Lukasi 18
18
Nakolembe na mabondeli te
1Yesu alobelaka bayekoli bande lisolo mpo ya bobateidza 'te: "eengedzi akasambelaka ntango'iyèye mpe banakolembèke te. 2O mboka yoko yaba na zuzi moko owabaka omoo, akoba akabanga Nyaamolo te, mpe akotosaka bato te. 3Mwalimoto bodzenge moko aba koto'akadzala o'ena mboka. Mbala na mbala akakèeke o dzudzi mpo ya bomobondedzi 'te: amolongidza o likambo dzande lilaba nande na ona wande. 4Banda kala dzudzi akoba'akakimidza te. Kasi o nsuka, ayei liyamanya o motema mwande 'te: "Ata na kotosa Nyaamolo, mpe nakobanga moto moko te, 5Kasi dza'okontungisa mama bodzenge obo, eengedzi na molongidza na likambo dzande; mpo yo nakoya liyu liyatungisaka ntango iyèye wabo te. 6Nampino nkolo Yesu alobaka 'te: booka walamu maloba ma zuzi owa dzanga bosembo, ma malobaka yo. 7Kasi bokanisi 'te Nyaamolo akolongidza baponomi bande te, bakaba bakamobondele butu na moi? Aumela mpo ya bobasalisi? 8Nalobi na bino 'te, abalongidza lai. Kasi waaya nga mwana wa moto, Natana bondimi o mokili?
Lisolo dza mofalizeo mpe mofuidza wa ntako
9Yesu alobaka lisolo libo mpo ya bato bababa bakamikumisa o ntema yaba 'te balo bato ba bosembo mpe baba bakatiola bato baboko. 10Bato babale balandaka o tempelo mpo ya bosambedzi; moko abaaka mofalizeyo; mpe o moko mokongodzi wa ntako. 11Mofalizeyo atelemi mpe abandi bo bosambedzi o ntei ya motema mwande 'te: "Ee Nyaamolo, naetondi mpo nakodza bato ba masumu te, balo baibi, bato ba ekobo te, baadzi ba makambo mabe, to mpe dza mofuidza wa ntako obo te." 12"Nakakila ntingo mbala ibale na poso mpo ya bosambedzi mpe na kainya ndambo ya dzomi ya bodzii bwanga." 13Kasi Mokongodzi wa ntako, yo atelemeke iluka mpe aakokokaka koto botombodzi miyo mande o likolo te. Aba akamibètè o buba mpo ya boteidza mawa mande mpe abandi bolobi 'te:" Ee Nyaamolo onsokela mawa, nga moto wa masumu." 14Nakaloba na bino 'te: mokongodzi wa ntako obo, a'olodzaka o ndako yande, akomi moto wa sembo o miyo ma Nyaamolo, kasi mofalizeo bototo. Mpamba te, moto'owamitombola bamoolidza mpe moto'owamiolidza bamotombola.
Yesu apambodzi banaba batau
(Mt. 19:13-15; Mk. 10:13-16)
15Bato boko bayaka na bana baba o Yezu mpo 'te abalendza mpe abapambola, kasi wabaène bayekoli ba bapandzi. 16Nampino Yezu alobi na bayekoli bande 'te: "bino nakobapekisa te, leme banaba batau baya o nga mpo bokondzi bwa Nyaamolo bolo mpo ya lolenge la bato ndenge ebo." 17Nakaloba na bino osolosolo: moto'owa koyamba bokondzi bwa Nyaamolo dza banaba batau babo te, akoingela omoo te.
