Luke 8
8
Uwak Iban Anam ŋkpɔ Ɔnɔ Jesus
1Ekem ke iyeyen ini ebede, Jesus asaŋa ke mme ikpɔ obio ma iduŋ iŋwɔŋ ɔkwɔrɔ ikɔ ma etimbuk inemechid obio ubɔŋ Abasi, mbed nsie duobeba asaŋa ma-e.
2Usuk iban eke ekɔkɔkde udɔŋɔ ma mben idiɔk spirit ɔwɔrɔde mmɔ ke idem, odu do ma-e. Ede chied ke otu mmɔ ekere Mary eke okotode obio Magdalene, eke idiɔk odudu itiahaba ɔkɔwɔrɔde ke idem nsie.
3Ma iban afin ekerede Joanna, aŋwan Chuza, akama ukpɔhɔre Herod ma Susanna, ma uwak mben afin, eke adade se mmɔ enyenede eche ŋkpɔ abaŋa Jesus ma mbed nsie.
Ŋke Asuan Mkpata
(Matthew 13.1-9; Mark 4.1-9)
4Ndien ke ini akamba otu owo obonode itie chied mme owo otode ke nsioŋo-nsioŋo obio echiene Jesus, etiŋ ikɔ ke ŋke ɔnɔ mmɔ.
5“Asuan mkpata akaka isuan mkpata nsie, nte esuande usuk mkpata ɔduɔŋɔ ke mben usuŋ, mmɔ odio mmɔ ke ikpad, ndien inuen ɔnyɔŋ editaŋ mmɔ ata.
6Usuk mkpata ɔduɔŋɔ ke akamba itiad. Ke ini mmɔ otubede, eyeme, siak mmuɔŋ idue inɔ mmɔ.
7Usuk mkpata ɔduɔŋɔ ke ufuɔd ikɔt nkukum, ndien nkukum ɔkɔri ntoro ma mmɔ, ababa mmɔ owod.
8Mben eke ɔsuhɔde ɔduɔŋɔ ke nti isɔŋ. Ke ini etubede, eŋwum mfri ikichie.” Ke ini etiŋde ikɔ eken efieri ke ɔkpɔsɔŋ uyo ete, “owo eke enyenede utɔŋ ikop, yak ekop!”
Ntak Mme ŋke
(Matthew 13.10-17; Mark 4.10-12)
9Ndien mbed nsie ebip-e se “ŋke nsie ɔwɔrɔde?”
10Ndien ete, “eyak enɔ mbufo, idiɔŋɔ ndube ŋkpɔ obio ubɔŋ Abasi. Ede, mben eken, etiŋ ke ŋke ɔnɔ mmɔ.
Ma ke ini mmɔ echede, mmɔ ikokud ŋkpɔ,
Ma ke ini mmɔ okopde, mmɔ idɔdiɔŋɔ.”
Anam Ŋke Asuan Mkpata Aŋwaŋa
(Matthew 13.18-23; Mark 4.13-20)
11“Ŋke eken ɔwɔre nte, mkpata ede ikɔ Abasi.
12Mben eke ɔduɔŋɔde ke mben usuŋ, ede mben eke okokopde ikɔ Abasi, ekem andidiɔk editaŋ ikɔ ke echid mmɔ efep, bak mmɔ inum ke akpanikɔ, ifiak ikud edinyaŋa.
13Mben eke ɔduɔŋede ke ɔnyɔŋ itiad, ede mben eke okopde ikɔ Abasi ke idarechid, ede mmɔ inyeneke nchɔŋɔnda, ntoro se mmɔ onum ke akpanikɔ ke ibibio ini, ndien mmɔ afiak edem ke ini idome.
14Ndien mkpata eke ɔduɔŋɔde ke ikɔt nkukum ede mben eke okopde, ɔwɔŋɔ aka ndien ekikere ma inyene ma inemechid uwem, ababa ikɔ odo owod. Ke ntak odo mmɔ ikɔrike isioŋo mfri.
