ba Isalaele o boombo bwa banguna ba biyo. Kasi bamobomi, lelo ekoki mikolo miyato banda dza owalema mana makambo! 22Mpe balibato ba mboka ya biyo batokamwisi liyu waike. Mpo balandaka Nakutu ekudzi bakamoeka o dzombo owa mokundaka ba, 23Kasi bamotaniko te, mpe bayaka liya tolobela 'te: batani ba andzelu, babatokoledzi mpe babalobedzi 'te Yesu alo na bomoi, ako liyu o kati ya nsobi te. 24Banà ba biyo baboko bakèeke o dzombo mpe baèneke makambo mamèeme bè ndenge eyabaebisaka balibato banana; kasi yo bakomoèneke te. 25Yesu abalobelaka: "Ee bino badzoba, mitema ma bino milona bwale mpo mikokimidza makambo ma malobaka basakoli te." 26Eengedziki'te boeba'te: ekoki 'te: klisto masiya aène mpasi inina iyèye mpe bamoboma yambo 'te aingela o nkembo yande! 27Nsima Yesu abandaka bobalimboledzi ntina ya makomi mamèeme ma makomamaka na ntina yande banda mibeko ma Moize kino'o basakoli babèebe. 28Ntango'eyakoma ba upe na mboka, Yesu abatubi mpe alandi wakudzi dza'akalanda o mboka eyu, elo'iluka na Emau. 29Kasi dza wakomaka malembe, bayekoli bamobondedzi 'te atuka naba o maana mpo ekomi mpokwa. Mpe Yesu aingelaka o ndako mpe adzadzi naba. 30Kasi ntango'eya dzala ba o mesa mpo 'te badza toma, Yesu akoi limpa, akumisi Nyaamolo, abuki limpa mpe abainyi 'te badza. 31Nampino miyo maba madziboi mpe bamoebi; mpe Yesu alimoi o miyo maba. 32Nsima babandi botunani 'te: mpoyaee? Mitema ma biyo mikobibei na nsai te, ntango ebei yo akasolola na biyo o mokanga mpe akatolimbolela makomi? 33Bè oena ngonga, batelemeke mpe baolodza o Yelusaleme. Wakoma ba o Yelusaleme, badziani na bayekoli dzomi na moko, elongo na bato baba o maana, baanganaka elele yawi; 34mpe balobedzi bayekoli babaikalaka o Yelusaleme mpe bato 'te: elo ya solo Yesu asekoi, atokolelaka Simona solo!
(Yn. 20:19-23)
35Nampino bayekoli babale babandi bolimboledzi bato makambo ma maèneke ba mpe mamabakomelaka o Emau mpe balimboledzi bato ndenge'eyaebaka ba na Yesu ntango'eya bakabelaka yo limpa.
Yesu atokolendzi Bantoma
36Ntango'eyaba ba bakasolola mana makambo, Yesu atelemeke o ntei yaba mpe alobi naba 'te: kimia eba na bino! 37Kasi bobangi mpe nsomo enene yabadziaka mpamba te, bamanyaka 'te, baèni modjijdi. 38Yesu abatunaka: bino, bokobanga'eloo baa? Mpe bolo na ntembe o mitema ma bino'ee mpo ya ye? 39Boeka maboko manga mpe makolo manga! Elo bè nga menyi! Bondendza mpe bonsekà elo bè nga! Mpamba te, elimo akoba na nsoni mpe na nkuwa dza ilo nanga te, mpe nga nalo nai. 40Wailidza yo bolobi dzabona, abateidza mpota ya maboko mpe ya makolo mande. 41Baakoba nino bakandima te, mpo batondaka na nsai enene mpe baba bakakamowa nande waike mpendza. Nsima abatuni 'te: bolo naiyoma ya bodzei waboo? 42Bayekoli bamoinyi eteni ya nsuu eyatumbaka ba. 43Akowaka eteni ya nsuu eyatumbaka ba mpe aedzei o miyo maba.
44Nsima Yesu alobi naba 'te: bokanisa makambo ma malobaka nga na bino niino waba nga na bino eika yawi yambo 'te nawa; yaengelaka 'te, makambo ma makomamaka mpo yanga o mobeko ma Moize, o minkanda mya basakoli mpe o ndzembo makokisama. 45Nsima, adzibolaka mayele maba mpo bakoka bososodzi ntina ya makambo ma makomamaka o makomi. 46Aolodzaka liyu bolobi naba 'te: ya komamaka 'te: Klisto masiya anyokwama, mpe awa nsima alodza na bomoi o ntei ya bawa o nsima ya mikolo miyato. 47Mpe o nkombo yande, bateidza bato ba mokili mobimba, bobandi o yelusaleme 'te:" ekoki bato babongola mitema mpo badziya bolimbisi bwa masumu. 48Bino, bolo batemo ba makambo mabo! 49Nampino naetomela molimo mumwa'elakelaka tata wanga. Kasi bino boikala wao mboka kino'o ntango eya dziya bino ngwiya eyauta o likolo.
Yezu abai o likolo
50Nsima Yesu abatokodzi o yelusaleme mpe akèi naba o mboka yoko mpembeni ya betania; atombodzi maboko o likolo mpe ab' apambondzi. 51Ntango'eyaba yo akapambola, makolo mande mabandi boiki nsobi mpe abai o likolo. 52Mpe bayekoli baupamaka mpe bamogumbamedzi, nsima baolodzaka o yelusaleme na esengo enene o mitema. 53Baba ntango iyèye eika yawi o tempelo bosanjodzi mpe bokumisi Nyaamolo.
Currently Selected:
Lukasi 24: LIZ
Highlight
Share
Compare
Copy
Want to have your highlights saved across all your devices? Sign up or sign in
Libinza Bible by Beyond Translation is licensed under Creative Commons Attribution-ShareAlike 4.0 License.
