Lukasi 19
19
Zakayo adzii lobiko
1Yesu na bayekoli bande baingelaka o ntei ya Yeliko mpe alandaka engumba mobimba. 2Moto moko abaka akadzala omoo nkombo yande Zakayo; yo abaka mokondzi wa bafuidza ba ntako mpe moto wa bodzii 3Awaka 'te aène Yezu mpe amoeba 'te alo'e ndza, nde dza waba yo mokuwe akokokaka bomoeni te mpo bato baba baike 4akulumoaka mbango mpe akèi likabaa o likolo dza mwete mwa sikomore mpo 'te aène Yesu mpamba te, Yezu aengelaka bè te atuba o'ewai enena. 5Ntango eyakoma Yezu o maana, atombodzi miyo mpe amoeni o likolo dza mwete, mpe alobi nande 'te: Zakayo olowa wabo lai, mpamba te naengedzi 'te nakoma o ndako yao lelo. 6Nampino Zakayo aolowaka mbango ayei ya yamba Yesu na nsai eyeye akèi nande o ndako yande. 7Ntango éyeeneke bato dzabona, babandi bomiimi o mitema myaba mpe balobi 'te: Eka akèi kaingela o ndako ya moto wa masumu. 8Kasi zakayo atelemi mpe alobi na nkolo 'te: Nkolo! Nga nakadzi 'te, nakowa nkabo ya toma tanga nakabela babola. Mpe ebeiki 'te nabôtoloko toma ta moto na mayele mabe, naamoololedza tu mbala inei! 9Yezu alobaka nande 'te: Lobiko loingedzi lelo o ndako ebo, mpo moto obo koto alo mokitani wa Abalayama. 10Mpamba te, nga mwana wa moto nayei liyawaa mpe liya bikisa bato ba babunga.
Lisolo dza basali dzomi
(Mt. 25:14-30)
11Waba bato bakaoka makambo mabo, Yesu akeyaka mpe alobaka naba lisolo dzoko mpo aba upe na Yelusaleme, mpe bato bamanyaka 'te bokondzi bwa Nyaamolo bwaya bè o ntango enena. 12Nampino Yesu abalobelaka lisolo dzoko 'te: Moto moko wa lokumu akèeke o mboka yoko iluka akakowaka bokondzi, nampino nsima aolodza. 13Yambo 'te akè, abelengaka basali dzomi o ntei ya basali bande, abainyi palanga ndzike mpe alobaka naba 'te: Boala mombongo na makuta mabo kino mokolo mumwa'olo dzanga. 14Kasi bato ba mboka yande bakoba bakamokala te, mpe batomaka bato o nsima yande mpo bakalobela mokondzi wa mboka enena 'te tokadziko te 'te moto'onona aba mokondzi wa biyo. 15Ntango'eya mopônô ba mokondzi, aolodzaka o mboka yande mpe abelengaka baombo bande babainyaka yo makuta mpo aeba moto na moto palanga iyakowaka yo mpo ya mombongo. 16Mosali wa yambo ayaka mpe alobi nande 'te: mokondzi nakowaka likuta dzawi mpe liboi makuta dzomi! 17Nampino mokondzi alobi nande 'te; oadzi walamu! Dza olowe na bosembo o makambo ma makeke, naekomidza mokondzi wa boyangedzi mboka dzomi. 18Mosali wa babale ayei mpe alobi na mokondzi wande 'te: nkolo, likuta dzanga liyakei makuta matano; 19Mokondzi alobi nande 'te: we wakowa mokumba mwa boyangedzi mboka itano. 20Nsima mosali o moko ayaka mpe alobi 'te: mokondzi eka likuta lidza mpinyaka we, nalibombaka mpe nalidzingaka na bitobo walamu! 21Mpamba te, naba nakaebanga mpo okoba moto wa matata; okoba okokowa misolo mikibombidza we bato te, mpe okobuka toma toko'onaka bato bau te. 22Mokondzi amoyanodzi 'te: olo mosali mobe! Naesambisa bokokani na maloba mao menyi. Waebaka 'te, nalo moto wa matata mpe nakokowa toma tokobombidza nga moto te, mpe nakobuka mbuma ya milona mikiyona bato bau te. 23Mpo ya'é wakokaikaka palanga yanga o banque te? Mpo wayaolodza nga nakaikowa na mwa litomba mpe ibakisama? 24Nampino mokondzi alobaka na bato bababa o maana 'te: bomobôtôlô ina palanga, mpe boiyinya o moto olo na makuta dzomi! 25Basali balobi nande 'te: nkolo! Mosali onona alo na mpata ya palanga dzomi! 26Mokondzi aololedza basali bande 'te nakaloba na bino 'te: Moto oolo natoma toike bamoakilidza tutôkô, kasi moto ooko natoma toike te, bamobôtôlô ata bokèke bolo nande. 27Kasi banguna banga, ba bakokalaka te 'te nakoma mokondzi, bobakowa boya naba wabo mpe bobaboma o miyo manga.
