ရှင်လုကာ 22
22
အခန်း (၂၂)
ကိုယ်တော်ယေရှု ဓုတ်ဟိုင်အာမ်ကြံစည်ခေါမ်
(ရှင်မဿဲ ၂၆:၁-၅။ ရှင်မာကု ၁၄:၁-၂။ ရှင်ယောဟန် ၁၁:၄၅-၅၃)
1အင်မ်ပါလ်နောလ် ပသခါပွဲတိရိုအာမ်ဟောင်ခေါမ် ဟန်းပူလ်ယတိမုန့်ပွဲချိန် အယျော်လူးပါလ်။ 2ဂျူးပုရောဟိတ်လန်လှီ့လား ကျမ်းဆလော်လှီ့နား ခေါင်ထုလှီ့အာမ်ကိခန်းနောလ် ကိုယ်တော်ယေရှု ယူရုပ်စောဝေါလ် ဓုတ်ခွတ်ဟိုင် နည်းလမ်း အာမ်ဆူလ်။ 3အင်မ်ဟိုဝေါလ် သာဝကကုလာနှိဒုလ့်ကာလ်ကိ #22:3 ယုဒရှကာရုတ်=နောက်ဆုံးအမီဘုအေပွဲရိုး မာရ်နောတ်ခေါမ် အင်မ်ခေါင်ဒုလ့်ကာလ်ဝင်ထေ့နား ကိုယ်တော်ယေရှု ဆတ်ဇော်ဖောက်ထေ့နား၊ ကိုယ်တော်ယေရှု ဆတ်ဇော်ဖောက်ခေါမ်တွက်ကာလ် နောင်တလောဒ့်ထေ့နား အပုန်းဟို့လားအပုန်းဟို့ ဘာလ့်လူအထူဟိလ့်။ယုဒရှကာရုတ် တိရို ဟောင်ခေါမ်စငေါလ် မာရ်နောတ်အပူးကပ်။ 4အင်မ်ပါလ်နောလ် ယုဒနား ဂျူးပုရောဟိတ်လန်လှီ့လား ဗိမာန်တော်စောင်တိအရာရှိလှီ့စငေါလ် ဈာတ်ထေ့နား ကိုယ်တော်ယေရှုခေါမ် အင်မ်လှီ့ကွတ်ဒုလ့်ကာလ် ဟိဘော်အပ်လောဒ့်အိုက်နောက်ခေါမ် အလာယေ။ 5အင်မ်ခေါင်လှီ့ခါ တပြင်းပျော်ထေ့နား ယုဒအောလ် ဒေါင်းဂိုပက်ဟိုင် သဘောအာမ်တူ။ 6ယုဒနားခါ သဘောအတူခန်းနောလ် ခေါင်လှီ့မယ်ယခေါမ် အချိန်ငေါလ် ကိုယ်တော်ယေရှု မင်ခွတ်ဟိုင် နည်းလမ်းအဆူလ်။
ပသခါပွဲတော်တွက်ပြင်ဆင်ခေါမ်
7အင်မ်ပါလ်နောလ် ဟင်းပူလ်ယတိမု့န်ပွဲတိရိုဟောင်ခေါမ် ပသခါပွဲတွက် သိုးစော ပူဇော်လောဒ့်ခေါမ် နှိုပ်အခိုက်လူး။ 8အင်မ်ခန်းနောလ် ကိုယ်တော်ယေရှုနား ပေတရုလား ယောဟန်ရိုး “ဟမီးပသခါပွဲ ဟှတောလ်အေဟိုင် ဈာတ်ထေ့နား ပြင်ဆင်ငယ်ယားဟိ” တိရို အမိန့်။
9အင်မ်ဟွဒ့်နားခါ “အရှင်ငါး၊ ဟိဘောင်ဓိလ်နောလ် ပြင်ဆင်ဆောက်ဟိုင် နာလီ” တိရို အဟီဟိ့ခန်းနောလ် 10ကိုယ်တော်နား “လုဒုလ့်ကာလ် နာဟီဝင်ဟိုဝေါလ် သွီးစီလန်ပိုးတိပါးလူးတိ ခေါင်ပွလ်ဟှတ် နာဟီမှူးအိုက်။ အင်မ်ခေါင် နှူဝေါလ်ဈာတ်ထေ့နား အဝင်နောက်အိမ်းမာလ်ဝင်ငယ်ဘွတ်ဟီ့။ 11အင်မ်ပါလ်နောလ် ‘အိမ်းမို့အောလ် ကေးမီး အရှင်နား