ရှင်လုကာ 21
21
အခန်း (၂၁)
မှလ်နူးအလှူ
(ရှင်မာကု ၁၂:၄၁-၄၄)
1အင်မ်ပါလ်နောလ် ကိုယ်တော်ယေရှုလား တပည့်တော်လှီ့ဗိမာန်တော်ဒုလ့်ကာလ်အာမ်မယ်လှူဟိုဝေါလ် ကိုယ်တော်ခေါမ် စူလာမ်းနီလာမ်းအဓေါ့်ဟိုဝေါလ် ဘို့တိလှီ့နား ဗိမာန်တော်ခြံငေါလ်မယ်တိ အလှူခံသတ္တာဝေါလ် အလှူအာမ်ဆာမ်းခေါမ် အမှူး။ 2စါက်ကယ်တိ မှလ်နူးပွလ်ဟှတ်နား အဖူနည်းတီတီတိ #21:2 ကီဆန်ဒေါင်းဂို ဖို့ဟှတ်ဆီးလားပြားဆာ့နောက်ခေါမ် ဒေနာရီကပ်ဟှတ် အညီမျှ။ကီဒေါင်းဂိုကပ်နှိ အလှူအဆာမ်းခေါမ် အမှူး။ 3အင်မ်ဟိုဝေါလ် ကိုယ်တော်ယေရှုနား အတပည့်လှီ့အောလ် “နာင်မီးရိုး အမှန်ကေဟောင်လောဒ့်အိုက်နောက်ဟိုဝေါလ်စေး နီစါက်ကယ်တိ မှလ်နူးနား အစွာခေါင်လှီ့ထက်ကာလ် အလှူအစိုင်းဟိလ့်။ 4ဟိဘော်ဟိုင်ရိုးနောက်ဟိုဝေါလ်စေး ခေါင်လှီ့နား အာမ်ပုန်းစငေါလ်ပိုတိ စည်းစိမ်လှီ့ဒုလ့်ကာလ်ကိ ပိုတိအချို့ယောင်အာမ်လှူ။ အင်မ်ဘော်နားခါ နီမှလ်နူးနားစေး စါက်ကယ်နားခါ အေအောတ့်နောက်ဟိုင်တွက် အပုန်းဟို့စငေါလ်မယ်တိ ဒေါင်းဂိုကိမ်ကိမ် အလှူ” တိရို ကိုယ်တော်နား အမိန့်။
ဗိမာန်တော်ပျက်စီးဟိုင်အကြောင်းအမိန့်ဗာန်ခေါမ်
(ရှင်မဿဲ ၂၄:၁-၂။ ရှင်မာကု ၁၃:၁-၂)
5အင်မ်ပါလ်နောလ် ကိုယ်တော် တပည့်တော်အချို့လှီ့နား ဖုလော်ရှင်ငေါလ် ခေါင်လှီ့နား အာမ်လှူခေါမ်ပစ္စည်လှီ့အောလ် လုံးပွန်တိလှီ့ဓေါလ် ဗိမာန်တော် ပွန်ယေဟနောလ် အစိုင်းယေခေါမ်အကြောင်း အာမ်ချီးမွမ်း။ 6“နာင်မီး မှူးခေါမ်လှီ့ကိမ်ကိမ် လုံးလုံးဟှတ်ခါ အဓိလ်ဟို့ဝေါလ် မယ်တီးယဟနောလ် ကိမ်ကိမ်ဖျက်ဆီးခံလောဒ့်ဟိုင် အချိန်အခိုက်လူးဝိုက်” တိရို အမိန့်။
ဆိတ်အကြောင်း သတိပက်ခေါမ်
(ရှင်မဿဲ ၂၄:၃-၁၄။ ရှင်မာကု ၁၃:၃-၁၃)
7အင်မ်ဟိုဝေါလ် အတပည့်လှီ့နား ကိုယ်တော်ဝေါလ် “ဆလော်ဝြား အင်မ်လှီ့ အီဟိုဝေါလ် အထောလ်လူးဝိုက်။ အင်မ်လှီ့ အထောလ်လူးဝိုက်ဟိလ့်ဟိုဝေါလ် ဟိဘောင် နိမိတ်လက္ခဏာလှီ့ အထောလ်လူးဝိုက်” တိရို အာမ်ဟိ့။
