ရှင်လုကာ 23
23
အခန်း (၂၃)
ကိုယ်တော်ယေရှု ပိလတ်စငေါလ် အာမ်ဈိခေါမ်
(ရှင်မဿဲ ၂၇:၁-၂၊ ၁၁-၁၄။ ရှင်မာကု ၁၅:၁-၅။ ရှင်ယောဟန် ၁၈:၂၈-၃၈)
1အင်မ်ပါလ်နောလ် တရားလွှတ်တော်ဝေါလ် စုအယ်တိ ဂျူးခေါင်ယှီအကြီးအကဲလှီ့နား ကိုယ်တော်ယေရှု ပိလတ်စငေါလ် ဈိပူနိုးထေ့နား 2“နီခေါင်နား ရောမဆောင်ဖလောင်လန်နောလ် အခွန်ဆက်သဟိုင် ငိုင်းယေထေ့နား အပုန်းဟိုနားအပုန်းဟို ဂျူးခေါင်ယှီလှီ့ ဆောင်ဖလောင်ငေါလ်ထောလ်တိ မေရှိယ တိရိုဟောင်ဝေထေ့နား ခေါင်လှီ့နား ရောမအစိုးရ ပုန်ကန်မှုထောလ်ဟနောလ် အစိုင်းခေါမ် ကေးမီးနား ကာမ်မှူးဟိလ့်” တိရို ပိလတ်မော်ဝေါလ် ကိုယ်တော် စွပ်စွဲထေ့နား အာမ်ဟောင်။
3ပိလတ်နား ကိုယ်တော်ယေရှုအောလ် “နာင် ဂျူးခေါင်ယှီလှီ့ ဆောင်ဖလောင်အဆီးတိရိုဝြာ” တိရို အဟိ့ခန်းနောလ်
ကိုယ်တော်နား “နာင်ဟောင်ဘော်ယောင်” တိရို အဖြေဘွာလ်။
4ပိလတ်နား အင်မ်ဓိလ်နောလ်မယ်တိ ဂျူးပုရောဟိတ်လန်လှီ့လား ခေါင်ထုလှီ့လာမ်းမာလ် မောင်ထေ့နား “နီစငေါလ် အပြစ်မယ်ခေါမ် အီခါမှူးဟီ” တိရို ဟောင်နားခါ
5ဂျူးခေါင်ယှီအကြီးအကဲကိမ်ကိမ်နား “နီခေါင် ဂါလိလဲရိုးကထု နီဂျေရုဆလင်လုစိ ယုဒဘီဘီဟှတ်လုံး ခေါင်ထုလှီ့အောလ် ဆောင်ထေ့နား အလှုံ့ဆော်ဟိလ်” တိရို အခိုင်အမာအာမ်ဟောင်။
ယေရှု ဟေရုဒ်မော်ဝေါလ် အာမ်လူခေါမ်
6အင်မ်ဘော် အာမ်ဟောင်ခေါမ် ပိလတ်နား အယှောက်ဟိုဝေါလ် “နီခေါင် ဂါလိလဲဆော်ဝြာ” တိရို အဟိ့။ 7ဟေရုဒ်အုပ်ချုပ်ခေါမ် ဂါလိလဲဘီရိုးကိအောလ်အထောလ်ခေါမ် အစုတ်င်ဟိုဝေါလ် အင်မ်ချိန်ငေါလ် ဂျေရုဆလင်လုအောလ် ခိုက်တိ ဟေရုဒ်စငေါလ် ကိုယ်တော်ယေရှု အာမ်ထောက်ကယ်။ 8ဟေရုဒ်နား ကိုယ်တော်ယေရှုအကြောင်း အယှောက်ဖူခန်းနောလ် မှူးဟိုင်အလီခေါမ် အဓီပါလ်ခန်းနောလ် ကိုယ်တော် အမှူးဟိုဝေါလ် အပျော်။ အင်မ်နား ကိုယ်တော်ယေရှု