15Ndien mkpata eke ɔduɔŋɔde ke nti isɔŋ, ede mben eke okopde ikɔ omum akama ke eti echid akpanikɔ afiak oŋwum mfri ke ime.”
Ŋke Eke Ayarade Unwana
(Mark 4.21-25)
16“Owo chied-chied idomoke utuenikaŋ ida ŋkpɔ ifuk, imenke suhɔ inum ke idak mkpana. Ede ɔwuk ke uwuk utuenikaŋ, ma mben eke odude ke echid-ufɔk okud unwana.
17Koro ŋkpɔ chied-chied idubeke eke owo imɔdiɔŋɔke, idue ŋkpɔ eke owo ɔfukde, eke imɔfuhɔkede ina ke aŋwa ma owo ɔdiɔŋɔ.
18Itum ikpeme nte mbufo ikopde, koro owo eke edede eke enyenede, iyebɔ afin idian ke se ebomde iso enyene, ede owo eke inyeneke, mmɔ iyebɔ-e se ekerede ete ede eke emmɔ.”
Mme Nditɔŋ Eka Jesus Ma Mma Nsie Ediyem-e
(Matthew 12.46-50; Mark 3.31-35)
19Ekem eka Jesus ma nditɔŋ eyen eka oto edi, ede mmɔ ikanke isum-e idem ɔnɔ nte owo awakde.
20Ede mmɔ ɔdɔhɔ-e ete, “uka ma nditɔŋ eyen uka ɔsuk eyem fin ke aŋwa. Mmɔ eyem ikud fin.”
21Ede ebɔrɔ mmɔ ete, “nditɔŋ eka mi ma eka mi ede mmɔ eke okopde ikɔ Abasi ɔtɔŋɔ ntak anam.”
Ofum Ma Udahakpa Ɔsuk Ibuod Ɔnɔ Jesus
(Matthew 8.23-27; Mark 4.35-41)
22Ndien ke usen chied, eduk ubom ma mbed nsie, ete mmɔ, “inam nnyin iwad ibe ika edem inyaŋ edieko” ntoro se osio uwad.
23Ede nte mmɔ awatde, idap ɔbɔhɔ-e ndien idiɔk ofum ɔtɔŋɔ ofum ke inyaŋ, mmuɔŋ ɔtɔŋɔ iduk ubom, ke ntak odo, ndik anam mmɔ.
24Ndien mmɔ atuak-e, edeme, mmɔ okuod-e, “Ete ufɔk, Ete ufɔk, nnyin imatak.” Ndien edeme ke idap asua ɔnɔ idiɔk ofum ma udaha akpa: mmuɔŋ odobe etie suŋ-ŋ.
25Ede edɔhɔ mmɔ ete, “mbuɔdidem mbufo odu ke mmɔ?” Ndik anam mmɔ, mkpaidem omum suhɔ, mmɔ ɔdɔhɔ ma chied eken ete, “nsutɔ owo oduomi, ofum ma mmuɔŋ okopde uyo nsie!”
Owo Eke Idiɔk Odudu Ɔtuhɔrede Ɔbɔ Nchɔŋidem
(Matthew 8.28-9.1; Mark 5.1-20)
26Ekem Jesus ma mbed nsie ebedi ke esuk Gerasene, eke echede iso ma Galilee.
27Ndien ke ini ewɔrɔde ke ubom ɔdɔk obod, owo chied oto ke obio edisobe ma Jesus, idiɔk odudu, odu-e ke idem, ikesineke ɔfɔŋ ke anyan ini, owo eken iduŋke ke ufɔk, ede ɔduŋ ke mme udi.
28Ke ini ekutde Jesus, efieri, eduɔ ke iso nsie efiak ɔdɔhɔ ke ɔkpɔsɔŋ uyo ete, “nsaŋa nso ma ofo Jesus eyen Abasi ibom, mekpe fin ubɔk, kunɔ min ufen!”
