Lukasi 20
20
Bokondzi bwa Yesu bwakondimamaka te
(Mt. 21:23-27; Mk. 11:27-33)
1Mokolo moko, ntango'eyaba Yesu akateya bato o lopango la tempelo mpe akasakola nsango ndamu, Bankumu ba mboka ya bayuda, bakondzi ba banganga ba Nyaamolo mpe balakisi ba mibeko ma Moize, baupamaka upe nande mpe akaba lobela. 2Bamotunaka 'te: Otoebisa, okoala makambo mabo'ena bokondzi bwa ndzaa? Moto'owaeinya bokondzi bubo'endzaa? 3Yesu abaololedza 'te: Nga koto nakaetuna motuna moko; bino mpe bondimbolela: 4"Yoane akulidzaka bato batisimo'enandingisa ya ndzaa? Ya Nyaamolo 'te ya bato? 5Baba bakalobana banaba mpe balobi 'te: "Tolobiki 'te na ngwiya ya Nyaamolo atotuna 'te nde wakomoyambaka te émpo yaée?" 6"Tolobiki koto 'te yautaka na bato yaba wabe, bato batomaa mabanga mpo batoboma mpamba te, bato bèebe baebaka 'te Yoane alo mosakoli." 7Kasi bamoyanolaka 'te: "biyo toebiko moto'owa moinyaka bokondzi bwa bobatisa bato te." 8Yezu koto abaololedzaka 'te:" nga koto nakoelobela bokondzi bokoala nanga makambo mabo te.
Lisolo la mosali mobe
(Mt. 21:33-46; Mk. 12:1-12)
9Nampino Yesu alobelaka bato lisolo 'te: moto moko aonaka nganda yande ya mbuma ya vinyo, kasi bato baba bakaefutela mpo akèeke mobembo iluka na mboka yande mpe adzadzi omoo ntango elai. 10O ntango ya bobuki mbuma ya vinyo, nkolo atomaka mosali wande o bato bakafutelaka nganda yande mpo bamoinya ndambo ya mbuma ya vinyo. Kasi bafutedzi banganda bamobèi mpe bamoolodza maboko mpamba o nkolo wande. 11Nkolo wa nganda, atomaka mosali o moko, o bafutedzi mpo akakowa ndambo yande ya mbuma. Kasi babèi koto ona mosali, bamotadzi mpe bamoolodza koto maboko bona. 12Mbala ya iyato liyu nkolo ndako atomaka mosali mowu, obafutendzi; kasi yo koto bamopandzi mpe bamobengi, bamotôkô odzei ya nganda ya vinyo.
13Nsima nkolo wa nganda alobi 'te: naala'ebo? Eengedzi 'te natoma mwana wanga wa bolingo mpe naèni 'te bamotosa. 14Ntango'eyaène bafutedzi banganda mwana wa monkolo nganda akayalanda, baokani banaba 'te: "eka moto owa'angola nganda ya'ango waba yo yobo! Leme tomoboma, mpo toma tubo taikala tabiyo. 15Ntango'eyakoma yo, bamokpeedzi na bokudzi o nganda ya vinyo mpe bamobomaka. Sika nkolo wa nganda ya vinyo abaala éboo? 16Monkolo nganda aaya mpe aboma bafutedzi babèebe mpe akowa nganda mpo aekabela bato baboko. Ntango eyaoka bato dzabona, Yesu alobi: balobi 'te; likambo ndenge enena Nyaamolo na kolingisa te 'te linakoalema. 17Kasi Yesu abaeki mpe alobi naba 'te: bino bololoba 'te likambo linakoalema te, ekelimbola ntina'etebo? Mpo Nyaamolo alobi o nkoma yande ya makomi na ntina ya Yesu masiya: "libanga lila tiolamaka na batongi lelo likomi likondzi dza ntina o ndako mobimba?" 18Moto momwèemwe otèi Masiya alodza moto okpei o likolo dza libanga lilinène, Abukeya na biteni. To mpe alodza moto libanga linene likpei o likolo dzande. Apandzana mpenza. 19Oena ntango, balakisi ba mibeko ma Moize, banganga ba nyaamolo mpe bakondzi ba mboka bawaka mwango mwa bokangi Yesu, mpamba te, baebaka 'te akaloba lisolo linina mpo yaba kasi babangaka 'te bato bakoki bobunyi naba.