စိုင်းခေါမ် စါစ်နောက်ဟိုင်အူဟှတ်ဟှတ် မှူးလောဒ့်ဟိုင် အမျှော်လင့်။ 9အင်မ်ခန်းနောလ် ဟေရုဒ်နား ကိုယ်တော်ဝေါလ် မေးခွန်းပူနူးဟီးနားခါ ကိုယ်တော်ယေရှုနား အီခါဖြေဘွာလ်ယော်။ 10အင်မ်ပါလ်နောလ် ဂျူးပုရောဟိတ်လန်လှီ့လား ကျမ်းဆလော်လှီ့နား ထော့ထေ့နား ကိုယ်တော် ပြင်းပြင်းထန်ထန် အာမ်စွပ်စွဲ။ 11ဟေရုဒ်လား စစ်ဆော်လှီ့နား ကိုယ်တော် စော်ကားထေ့နား အာမ်လှောင်ပြောင်။ အင်မ်လှီ့နား ကိုယ်တော်ဝေါလ် တန်ဖိုးလန်တိဝတ်ရုံ ခုအယ်ဆောက်ထေ့နား ပိလတ်စငေါလ် အာမ်ထောက်ကယ်ဘွာလ်။ 12ဟေရုဒ်လား ပိလတ်ခေါမ် ဟမာလ် ဆှုန်ပွီလှီ့အောလ်ထောလ်နားခါ အင်မ်နှိုပ်ပါလ်ကထု ခီပွီလှီ့အောလ် အဟီထောလ်ဘွာလ်။
ဘာလ့်ဒဏ်
(ရှင်မဿဲ ၂၇:၁၅-၂၆။ ရှင်မာကု ၁၅:၆-၁၅။ ရှင်ယောဟန် ၁၈:၃၉-၁၉:၁၆)
13ပိလတ်ဆောင်ဖလောင်နား ဂျူးပုရောဟိတ်လန်လှီ့၊ ဂျူးခေါင်ယှီခေါင်းဆောင်လှီ့လား ခေါင်ထုပရိတ်သတ်လှီ့ စုအယ်ဆောက်ထေ့နား 14“နီခေါင်နား ခေါင်လှီ့နား ရောမအစိုးရပုန်ကန်ခေါမ်ထောလ်ဟနောလ် အစိုင်းတိရို ဟောင်ထေ့နား ကေးစငေါလ် နာမ်လူးခန်းနောလ် နာင်မီးကိမ်ကိမ်မော်ဝေါလ် စစ်ဆေးနားခါ နာင်မီး စွပ်စွဲဘော်ဝေါလ် အပြစ်မယ်ခေါမ် အီခါမှူးဟီ။ 15ဟေရုဒ်နားခါ အင်မ် အပြစ်ဆူလ်ရိုး လောဒ့်ယခန်းနောလ် ကေးစငေါလ် အထောက်လူးဘွာလ်။ နီစငေါလ် ဘာလ့်ဒဏ် ပက်ဟိုင်ဟို့ အီအပြစ်မယ်ယော်နောက်ခေါမ် အထင်ရှား။ 16အင်မ်ဘော်ခန်းနောလ် နီရိုး ကြိမ်ဒဏ်ပေးထေ့နား ကေလှိဘွာလ်ဝိုက်” တိရို အဟောင်။ 17ပိလတ်နား အင်မ်ဘော် အဟောင်လောဒ့်ခေါမ်စေး ပသခါပွဲရိုး ဂျူးခေါင်ယှီအပြစ်ဆော်ပွလ်ဟှတ် လှိပက်လောဒ့်ခေါမ် ပိလတ်ထုံကြောင့်ငေါလ် အထောလ်#23:17 တချို့မူရင်းကျမ်းရိုး “ပသခါပွဲခိုက်တိုင် ရောမအစိုးရနား အင်မ်လှီ့တွက် ခေါင်ပွလ်ဟှတ်ဟှတ် လှီပက်လောဒ့်နောက်ခေါမ်” စော်ကြောင်းအပူလ်။။