အတပည့်လှီ့ဓေါလ် ပသခါပွဲအမီဘုအေအောတ်နောက်ဟိုင်အခန်း ဟိဘောင်ငေါလ် တိရို နာင်ငေါလ် အဟိ့လူးဆောက်’ တိရို ဟောင်ဘွတ်ဟီ့။ 12အင်မ်ဟိုဝေါလ် အိမ်းမို့နား နာင်ဟီ့ အဟြှလ်နောလ် ဈိပူနိုးထေ့နား ပြင်ဆင်ဟိုင် အဆင်သင့်ထောလ်စောလ်တိ အခန်းလန်တိခန်းဟှတ် အဓေါင်နိုက်။ ပသခါအေအောတ့် အင်မ်အခန်းရိုး ပြင်ဆင်ဘွတ်ဟီ့” တိရို အမိန့်။
13အင်မ်ပါလ်နောလ် ပေတရုနလား ယောဟန် လုဒုလ့်ကာလ် ဈာတ်ထေ့နား ကိုယ်တော်ဟောင်ဘော် အဟီမှူးခန်းနောလ် ပသခါအေအောတ် အင်မ်ဓိလ်နောလ် အဟီပြင်ဆင်။
တပည့်တော်လှီ့ဓေါလ်ဟှတောလ် ပသခါ အမီဘုအေခေါမ်
(ရှင်မဿဲ ၂၆:၂၆-၃၀။ ရှင်မာကု ၁၄:၂၂-၂၆)
14ပသခါ အမီဘုအေဟိုင် အချိန်ကျလူးဟိုဝေါလ် ကိုယ်တော်ခေါမ် သာဝကလှီ့ဓေါလ်ဟှတောလ် ဘုအေခုံငေါလ်အငွာ။ 15အင်မ်ပါလ်နောလ် ကိုယ်တော်နား အင်မ်လှီ့အောလ် “ကေးနား ဆိတ်ခမ်းထေ့နား ကေဘာလ့်လှောင်နောလ် နီပွဲပသခါပွဲ နာင်မီးဓေါလ်ဟှတောလ် အေဟိုင် ကေလီ။ 16နာင်မီးရိုး ကေဟောင်ဝိုက်လောဒ့်အိုက် နောက်ဟိုဝေါလ်စေး #22:16 နီစော်ကြောင်းငေါလ် ဂျူးခေါင်ယှီလှီ့ မာဘဝအောလ်ကိ အာမ်လွှတ်ဘော် ကိုယ်တော်ယေရှုနား အဘာလ့်ခံထေ့နား ဖုလော်ရှင် ခေါင်ယှီလှီ့အပြစ်တောလ်ကိ လွှတ်မြောက်ခေါမ်ငေါလ်အထောလ်။ ပသခါသိုးစောနောက်ခေါမ် ကိုယ်တော်ဓေါလ် ခိုင်းနှိုင်းခေါမ်ငေါလ်အထောလ်။ဖုလော်ရှင်သာသနာတော်ဝေါလ် ပသခါပွဲ အဓိပ္ပာယ် အမှန်တကယ်ထောလ်လူးယဝေ့ ကေးနား အထာပသခါပွဲ အေတီးဟိုင်ဆီးဟီ” တိရို အမိန့်။
17အင်မ်ပါလ်နောလ် ကိုယ်တော်နား စပျစ်ဝိုင်ခွတ်လိုဝေထေ့နား ဖုလော်ရှင်ကျေးဇူးတော် အချီးမွမ်းပါလ်နောလ် “နီဝိုင်ခွက်လိုဝေထေ့နား ပွလ်ဟှတ်လားပွလ်ဟှတ် ဖဲ့အယ်ထေ့နား အူးဘွတ်စူး။ 18နာင်မီးရိုး ကေဟောင်လောဒ့်အိုက်နောက်ဟိုဝေါလ်စေး ဖုလော်ရှင်သာသနာတော် ခိုက်လူးဟာမ်းယဝေ့ စပျစ်ဌေ့ရိုးကိလောဒ့်ခေါမ် စပျစ်ဝိုင်ခေါမ် အီဟိုဝေါလ်ခါ အူးတီးဟိုင်ဆီးဟီ” တိရို အမိန့်။
