Lukasi 16
16
Lisolo la mobombi
1Yesu asololaka lisolo o bayekoli bande: modzii moko abaaka na mosali mwande mpo abatelaka toma tande. Bamolobedzi 'te: ona mosali akabebisa toma na bomengo bwande. 2Ona modzii amobelengaka mpe amotuni 'te: "makambo mamaoki nga mpo yao malo bè dzabona? Ondimbolela ndenge ekala we mosala mwao, mpamba te, wakoba liyu mokambi wa misala myanga te." 3Ona mosali amituni o motema mwande 'te: Naala minaa émayele baa, mpo mokondzi akawa 'te ansumola o mosala? Nako na ngwiya ya booni mosala mwa banganda te, mpe boongi bato toma elo iyôni mpo yanga. 4Minaa nadziya likanisi dza boadzi, nalolea likambo dzoko mpo bato bampinya eika ya bodzadzi ntango'eyakoma nga somele. 5Nampino abelengaka bato bababa na nyongo ya mokondzi wande: atuni moto wa yambo: "olo na nyongo ya mokonzi 'éntalo boo?" 6Moto wa nyongo amoololedza 'te: "nalo na nyongo ya mpipa ya nsadzi monkama ya Olive," nsima mosali alobi nande 'te: kowa cahier yao lai mpe okoma monkanda mou mpe omodzongidza na mpipa ntuku itano ya nsadzi." 7Mosali atunaka moto o moko: olo na nyongo 'éntalo boo? Ona moto amoololedza 'te: "saki ya masango monkama," mosali alobi nande: "eka monkanda mwao mwanyongo okoma 'te olo na nyongo yaba saki ya masango ntuku mwambi." 8Nampino mokondzi akumisaka mosali mununa mpo ya mayele mabe alobi: bato bakaba bakawaa bodzii bwa mokili bakaba bakaala makambo maba na mayele, batubi bato bakawaa bolandi na bosembo 9Yesu alobi naba 'te, bodzii bwa bino bwa koikala seko te, yango enena bosunga bato na bodzii bwa bino na ntina te mokolo mumwa dzanga bino ba koto baeyamba o ndako ya seko elo o lola.
10Oloba okolanda na bosembo o makambo ma makeke walanda koto na bosembo o makambo ma manene, kasi moto adzangiki bosembo o makambo ma makeke adzangi koto bosembo o makambo ma manene. 11Obeiko okoala bosembo o bodzii bwa mokili te, Nyaamolo akoeinya koto bomengo o bodzii bwa likolo te 12Bodzangiki bosembo o toma ta bato bau, nampino moto owaeinya toma ta bino menyi 'endzaa? 13Mosali akosalela bankolo babale te mpo aina moko mpe akala moko, yango enena bokota 'te bosalela Nyaamolo mpe bosalela palanga te.
14Lisanga dza losambo dza Bafalizeyo bakalaka koto palanga waike, kasi ntango eyaokaka ba mpo ibo bamoèkeke. 15Yesu alobaka naba 'te bino menyi bokomikumisa 'te bolo bato balamu, nooka Nyaamolo aeyebi 'te mitema ma bino milo mibe, mpamba te iyoma ikiène bino 'te ilo na ntina Nyaamolo akoikala te.
Mibeko mpe bokondzi bwa Nyaamolo
(Mt. 11:12-13)
16Mibeko ma Moize mpe basakoli basukaka o ntango ya Yoane Mobatisi, banda o ntango enena, nsango ndamu ya bokondzi bwa Nyaamolo bakaelobela mpe moto mumwèemwe akaala wakudzi 'te aingela omoo mpe aeyoka. 17Kasi liloba lidzèdzè lidza komama o mibeko mya Nyaamolo litei 'te liyalema, Likolo na nse ta tuba; kasi liloba dza Nyaamolo dza kotuba te.
(Mt. 5:32)
18Moto oumodzi mwadzi wande mpe abadzi mwadzi mou akaala nande ekobo; mpe moto o obadzi mwalimoto o'oumoi o libala akaala nande koto ekobo.
Lisolo la modzii mpe mobola lazalo
19Nsima Yesu alobi naba 'te: Yabaaka na modzii moko owabaaka akalata bitobo bilamu mpe bya ntalo, mpe abaaka na bomoi bwa nkita 20Mobola moko nkombo yande lazalo abaaka na bampota ndzoto mobimba mpe akatuka o monoko mwa ndako yande. 21Abaaka akatôngôlô toma ta bodzei totaba tokokpa o mesa ma modzii. Ata ba mbwa baba koto bakalète mpota yande. 22Mobola awei mpe ba andzelu bamotoi upe na Abalayama. Modzii mpe awaka mpe bamokundi. 23Wakoma ba o mboka ya ewelo, ebambo ya modzii yabaaka lifelo wabaka monyoko moike mpendza, watombola yo miyo o likolo aèneke Abalayama iluka mpe Lazalo adzadzi o buba bwande. 24Nsima modzii abelelaka na mongongo o likolo, nkoko Abalayama onsokela mawa, toma Lazalo aemba nsonge ya mwai mwande o mai aya ntangilidza o lolemu, mpo nakaoka bwale mpendza o mweya molo nga wabo. 25Kasi Abalayama amoololedzaka 'te: Mwana wanga kanisa walamu toma totaba nao ntango eyaba we na bomoi, ntango eyaba Lazalo na bwale. Minaa yo akabondisama wabo, we okomi na bwale. 26O ntei ya biyo na bino libulu linene lilomoi, moto akokiko boumoi wabo 'te aya omoo te, moto koto akouta o bino 'te aya olo biyo olibo te. 27Modzii alobaka 'te: Nakaebondela 'te o toma Lazalo olo baliya dzanga; 28Mpamba te, nalo na bamwanyango banga batano akabakebisa mpo ba nakoya o'elele ya bwale'elo nanga'ebo te. 29Kasi Abalayama amoololedzaka 'te: Bamwanyango ba o balo na mibeko mya Moize mpe mya basakoli omoo, baoka bè ba. 30Kasi modzii alobaka liyu 'te: Bototo, nkoko Abalayama Wèeniki moto moko awiki o mboka ya bawei mpe akèi oba, o maana babongola mitema. 31Kasi Abalayama amoololedza: Bè balo tèè booki mibeko ma Moize na basakoli, nibei moto asekwi o liwa bakomondima te.
Currently Selected:
Lukasi 16: LIZ
Highlight
Share
Compare
Copy
Want to have your highlights saved across all your devices? Sign up or sign in
Libinza Bible by Beyond Translation is licensed under Creative Commons Attribution-ShareAlike 4.0 License.