18အင်မ်ဘော်နားခါ ခေါင်ထုလှီ့ကိမ်ကိမ်နား “နီခေါင် ဓူးထေ့နား ဗာရဗ္ဗ လှိပက်သား” တိရို ဟှတ်တောလ်ပါရ်ထေ့နား အာမ်ဟောင်။ 19တုအောလ် ဗာရဗ္ဗခေါမ် ပုန်ကန်မှုလား ခေါင်ပွလ်ဟှတ် အဓုတ်ဟိလ့်ခန်းနောလ် ထောင်ဒုလ့်ကာလ် အပြစ်အခံလောဒ့်။
20ပိလတ်နား ကိုယ်တော်ယေရှု လှိပက်ဟိုင် အလီခန်းနောလ် အင်မ်လှီ့အောလ် အထာကွန်ဟှတ် အဟိ့ဘွာလ်တီ။ 21အင်မ်ဘော်နားခါ အင်မ်လှီ့နား “နီခေါင် လက်ဝါးကပ်တိုင်ရိုး တင်ငါး။ နီခေါင် လက်ဝါးကပ်တိုင်ရိုး တင်ငါး#23:21 ရောမခေါင်ယှီလှီ့နားအပြစ်ဆော်ဝေါလ် ဘာလ့်ဒဏ်အာမ်ပက်ဟိုဝေါလ် လက်ဝါးကပ်တိုင်ရိုး တင်ထေ့နားအာမ်ဓုတ်။ ” တိရို အထာခါ အာမ်ဟောင်။
22အင်မ်ဟိုဝေါလ် ပိလတ်နား “နီနား ဟိဘောင်ရာဇဝတ်မှုလှီ့ အစိုင်းဟိလ့်၊ နီစငေါလ် ဘာလ့်ဒဏ်ပက်လောဒ့်ဟိုင်အပြစ် အီခါမှူးဟီ။ အင်မ်ခန်းနောလ် နီခေါင် ကြိမ်ဒဏ်ပေးထေ့နား လှိဘွာလ်ဝိုက်” တိရို အထုမ်နောက် အဟောင်ဘွာလ်တီ။
23အင်မ်ဘော်နားခါ ခေါင်ထုပရိတ်သတ်လှီ့နား ကိုယ်တော်ယေရှု လက်ဝါးကပ်တိုင်ရိုး တင်ဟိုင်တွက်ကာလ် အာမ်တောင်းဆိုခန်းနောလ် အဆုံးငေါလ် အင်မ်လှီ့နားပါရ်ငယ်နား အာမ်တောင်းဆိုခေါမ်ထိုင်းလှီ့နား အနိုင်လောဒ့်။ 24အင်မ်ခန်းနောလ် ပိလတ်နား ခေါင်ထုလှီ့ တောင်းဆိုခေါမ်ဘော် စိုင်းဟိုင် အဆုံးဖြတ်ဟိလ့်။ 25ခေါင်ထုပရိသတ်နား လှိဟိုင်လီခေါမ် ပုန်ကန်မှုလား ခေါင်ဓုတ်မှုလှီ့ အစိုင်းခန်းနောလ် ထောင်ဒုလ့်ကာလ် ပြစ်ဒဏ်ခံလောဒ့်တိ ရာဇဝတ်ဆော် ဗာရဗ္ဗ လှိပက်ထေ့နား ကိုယ်တော်ခေါမ် ခေါင်လှီ့ စိုင်းဟိုင်အာမ်လီဘော်စိုင်းဟိုင်တွက်ကာလ် စစ်ဆော်လှီ့အောလ်အအပ်။
ကိုယ်တော်ယေရှု လက်ဝါးကားတိုင်ရိုးအာမ်တင်ခေါမ်
(ရှင်မဿဲ ၂၇:၃၂-၄၄။ ရှင်မာကု ၁၅:၂၁-၃၂။ ရှင်ယောဟန် ၁၉:၁၇-၂၇)
