Lukasi 15
15
Lisolo dza mème eyabungaka
(Mt. 18:12-24)
1Bakongondzi ba ntako mpe bato ba masumu, baba bakaya upe ya Yesu mpo ya bomooki. 2Kasi bafalizeyo mpe balakisi ba mibeko ma Moize, baba bakamitungisa mpe bakaloba 'te: moto obo akalanda na bato ba masumu mpe akadza naba elele yawi o bandako yaba. 3Nsima Yesu abalobelaka lisolo libo: 4Kanisa 'te moko wa bino abeiki na bamème monkama, mpe yawi abungi. Atèi mpe 'te aika liyu ba mèeme iyoko ntuku libuwa na libuwa atooko kawaa mème yawi ebungi o esobe kino waedziya yo. 5Mpe ntango yaeyene yo, asepelaka mpe asepelaka waike, nampino aetoi o mabeke mande. 6Nsima aolodza naé o ndako yande. Abelengi baana bande mpe bato balo upe nande na bato badzadzi upe nande mpe alobi naba 'te nadzii ina mème ebungiki. Yaka bosepela nanga elongo. 7Elo bè dzabona Nyaamolo mpe baandzelu bande o likolo basepela waike na moto wa masumu odzongi o Nyaamolo botubi bato ntuku libuwa na libuwa bako na likoki dza boyambodzi te.
Lisolo dza palanga ya makuta
8Yesu alobaka lisolo lidzoko kanisa 'te mwalimoto alo na palanga yande ya bibende mpata dzomi mpe abungidza mpata yawi, aatumba mwinda mpo 'te awa mpata yawi ebungi enena kina adzia. 9Mpe waedzia yo, abelengaka banà bande, mpe bato balo nande upe mpe abalobedzi 'te yaka bosepela nanga mpo nadzii palanga ibungiki!' 10Yesu abalimboledzi, elo bè ndenge yawi na moto moko wa masumu obongodzi motema, Nyaamolo yo naba andzelu bande, baala enyanga mpo yande.
Lisolo dza mwana
11Yesu alobi liyu lisolo dza bana babale: moto moko abaka na bana bande ba bampele babale. 12O modzimi alobaka na ango waba 'te: Tata ompinya yanga ndambo ya toma; yambo 'te owa; nampino tata waba akimidzaka 'te abakabolela toma tande. 13Nsima ya mwa mikolo o modzimi abelidzaka toma tande totèete mpe adziaka ndambo yande ya palanga mpe akèeke mobembo o mboka eyu; wakomaka yo omoo, abebisaka palanga yande iyèye na bomoi bwa kiilkili. 14Waila palanga yande, kasi mongenge mwa nsomo mwa kpaaka o mboka eyaba yo, mpe akelelaka waike. 15Nampino akèeke lika ingela mosala mwa bobadzi banganda o moto moko wa mboka enena mpe moto onona amotomaka 'te akabatela bangulu bande o banganda. 16Kasi mwana wa lele obo aba akadza toma totalelaka ba bangulu kasi moto moko akomoinyaka toma ta bodzei te. 17Ntango eyaakanisa mwana wa lele amilobedzi 'te nakomi dzoba; mpo basali batata wanga balo natoma ta bodzei toike mpe nga nakawa na nsala wabo! 18Naolodza o ndako ya tata wanga mpe nakaloba nande 'te: tata naeyaledzi bobe mpe naaledzi Nyaamolo wabe. 19Yango enena nakonkowa liyu mwana wao te, kasi onkowa dza basali ba o bakafutama." 20Nampino mwana aolodzaka o ango wande, kasi waba yo naino mwa iluka na ndako, ango wande amoeni mpe amooki mawa. Akèi mbango lika moyamba mpe amopwepwi. 21Nampino mwana alobi na ango 'te; tata naadzi bobe o miyo ma nyaamolo mpe o miyo mao mpe nakota 'te ombelenga liyu mwana wao te kasi moombo wao." 22Nsima Ango ainyaka mobeko na baombo bande baboko 'te: boke o ndako bomokoela bitobo bi bilamu botubi mpe yaka nabi bomolaidza, bomolaidza koto mompetè o mwai mwande mpe bomolaidza sandale elamu o makolo mande. 23Mpe boke lika kowa ngombo elo na ndzoto ndamu, boeboma mpe boelamba mpo toala enyanga, tosepela na mwana wanga o wabungaka, aolodza. 24Tata alobi; elo dza mwana wanga awaka mpe lelo aolodza na bomoi; mpe elo dza abungaka mpe lelo adziani. Nampino babandzi bosepedzi.
25Ntango eyaba likambo likalema, motolomo wande abaka o mosala mwande mwa banganda o moito; waya yo na malembe, akomi upe na mboka, aoki lokito dza mbonda mpe dza mabina. 26Ntango eyakoma, mwana omokolu abelengi moombo mwaba moko mpe amotuni makambo maka tuba. 27Nampino moombo amololedza 'te; ele modzimi wao aolodza o ndako, mpe ongo wa bino aadzi enyanga, abomi mwana wa ngombo o molamu mpe tokosepela na boyei bwande ndzoto ndamu. 28Nsima motolomo waoka yo dzabona asiliki wakudzi mpe akokalaka bokei o enyanga te, nde nsima ango waba ayei liya mobondele 'te aingela o ndako owaba enyanga. 29Kasi mwana o motolomo ayanolaka ango waba 'te; eka mbula ndzike naadzi mosala owè dza moombo nakaetosa ntango iyèye kasi wakompinya ata ebuwa yoko 'te naala enyanga na baana banga te. 30Nampino mwana wao; o bebisi palanga yao na bandumba, ayei liya Olodza o ndako, mpoyae? Okosepela mpe obomi mwana wa ngombo o molamu mpo yande? 31Mpe nsima ango amololedza 'te: mwana wanga wa nsomi, tolowabo bè biyo babale eika yawi ntango iyèye, mpe bodzii bwanga elo bè bodzii bwao mpe o ntei 'te osalela toma tanga na ndenge ekadzi we. 32Nakosilika te, yaka tosepela mpo mwanyongo owabaaka dza mowei lelo aeneni mpe owabaka dza mobungi, adziani liyu!
Currently Selected:
Lukasi 15: LIZ
Highlight
Share
Compare
Copy
Want to have your highlights saved across all your devices? Sign up or sign in
Libinza Bible by Beyond Translation is licensed under Creative Commons Attribution-ShareAlike 4.0 License.