8ကိုယ်တော်နား “နာင်မီး အစွာခေါင်လှီ့ လှည့်စားခေါမ် ခံလောဒ့်ယဟနောလ် သတိတောဘွတ်စူး။ ဟိဘော်ဟိုင်ရိုးနောက်ဟိုဝေါလ်စေး ခေါင်လှီ့နား အင်မ်လှီ့စငေါလ် ကေးအခွင့်အာဏာ ကာမ်တောဒ့်ကယ်တိရို လိုက်အယ်နိုးထေ့နား ‘ကေး မေရှိယအောလ် ကေထောလ်’ လား ‘အချိန်နီးကပ်လူးဟိလ့်’ တိရိုခါ အာမ်ဟောင်ဝိုက်။ အင်မ်ဘော်နားခါ အင်မ်လှီ့ယုမ်ကော့စူး။ 9နာင်မီးနား စစ်ထောလ်ခေါမ်ဆီးတင်လှီ့လား လိမ်ဆှို့ခေါမ်အထိုင်းလှီ့ နာမ်ယှောက်လောဒ့်ဟိုဝေါလ် ကိကော့စူး။ အင်မ်လှီ့နောက်ခေါမ် အရင်ငေါလ် အဖြစ်ပျက်လောဒ့်ဟိုင်ရိုး အထောလ်။ အင်မ်ဘော်နားခါ နီနောက်ခေါမ် ဆုမ်သပ့်အဆုံးဆီးဟာမ်းယော်။
10အင်မ်ပါလ်နောလ် ကိုယ်တော်နား ခေါင်ယှီယှီဟှတ်လားယှီဟှတ် နိုင်ငံဟှတ်လားနိုင်ငံဟှတ် စစ်အာမ်ထောလ်နိုက်။ 11ဓိလ်ပူနူးဝေါလ် ပြင်းပြင်းထန်ထန်လီလူးထေ့နား အေအောတ့်လှီ့ခါ ခီရ်ထေ့နား ကပ်ရောဂါလှီ့ထောလ်ခေါမ် နာမ်ခမ်းလောဒ့်အိုက်။ နေဟြှလ်နောလ် ကိဆီးတိ ထူးဆန်းတိနိမိတ်လက္ခဏာလှီ့ အပေါ်လူးဝိုက်။
12အင်မ်ဘော်နားခါ နီဘော်ထောလ်လှောင်နောလ် နာင်မီးခေါမ် ခေါင်လှီ့နား ကေးကြောင့်ငေါလ် မင်ထေ့နား ဆဆ္ဆီနိုးဗာန် ဓမ္မာရုံငေါလ်စွပ်စွဲထေ့နား ထောင်အာမ်ခေါက်ကိုက်။ ဆောင်ဖလောင်လား အုပ်ချုပ်တိလှီ့မော်ဝေါလ် ဈိအယ်ထေ့နား စစ်ဆေးနာမ်ခံလောဒ့်အိုက်။ 13အင်မ်ဘော်နားခါ နီဘော်ထောလ်ခေါမ် ကေးအကြောင်း သက်သေခံဟိုင် အခွင့်ရေးရိုး အထောလ်နိုက်။ 14အင်မ်ခန်းနောလ် နာမ်ပုန်းဟို့လား နာမ်ပုန်းဟို ဟိဘော်ကာကွယ်ထေ့နား နာမ်ဟောင်ဘွာလ်လောဒ့်အိုက် နောက်ခေါမ် ဆဆော်ကော့စူး။ 15ဟိဘော်ဟိုင်ရိုး နောက်ဟိုဝေါလ်စေး ဆုန်ပွီလှီ့နား ငြင်းခွတ်ယဟနောလ် ဆီးယနား နာင်မီး နာမှော်တိရို အာမ်ဟောင်ခွတ်ယဟနောလ် ဟိဘော်နာမ်ဟောင်ဘွာလ်လောဒ့်နောက်ခေါမ် စုတ်င်ခေါမ်ဉာဏ်ပညာလှီ့ နာင်မီးရိုး ကေးကိုယ်တိုင်နား ကေပက်တိုက်။ 16နာင်မီး နူးပေါလ်၊ သာနောင်၊ ယှီယောင်၊ ခီပွီလှီ့ကုံးနားခါ နာင်မီး ဆတ်ဇော်အာမ်ဖောက်ကိုက်။ နာင်မီးဒုလ့်ကာလ်ကိ အချို့ ကေးကြောင့်ငေါလ် အာမ်ဓုတ်ကိုက်။ 17ကေးတပည့်လှီ့အောလ်နာမ်ထောလ်ခန်းနောလ် ခေါင်တိုင်နား နာင်မီး အမှူးဓေါင်မိုက်။ 18အင်မ်ဘော်နားခါ နာင်မီး လူကီရိုးကိ လူးဆမ်းကဲင်ဟှတ်ကုံးခါ ပျက်စီးဟိုင်ဆီးယော်#21:18 နီစော်ကြောင်းအဓိပ္ပာယ်စေး ဘာလ့်နားခါ လုန်ဝိညာဉ်စေး ဖုလော်ရှင်ဓေါလ်ဟှတောလ်မယ်ထေ့နား လုံခြုံမှုအမယ်ရိုက် တိရိုအထောလ်။။ 19နာင်မီး ခက်ခဲခေါမ်အချိန်လှီ့ နာမ်ခမ်းလောဒ့်နားခါ ကေး နာမ်ယုမ်ခေါမ် စွန့်လွှတ်ကော့စူး။ အင်မ်ဘော်နောက်ဟိုဝေါလ်စေး နာင်မီးနား နိစ္စထာဝါဆောက်င် နာမ်လောဒ့်အိုက်” တိရို အမိန့်။
ဂျေရုဆလင်လုပျက်စီးဟိုင် အကြောင်းမိန့်ခေါမ်
(ရှင်မဿဲ ၂၄:၁၅-၂၁။ ရှင်မာကု ၁၃:၁၄-၁၉)
20အထာကွန်ဟှတ် ကိုယ်တော်နား “ဂျေရုဆလင်လု ဆုန်ပွီစစ်ဆော်လှီ့နား အဝိုင်းခေါမ် နာမ်မှူးဟိုဝေါလ် အင်မ်လု ပျက်စီးခံလောဒ့်အိုက်ဟိလ့် နောက်ခေါမ် စူးဘွတ်စူး။ 21အင်မ်ချိန် ခိုက်လူးဟိုဝေါလ် ယုဒဘီးရိုး မယ်တိခေါင်လှီ့ ကုန်းဟြှလ်နောလ် ဈာန်းဘွတ်စူး။ လုဒုလ့်ကာလ်မယ်တိခေါင်လှီ့ လုပြင်ငေါလ် ထွက်ဘွတ်စူး။ နာမ်းမယ်တိလှီ့စေး လုအောလ်ဈာတ်ကော့စူး။ 22ဟိဘော်ဟိုင်ရိုးနောက်ဟိုဝေါလ်စေး အင်မ်နှိုပ်ပါလ် ဖုလော်ရှင်နား ဂျေရုဆလင်လုအောလ်ကိ ခေါင်လှီ့အောလ် အပြစ်ပက်တိုက်ခန်းနောလ် ပရောဖက်လှီ့ ကျမ်းစော်ဝေါလ်ရော့ကယ်တိလှီ့နောက်ခေါမ် အမှန်နောလ်အထောလ်လူးဝိုက်။ 23အင်မ်ချိန်ငေါလ် ဟြွလ်မယ်တိမုတောလှီ့လား ခိုသွီးအူးဒိပ်စောတောဝေတိမုတောလှီ့တွက် ဆိုးဝါးတိအချိန်ငေါလ်အထောလ်နိုက်။ အင်မ်ဓိလ်နောလ် မယ်တိခေါင်လှီ့ ဆိတ်လန်တိခမ်းထေ့နား