Lukasi 22
22
Yudasi akabi Yesu
(Mt. 26:1-5,14-16; Mk. 14:1-2; Mk. 10:11; Yn. 11:47-53)
1Yabaka nampino ntango ya lisanga la losambo la bayuda ya boadzi enyanga ya pasika eyabaka ya mapa madzangi levure eyaba bato bakabelenga 'te elekeli. 2Bakondzi ba banganga ba Nyaamolo, balakisi ba mibeko ma Moize mpe bakondzi ba mboka ya bayuda baba bakawa mayele mpo 'te baboma Yesu; kasi babaaka bakabanga bato. 3Nampino satana aingelaka o motema mwa Yudasi mokeliota; owaba ntoma o ntei ya bantoma dzomi na babale ba Yesu. 4Nampino Yudasi akèeke oba banganga ba Nyaamolo, bakondzi ba mboka mpe o bakengedzi ba tempelo aokana naba, mpo aeba lolenge bani lokoki 'te akaba Yesu o maboko maba. 5Basepelaka waike mpe bakimidzaka 'te: bainya Yudasi palanga mpo abasunga mpo 'te badzia Yesu. 6Yudasi akimidzaka mpe abandaka bowai mayele mpe lolenge la bokabi Yesu o maboko maba, na ndenge'elo 'te bato nakoeba te.
Yesu na bayekoli bande badzei toma ta pasika
(Mt. 26:17-19; Mk. 14:12-61)
7Mokolo mwa yenga mo mwa belengaka ba 'te elekeli to mpe pasika mwakomaka mpe ya sengeke 'te baboma mwana wa mèeme bokokani na mibeko mya enyanga; mpe badza fufu ya farine edzangi levure.
8Yesu atomaka petelo yo na Yoane mpe alobi naba 'te: Kè o Yelusaleme katolambela toma ta bodzei mpo ya pasika todza elongo." 9Bayekoli bamotuni 'te: okadzi 'te tokaloleya tuna toma'ewaa? 10Yesu abaololedza 'te: waingela bino o mboka Yelusaleme, bwadziana na moto moko atoi molangi mwa mai, bomobenga mpe boingela nande o ndako eyaingela yo. 11Mpe bolobela monkolo ndako 'te: motei wa biyo aetomedzi maloba 'te: ototeidza eteni ya ndako ekoki 'te yo na bayekoli bande badzala mpo ya bodzei toma ta enyanga ya pasika. 12Nampino, aeteidza eteni ya ndako ya likolo elo walamu mpe omoo bwa ololeya toma ta enyanga ya pasika. 13Bakèeke o engumba mpe bakatanaka makambo mèeme dza walobaka Yesu naba mpe baloleyaka toma o maana mpo ya pasika.
(Mt. 26:26-29; Mk. 14:22-25)
14Ntango eyakomaka ngonga ya'enyanga, Yesu yo na bantoma bande dzomi na babale badzalaka o mesa. 15Nsima Yesu alobaka na bayekoli bande 'te: na bana mposa 'te nayadzei pasika ebo elongo na bino yambo 'te naène mpasi mpe liwa lindziya. 16Mpo nakaloba na bino 'te nakoonga lidza enyanga ya pasika ya ndenge ebo liyu te, kino mokolo mu mwakoka pasika ya solo ya bokondzi bwa Nyaamolo. 17Nsima yango akoi kopo atondi nyaamolo mpe alobi na bayekoli bande 'te: bokowa vinyo ebo boekabola o ntei ya bino 18Mpamba te, naelobedzi 'te, nakomwa liyu vinyo te, kino'o ntango eya koka bokondzi bwa nyaamolo. 19Nsima mpe akoi mwa eteni ya limpa atondi ndzambe mpe abuki limpa, abainyi, babèebe mpe alobi: ebo elo ndzoto yanga ikabami mbeka mpo ya bino! Mpe boalaka dzabo ntango iyèye mpo 'te bonkanisaka! 20Nsima ya bodzei lipa, akoi koto kopo ya vinyo o maboko mande mpe alobi: kopo ebo elo bookani bwa sika botenami na nzela ya makila manga, ma maweeya mpo ya bino.
(Mt. 26:20-25; Mk. 14:17-21)
21Kasi nakadzi 'te bino boeba: moto owa nkaba o maboko ma banguna tolo nande wabo mpe tokodza nande eika yawi o mesa wabo! 22Nga mwana wa moto nawa bè na ndenge eya loleyaka Nyaamolo, kasi yaba nsomo na moto'owa nkaba o maboko ma banguna. 23Ntango'owaekaka bayekoli bande, babandaka botunani banaba mpo baeba ndzani o ntei yaba o koki boadzi likambo dza ndenge enena.
