Luke 10
10
Jesus Osio Owo Atamanduop Ɔdɔŋ
1Ekem ke mme ŋkpɔ eken ebede Ɔbɔŋ Jesus emek owo atamanduop efen, ndien edɔŋ mmɔ asaŋa iba-iba obom-e iso aka ɔkɔduk ke kpukpru obio ma itie eke eyemde ika.
2Ndien mbomiso Jesus osio mbed nsie ɔdɔŋ, edɔhɔ mmɔ ete, “mben eke eyemde ikop ikɔ Abasi ma mmɔ onum ke akpanikɔ awak, ede mben eke adade etimbuk eken akatiŋ ɔnɔ mmɔ iwakke. Etie nte akamba iŋwɔŋ ikuokoud eke Abasi ɔdɔŋde, eke ŋkpɔ ɔchɔŋde ama ke echid. Ndien yak nnyin ibeŋe eke enyenede idɔk, ɔdɔŋ uwak owo edi ke idɔk nsie.
3Ika eke mbufo; koro, mmosio mbufo ndɔŋ nte nditɔŋ-erɔŋ ke ufuɔd mme ekpe ikɔt.
4Ikikama ekpad ɔkuk, mme ekpad udia; mme ikpa-ukod: ikikɔm owo ke usuŋ.
5Ede ufɔk ekedede eke mbufo idukde, ibom iso idɔhɔ ite, yak emem odu ke ufɔk eken.
6Ndien mese eyen emem odude do, emem mbufo idodoro-e ke idem: ede mese eyen emem idue, emem, mbufo ifafiak ichiene mbufo.
7Ede itie suhɔ ke ufɔk odo, idia ifiak iŋwɔŋ se mmɔ ɔnɔde mbufo, koro eyen-utom odod ŋkpɔ eyen utom nsie ikisaŋa ke ufɔk ke ufɔk.
8Ndien obio ekedede eke mbufo idukde, mese mben odo enyimede mbufo, idia ŋkpɔ eke mmɔ onumde ɔnɔ mbufo.
9Ndien inam udɔŋɔ ekwere mben udɔŋɔ eke odude do, ndien idɔhɔ mmɔ ete, ke obio ubɔŋ Abasi asaŋa ekpere mbufo.
10Ede obio ekedede eke mbufo idukde, mben odo inyimeke idara mbufo, iwɔrɔ ika ekwere eke idara mbufo, idɔhɔ ite.
11Nnyin ikeŋ ntan ikpad eke otode obio mbufo eke adiande nnyin ke ikpad, se nnyin ikeŋ ifep idian mbufo, nte ntɔd inɔ mbufo koro Abasi ikpekpe ikpe ma mbufo, idiɔŋɔ ite obio ubɔŋ Abasi asaŋa ekpere mbufo.
12Ede ndɔhɔ mbufo nte, ŋkpɔ ifafan ma Sodom ke usen ikpe ikan obio odo.”
Obio Eke Ikabakede Echied
(Matthew 11.20-24)
13“Ndien Jesus ɔdɔhɔ ete, ifankefan inɔ mbufo chorazin ifankefan inɔ mbufo Bethsaida koro mese ekpanamde ke Tyre ma Sidon akamba utom eke ekanamde ma mbufo, mmɔ ikpikabare echid anyan ini isine ɔfɔŋ-ikpo itie ke ntɔŋ.
14Ede ŋkpɔ ifafan ma Tyre ma Sidon ke usen ikpe ikan ma mbufo 15Ndien ofo capernaum, eke ekemeŋere osum ɔnyɔŋ, isɔsuhɔre fin isum obio ekpo. 16Owo eke okopde uyo mbufo okop uyo Mmi, owo eke echinde mbufo echin suhɔ Min, ndien owo eke echinde Min, echin suhɔ enyemi ɔkɔdɔŋde Min.”
Atamanduop Esed Ma Idaraechied
17Ndien mbet atamanduop odo afiak edi ma inemechid edidɔhɔ Jesus ete, “Ɔbɔŋ, suhɔ mme idiɔk odudu ɔsuk ibuod ɔnɔ nnyin ke enyiŋ mfo ibin mmɔ iduɔk.”
18Ede Jesus edɔhɔ mmɔ ete, “Mma ŋkud andidiɔk otode ke ɔnyɔŋ ɔduɔ nte amini mini.
19Che-che, mmɔnɔ mbufo odudu idio urukikɔt ma itutubom ke ikpad, mfiak ŋkara efri odudu mme asua, ndien ŋkpɔ chied-chied imanamke mbufo idiɔk.
20Ede ikidad echid koro mme idiɔk odudu ɔsukde ibuod ɔnɔ mbufo; ede idad echid koro ama ewed enyiŋ mbufo ke obio ubɔŋ.”
Jesus Adadechied Ke Spirit
(Matthew 11.25-27)
21Ke ini odo Jesus okop inemechid ke edisana Spirit, ndien ebɔŋ akam ete, “mmɔkɔm Fin, O Ete, Ɔbɔŋ ɔnyɔŋ ma isɔŋ koro odupde ŋkpɔ eken ke anyin mme ɔdiɔŋɔ ŋkpɔ ndien ayararede ɔnɔ nsek nditɔŋ, Ete, koro enende Fin ntoro ke anyin.
