Lukasi 21
21
Mwalimoto mobola ainyi likabo
(Mk. 12:41-44)
1Ntango'eyadzalaka Yesu o tempelo elongo na bayekoli bande, aèneke bato ba bodzii bakaya na mabondza maba o tempelo mpe baka malangeya o ekolo ya mabondza. 2Aèneke koto mwalimoto moko mobola mpe bodzenge ayalangeyaka koto mabondza mande o'ekolo ya mabondza; yabaka makuta mabale mabibende. 3Yesu alobi naba 'te: eka mwalimoto bodzenge obo, ainyi palanga ndzike boleki bato babèebe. 4Mpamba te, bato babèebe babainyi palanga yaba bainyi bè mwa ndambo ekèke ya bodzii bwaba, kasi mwalimoto obo; o ntei ya bobola bwande mpe olibenga dzande! Abondzedzi palanga iyèye ibei nande mpo ya bosungi bomoi bwande.
Kobebisami bwa tempelo
(Mt. 24:1-8; Mk. 13:1-8)
5Bayekoli bande baba bakakumisa bolamu bwa tempelo, ndenge eya'ekomaka ngelingeli mpo ya mabanga ma motuya, kasi Yesu alobaka naba 'te: 6"Mikolo mimaya, ntango'eyabukeya ndako, libanga dzoko dzakoikala o likolo dza libanga lina te, mabanga mèeme mapalangana.
Mobulu mpe bokabwani
7Nampino bayekoli bamotuni 'te: "motei, mana makambo masalema'éntango baa? Ekela bani'eyalimbola 'te: mana makambo masalema solo?" 8Yesu abayanodzi: bokeba moto moko yo nakoekosa te. Mpamba te, bato baike baya na nkombo yanga mpe baloba'te: nga nalo Klisto! Mpe ntango'ekomi upe! Mpe bino nakobandima na makambo makaloba ba te! 9Ntango'eyaoka bino nsango ya bitumba, mpe mibulu biwai na biwai, bino nakobanga te. Mpamba te, ekoki 'te makambo manana mamèeme masalema yambo, kasi nsuka yakoya niino lai te. 10Yesu alobaka naba'te: ekolo yoko yabuna na ekolo eyu mpe bokondzi boko bwa buna na bokondzi bou. 11Nsobi yanyingana wakudzi menyi nsala mpe lolenge dza male taaya mpe mapanzana lai o bato; nsala yaaya, makambo ma nsomo mpe bilembo binene bya tokoo uta' o likolo.
(Mt. 10:17-22; Mk. 13:9-13)
12Kasi yambo 'te mpo ibo ikelama, baekanga, baenyokolo, baesambisa o bandako ya losambo, mpe baekanga maloko; mpe mpo ya nkombo yanga bakaesambisa oba tempelo mpe o yambo ya bakondzi banene? 13Mana makambo maeinya mpipo 'te boteidza nkombo yanga o bato. 14Boala likambo libo o mitema ma bino: bino nakomitungisa te mpo ya ndenge'eyaloba bino. 15Mpamba te, nga mpendza naeinya maloba mpe bwanya bolo'te; banguna ba bino, bèebe bakokoka boolodza biyano te, mpe botii ntembe te mpe baloba 'te olo na libunga. 16Mpe Yesu abalobedzi: ba mama, batata mpe ba ndeko ba o, mpe baana ba bino baekaba o bakondzi; mpe bakondzi baboma bokoba bino. 17Bato baike baeina mpo bolo bayekoli banga. 18Kasi bino nakomitungisa te, mpoo moto moko te akokoka boeyadzi bobe mpo ya seko.
(Mt. 24:15-21; Mk. 13:14-19)
19Pamba te Wèeniki otelemi ngwi nde wadzia bomoi bwa seko. 20Ntango yaene bino yelusaleme edzingami na basoda boeba 'te bakawa babebisa engumba mobimba mpe bailidza moto momwèemwe olo omoo. 21O ntango enena, bato balo o yudea eengedzi naba 'te balota obangomba bamibomba; bakadzala o Yelusaleme eengedzi 'te batôkôo Mpe bino balo o banganda na kolodza omoo te. 22Mpamba te, mikolo minina Nyaamolo ainya etumbu o yelusaleme mpo makambo ma makomamaka na basakoli makokisama. 23Mawa maike maba na balibato balo na dzemi mpe bababa bakamwangidza bana, mpamba te bakokoka bokulomoi te, ena ngonga bato banyokwama waike mpe etumbu eyainya yo o ekolo yaba enene. 24Bato baboko o ntei ya bino ba bomama o basoda na mimpanga, baboko babakpeela mpe bake naba o boombo bwa bikolo biboko. Engumba Yelusaleme ya bebisama, ya kondzama na bato bako bayuda te kino Ntango yaba waekoka.
Boloodza bwa Yezu
(Mt. 24:29-35; Mk. 13:24-31)
25Nsima bilembo bya bokamoi byasalema o moi, o sandza mpe o mindzoto. Bato ba ekolo mobimba batonda na nsomo mpe bobangi mpo ya lokito la mbonge ya ebale. 26Bato baike baawa na nsomo mpo babandi bwèeni makambo mabandi bwaalemi o mokili mwaba, mpamba te, ngwiya ya likolo yanyingana o ntango enena. 27Nampino bato babebe baène mwana wa moto akauta o mampata na ngwiya mpe na nkembo enene. 28Ntango'eyabanda makambo manana bwalemi, boteleme ngwi, mpe boika mpiko, mpamba te, bokangolami bwa bino bokomi upe.
Lisolo la mwete mwa figi
29Yezu alobaka naba lisolo libo 'te: boeka mwete mwa figi mpe ndzete iyoko iyèye. 30Weniki nkaa ya mwete mwa figi iyongi, bwaeba 'te ntango ya mpiyo ekomi upe. 31Bino koto ndenge yawi, ntango'eyaène bino makambo mabo masalemi, boeba 'te bokondzi bwa Nyaamolo bokomi upe. 32Ya solo nakaloba na bino 'te bato boko balo minaa bakowa te kino baène makambo mabo na miyo. 33Likolo mpe nse ta tuba kasi maloba manga makotuba te. 34Kasi bokeba na lolenge loko bika na bino. Keba 'te boumowa o lokoso la toma ta bodzei na bolangi manga, mpe bino nakomitungisa te na bomoi bwa mikolo mibo. Mpo 'te mokolo mununa mu nako'etokolela mbalakaka. 35Mpamba te, buna bwinya bwa'anginya bato ba mokili mobimba ndenge dza'okoanginya ba bodzanga. 36Bokèngeleke walamu mpe bosambelaka ntango iyèye, mpo bweèneneke 'te bokakoka mpo ya bomibatedzi na makambo manana mamèeme. Mpe mpo 'te bokoka botelemi o yambo yanga mwana wa moto.
37Mikolo mimèeme, Yesu abaka akateya o lopango la tempelo, mpe na butu abaaka akakè likatuka o ngomba ya olive mikolo mimèeme. 38Mpe na ntongo iyèye, bato baba bakaya o lopango la tempelo mpo abateya mpe bamooka.
Currently Selected:
Lukasi 21: LIZ
Highlight
Share
Compare
Copy
Want to have your highlights saved across all your devices? Sign up or sign in
Libinza Bible by Beyond Translation is licensed under Creative Commons Attribution-ShareAlike 4.0 License.