26စစ်ဆော်လှီ့နား ကိုယ်တော်ယေရှု အာမ်ဈိပူနောက်ဟိုဝေါလ် ကုရေနိလုအောလ်ကိ ရှိမုန်နောက်ခေါမ် လိုင်ရိုးကိ အလူးဘွာလ်ခေါမ် အမှူးဟိုဝေါလ် အင်မ်ခေါင် မင်ထေ့နား ကိုယ်တော်နှူးဝေါလ်ရုန်းထေ့နား လက်ဝါးကပ်တိုင် အာမ်ပါးဆောက်။ 27ခေါင်ထုလှီ့နားခါ အနှူဝေါလ် အာမ်ယုန်းနယ်။ မုတောလှီ့ခါ ကိုယ်တော်တွက်ကာလ် အာမ်ကာပ်။ 28ကိုယ်တော်နား အင်မ်လှီ့လာမ်းမာလ် မောင်ထေ့နား “ဂျေရုဆလင်ဆော်နူးလှီ့အား ကေးတွက်ကာလ် ကာပ်ကော့စူး။ နာင်မီးတွက်လား နာမ်စိုးနောင်လှီ့တွက်ယောင် ကာပ်ဘွတ်စူး။ 29ဟိဘော်ဟိုင်ရိုးနောက်ဟိုဝေါလ်စေး ‘စိုးနောင် လောဒ့်အယ်ထေးယတိ မုတောလှီ့၊ ဟြွလ်မယ်ဖူးယတိဟြွလ်တုံလား ခိုလ်ဗို့ဟိုင်ဒိပ်စောမယ်ယတိမုတောလှီ့ အာမ်ခုလ်ပွန်’ တိရို ခေါင်လှီ့နား အာမ်ဟောင်ဟိုင် ခုနှိုပ်လှီ့အခိုက်လူးဝိုက်ဟိလ့်။ 30အင်မ်ခူနှိုပ်ခိုက်လူးနားစေး ကျမ်းစော်ဝေါလ်ရော့ကယ်တိဘော် ခေါင်လှီ့နား
ကုန်းလှီ့အောလ် ‘ကေးမီးစငေါလ် ပြိုဝေါလ်’ တိရို ဟောင်ထေ့နား
စုန်းလှီ့အောလ်ခါ ‘ကေးမီး ကိပ်ပါလ်’ တိရို အာမ်ဟောင်ဝိုက်။
31ဟိဘော်ဟိုင်ရိုးနောက်ဟိုဝေါလ်စေး ထိင်းပွန်လှီ့ဘော် အပြစ်မယ်ယတိ ကေးကုံးငေါလ်ခါ နီဟို့ပွန်ယတိလှီ့ အထောလ်နောက်ဟိုဝေါလ်စေး ဇာလာခ့်တိထိင်းလှီ့ဘော် အပြစ်ဒုစရိုက်ဆော်လှီ့အောလ်ထောလ်တိ နာင်မီးစငေါလ်စေး ဟီဟို့ဘောင် ပွန်ယတိလှီ့အထောလ်နိုက်” တိရို အမိန့်။
32စစ်ဆော်လှီ့နား အစွာရာဇဝတ်ဆော်ဟွဒ့်ပွလ်နှိခါ ကိုယ်တော်ဓေါလ်ဟှတ်တောလ် ဘာလ့်ဒဏ်ပက်ဟိုင် အာမ်လူးပူနောက်။ 33ခေါင်လူကီခွံ မိန်နိုးတိကုန်း အာမ်ခိုက်ဟိုဝေါလ် ကိုယ်တော်ယေရှု လက်ဝါးကပ်တိုင်ရိုး တင်ထေ့နား ချောင်းထီရိုး အာမ်ရိုက်။ ကိုယ်တော် ခစ်လမ်းလား ခလမ်းလာမ်းမာလ် ရာဇဝတ်ဆော်ပွလ်နှိခါ လက်ဝါးကပ်တိုင်ရိုး တင်ထေ့နား ချောင်ထီရိုးအာမ်ရိုက်။ 34အင်မ်ဟိုဝေါလ် ကိုယ်တော်နား “ပေါလ်ဖုလော်ရှင်ငါး၊ နီခေါင်လှီ့နား ဟိအီ အာမ်စိုင်းနောက်ခေါမ် စူးဝေယော်ဟခန်းနောလ် နီလှီ့ ခွင့်လွှတ်ပက်ဘွတ်#23:34 အဖဖုလော်ရှင်၊ နီခေါင်လှီ့နား ဟိအီ အာမ်စိုင်းနောက်ခေါမ် စူးဝေယော်ဟခန်းနောလ် နီလှီ့ ခွင့်လွှတ်ပက်ဘွတ် နောက်ခေါမ် တချို့မူရင်းကျမ်းရိုးပူလ်ယော်။” တိရို ဆုအတောင်။ စစ်ဆော်လှီ့နား ကိုယ်တော် ဝတ်ရုံတော်ခေါမ် မဲနှိုက်ထေ့နား အာမ်ဖဲ့ယေ။
35ခေါင်လှီ့နား တုလ်ထေ့နား အာမ်ဓေါ့်ဝေဟိုဝေါလ် ဂျူးခေါင်ယီခေါင်းဆောင်လှီ့နား ကိုယ်တော်ယေရှုခေါမ် လှောင်ပြောင်ထေ့နား “နီနား ခေါင်လှီ့အကယ်တင်ဟိလ့်။ အပုံငေါလ် နီခေါင် ဖုလော်ရှင်နား အရွေးချယ်ခေါမ် မေရှိယအောလ် အထောလ်ဟိုဝေါလ်စေး အပုန်းဟို့နားအပုန်းဟို့ ကယ်တင်ငယ်ဆက်” တိရို အာမ်ဟောင်။
36စစ်ဆော်လှီ့နားခါ ကိုယ်တော် လှောင်ပြောင်ထေ့နား ကိုယ်တော်ကာဝေါလ်ဈာတ်ထေ့နား#23:36 ဝိုင်ချဉ်=အချဉ်ရည်မျိုးဟှတ်။ နာကျင်ခေါမ်လှီ့ သက်သာဟိုင်တွက်ကာလ် အသုံးအာမ်ပြု။ ယုဒသန် ကျမ်းစော်ဝေါလ် ပုံးရည်တိရို အဖော်ပြအယ်။ဝိုင်အထူး ဗို့ထေ့နား 37“နာင်နောက်ခေါမ် ဂျူးခေါင်ယှီလှီ့ဆောင်ဖလောင် အမှန်နောလ်နာထောလ်ဟိုဝေါလ်စေး ပုန်းဟို့နားပုန်းဟို့ ကယ်တင်ငယ်ယား” တိရို အာမ်ဟောင်။
38အင်မ်လှီ့နား ကိုယ်တော်ဝေါလ် “နီခေါင် ဂျူးခေါင်ယှီလှီ့ဆောင်ဖလောင်ငေါလ် အထောလ်” တိရို ရော့ကယ်တိ ကိုယ်တော်လူကီဟြှလ်နောလ် ဆိုင်းဘုတ်အာမ်ဗို့။
39လက်ဝါးကပ်တိုင်ရိုး ပို့ခေါမ်ခံလောဒ့်တိ ရာဇဝတ်ဆော်ပွလ်နှိရိုးကိ ပွလ်ဟှတ်နား ကိုယ်တော်ဝေါလ် “နာင်နောက်ခေါမ် မေရှိယနောက်ဟိုဝေါလ်စေး နာပုန်းဟို့နားနာပုန်းဟို့ ကယ်ယေထေ့နား ကေးဟီ့ခါ ကယ်ယား” တိရို စော်ကားထေ့နား အဟောင်။