Bato ba bodzii mpe bokonzi bwa Nyaamolo
(Mt. 19:16-30; Mk. 10:17-31)
18Mokondzi moko wa losambo la bayuda atunaka Yesu alobi 'te: motei molamu; eengedzi 'te naala'edzabo mpo 'te nadzia bomoi bwa seko? 19Yezu amoololedza 'te: ombelengi moto molamu'émpo yaée? Moto molamu akomoi te, elo bè Nyaamolo yo menyi. 20"Wéebi mibeko ma Moize: nako'ala ekobo te, nakoboma moto te, nakoiba te, nakoloba mpo ya molete te, memya ongo na nyongo." 21Ona moto aololedzaka Yesu 'te: "Motei, nakatosa makambo manana mamèeme banda bolenge bwanga." 22Ntango'eyaoka Yezu maloba mande, amoololedza 'te: Olobi walamu kasi eikadzi iyoma yawi: "Belidza toma tolo nao tu tèete mpe otokabela babola, nampino wadzia bomengo o likolo nsima yaka o mbenga." 23Ntango'eyaoka yo maloba manana, ona moto akomaka mawa-mawa; mpamba te, abaaka na bodzii boike mpendza. 24Ntango'eyaène Yezu 'te akomi mawa-mawa alobi nande 'te: "Elo bwale boike mpo ya moto wa bodzii 'te aingela o bokondzi bwa Nyaamolo." 25"Eko na nkaka te mpo ya kamela 'te eingela o lilusu dza ntonga, kasi elo nkaka ekudzi mpo ya modzii 'te aingela o bokondzi bwa Nyaamolo." 26Bato ba bamookaka bamotuni 'te: Nampino yabika'endzaa? 27Yesu abaololedza: "Likambo lilo 'te bato bako na makoki ma boliadzi te, Nyaamolo alo na makoki ma boliadzi." 28Nampino Petelo alobi 'te: Biyo tolèmi mpoo iyèye iyaba na biyo toebengi. 29Yesu alobi nande 'te: Nakaloba na bino o solo: Eko na moto moko te, oiki ndako yande to mpe mwadzi wande, te baliya dzande, te baboti bande, te bana bande mpo ya bokondzi bwa Nyaamolo, 30Solo baadzia toma toike boleki o ntango'ebo mpe o ntango'eyaya bomoi bwa seko.
Yesu aebisi liyu bowei mpe bosekoi bwande
(Mt. 20:17-19; Mk. 10:32-34)
31Yesu akowaka bayekoli bande dzomi na babale o mpembeni mpe alobi naba 'te: eka tokakè o Yelusaleme, mpe makambo mamèeme ma makomaka basakoli mpo yanga mwana wa moto maakokisama. 32Mpamba te, bankaba o maboko ma bato bako bayuda te, bansèke, bantoela nsoi, 33Bambètè fimbo, bamboma, mpe nasekowa wakoka mikolo miyato. 34Bayekoli bakosôsôlokô ata likambo dzoko o ntei ya maloba mande te, mpamba te, bakodziaka ndimbola yoko o ntei yaba te, mpe bakoebaka ntina eyaba Yezu akaloba te.
Yesu abikisaka moto wa lolanda
(Mt. 20:29-34; Mk. 10:46-52)
35Ntango'eyakoma Yesu upe na Yeliko, moto moko wa lolanda aba' adzadzi o mpembeni ya mokanga mpe akaonga palanga. 36Ntango'eyaoka yo boike bwa bato bakakatuba, atuni mpo aeba ntina eketuba na bato. 37Balobi nande 'te: "Elo Yezu wa na Nazarete akatuba." 38Abandi bokombodzi na mongongo mokudzi 'te: Yezu mwana wa Davidi onsokela mawa! 39Bato bababa o yambo yande bamobekedzi mpo 'te aleme bolobi, kasi yo akombolaka liyu wakudzi boleki: "mwana wa Davidi, onsokela mawa!" 40Ntango'eyaoka Yezu dzabona, adzongidza boo mpe alobi 'te bamoyela ona moto wa lolanda, o wakoma yo upe nande, Yezu amotuni 'te: 41Okokadzi 'te naeinya éyée? Ebosônô alobi nande 'te:"nkolo! Nakadzi'te naène liyu." 42Yezu alobi nande 'te: O koki boèni liyu mpo waadzi motema mwao o nga mpe bondimi bwao boebikisi. 43Bè na mbala, moto wa lolanda aèni liyu, abengi Yesu mpe abandaka bokumisi Nyaamolo; ntango'eyaène bato babèebe lina likambo, bakumisaka koto Nyaamolo.
Currently Selected:
Lukasi 18: LIZ
Highlight
Share
Compare
Copy
Want to have your highlights saved across all your devices? Sign up or sign in
Libinza Bible by Beyond Translation is licensed under Creative Commons Attribution-ShareAlike 4.0 License.