Etubi bonene endzaa
(Mt. 20:25-28; Mk. 10:42-45)
24Nampino bayekoli babandi botunani banaba, mpo baeba o ntei yaba moto'o tubi bonene. 25Yesu alobaka na bayekoli bande 'te: Bakondzi bako bayuda te mpe bato banene bakadzi bokondzi likolo dza bato 'te babayangelaka mpe babainyaka lokumu 'te balo basungi ba bato. 26Kasi mpo ya bino ekota 'te bobadzabona te. Noka'e moto okadzi 'te aba mokondzi o kati ya bino ekeonga 'te amiolidza dza mwana motau o ntei ya bino babèebe; mpe moto okadzi te aba mokondzi o ntei ya banà ekeonga andima 'te abamosali. 27Mpamba te, moto'o tubi bonene'eloé ndzaa? Elo moto'odzadzi o mesa te moto'okomosalela? Eko moto'odzadzi o mesa te? Noka'enga nalo o ntei ya bino dza moto okoesalela. 28Bino bolo bato babakangi mitema nanga elongo o ntango ya bwale bwanga bwèebwe; 29Ndenge'eya mpinyaka tata bokondzi bwa bokambi, nga koto naeinyi bu. 30Mpo 'te bodza mpe bomwa o mesa manga, o ntei ya bokondzi bwanga; na ntina 'te bodzala o bokondzi bwanga mpo ya boyangedzi mabota dzomi na mabale ma Isalaele.
Yesu aebisi Petelo 'te amwangana
(Mt. 26:31-35; Mk. 14:27-31; Yn. 13:36-38)
31O nsima Yesu alobi na Petelo: "Simona, Simona! Eka Satana aeyongiki o Nyaamolo 'te aenyongela dza ndenge'ekenyongela ba masango" 32Kasi nga nasambedziki mpo yao na ntina te we nakokpeisama te, mpe nsima ya bobongodzi motema, osengedzi bolendisi bayekoli baboko bababa na bondimi o nga. 33Simona Petelo alobi na Yesu 'te: Nkolo nandimi 'te naingela nao o boloko elele yawi mpe nakawa nao elele yawi!. 34Kasi Yesu amoololedza 'te: Nakaloba nao Petelo: Naino nsoo ya kotongo te, wansangana mbala iyato. 35Nampino Yesu abatunaka 'te: Ntango eyaetomaka nga: Bino bwakoba na palanga te, sakosi te, sandale mpe te, nampino wadzangaka iyoma? Bamoololedza 'te: takodzangaka iyoma te tadziaka tutètè tutaengelaka na biyo. 36Mpe alobaka naba 'te: kasi o minaa moto olo na palanga aikowa olo koto na sakosi aekowa; Moto odzangi mompanga abelidza etobo yande mpo aomba. 37Mpamba te, yakomama o makomi mpo yanga 'te: "Bamoanginya elongo na bato babale; mpe nakaloba na bino liyu 'te kala te maloba mabo maengedzi te makokisama mpo 'te makambo ma makomamaka mpo ya ntina yanga makokisama." 38Nampino bayekoli balobaka nande 'te: Nkolo, tolo na mimpanga mimbale wabo! Yesu abaololedza 'te watei.
Yesu abondedzi o ngomba ya Ndzete ya olive
(Mt. 26:36-45; Mk. 14:32-41)
39Mpe Yesu atokoi o engumba ya yelusaleme mpe akèke o ngomba ya ndzete ya olive dza momeseno mpe bayekoli bakèeke nande elongo 40Ntango'eyakoma yo o ntei mei alobi naba: Bosambela mpo bino nakokpa o masumu te. 41Nsima akusaka mwa iluka naba, agumbami mpe asambedzi 'te: 42Tata wanga, walokala, o nsumola kopo ya bwale'ebo o yambo yanga; mpe mokano mwanga nakoalema te, kasi leme mokano mwao mokokisama. 43Nampino Andzelu uta o likolo ayaka liya molendisa. 44Ndenge'eyadziaka yo mawa mpo ya mpasi'eyaba nande, molunge mwande mwadzongaka dza makila mpe mwaba mokoolowa o nsobi. 45Ntango'eyailidza yo bosambedzi akèeke owaba bayekoli bande. Akabatanaka batuki mpo baba na mawa maike. 46Nampino Yesu abatuni: "Bokotuka ilo'e mpo yaée? Boteleme mpe bosambela mpo 'te bino nakoala masumu o ntango ya komekama te.