40အင်မ်ဘော်နားခါ အထာရာဇဝတ်ဆော် ပွလ်ဟှတ်နား အင်မ်ခေါင်ငေါလ် “နာင်နောက်ခေါမ် နီခေါင်ဓေါလ် ဟှတ်တောလ်ဘာလ့်ဒဏ်ခံလောဒ့်ဗာန်နား ဖုလော်ရှင် ကိဟာမ်းယော်တိအာ။ 41ဟဟီ့စေး ဟပြစ်မယ်ခန်းနောလ် အပြစ်ခံလောဒ့်ခေါမ် ဟတန်နယ်။ အင်မ်ဘော်နားခါ နီခေါင်စေး အီပြစ်ခါ ကျူးလွန်ဟိလ့်ခေါမ်ဆီးယော်” တိရို အဟောင်။
42အင်မ်ပါလ်နောလ် အင်မ်ခေါင်နား ဆက်ကယ်နား ကိုယ်တော်ဝေါလ် “ကိုယ်တော်ယေရှုအား၊ နာင်ဆောင်ဖလောင် ပါးဟှတ်အဖြစ် အုပ်စိုးဟိုင် နာလူးဘွာလ်ဟိုဝေါလ် ကေးသတိလောဒ့်ဘွတ်” တိရို အဟောင်။
43အင်မ်ဟိုဝေါလ် ကိုယ်တော်နား “နာင်ငေါလ် အမှန်ကေဟောင်ဝိုက်။ တုနှိုပ်ကုံးငေါလ် ကေးဓေါလ်ဟှတောလ် #23:43 ပရဒိသုဘုံ=ဖြောင့်မတ်တိလှီ့ ဆောက်င်ဟင်ဘွာလ်ခေါမ်လား နောက်ဆုံးတရားစီရင်နောက်ဓိလ်။ပရဒိသုဘုံငေါလ် နာမယ်ရိုက်” တိရို အမိန့်။
ကိုယ်တော်ယေရှုအဘာလ့်ခေါမ်
(ရှင်မဿဲ ၂၇:၄၅-၅၆။ ရှင်မာကု ၁၅:၃၃-၄၁။ ရှင်ယောဟန် ၁၉:၂၈-၃၀)
44အင်မ်အချိန်ကထုစအယ်နား နာရီထုမ်စိ နိုင်ငံဟှတ်လုံး အယှုန်တူ။ 45ခူအဝြာ ခိတ်တိမ်းထေ့နား ဗိမာန်တော်ဝေါလ်ကိ အမြင့်မြတ်ဆုံးတိဓိလ် ဖုံးအုပ်တိကန့်လန့်ကာ ကတ်နှိအောလ် အကတ်ကယ်။ 46ကိုယ်တော်ခါ ပါရ်ထေ့နား “ပေါလ်ဖုလော်ရှင်ငါး။ ကေးဝိညာဉ် ပေါလ်ဖုလော်ရှင် ကွတ်တောလ် ကေအပ်ပါလ်” တိရို ဟောင်ထေ့နား အဘာလ့်လှာလ်။
47နီအဖြစ်ပျက်လှီ့ မှူးလောဒ့်တိ ရောမတပ်မှူးနား ဖုလော်ရှင် ချီးမွမ်းဗာန် “နီခေါင်ခေါမ် ဖြောင့်မတ်တိအောလ်အထောလ်” တိရို အဟောင်။ 48အင်မ်အဖြစ်ပျက်လှီ့ ဓေါ့်ဟိုင်စုဝေလူးတိ ခေါင်ထုပရိတ်သတ်လှီ့ ကိုယ်တော်အဖြစ်ပျက်လှီ့ အမှူးလောဒ့်ဟိုဝေါလ် ကာင်စာန်ဆုကယ်ထေ့နား ဝမ်းနည်းဗာန် အိမ်းမာလ် အာမ်ဈာတ်ဘွာလ်။ 49အင်မ်ဘော်နားခါ ကိုယ်တော်ယေရှု ခီပွီလှီ့လား ဂါလိလဲရိုးကိ လူးတိလှီ့ မုတောလှီ့နားခါ အလှမ်းမာလ်ကထု တုလ်ထေ့နား အဖြစ်ပျက်လှီ့ကိမ်ကိမ် အာမ်ဓေါ့်ဝေ။
ကိုယ်တော်ယေရှု အခိခေါမ်
