Luke 9
9
Jesus Osio Mbed Duopeba Ɔdɔŋ Ukwɔrɔikɔ
1Jesus okuod mbed nsie duopeba obon itie chied, ɔnɔ mmɔ odudu ma unen ibin mme idiɔk odudu ma ikɔk udɔŋɔ.
2Ɔdɔŋ mmɔ ɔkɔkwɔrɔ obio ubɔŋ Abasi, afiak anam mben udɔŋɔ okop ŋchɔŋidem.
3Ndien edɔhɔ mmɔ ete, “ikikama ŋkpɔ ke usuŋ isaŋ, ikikama eto isaŋ, edede ekpad isaŋ, edede udia, ma okuk, ikikama suhɔ ɔfɔŋ iba.
4Ufɔk eke mbufo idukde, itie do, ito suhɔ do inyɔŋ.
5Ede mben obio eke inyimeke idara mbufo, nte iwɔŋɔde ke obio odo, ikeŋ ntan obio odo ifep ke ikpad mbufo, ami awiri ŋkpɔ ntup ikpe mmɔ.”
6Ndien mme mbed Jesus adaha aka mme iduŋ iŋwɔŋ, akasuan etimbuk ɔnɔ mme owo, afiak anam udɔŋɔ ekwere ke kpukpru itie.
Herod Eyem Ikud Jesus
(Matthew 14.1-12; Mark 6.14-29)
7Herod Antipas, eke akarade Galilee okop kpukpru se otubede, eke Jesus akanamde, idem akpa-e eti-eti, koro ndusuk owo ɔdɔhɔ ete, ke John ama eseri ke mkpa.
8Ndusuk ɔdɔhɔ ete, ke Elijah ama edi, mben afin ete, owo chied ke otu nkani asiak uduak ama eseri.
9Ede Herod ɔdɔhɔ ete, “mma nsube John iboud, newo oduomi nkopde utɔ ŋkpɔ eken mbaŋa-e?” Ndien eyem ikud Jesus.
Jesus Ɔnɔ Owo Tɔsin Ition Udia
(Matthew 14.13-21; Mark 6.30-44; John 6.1-15)
10Ndien mbed Jesus duopeba, eke ekedɔŋde utom afiak edi, emen kpukpru se mmɔ akanamde ɔbuk ɔnɔ-e, ndien eda mmɔ ke idem mmɔ ɔkpɔŋ aka ke edem nchad isɔŋ, ke obio eke ekerede Bethsaida ma mmɔ odu ma-e.
11Ede ke ini mme owo ɔdiɔŋɔde, mmɔ asaŋa ma-e. Edara mmɔ, afiak atiŋ ikɔ ɔnɔ mmɔ abaŋa obio ubɔŋ Abasi, ndien ekɔk udɔŋɔ mben eke eyemde idem ɔchɔŋ mmɔ.
12Ke ini utin ɔtɔŋɔde ikɔhɔde itɔŋ, mbed nsie duopeba edidɔhɔ ete, “dɔhɔ otu owo ɔnyɔŋ ma mmɔ akana ke iduŋ iŋwɔŋ ma iŋwɔŋ eke odude ke nkan-ŋkuk, ma mmɔ okud se mmɔ adiade, siak edede nchad isɔŋ se nnyin idu.”
13Ndien Jesus ɔdɔhɔ mmɔ ete, “inɔ mmɔ ŋkpɔ adia.” Ede mmɔ ɔbɔrɔ ete, “nnyin inyeneke ikan uyo ition ma iyak iba, ibɔhɔke ika nkedep udia nnɔ utɔ uwak owo eken.”
14Koro mmɔ ekpere tɔsin iden owo ition ke ibad. Ndien Jesus ɔdɔhɔ mbed nsie ete, “inam mmɔ etetie ke udum-ke udum, owo abamanduop ke udum chied.”
15Ede mmɔ anam ntoro, ndien kpukpru mmɔ etetie.
16Ndien Jesus emen uyo ition ma iyak iba, emeŋede anyin eche ɔnyɔŋ, ɔdiɔŋ mmɔ, efiak ɔbuŋ ayak ɔnɔ mbed nsie ete ɔnɔ otu owo.
17Ndien kpukpru mmɔ adia nsia ɔyɔk, ndien mbed Jesus ataŋ mubek udia eke ɔsuhɔde ɔdɔŋ ke akpan duopeba ɔyɔk.
Peter Atiŋ Ke Jesus Ede Christ
(Matthew 16.13-20; Mark 8.27-30)
18Usen chied nte Jesus ɔbɔŋde akam ɔkpɔŋ, mbed nsie edisum-e, ebip mmɔ ete, “mme owo ɔdɔhɔ ete, Ami nde enyewo?”
19Ntoro se mmɔ ɔbɔrɔ-e ete, mmɔ ɔdɔhɔ ete, ede “John Baptist, ede mben afin ete, Elijah, mben efen ete, owo chied ke otu mme nkani asiak uduak ama eseri.”