Bakangi Yesu
(Mt. 26:47-55; Mk. 14:43-49; Yn. 18:2-11)
47Ntango'eyaba naino Yezu akaloba; boike bwa bato boyei mpe Yudasi owabaka moko wa bantoma dzomi na babale ba Yezu, yo moto owaba o dzolo dzaba. Aupamaka upe na Yezu mpo amoinya mbote ya bizi. 48Kasi Yezu alobaka nande: Yudasi nalo na mawa maike mpo osaledzi mbote ya bizi mpo ombelidza nga mwana wa moto? 49Ntango'eyaèneke bayekoli ba Yezu makambo ma mawaka 'te masalema; bamotunaka 'te: Nkolo, tokoki botokodzi mimpanga mya biyo mpo tobuna naba? 50Nampino moko o ntei ya bayekoli, abèteke mosali wa nganga-ndzambe monene mpe amotenaka litoi dza ewai eya'elomi. 51Kasi Yezu alobaka 'te: Leme liyala dzabona! Atongôlôko lina litoi dza moto onona mpe aliolodza. 52Mpe yezu alobaka na bakondzi ba banganga ba Nyaamolo, bakondzi ba bakengeli ba tempelo, bankumu ba mboka mpe bapagano ba bayaka liya mokpeela 'te: Eloé lôo baa? Nakomi moto wa mobulu mpo boya liyankpeela na mimpanga, na ndzete mpe naba mbao o maboko? 53Nabaka na bino mikolo mimèeme o tempelo, mpe moto moko akonkangaka te; kasi minaa elontango ya bino, mpo misala mya ngwiya ya butu miènene.
Petelo aangani Yesu
(Mt. 26:57-58; Mk. 14:53-54; Yn. 18:15-16)
54Nsima, bakengedzi ba tempelo bakpedzi Yesu bakei nande o ndako ya bakondzi mpe Yanganga-ndzambe monene wa Nyaamolo. Petelo abaka akababenga o mokeya, kasi akoupamaka upe naba te. 55Ntango eyakoma baba loleyaka mweya na butu o lopango badzadzi, petelo mpe adzalaka naba elele.
(Mt. 26:69-75; Mk. 14:66-72; Yn. 18:17-27)
56Mosali moko wa mwalimoto aèneke petelo adzadzi upe na mweya, ntango'eyamolembetela yo walamu, alobi nande 'te: Obo eko moko wa bato ba Yesu o kangi ba obo te?. 57Kasi Petelo aangani alobi na mwalimoto 'te: Namoebiko te. 58Nsima ya mwa ntango, o moko amoèneke adzadzi mpe amotuni: We koto obei moko o ntei yaba! Kasi Petelo amoololedza 'te: We mwana wa lele obo, nga bototo. 59Nsima ya mwa ngonga, moto o moko aikikidza liyu bomotuni! Elo ndoo moto obo abeki eika na Yesu mpo yo koto alo moto wa galileya. 60Kasi Petelo amoololedza 'te: ona wanga, naebiko te ikindobela we, nga naebiko mpo ikiloba we te! Wakoilidzaka yo maloba mande te, eka nsoo etongi. 61Nsima Nkolo adzongidza boo mpe aeki Petelo, Ntango'eyakanisa Petelo maloba ma mamolobelaka Yesu 'te: Yambo 'te nsoo etongo, wansangana mbala iyato! 62Petelo atokooko o ndzei mpe aledzi na mawa maike mpendza.
(Mt. 26:67-68; Mk. 14:65)
63Bato bababa bakakengele Yesu, baba bakamobète mpe bakamoèke. 64Baba bakamodziba boo na bitobo mpe bakamotuna 'te: We! Obeiki mosakoli solo otolobela moto'owebèi? 65Nampino baba baka motiola mpe bakamotala na ntadzi kilikili.
Yesu asambi o yambo ya linkita linene
(Mt. 26:59-65; Mk. 14:55-64; Yn. 18:19-24)
66Ntango'eyatana bwinya, bankumu ba bayuda, bakondzi ba banganga ba Nyaamolo mpe balakisi ba mibeko ma Moize, baanganaka mpe badzalidza Yesu o yambo yaba. 67Mpe babandi bomotuni 'te; Otolobela ebeiki 'te we olo klisto masiya! Yesu abaololedza: "Ata naelobedziki bwa kokimidza makambo ma maloba nga te." 68Naloetuna koto motuna bwakompinya eyano te. 69Kasi banda lelo, nga mwana wa moto nakadzala o eboko ya elomi ya Nyaamolo o tubi ngwiya iyèye. 70Nampino bababèebe bamotunaka 'te: Ekelimbola 'te we olo mwana wa Nyaamolo? Yo abaololedza te: Elo bè dza olobi bino 'te nalo mwana wa Nyaamolo. 71Nampino balobi banaba 'te: Taongaliwa batemo ba lôo ba? Biyo menyi tooki o maloba mande.
Currently Selected:
Lukasi 22: LIZ
Highlight
Share
Compare
Copy
Want to have your highlights saved across all your devices? Sign up or sign in
Libinza Bible by Beyond Translation is licensed under Creative Commons Attribution-ShareAlike 4.0 License.