22Ndien Jesus ɔdɔhɔ mme owo ete, Ete Mi amayak kpukpru ŋkpɔ ɔnɔ Min, ndien owo chied-chied idiɔŋɔke eyen, ebede Ete, owo idiɔŋɔke Ete, ebede Eyen ma owo ekedede eke Eyen amade iyarade Ete nnɔ.”
23Ekem ewɔŋɔde eche mbed nsie, edɔhɔ mmɔ ke ndube ete, “afafan ɔnɔ mme anyin eke okutde mme ŋkpɔ eke mbufo ikutde.
24Koro ndɔhɔ mbufo nte uwak mme asiak uduak ma mbɔŋ ama eyem ikud mme ŋkpɔ eke mbufo ikutde, ndien ikekwe, mfiak ŋkop mme ŋkpɔ eke mbufo ikekopde, ndien, ikekopke.”
Newo Ede Mbɔhɔiduŋ Mi?
(Matthew 22.34-40; Mark 12.28-34)
25Che-che, ke ini Jesus ɔsuk ekpepde ŋkpɔ, ekpep mbet Moses chied adaha ke ɔnyɔŋ odome Jesus ete, “Andikpep, nnam didie ma nnyene nsinsi uwem?”
26Ede Jesus atiŋ ɔnɔ-e ete, “ewed didie ke mbet Moses! Okuod didie?”
27Ntoro ebɔrɔ ete, “mma Ɔbɔŋ Abasi ke efiri echid mfo, ma ke efiri ukpɔŋ mfo, ma ke efiri ekikere mfo, ma ke efiri odudu mfo, ndien mma mbɔhɔiduŋ mfo nte idem mfo.”
28Jesus ɔdɔhɔ-e ete, “ɔmɔtum ɔbɔrɔ: nam ntoro, ndien udodu uwem.”
29Ede siak owo odo eyemde iwiri ke emɔ imenen ebip Jesus ete, “newo ede mbɔhɔiduŋ mi?”
30Jesus ɔbɔrɔ-e ke ŋke ete, “owo chied okoto Jerusalem ɔsuhɔde aka Jericho; ndien eduɔ ke otu mben inɔ, eke ɔkpɔkde ɔfɔŋidem nsie efep amia-e, afiak adaha ɔkpɔŋ-e ekpere mkpa.”
31Ede nte ŋkpɔ anade oku chied ɔwɔrɔ edi ke usuŋ okud owo odo, esaŋa ebe ke edem chied.
32Suhɔ ntoro owo chied otode ubon Levite osum itie odo, ada eche-e ndien asaŋa ebe ke edem chied.
33Ede eyen Samaria chied, eke asaŋade isaŋ, edisum itie eke owo odo odude, ede nte ekutde-e, enyene mbɔm ɔnɔ-e.
34Ntoro se esaŋa adiana-e etɔhɔ mmin ma arin ke unan nsie, ndien ebip mmɔ: emen-e odori ke enaŋ nsie, ada edi ke ufɔk-echen, ndien ekpeme-e.
35Ndien ke oyo echierede esio ɔkuk utom usen iba ɔnɔ Ete ufɔk, ete, kpeme owo eken, nsosio kpukpru se abiatde akan odo nnɔ fin.
36Ke otu owo ita odo, ekere ete newo ede mbɔhɔiduŋ owo eken ɔkɔduɔde ke otu mben inɔ?
37Ede edɔhɔ ete, “ede owo eke akatuade-e mbɔm.” Ndien Jesus ɔdɔhɔ ete, “ka kanam suhɔ ntoro.”
Jesus Ekeche Martha Ma Mary
38Edikem nte Jesus ma mbed nsie asaŋade isaŋ aka ke Jerusalem, mmɔ ɔduk ke obio-chied ndien aŋwan eke ekerede Martha ada-e ɔduk ufɔk.
39Ede Martha enyene eyen eka aŋwan ekerede Mary, eke etiede ke ukod Jesus, okop ikɔ nsie.
40Ede utom eke Martha anamde afina ɔkpɔsɔŋ; ke ntak unam ŋkpɔ ndien edɔhɔ ete, “Ɔbɔŋ, nte ukereke ami eyen-eka mi ɔkpɔŋde utom ɔnɔ Min ɔkpɔŋ? Dɔhɔ-e ediwam Min.”
41Ede Jesus ɔbɔrɔ ete, “Martha, Martha, ofo ama ayak uwak ŋkpɔ otumede fin ekikere.
42Ede ŋkpɔ chied se nyem, ede Mary emek eti udeme, eke owo imɔbɔ-e.”
Currently Selected:
Luke 10: UKQ
Highlight
Copy
Compare
Share
Want to have your highlights saved across all your devices? Sign up or sign in
Ukwa Bible by Beyond Translation is licensed under Creative Commons Attribution-ShareAlike 4.0 License.