19အင်မ်ပါလ်နောလ် ပေါင်မုန့်လိုထေ့နား ဖုလော်ရှင်ကျေးဇူးတော် ချီးမွမ်းထေ့နား ဖဲဗာန် အတပည့်လှီ့အောလ် ပေးထေ့နား “နီပေါင်မုန့်ခေါမ် နာင်မီးရိုး ကေပက်ခေါမ် ကေးပုန်းမာလ် အထောလ်။ ကေး နာမ်ခိန်နယ်နောက်ဟိုင်ရိုး နီဘော်ဆက်ကယ်နားစိုင်းဘွတ်စူး” တိရို အမိန့်။
20အင်မ်ဘော် အမီဘုအာမ်အေပါလ်နောလ် ကိုယ်တော်နား ဝိုင်ခွက်ကိုင်ဗာန် “နီစပျစ်သွီးစေး ဖုလော်ရှင်ဓေါလ် သဘောတူခေါမ် အထာဝေါလ်ထောလ်ဟနောလ် နာင်မီးရိုး ကေးနား ကေလွဲန်ခေါမ် ကေးထီးရိုး အထောလ်။ 21အင်မ်ဘော်နားခါ ကေး ဆက်ဇော်ဖောက်ဟိုင်ခေါင် ကေးဓေါလ် စားပွဲဟှတောလ် အအေ။ 22ခေါင်စိုးစေး ဖုလော်ရှင် အကြံစည်ဘော် ဘာလ့်လောဒ့်အိုက်နိုးနားခါ ခေါင်စိုး ဆက်ဇော်ဖောက်တိ ခေါင်စေး ဆိတ်အခံလောဒ့်အိုက်” တိရို အမိန့်။ 23အင်မ်ခေခေါအာမ်ရောက်ဟိုဝေါလ် တပည့်တော်လှီ့နား “ဟမီဒုလ့်ကာလ်ကိ ဟအူနား နီဘောင်ပွန်ယတိကိစ္စလှီ့ အစိုင်းရိုက်” တိရို ပွလ်ဟှတ်လားပွလ်ဟှတ် အာမ်ဟီးယေတောင်။
ဟအူကြီးမြတ်တိရို အငြင်းပွားခေါမ်
24အင်မ်ပါလ်နောလ် တပည့်တော်လှီ့နား အင်မ်လှီ့ဒုလ့်ကာလ်ကိ ဟအူအကြီးမြတ်ဆုံးနောက်ခေါမ် အာမ်ငြင်းငယ်တောင်ခန်းနောလ် 25ကိုယ်တော်နား “ဂျူးခေါင်ယှီဆီးယတိလှီ့ ဆောင်ဖလောင်လှီ့နား ခေါင်ထုလှီ့ အာဏာဓေါလ် အာမ်အုပ်ချုပ်နားခါ အပုန်းဟို့နားအပုန်းဟို့ ခေါင်လှီ့ အကျိုးဆောင်တိလှီ့ တိရို ခေါင်လှီ့နား စုတ်င်ဟိုင်အာမ်လီဝေ။ 26အင်မ်ဘော်နားခါ နာင်မီးနား အင်မ်ဘော် စိုင်းကော့စူး။ အင်မ်အစား နာင်မီးဒုလ့်ကာလ်ကိ အရေးပါဆုံးတိနောက်ခေါမ် အရေးပါယတိဘော် မယ်သင့်ထေ့နား ခေါင်းဆောင်ခါ အစေခံဘော် နှိမ့်ချထေ့နား အမယ်သင့်။ 27အေနောက်ခုံငေါလ် အေဟိုင်ငွာတိခေါင်လား အေအောတ်လှီ့ဓေါလ်ခိန်းနိုးတိ ပွလ်နှိဒုလ့်ကာလ် ဟအူအကြီးမြတ်။ အေနောက်ခုံငေါလ်ငွာတိအာ ဆီးယနား အေအောတ်ဟိုင်လှီ့ဓေါလ် ခိန်းနိုးတိအာ။ အေနောက်ခုံငေါလ် ငွာတိ ဆီးယော်ဝြာ။ အင်မ်ဘော်နားခါ ကေးနောက်ခေါမ် နာင်မီးတွက် အေအောတ်လှီ့ဓေါလ် ခိန်းနိုးပက်လောဒ့်တိ အစေခံပွလ်ဟှတ်ဘော် ကေထောလ်။ 28နာင်မီးစေး ကေးနား