20Ndien Jesus ete mmɔ, “mbufo idɔhɔ ite nde enyewo” Ndien Peter ɔbɔrɔ e-ete, “ofo ede Christ eke Abasi ɔkɔŋwɔŋɔde idɔŋ.”
Jesus Atiŋ Abaŋa Mkpa Nsie Ma Iseri Ke Mkpa
(Matthew 16.20-23; Mark 8.30-38)
21Ede Jesus owuk mmɔ ke ɔkpɔsɔŋ, ete ikitiŋ inɔ owo chied-chied.
22Ede nennen ete, “Ami Eyen owo nyene ikud uwak ikuri, ke ubɔk mme ikpɔ owo, ma ikpɔ oku, ma mme ekpep mbet iche-chin-e, ifiak iwod-e, ndien Abasi inanam min nseri ke ɔyɔhɔ usen ita.”
Se wɔrɔde Owo Ide Mbed Jesus
(Matthew 16.24-27; Mark 8.34-38)
23Ndien Jesus ɔdɔhɔ mme owo ete, “owo ekedede eke eyemde ichiene Min, yak echin kpukpru ŋkpɔ eke eyemde, afiak emen cross nsie, echiene min ke usen ke usen.
24Koro owo ekedede eke eyemde iŋyaŋa uwem nsie ideduɔk-e ede owo ekedede eke ɔduɔkde uwem nsie ke baŋa Min, owo odo inyayaŋa uwem nsie.
25Nso udori se owo ibɔ mese ediade efiri ererimbon, ndien eduɔk idem nsie ke nsinsi nsobo?
26Koro owo ekedede eke okopde obud abaŋa min ma ukpep ŋkpɔ mi, Eyen owo ikokop obud ibaŋa-e ke ini Eyen owo idide ke ubɔŋ nsie ma eke ntete nsie ma eke ndisana angel.
Jesus Ɔkpuhɔde Ke Ɔbud
(Matthew 16.28-17.9; Mark 9.2-10)
27Ede ntiŋ akpanikɔ nnɔ mbufo ndusuk owo odu ke otu mben eken adade mi eke imakpa mkpa, tutu mmɔ okud obio ubɔŋ Abasi.”
28Nte usen itiaita ebede nte akatiŋ ikɔ eken ama, Jesus ada Peter, ma John ma James, aka ke etiŋ ɔbud ɔkɔbɔŋ akam.
29Ekem nte Jesus ebɔŋde akam iso nsie okpuhede, ɔfɔŋ nsie akabade afia esem etieti.
30Nde-nde odo owo iba atiŋ ikɔ ma Jesus, mmɔ ede Moses ma Elijah.
31Moses ma Elijah ɔbiɔŋɔre ke ubɔŋ, eneme ma Jesus abaŋa mkpa eke ikpade nte uduak Abasi iwɔrɔde isu ke Jerusalem.
32Ede idap omum Peter ma mmɔ eke odude ma-e eti-eti, ke ini mmɔ edemede mmɔ, okud ubɔŋ nsie mma owo iba odo adade ma-e.
33Ndien otube ke ini mmɔ adahade ɔkpɔŋ-e, Peter ɔdɔhɔ Jesus ete, “Ete ufɔk afan nnyin idu mi, yak nnyin ibup efe ita, chied enyene fin, chied enyene. Moses, chied enyene Elijah” ede idiɔŋɔke se e-ɔdɔhɔde.
34Ke nte Peter ɔsuk etiŋde ikɔ eken ntuhube edifuk mmɔ, Ede ndik anam mme mbed nte ntuhube ɔfukde mmɔ.
35Uyo oto ke ikpa ɔnyɔŋ ɔdɔhɔ ete, “ami ede Eyen ima mmi, ikop uyo nsie!”
36Ndien ke ini uyo odo odopde, mmɔ edekut Jesus ɔkpɔŋ. Mmɔ ododop itiŋke ŋkpɔ eke mmɔ okokude ke usen odo inɔ owo tutu ini esie edi.
Jesus Ebin Idiɔk Odudu Osio eyen Eden Ke Idem
(Matthew 17.12-21; Mark 9.14-29)
37Ede ke edem usen, Jesus ma mbed nsie ita otode ke ɔbud ɔsuɔhɔre, akamba otu owo osobe ma-e.
38Nde-nde odo owo chied ke otu mben odo osobede Jesus efieri ete, “Andikpep, mme kpe fin ubɔk nte eche eyen-eden mi, koro nyenede chied eken ɔkpɔŋ.
39Ede che-che, idiɔk odudu emen-e, ndien ebumere efieri, spirit esihere-e, esin-e osio efot ke inua, ndien ewɔrɔ ke idem nsie, ede ɔchɔŋ eti-eti isana-e nyak.
40Ede ŋkekpe mbed mfo ubɔk nte ebin-e ɔduɔk ede mmɔ ikanke.”
41Ndien Jesus ɔbɔrɔ ete, “O emana unana mbuɔdidem ma ukwaŋido mbihi didie ma mbufo mben unana mbuɔdidem, da eyen-eden fo diken.”