(ရှင်မဿဲ ၂၇:၅၇-၆၁။ ရှင်မာကု ၁၅:၄၂-၄၇။ ရှင်ယောဟန် ၁၉:၃၈-၄၂)
50အင်မ်ချိန်ငေါလ် ယောသပ် တိရို ဟောင်ခေါမ် ဖြောင့်မတ်တိပွလ်ဟှတ်အမယ်။ အင်မ်ခေါင်ခေါမ် ခေါင်ပွန်ပွလ်ဟှတ်တောလ် ထောလ့်ထေ့နား ဂျူးခေါင်ယှီလှီ့လွှတ်တော်အဖွဲ့ဝင် ပွလ်ဟှတ်တောလ်ခါ အထောလ်။ 51အင်မ်ခေါင်နား ကိုယ်တော်ယေရှု အစွာဂျူးလွှတ်တော်အဖွဲ့ဝင်လှီ့ ဆုံးဖြတ်ချက်လား အာမ်စိုင်းခေါမ်လှီ့ သဘောတူဟိလ့်ယော်။ အင်မ်နောက်ခေါမ် ယုဒဘီ၊ အရိမဿဲလုဆော်ဝေါလ်ထောလ်ထေ့နား ဖုလော်ရှင်သာသနာတော် ခိုက်လူးဟိုင်ခါ စောင်တိအောလ်ခါ အထောလ်။ 52အင်မ်နား ကိုယ်တော် ရုတ်ခေါမ် ခိဟိုင်ရိုး ပိလတ်စငေါလ် အတောင်ဟိုဝေါလ် ပိလတ်နားခါ ခွင့်အပြုဟိလ့်။ 53အင်မ်ခန်းနောလ် အင်မ်ခေါင်နား ကိုယ်တော် လက်ဝါးကပ်တိုင်ငေါလ်ကိ အသောင်ငေါလ်ခိုးထေ့နား ပိတ်စပွန်ရိုး အပတ်။ လုံးလန်ပိုးတိရို အာမ်စိုင်းခေါမ် အူခါ အာမ်ခိနောက်ယ စူထာဝေါလ်အခိ။ 54အင်မ်နှိုပ်ခေါမ် ဥပုသ်နှိုပ် ခိုက်လှောင်နောလ် သောကြာနှိုပ် အမီးလာမ်းမာလ်အထောလ်။
55ဂါလိလဲရိုးကထု ကိုယ်တော်ဓေါလ်ဟှတောလ်လူးတိ မုတောလှီ့ ယောသပ်ကိုယ်နောလ်လူးထေ့နား ကိုယ်တော်စုခါ၊ ကိုယ်တော်အရုတ် ဟိဘော် အတောဒ့်နောက်ခေါမ် အာမ်မှူးလောဒ့်။ 56အင်မ်ပါလ်နောလ် မုတောလှီ့ အိမ်းမာလ်ဈာတ်ဘွာလ်ထေ့နား ကိုယ်တော် ပူဇော်နောက်ဟိုင် ဆီသွီအအူတိလား အမွှေးနံ့သာသွီးလှီ့ အဆင်သင့်အာမ်ပြင်ဆင်။ အင်မ်လှီ့ ပညတ်တော်ဝေါလ် ပူလ်တိဘော် ဥပုသ်နှိုပ်ပါလ် အာမ်ဓိမ်း။
Currently Selected:
ရှင်လုကာ 23: CSJ
Highlight
Share
Compare
Copy
Want to have your highlights saved across all your devices? Sign up or sign in
Chin Songlai (ဆောင်လိုင်) Bible by Beyond Translation is licensed under Creative Commons Attribution-ShareAlike 4.0 License.