Eyano ya Yesu mpo ya ntako ya mokondzi wa loma
(Mt. 22:15-22; Mk. 12:13-17)
20Mokondzi wa etuka mpe banganga ba Nyaamolo, bawaka mayele 'te bamokanga mpe bafutaka bato babaèneneke dza bato ba bosembo mpe babatomaka o Yesu mpe baba na likanisi 'te bato banana badziya Yesu na maloba moko mabe mpo bakoka bomofundi o mokondzi wa baloma 21Banà bato batuni Yesu 'te: motei! Toebi 'te okoloba mpe koteya na bosembo bubwèebwe, okoeka moo ma bato te, kasi okoteya ndzela ya nyaamolo na bosembo bubwèebwe. 22Minaa, otoebisa biyo, bokokani na mobeko mwa Moize, elo walamu to mpe wabe mpo ya biyo bofui ntako ya mokondzi wa loma? 23Kasi Yesu abaebaka'te bayei na mayele mabe mpe alobi naba 'te: 24Bonteidza palanga ikifuta na bino ntanko ya leta, ilo'ena boo bwa mokondzi ndzaa? Mpe nkombo ekomami o likolo dza palanga elo'eyandzaa? Bamoololedza 'te: "ilo na boo bwa mokondzi wa loma." 25Yezu Alobi naba 'te: bokabela mokondzi wa loma toma tolo tande mpe kabela Nyaamolo toma tu tande. 26Bakamwaka na eyano yande waike badzadzi nyee, mpe bakokokaka liyu bomodzi na likambo dzoko libe mpo bamofunda o likambo te.
Eyano ya Yesu mpo ya lisekwa
(Mt. 22:23-33; Mk. 12:18-27)
27Lisanga la losambo la Basadukai bàbakoba bakandima lisekwa te; bayaka o Yesu mpe bamotunaka motuna 'te: 28Motei, Moize atokomelaka o mibeko 'te; Wèeniki moto awei, mpe aiki mwadzi wande mpe ebeiki 'te, aikiko bana te, modzimi wa mowei akoki 'te akowa mwadzi wande o libala mpo 'te abotela mwanyango mowei bana. 29Nampino bato nsambo bautaka na mama wawi: owa yambo, abalaka mwadzi wande mpe yo awaka kasi akoikaka bana te; 30Owa babale koto abalaka mwadzi wa mowei; Bakobotaka bana te yo koto awaka. 31Owa baato abalaka koto mwadzi wa bawei awaka, akoyaikiki koto mwana te. 32Nsuka-nsuka o mwalimoto koto awaka. 33Nampino o mokolo mwa bosekoi ona mwadzi aba'e mwadzi wa ndzaa? Mpamba te babèebe nsambo bamobalaka.
34Yango enena Yezu abayanolaka 'te; ele'e bampele mpe balibato ba mokili mubo bakabalana. 35Kasi mokolo mumwaya, bampele mpe balibato balo sembo mpo ya bosekoi bakobalana te o likolo 36Mpe bakowa te-te, baaba dza ba andzelu. Baaba banaba nyaamolo mpo basekwa o ntei ya bawa. 37Mpo ya likambo liyeki bosekoi bwa bawei, Moize yo menyi ateyaka lina likambo ntango'eyateidzaka yo likambo dza mwete mu mwaba mokolola mweya, mpamba te, abelengaka: "Nkolo Nyaamolo wa Abalayama, Nyaamolo wa izaka mpe wa Yakobo." 38Kasi Yo, akoba nyaamolo wa bawei te, kasi wa bato ba bomoi! Mpamba te, mpo ya nyaamolo, bato bèebe balo na bomoi. 39Nampino balakisi ba mibeko ma Moize baboko bamololedzaka 'te: motei olobi walamu. 40Nampino moto moko, akoongaka liyu bomotuni motuna te.
Eyano ya Yesu mpo ya bomoto bwa klisto
(Mt. 22:41-46; Mk. 12:35-37)
41Nampino Yesu abatunaka 'te: mpo yaée, bokoloba 'te klisto masiya alo mwana wa Davidi? 42Davidi yo menyi alobaka o buku bwa ndzembo'te: "nkolo alobi na nkolo wanga: dzala o'eboko yanga ya'elomi. 43Kina wakomidza nga banguna ba o eika ya botèlè bwa makolo mao. 44David abaaka akamobelenga 'te klisto nkolo, nampino akoki bobei liyu motike mwa mokondzi davidi?
Yesu apamedzi balakisi ba mibeko
(Mt. 23:6; Mk. 12:38-40)
45Waba bato babèebe bakamooka, alobaka na bayekoli bande 'te: 46Bokeba na balakisi ba mibeko, ba bakakala bolai bitobo bibilai mpe bakabainya mbote o bilele bya lokumu, bakakala koto bodzadzi o bilele bya lokumu o ndako ya losambo ya bayuda, mpe o bilele bi bilamu bya binyanga. 47Bakabôtôlo balibato bodzenge toma taba mpe bakadzi bosambedzi mabondeli malai-malai; etumbu o ntei yaba, yaaba ekudzi mpendza.
Currently Selected:
Lukasi 20: LIZ
Highlight
Share
Compare
Copy
Want to have your highlights saved across all your devices? Sign up or sign in
Libinza Bible by Beyond Translation is licensed under Creative Commons Attribution-ShareAlike 4.0 License.