ဖုလော်ရှင် တပြင်းလုန်ဆဆုခေါမ် အင်မ်လှီ့စငေါလ်အခိုက်ရိုက်။ 24အင်မ်လှီ့ဒုလ့်ကာလ်ကိ အချို့ခေါင်လှီ့ စစ်ဆော်လှီ့ စီမ်မာလ် အာမ်ဘာလ့်လောဒ့်အိုက်။ အစွာခေါင်လှီ့ ထောင်ဆော်အဖြစ် တစွာဘီရိုး အာမ်ဈိအယ်ရိုက်။ ဂျူးခေါင်ယှီဆီးယတိလှီ့နား ဂျေရုဆလင်လု သိမ်းပိုက်ထေ့နား ဖုလော်ရှင်နား အင်မ်လှီ့အောလ် အုပ်ချုပ်ခွင့်အပက်ခေါမ်အချိန်စိ အင်မ်လုအောလ်မယ်တိခေါင်လှီ့ အာမ်ဖိနှိပ်ကိုက်” တိရို အမိန့်။
ခေါင်စိုးအကြွလူးဘွာလ်ခေါမ်
(ရှင်မဿဲ ၂၄:၂၉-၃၁။ ရှင်မာကု ၁၃:၂၄-၂၇)
25အင်မ်ပါလ်နောလ် ကိုယ်တော်နား “ခူနီ၊ ခူထာလား အာဆီးလှီ့အောလ် နိမိတ်လက္ခဏာလှီ့ အပေါ်လူးဝိုက်။ ပင်လယ်လှိုင်းတံပိုးထိုင်းကြောင့်ငေါလ် ဆုမ်သပ့်ကာလ်ကိခေါင်တိုင်ခါ ကိအယ်ထေ့နား ဟိအီစိုင်းလောဒ့်အိုက် နောက်ခေါမ် စူးတီးဟိုင်ဆီးယော်ဟ။ 26နေဟြှလ်နောလ်မယ်တိလှီ့ကိမ်ကိမ် ပုံမုန်ဓိလ်နောလ်ကိ အရွေ့ခန်းနောလ် အထာထောလ်လူးဟိုင် ကိဆီးတိအန္တာရာယ်လှီ့ အာမ်မှူးလောဒ့်ခန်းနောလ် ခေါင်လှီ့နောက်ခေါမ် ကိအယ်ထေ့နား သတိအာမ်မေ့အိုက်။ 27အင်မ်ပါလ်နောလ် ခေါင်စိုးခေါမ် ခူဆက်ဒုလ့်ကာလ်ကထု ကြီးမြတ်တိဘုန်းတန်ခိုးလှီ့၊ ဘုန်းတန်းခိုးလှီ့တော်ထေ့နား အကြွလူးခေါမ် ခေါင်လှီ့နား အမှူးလောဒ့်အိုက်။ 28အင်မ်ခန်းနောလ် နီကိဆီးတိလှီ့ စအယ်နား ထောလ်လူးခေါမ်ချိန်ငေါလ် ဖုလော်ရှင်နား ဓီယော် နာင်မီး ဆိတ်ခမ်းခေါမ်ငေါလ်ကိ အကယ်ရိုက်ဟိလ့်ခန်းနောလ် တုလ်ထေ့နား လူကီတုလ်းဘွတ်စူး” တိရို အမိန့်။
ဆပိထိင်းပုံဥပမာ
(ရှင်မဿဲ ၂၄:၃၂-၃၅။ ရှင်မာကု ၁၃:၂၈-၃၁)
29အင်မ်ပါလ်နောလ် ကိုယ်တော်နား အင်မ်လှီ့အောလ် ပုံဥပမာပုဒ်ဟှတ် မိန့်ခေါမ်စေး “ဆပိထိင်းလား အစွာထိင်းလှီ့ ဓေါ့်ဝေါလ်။ 30အဆယ်နောလှီ့ ထွက်လူးခေါမ် နာမ်မှူးဟိုဝေါလ် ခူလှောက် ခိုက်ဟိလ့်နောက်ခေါမ် အလိုလိုနာမ်စုတ်င်ကိုက်။ 31အင်မ်ဘော်ဝေါလ် ကေးမိန့်ဟိလ့်ခေါမ်လှီ့ထောလ်လူးခေါမ် နာမ်မှူးနားစေး ဖုလော်ရှင်သာသနာတော် ခိုက်လူးဟိုင် အဟျှော်လူးဟိလ့်နောက်ခေါမ် နာမ်စုတ်င်ကိုက်။