Boingedzi bwa Yesu o yelusaleme
(Mt. 21:1-17; Mk. 11:1-10; Yn. 12:12-16)
28Wailidzaka Yesu bolobi makambo manana, alandaka o yambo ya bato mpo ya bokei o Yelusaleme. 29Wakomaka yo upe na mboka Betefaze mpe Betania mpembeni ya ngomba ekebelengaka ba 'te Olive, atomaka bayekoli bande babale. 30Mpe alobi naba 'te: boke o mboka elo'o yambo ya biyo, bwakatana mwana wa mpunda aingami o mwete naino moto akomolande nande te, bomoingola boya nande. 31Wèeniki moto aetuni: "Bokonyangola mpunda' enena 'te boke naye'éwa?" Bomoololedza 'te: "Nkolo aengedzi naé.
32Bayekoli bakatanaka mpoo iyèye bè ndenge'eyabaebisaka yo. 33Wakaingola ba mwana wa mpunda, bankolo ba mpunda babatuni: "Bokokè na mwana wa mpunda onona'éwa?" 34Bayekoli babayanodzi 'te: "Nkolo aengedzi naé". 35Nampino bakèeke na mwana wa mpunda o Yezu, badzingi mpunda na bitobo byaba, mpe Yesu adzadzi o likolo dza mpunda. 36Waba yo akalanda o likolo dza mpunda, bato batandaka bitobo byaba o mokanga baboko bakapèpe mangalala(nkaa ya mabila). 37Wakoma yo upe na ngomba ya ndzete ya Olive, ebele ya bayekoli batondaka na esengo mpe babandaka bokumisi Nyaamolo na mingongo mikudzi mpo ya makamwisi manene ma maèneke ba o yo. 38Baba bakaloba 'te: "Lokumu o mokondzi okoya na nkombo ya nkolo Nyaamolo! Kimia o likolo, mpe nkembo obiika bii bileki likolo!" 39Bafalizeyo baaboko balobaka nande 'te:" Motei, pekisa bayekoli ba o balèmè bolobi makambo mabo!" 40Yesu abaololedza 'te: Nakaloba na bino, bwalopekisa Bayekoli banga 'te ba nakonkumisa te, mabanga ma nkumisa.
Etumbu ya Yelusaleme
41Ntango'eyakoma Yesu upe na engumba ya Yelusaleme, mpe waène yo'ena mboka, abandi boledzi mpo-mpo ya'ena mboka mpe mpo ya bato. 42Mpe alobi: "Ee, Yelusaleme 'te w'ebiki makambo mawaiki 'te maekomela lelo o ntei ya kimia!, Kasi nookaé minaa, mana makambo malo niino ma bobombami o miyo mao." 43Mpamba te, mikolo mya bwale myaekomela, o ntango'enena banguna ba o baetimolela mabulu o dzingadzinga yao mpe baebunidza biwai bibèebe. 44Baebebisa we na bana bao o babèebe balo o ntei ya lopango, mpe bakoika libanga dzoko o likolo dza libanga liyu te, mpo wakoebaka ntango'éyayàka Nyaamolo liyaeteidza mawa mande te.
Yezu ateidza o tempelo
45Nampino aingelaka o lopango la tempelo, mpe ampandzaka bato bababa bakabelidza toma o ntei.Alobaka naba 'te: 46Yakomama o monkanda mwa mosakoli 'te: "tempelo yanga elo ndako ya losambo, kasi bino, boekomidza Dzando dza baibi." 47Yesu abaka akateya mikolo mimèeme o tempelo; kasi bakondzi ba banganga ba Nyaamolo, bakondzi ba bayuda mpe balakisi ba mibeko ma Moize, baba bakawaa mokano mwa bomobomi. 48Kasi, bakodziaka lolenge la boadzi te, mpamba te, bato babèebe babaaka na mposa ya booki mateya mande na likebi waike.
Currently Selected:
Lukasi 19: LIZ
Highlight
Share
Compare
Copy
Want to have your highlights saved across all your devices? Sign up or sign in
Libinza Bible by Beyond Translation is licensed under Creative Commons Attribution-ShareAlike 4.0 License.
