Lukasi 17
17
Lisumu mpe kondima
(Mt. 18:6-7; Mk. 9:42)
1Yesu alobi na bayekoli bande: Moto momwèemwe atuba o limeki mpo 'te aala masumu, kasi mawa ma moto olo 'te na nzela yande bomekami bokoya mpo adzia etumbu ekudzi. 2Yaba walamu 'te bamokanga libanga o kingo bamobwaka o mai ma mbu na eika 'te aba akabebisa moko wa bato balo dza bana babo. 3Yango'enena boba bino menyi na bokengi; Wèeniki moto moko! A'eyadziki bobe boko, o mopamela, mpe alooka mawa na likambo li liyadzi yo, abongodzi ezalela yande, mpe a'ongi bolimbisi, o molimbisa. 4Mpe Wèeniki a'eyadzi bobe mbala dziike na mokolo, mpe ayeiki koto mbala nsambo mpo 'te aeyonga bolimbisi: "naoki mawa na bobe boeyaledzi nga, "o molimbisa.
Bondimi bolodza mbuma ya mutarde
(Mt. 17:20)
5Bantoma balobaka na Yesu 'te: Nkolo, otobakeya boyambi bwa biyo. 6Nkolo abaololedza 'te: "Bobeiki na boyambi dza mombuma mwa mutarde, mbele bolobi na mwete mwa gbukulu mubo 'te bilea wabo, kèe likatôo o ebale," mpe muna mwete mwaetosa.
Lotomo la mosali
7O ntei ya bino olo na mosali mwande akamoonela banganda yande to mpe akamôokôlela bamème bande, nampino o kouta mosali o nganda, akamobelenga mpo aloba nande 'te upama wabo lai, dzala o mesa odza;éloendzaa? 8Wakoloba nande te 'te: Lata bitobo bi bilamu bya mosala, o ndambela naino toma tutanga nadza wailidza nga bodzei mpe bomwei, nampino olamba tutao odza mpe omwa? 9Waène mokondzi akaba akainya matondi o mosali omoaledzi mosala? Elo solo 'te yakoalema mokolo moko te. 10Elo mpe ndenge yawi na bino bayekoli, boadziki mpoo iyèye dza wa etomaka ba, boloba 'te: "Tobongiko na lokumu te tolo bè basali ba mpamba toadji bè mosala mwa bio.
Yesu abikisi bato dzomi na bwale bwa maba
11Bokei bwa Yesu o yelusaleme, atubaka o ndelo ya botubi o samalia nao galileya. 12Ntango'eyaba yo akaingela o mboka yoko, bato dzomi ba bwale bwa maba bayaka liya dziana nande, batelemeke ntaka. 13Mpe baba bakamobelela na mongongo mokudzi: Mokondzi Yezu otookela mawa mpe otobikisa! 14Yesu abaekaka mpe alobi naba 'te: Boke bokomiteidza o banganga ba Nyaamolo, ntango' eyakè ba o yo, babiki bakomi peto. 15Moko-moko o ntei yaba, ntango'eyaène yo 'te abiki, ayei liya'olodza o Yezu mpe akumisaka Nyaamolo na mongongo mokudzi! 16Agumbami o yambo ya Yesu, aôkèi boo bwande o nsina mpe ainyi Yesu matondi. Ona moto aba akawa engumba samalia 17Yezu akoi maloba atuni: Bokomiki peto bino dzomi, Nde libuwa lidzoko liengedziki koto te 'te liya inya Nyaamolo matondi? 18Kasi ata moto moko te, akoyaolodzaka mpo ya bokumisa Nyaamolo, kasi yaolodzaka bè mopaya owakoba moyuda te!" 19Nampino alobaka nande 'te: Teleme o landa; boyambi bwao boebikisi!
Bokondzi bwa Nyaamolo bwaya éntango baa?
20Mokolo moko lisanga la losammbo la bafalizeyo bamotunaka ntango bani'eyaya bokondzi bwa Nyaamolo. Yesu abaololedza 'te: bokondzi bwa Nyaamolo bwakoya na lolenge 'te bato baboènè te.
21Mpamba te Baakoloba 'te: "bolo owabo, to mpe bolo obo!" Mpamba te, bokondzi bwa Nyaamolo bolo o ntei ya bino. 22Nampino alobaka na bayekoli bande: Ntango ekeyèkè, elo 'te bwaba na mposa enene ya boèni mokolo mwanga mwana wa moto, kasi bwakoène muna mokolo te.
(Mt. 24:23-28)
23Bato baloba na bino o mikolo minina: Eka alo owabo!, Mpe alo'bo!, Bino nakoke te, mpe nakobabenga te. 24Lolenge lokoba mokalikali mokouta o likolo, mokongengidza ewai na ewai, yaba koto djabona mpo ya mokolo mwanga mwana wa moto naolodza. 25Kasi yambo ekeengela 'te naène mpasi ya makambo maike, mpe bato ba eleko ebo bantèe.
(Mt. 24:37-41)
26Makambo mamatubaka o ntango ya Nowa, maalema koto bè dzabona o mikolo mya mwana wa moto owaya'olodza yo. 27Bato baba baakadza, baakamwa, kina'o mokolo mo mwaingelaka Nowa o masuwa. Nampino mpela waeyaaka, ya babomaka bababèebe. 28Lolenge lawi koto o ntango ya Lota, bato baba baakadza, baakamwa, baakaomba, baakabadza bana baba, bakaona, mpe botongi bandako. 29Kasi mokolo mumwa tokooko Lota o sodomo, bolôbô bwa mweya mpe bwa matandala bwautaka o likolo mpe bwaba bomaka bababèebe. 30Yaba koto bè dzabona o mokolo mumwaya nga mwana wa moto. 31O mokolo mununa, moto'owaba o likolo dza ndako mpe abeiki natoma tande onsa ndako, yo nakoolowa te 'te akatokowa. Ndenge yawi koto mpo ya moto'owaba o nganda, yo nakoolodza te, mpo ya bokoi iyoma yoko. 32Bokanisa na likambo dza mwadzi wa lota. 33Moto'owakala bobikisi bomoi bwande yo menyi, abobungisa, kasi moto'owabungisa bomoi bwande mpo yanga, abobikisa mpo ya seko. 34Nalobi na bino, o mokolo mununa, bato babale batuka bolange bwawi: bakowa wawi mpe o moko aikala. 35Balibato babale baba bakatôkô o'ebôka ntei yawi, bakowa moko mpe o moko aikala. 36Bampele(bato) babale baba o nganda yawi, moko akowama mpe o moko aikala. 37Bayekoli bamotuni 'te: Nkolo mana makambo maalema o'eika baa? Yesu abaololedza 'te: Ntei elo mowei molangi, elo ntei ekeba bingondo bikyangana.
Currently Selected:
Lukasi 17: LIZ
Highlight
Share
Compare
Copy
Want to have your highlights saved across all your devices? Sign up or sign in
Libinza Bible by Beyond Translation is licensed under Creative Commons Attribution-ShareAlike 4.0 License.