ဆိတ်လှီ့ကေခမ်းဟိလ့်ဟိုဝေါလ်ခါ ကေးဓေါလ်ဟှတောလ် နာမ်မယ်ဟိလ့်ဟ။ 29ပေါလ်ဖုလော်နား ကေးရိုး အုပ်စိုးခွင့် အပက်ဟိလ့်ဘော် ကေးနားခါ နာင်မီးရိုး အုပ်စိုးခွင့် ကေပက်တိုက်။ 30အင်မ်ခန်းနောလ် နာင်မီး ကေးသာသနာတော်ဝေါလ်မယ်တိ ကေး စားပွဲရိုး ကေးဓေါလ်ဟှတ်တောလ် အေခွင့်လောဒ့်ထေ့လား ပလ္လင်ခုံငေါလ်ငွာထေ့နား အစ္စရေးခေါင်ယှီ့ ယှီကုလာနှိ နာမ်အုပ်စိုးလောဒ့်အိုက်” တိရို အမိန့်။
ပေတရုနားအငြင်းဟိုင်အကြောင်း အမိန့်ဗာန်ခေါမ်
(ရှင်မဿဲ ၂၆:၃၁-၃၅။ ရှင်မာကု ၁၄:၂၇-၃၁။ ရှင်ယောဟန် ၁၃:၃၆-၃၈)
31အင်မ်ပါလ်နောလ် “ရှိမုန်၊ ရှိမုန်၊ ငေယား။ လိုင်မို့နား စောင်စီးလားအဟုပ့်လှီ့ အခွဲခြားဘော် မာရ်နောတ်နားခါ နာင်မီး ပွလ်ဟှတ်စီမာလ် ကေးယုမ်တိလား ကေးယုမ်ယတိခွဲခြား အစမ်းသပ်ဟိုင် အခွင့်ခါအတောင်ပါလ်။ 32အင်မ်ဘော်နားခါ ရှိမုန်ငါး၊ နာင်စငေါလ် ကေးနာယုမ်ဆော်ဟိုင်ရိုး ဆုကေတောင်ပက်။ နာင် နောင်တလောဒ့်ထေ့နား ကေးလာမ်းမာလ် နာမောင်လူးဘွာလ်ဟိုဝေါလ် သာနောင်လှီ့ ယုမ်ကြည်မှု ပိုဝေနားမယ်ဟိုင် ကူညီဘွတ်” တိရို အမိန့်။
33အင်မ်ဘော်နားခါ ပေတရုနား ကိုယ်တော်ဝေါလ် “အရှင်၊ ကေးနောက်ခေါမ် ထောင်ငေါလ်ခါဆီးဆတ်၊ အရှင်ဓေါလ်ဟှတ်တောလ် ဘာလ့်လောဒ့်ဟိုင်ကုံးခါ အဆင်သင့်ယောင်” တိရို အလျှောက်ခန်းနောလ်
34ကိုယ်တော်ယေရှုနား “ပေတရု၊ နာင်ငေါလ် ကေဟောင်ဝိုက်။ တုမီကုံးငေါလ် အာခေါင်(င်)လှောင်နောလ် နာင်နား ကေး စူးဟီ တိရို ကွလ်ထုမ်တိတိ နာငြင်းငိုက်” တိရို အမိန့်။
ဒေါင်းဂိုအိတ်၊ ခရီးဆောင်အိတ်လား စီမ်(မ်)ဆောင်း
35အင်မ်ပါလ်နောလ် ကိုယ်တော်နား “ကေးနား နာင်မီးရိုး ဒေါင်းဂိုအိတ်၊ ခရီးဆောင်အိတ်လား ဖိနပ်ကုံးခါ စိအယ်ဆောက်ကော် ကေတိဟိလ့်ဟိုဝေါလ် လိုအပ်ချက် အမယ်ဟိလ့်တာ” တိရို အဟိ့ဟိုဝေါလ်
အတပည့်လှီ့နား “မယ်ဟိလ့်ယော်” တိရို အာမ်လျှောက်။