32နာင်မီးရိုး အမှန်ကေဟောင်ဝိုက်။ နီလှီ့ကိမ်ကိမ် ထောလ်ဟာမ်းယဝေ့ တုအောလ်ဆောက်င်ဟင်တိခေါင်လှီ့ကိမ်ကိမ် ဘာလ့်ဟာမ်းဟိုင်ဆီးယော်ဟ။ 33ဆုမ်သပ့်လား နေဟြှလ်နောက်ခေါမ် မယ်ဆော်ဟိုင် ဆီးယနားခါ ကေးခေခေါနောက်ခေါမ် အမယ်ဆော်ရိုက်” တိရို အမိန့်။
အဆင်သင့်ပြင်စိုင်းဘွတ်စူး
34အထာကွန်ဟှတ် ကိုယ်တော်နား “အင်မ်ခန်းနောလ် အေပွဲအောတ်ပူနူးအေဗာန်၊ မုတ်ဗာန်၊ ဘဝတွက်ဆဆော်ဗာန် နာင်မီး အချိန်လှီ့ဘွတ်ယဟနောလ် သတိအောလ်မယ်ဘွတ်စူး။ အင်မ်ဘော်ဝေါလ် အချိန်ဘွတ်နားစေး ထောင်ချက်မိဘော် မျှော်လင့်ယခေါမ်အချိန်ငေါလ် ကေး ကေလူးဘွာလ်ဟိုဝေါလ် အဆင်သင့်မယ်ဟိုင်ဆီးယော်စူး။ 35ဟိဘော်ဟိုင်ရိုး နောက်ဟိုဝေါလ်စေး အင်မ်နှိုပ်လှီ့နောက်ခေါမ် နီဆုမ်သပ့်ခုံးငေါလ်မယ်တိ ခေါင်လှီ့ကိမ်ကိမ်ငေါလ် အခိုက်လူးဝိုက်ခန်းနောလ်ထောလ်။ 36အင်မ်နှိုပ်ပါလ် ထောလ်လူးဟိုင်လှီ့အောလ်ကိ လွှတ်ထေ့နား ခေါင်စိုးမော်ဝေါလ် ယုမ်ကြည်မှုအပြည့်ဓေါလ် တုလ်ခွတ်ဟိုင် သတိတောထေ့နား ဆုတောင်ဆော်ဘွတ်စူး” တိရို ကိုယ်တော်နား အမိန့်။
37အင်မ်ပါလ်နောလ် ကိုယ်တော်ခေါမ် ဗိမာန်တော်ခြံငေါလ် အနှိုပ်ပါလ် တရားလှီ့အဟော။ အမီလာမ်းမာလ် လုပြင်ငေါလ်ထွက်ထေ့နား အမီဝေါလ် သံလွင်ကုန်းဟြှလ်နောလ် အမယ်ယေ။ 38ခေါင်လှီ့ခါ ဗိမာန်တော်ဝေါလ် ကိုယ်တော်စငေါလ် တရားလှီ့ ငေဟိုင်ရိုး အငီတိထောထေ့နား အာမ်လူး။
Currently Selected:
ရှင်လုကာ 21: CSJ
Highlight
Share
Compare
Copy
Want to have your highlights saved across all your devices? Sign up or sign in
Chin Songlai (ဆောင်လိုင်) Bible by Beyond Translation is licensed under Creative Commons Attribution-ShareAlike 4.0 License.