42Ede nte esaŋade edi, idiɔk odudu osio-e ɔduɔk ke isɔŋ, ndien atuak-e ɔkpɔsɔŋ. Ede Jesus asua ɔnɔ idiɔk spirit odo, anam-e ekop nchɔŋidem afiak ayak-e ɔnɔ ntete nsie.
Jesus Afiak Atiŋ Abaŋa Mkpa Nsie
(Matthew 17.22,23; Mark 9.30-32)
43Ede idem akpa mmɔ ikud odudu Abasi. Ede ke ini idem akpade kpukpru owo abaŋa kpukpru ŋkpɔ eke Jesus aka anamde, ede edɔhɔ mbed nsie ete.
44“Ana ikpaŋ utɔŋ eti-eti, ma eti se ŋtiŋde, ke ini ibigike, iyayak Eyen Owo inɔ odudu mme asua mmi.”
45Ede mmɔ idiɔŋɔke ikɔ eken, ndien edube mmɔ anamdo mmɔ ikereke, ede ndik anam mmɔ ibip-e mbaŋa ikɔ eken.
Newo Okpon Akan
46Ndien mbed enini ke otu idem mmɔ ete, newo ke otu mmumɔ okpon akan.
47Ede ke ini Jesus ɔdiɔŋɔde ekikere echid mmɔ, emen odup eyen onum mmɔ ke iso.
48Ndien edɔhɔ mmɔ ete, “owo ekedede eke adarade odup-eyen eken ke enyiŋ mi adara Min, ndien owo ekedede eke adarade Min adara Abasi eke ɔdɔŋde Min, koro eke asiŋde akan ke otu mbufo kpukpru, ikpon ikan ke nkaŋ Abasi.”
Owo Eke Ibiɔŋɔke Fin Ada Ma Ofo
(Mark 9.38-41)
49Ede John ɔbɔrɔ Jesus ete, “Ete ufɔk, nnyin imokut owo ebinde mme idiɔk odudu ɔduɔk ke enyiŋ fo ndien nnyin ikpan-e, koro isaŋake ma nnyin ichiene fin.”
50Ede Jesus ɔdɔhɔ-e ete, “kukpan-e koro owo eke ibiɔŋɔke nnyin adada ma nnyin.”
Mben Samaria Echin Jesus
51Ekem, ke ini mme usen eke imende Jesus idɔk ke ɔnyɔŋ ekperede, etum asak iso eche Jerusalem ika do.
52Ede edɔŋ mme isuŋ utom obomiso aka, ndien mmɔ aka ɔkɔduk ke iduŋ iŋwɔŋ Samaria itum itie nnɔ-e.
53Ede mmɔ iyimeke Jesus. Ɔduk obio mmɔ koro asakde iso eche Jerusalem.
54Ede ke ini mbed nsie James ma John okutde ami, mmɔ ɔdɔhɔ-e ete, “Ɔbɔŋ, nte emeyime nnyin ikuod ikaŋ oto ke ɔnyɔŋ ɔsuɔhɔre edita mmɔ nte Elijah akanamde?”
55Ede ewɔŋɔde asua ɔnɔ mmɔ ete, “mbufo idiɔŋɔke utɔ spirit eke odude mbufo ke idem.
56Koro eyen owo ikedie isobo, ede ekedi iŋyaŋa mmɔ” ede mmɔ aka obio afin.
Owo Ita Eke Eyemde Ide Mbed Jesus
(Matthew 8.18-22)
57Ekem nte Jesus ma mbed nsie asaŋade ke usuŋ aka Jerusalem, owo chied ɔdɔhɔ-e ete, “Ɔbɔŋ nsa-saŋa ma afo ŋka itie ke eyemde ika.”
58Ndien Jesus ɔdɔhɔ-e ete, “ebua ikɔt enyene odu, mme inuen ɔnyɔŋ enyene mme efɔk, ede eyen owo inyeneke itie ke edoride ibuod nsie.”
59Ndien edɔhɔ owo efen ete, “chiene Min.” Ede owo odo ɔdɔhɔ-e ete, “yak mbom-iso nkɔbuk ntete mmi.”
60Ede Jesus ɔdɔhɔ-e ete, “yak mme akpa mkpa eke akpade ke spirit ɔbuk mme akpa-mkpa mmɔ, ede ofo ka-kɔkwɔrɔ obio ubɔŋ Abasi.”
61Ede owo efen ɔdɔhɔ-e ete, nchechiene fin, “Ɔbɔŋ, ede yak mbomiso nka ŋkɔkɔm mben odude ke ufɔk mmi.”
62Ede Jesus ɔdɔhɔ ete, “owo eke edede mbed mi eke eyemde ifiak ndu akani uwem odo ekodude akpa idodke aba inam utom obio ubɔŋ.”
Currently Selected:
Luke 9: UKQ
Highlight
Copy
Compare
Share
Want to have your highlights saved across all your devices? Sign up or sign in
Ukwa Bible by Beyond Translation is licensed under Creative Commons Attribution-ShareAlike 4.0 License.