36အင်မ်ပါလ်နောလ် ကိုယ်တော်နား “တုအောလ်စေး ဒေါင်းဂိုအိတ် နာမ်တောဒ့်ကယ် ဟိုဝေါလ်စေး စိအယ်ဘွတ်စူး။ ခရီးဆောင်အိတ်ခါ စိအယ်ဘွတ်စူး။ စီမ်#22:36 နီဓိလ်နောလ် ကိုယ်တော်နား စီမ်အလှည့်ဆောက်ခေါမ်ဆီးကော် အင်မ်အစား ခေါင်လှီ့နား အာမ်ဆဆ္ဆီနောက်ဟိုဝေါလ် ပုန်းဟို့နားပုန်းဟို့ ကာကွယ်ယေဟိုင်အဟောင်ခေါမ် တပည့်တော်လှီ့နား တကယ့်စီမ်အလှည့်ဆောက်တိရို အာမ်ခိလ်။ နာမ်တောဒ့်ကယ်ယဟိုဝေါလ်စေး ဆူဆောက်အချို့ ရီထေ့နား လှည်းဘွတ်စူး။ 37နာင်မီးရိုး ကေဟောင်လောဒ့်အိုက်နောက်ဟိုဝေါလ်စေး ကေးစငေါလ် အမှန်ကုံးငေါလ် အထောလ်လူးဝိုက် တိရို ကျမ်းစော်ဝေါလ် ရော့ကယ်တိ ‘အင်မ် ရာဇဝတ်ဆော် တိရို သတ်မှတ်ခံလောဒ့်အိုက်’ တိရို အရော့ကယ်ခေါမ်ဘော် အမှန်ကုံးငေါလ်အထောလ်လူးဟိလ့်” တိရို အမိန့်။
38အင်မ်ဟိုဝေါလ် တပည့်လှီ့နား “ကိုယ်တော်၊ ဓေါ့်ဝြား။ နီရိုး စိမ်ချောင်းနှိ အမယ်” တိရို အတပည့်လှီ့နား အာမ်လျှောက်ခန်းနောလ် ကိုယ်တော်နား “အလို့ပါလ်” တိရို အမိန့်။
ကိုယ်တော်ယေရှု သံလွင်ကုန်းဟြှလ် ဆုတောင်းခေါမ်
(ရှင်မဿဲ ၂၆:၃၆-၄၆။ ရှင်မာကု ၁၄:၃၂-၄၂)
39အင်မ်ပါလ်နောလ် ကိုယ်တော်ယေရှုနား အစိုင်းဆော်ဘော် သံလွင်ကုန်းဟြှလ်နောလ် အကွာ။ တပည့်တော်လှီ့နားခါ အနှူဝေါလ် အာမ်ရုန်းလူ။ 40အင်မ်ဓိလ်နောလ် အာမ်ခိုက်ဟိုဝေါလ် ကိုယ်တော်နား တပည့်တော်လှီ့အောလ် “ဖြားယောင်းခေါမ် ခံလောဒ့်ယဟနောလ် ဆုတောင်းဘွတ်စူး” တိရို အမိန့်။ 41အင်မ်ပါလ်နောလ် ကိုယ်တော်ခေါမ် အတပည့်လှီ့ မယ်နောက်ဓိလ်ဓေါလ် အလှမ်းနောက်အခိုက်ဟိုဝေါလ် ကိုယ်တော်ခေါမ် ခုတ်လူရ်ထောက်ဗာန် 42“အို ပေါလ်ဖုလော်ရှင်၊ ပေါလ်ဖုလော်ရှင် ကေးစငေါလ် ဆိတ်လှီ့ထောလ်လူးယဟနောလ် စိုင်းပက်တား။ အင်မ်ဘော်နားခါ ဖုလော်ရှင် လီဘော်ယောင် ထောလ်ဆတ်။ ကေး လီဘော်ထောလ်ယဆတ်” တိရို ဆုအတောင်။ 43အင်မ်ဟိုဝေါလ် ဟြှားလုအောလ်ကိ ဖုလော်ရှင်နောတ်ဒေဝါပါးဟှတ် ခိုက်လူးထေ့နား ကိုယ်တော်ဝေါလ် အားအပက်။ 44အင်မ်ပါလ်နောလ် ကိုယ်တော်နား တပြင်းကုံးလုန်ပင်ပန်းခေါမ်ခံစားလောဒ့်ထေ့နား အပြင်းအထန် ဆုအတောင်ဟိုဝေါလ် ကိုယ်တော်စငေါလ်ကိ ကိုးတိ ခွလ်လှီ့ ထီးဘော်ဝေါလ် သပ့်ခုံငေါလ် အကိုး။
45ကိုယ်တော်နား အင်မ်ဘော် ဆုအတောင်းပါလ်နောလ် ထောထေ့နား အတပည့်လှီ့စငေါလ် အလူးဘွာလ်ဟိုဝေါလ် အတပည့်လှီ့ လုန်ပွန်ယအောလ်အာမ်ထောလ်ခန်းနောလ် ရိုင်းဗာန် အာမ်အိပ်ခေါမ် အမှူးလူး။ 46ကိုယ်တော်နား အတပည့်လှီ့အောလ် “ဟိဘော်ဟိုင်ရိုး နာမ်အိပ်။ ထောထေ့နား ဖြားယောင်းခေါမ်ငေါလ် ခံလောဒ့်ယဟနောလ် ဆုတောင်ငေါလ်” တိရို အမိန့်။
ယုဒနားကိုယ်တော်အနှာမ်ခေါမ်
(ရှင်မဿဲ ၂၆:၄၇-၅၆။ ရှင်မာကု ၁၄:၄၃-၅၀။ ရှင်ယောဟန် ၁၈:၃-၁၁)
47ကိုယ်တော်နား နီဘော် အမိန့်လှူလှူဟိုဝေါလ် စါစ်နောက်ကာလ် ခေါင်အုပ်စုဟုတ် ကိုယ်တော်စငေါလ် အာမ်ခိုက်လူး။ အင်မ်ခေါင်လှီ့နောက်ခေါမ် သာဝကကုလာနှိဒုလ့်ကာလ်ပူလ်တိ ယုဒရှကာရုတ်နား ဦးဆောင်ဗာန်အလူးပူနောက်။ ယုဒနား ကိုယ်တော်ခေါမ် နှာမ်ထေ့နား နှုတ်ဆက်ဟိုင် အကာဝေါလ်အလူး။ 48အင်မ်ဟိုဝေါလ် ကိုယ်တော်နား ယုဒအောလ် “နာင်နား ခေါင်စိုးနီဘော်နှမ်ဗာန် ဆက်ဇော်နာဖောက်ကာ” တိရို အဟိ့။
49ကိုယ်တော် တပည့်လှီ့နား အင်မ်အဖြစ်ပျက်လှီ့ အမှူးဟိုဝေါလ် “အရှင်ငါး ကေးမီးနား အင်မ်ခေါင်လှီ့ စိမ်မာလ် ကေခုခံလောဒ့်အိုက်ယာ” တိရို အာမ်ဟိ့။ 50အင်မ်ပါလ်နောလ် တပည့်တော်လှီ့ဒုလ့်ကာလ်ကိ ပွလ်ဟှတ်နား ဂျူးပုရောဟိတ်အလန်ဆုံးတိ အစေခံပွလ်ဟှတ်စိမ်မာလ် အဆို့ဟိုဝေါလ် ခစ်လာမ်းနှိုဂူ အပြအယ်လှမ်။
51အင်မ်ဘော်နားခါ ကိုယ်တော်နား “နီဟို့အောလ် ရပ်အား” တိရို ဟောင်ထေ့နား အင်မ်ပြအယ်လှမ်တိ အစေခံနှိုဂူ နဂိုဘော်မယ်ဘွာလ်ဟနောလ် အစိုင်းပက်ဘွာလ်။
52အင်မ်ပါလ်နောလ် ကိုယ်တော်နား အပုန်းဟို့ မင်ဟိုင်လူးတိ ဂျူးပုရောဟိတ်လန်လှီ့၊ ဗိမာန်တော်စောင့်တိအရာရှိလှီ့လား ဂျူးခေါင်ယှီဆောက်င်စာန်တိလှီ့အောလ် “နာင်မီးနား သူခိုး၊ ဓါးပြ မင်ဘော် စီမ်လှီ့၊ ခါးလှီ့ဓေါလ် ဟိဘော်ဟိုင်ရိုး နာမ်လူး။ ကေး ရာဇဝတ်ဆော် တိရို နာမ်ခိန်နာ။ 53ကေး နှိုပ်တိုင် ဗိမာန်တော်ခြံငေါလ် နာင်မီးဓေါလ်ဟှတောလ် ကေမယ်ဟိုဝေါလ် ဟိဘော်ဟိုင်ရိုး မင်လူးယော်စု။ အင်မ်ဘော်နားခါ နီအချိန်ခေါမ် နာင်မီးအချိန်ငေါလ် ထောလ်ထေ့နား မာရ်နောတ်ခါ အင်မ်ပွန်ယတိလှီ့ အစိုင်းခေါမ် အချိန်ငေါလ် အထောလ်” တိရို အဟောင်။
ကိုယ်တော်ယေရှုစူးဟီတိရို ပေတရုနားအငြင်းခေါမ်
(ရှင်မဿဲ ၂၆:၅၇-၅၈၊၆၉-၇၅။ ရှင်မာကု ၁၄:၅၃-၅၄၊၆၆-၇၂။ ရှင်ယောဟန် ၁၈:၁၂-၁၈၊၂၅-၂၇)
54အင်မ်ပါလ်နောလ် အင်မ်လှီ့နား ကိုယ်တော် မင်ထေ့နား ဂျူးပုရောဟိတ်အလန်ဆုံးတိ အိမ်းမာလ် အာမ်ဈိအယ်ဟိုဝေါလ် ပေတရုနား မက်စောအလှမ်းမာလ်ကထု အနှူဝေါလ် အရုန်းနယ်။ 55အင်မ်လှီ့ အင်မ်ဓိလ်နောလ် အာမ်ခိုက်ပါလ်နောလ် ပုရောဟိတ်အလန်ဆုံး အိမ်းခြံဝန်းဒုလ့်ကာလ် ခေါင်အချို့လှီ့ ဝိုင်းယေနား မေးအာမ်အုမ်နောက်ကိုးကိုဝေါလ် ပေတရုအငွာယေ။ 56အင်မ်ဘော် ပေတရု မေးအုမ်ခေါမ် အစေခံမုတောပွလ်ဟှတ်နား အမှူးဟိုဝေါလ် ပေတရု ပွန်ပွန်ဓေါ့်ဝေထေ့နား “နီခေါင်ခါ ယေရှုဓေါလ် ဟှတောလ် မယ်တိဒုလ့်ကာလ်ကိ ပွလ်ဟှတ်တောလ် အထောလ်” တိရို အဟောင်။
57အင်မ်ဘော်နားခါ ပေတရုနား “မုတောဝြား ကေးနား အင်မ်စူးဟီ” တိရို အငြင်း။
58အင်မ်ပါလ်နောလ် အီဝှေ့ခါ ဓီယော် အစွာခေါင်ပွလ်ဟှတ်နား ပေတရုအမှူးခန်းနောလ် “နာင်ခါ အင်မ်ခေါင်လှီ့ ဒုလ့်ကာလ်ကိပွလ်ဟှတ်တောလ် နာထောလ်” တိရို အဟောင်ခန်းနောလ်
ပေတရုနား “ကေး အင်မ်အဖွဲ့ဒုလ့်ကာလ်ကိ ဆီးဟီ” တိရို အငြင်း။
59အထာ နာရီဟှတ်တောလ် အစွာခေါင်ပွလ်ဟှတ်နား “နီခါ ဂါလိလဲဆော်ဝေါလ်အထောလ်ခန်းနောလ် ယေရှုဓေါလ် ဟှတောလ် အမယ်ဟိလ့်နောက်ခေါမ် အသေချာယောင်” တိရို ခိုင်ခိုင်မာမာ အဟောင်။
60အင်မ်ချိန်ကုံးငေါလ် ပေတရုနား “ခီပွီယား၊ နာင်နား ဟိအီ နာဟောင်နောက်ခေါမ် ကေး စူးဟီ” တိရို အငြင်းဘွာလ်တီး။ အင်မ်ဘော် အဟောင်လှူလှူဟိုဝေါလ် အာအခုန်လူး။ 61အင်မ်ဟိုဝေါလ် ကိုယ်တော်ခေါမ် ပေတရုလာမ်းမာလ် မောင်ထေ့နား အဓေါ့်ဝေဟိုဝေါလ် ပေတရုနား ကိုယ်တော် မိန့်ဟိလ့်ခေါမ် “တုမီ အာခုန်လှောင်နောလ် ကေး စူးဟီ တိရို ကွလ်ထုမ်တိတိ နာငြင်းငိုက်” နောက်ခေါမ်ခေခေါ သတိအလောဒ့်ခန်းနောလ် 62အကောင်ငေါလ်ထွက်ထေ့နား တပြင်းအကာပ်ပေ။
63အင်မ်ချိန်ငေါလ် ကိုယ်တော်ယေရှု စောင်တိစစ်ဆော်လှီ့နား ကိုယ်တော် လှောင်ပြောင်ထေ့နား အာမ်မွ။ 64မိတ်မှူးလောဒ့်ယဟနောလ် ဆူဆောက်ကာလ် ပတ်ထေ့နား “နာင် ပရောဖက်နောက်ဟိုဝေါလ်စေး နာင် ဟအူနား အမွနောက်ခေါမ် ခန့်မှန်းစမ်းမား” တိရို ဟောင်ထေ့နား 65နည်းအယီယီဝေါလ် ကိုယ်တော် အာမ်စော်ကား။
ကိုယ်တော်ယေရှုအာမ်စစ်ဆေးမခေါမ်
(ရှင်မဿဲ ၂၆:၅၉-၆၆။ ရှင်မာကု ၁၄:၅၅-၆၄။ ရှင်ယောဟန် ၁၈:၁၉-၂၄)
66ခူအဝြာဟိုဝေါလ် ဂျူးပုရောဟိတ်လန်လှီ့၊ ကျမ်းဆလော်လှီ့ပူလ်နောက် ဂျူးခေါင်ဆောင်လှီ့ #22:66 တရားလွတ်တော်နောက်ခေါမ် ဂျူးခေါင်ယှီခေါင်းဆောင်လှီစုဝေးထေ့နား ဂျူးခေါင်ယှီလှီ့ဓေါလ် ပတ်သတ်တိလှီ့ ဆုံးဖြတ်ချက် ခေါက်နောက်ဓိလ်နောလ်ထောလ်။တရားလွှတ်တော်ဝေါလ် အာမ်မယ်ဟိုဝေါလ် ကိုယ်တော် အင်မ်ခေါင်လှီ့မော်ဝေါလ် အာမ်လူး။ 67အင်မ်လှီ့နား ကိုယ်တော်ဝေါလ် “နာင်နောက်ခေါမ် ကယ်တင်ရှင်မေရှိယအား ဟောင်ဝြား” တိရို အာမ်ဟောင်။
အင်မ်ဟိုဝေါလ် ကိုယ်တော်နား “နာင်မီးရိုး ကေဟောင်နားခါ ယုံယော်စူး။ 68အင်မ်အပြင် နာင်မီးရိုး ကေဟိ့ဟိုဝေါလ်ခါ ဖြေယော်စု။ 69အင်မ်ဘော်နားခါ နီအချိန်ငေါလ် ကထုစအယ်နား ခေါင်စိုးခေါမ် တန်ခိုးတော်ဓေါလ် ပြည့်စုံတိ ပေါလ်ဖုလော်ရှင် ခစ်လမ်းမာလ် အငွာဝိုက်” တိရို အမိန့်။
70အင်မ်ဟိုဝေါလ် အင်မ်လှီ့ကိမ်ကိမ်နား “နီဘော်နောက်ဟိုဝေါလ်စေး နာင်နောက်ခေါမ် ဖုလော်ရှင်နားအစိုးဝြား” တိရို အာမ်ဟိ့ခန်းနောလ်
ကိုယ်တော်နား “နာင်မီးဟောင်ဘော်ယောင်” တိရို အဖြေဘွာလ်။
71အင်မ်ဟိုဝေါလ် “နီနား ဟောင်ခေါမ်ခေခေါ ဟမီးကိုယ်တိုင်နား ယှောက်လောဒ့်ပါလ်ခန်းနောလ် အစွာသက်သေလီတီးယော်” တိရို အာမ်ဟောင်။
Currently Selected:
ရှင်လုကာ 22: CSJ
Highlight
Share
Compare
Copy
Want to have your highlights saved across all your devices? Sign up or sign in
Chin Songlai (ဆောင်လိုင်) Bible by Beyond Translation is licensed under Creative Commons Attribution-ShareAlike 4.0 License.