29Siak Jesus ɔwukde idiɔk spirit ete, Wɔrɔ owo eken ke idem, koro spirit emen-e ke uwak ini, ndien mmɔ ada-e esin ke idak ukpeme, ɔkɔbi-e ke ŋkpɔkɔbi etem itie chied, ede ekubi ŋkpɔkɔbi, ndien idiɔk odudu esimen-e aka ke nchad isɔŋ.
30Ndien Jesus ebip ete, “ekere didie” ebɔrɔ ete, nkere “Legion” (udum) siak uwak mme idiɔk odudu ɔduŋde-e ke idem.
31Mme idiɔk odudu ebeŋe Jesus ete idɔdɔhɔ mumɔ iwɔrɔ ikɔduk obube ufen.
32Akamba otu edi, odu do, adia ŋkpɔ ke ɔbud ndien mmɔ ebeŋe Jesus ete enam mmumɔ ikɔduk ke idem mme edi, Jesus enyime.
33Mme idiɔk odudu ɔwɔŋɔ owo odo ke idem ɔkɔduk mme edi, mme edi obumere ɔfɔŋɔ ɔsuhere ebedeŋ ɔkɔduɔŋɔ ke inyaŋ, akpaŋa.
34Ndien ke ini mme ɔbɔk edi okude se otubede, mmɔ ɔfɔŋɔ akatiŋ ke obio ma ke iŋwɔŋ, se mmɔ okutde.
35Mben obio ɔnwɔŋɔ edi ediche se okotibede mmɔ edikud Jesus ma owo ami idiɔk odudu ɔwɔrɔde ke idem, nte etiede ke ukod Jesus, esine ɔfɔŋ, ibuod nsie akabade eyie, ndien ndik anam mmɔ.
36Mben eke okokutde ŋkpɔ odo, ɔbuk ɔnɔ mben eken nte ekanamde owo odo idiɔk odudu ɔwɔrɔde ke idem okop nchɔŋidem.
37Ndien kpukpru mben eke ɔduŋde ke ŋkaŋediedo, ke isɔŋ mme Gerasene ekpe Jesus ubɔk adaha ɔkpɔŋ edem mmɔ, siak ɔkpɔsɔŋ ndik anamde mmɔ, ntoro ke Jesus ɔduk ke ubom ɔwɔrɔ.
38Ede owo odo idiɔk odudu ɔkɔwɔrɔde ke idem ebeŋe Jesus ete emmɔ isaŋa ma-e.
39“Ede Jesus anam-e efiak ɔnyɔŋ ufɔk ete, kɔbuk ikpɔ ŋkpɔ eke Abasi anamde ɔnɔ fin” ndien enyɔŋ ufɔk, ekɔbuk ikpɔ ŋkpɔ eke Jesus akanamde ɔnɔ mben obio.
Ŋkaiferi Chied Ɔbɔ Uwem Ndien Aŋwan Chied Ɔbɔ Edikɔk
40Ekem ke ini Jesus ɔtɔŋɔde ntak ekebehe ke obio, uwak owo adara ke ini mmɔ okude-e, siak mmɔ kpukpru etiede mbed-e.
41Ekem owo chied ekerede Jairus, ɔbɔŋ itie ukpono mme Jew, ediduɔ Jesus ke ukod iwud ukpono ekpe ubɔk ete, edi ke ufɔk nsie.
42Koro enyenede kpɔrɔchied eyen aŋwan, eke edede ŋkpɔ nte isua duopaba, edɔŋɔ eyem ikpa, ede nte ekade, uwak owo efik-e ke idem.
43Ndien aŋwan chied eke ɔdɔŋɔde uwɔrɔ eyip ke isua duopeba, eke ebiatde kpukpru se ekpadade odu uwem ɔnɔ abia ibɔk, owo chie-chied ikanke inam idem ɔchɔŋ-e.
44Ndien eto ke edem ɔtuk etɔŋ ɔfɔŋidem Jesus, ndien nde-nde odo uwɔrɔ eyip ekwere.
45Ndien Jesus ɔdɔhɔ ete, “ne-etuk Min?” Ede ke ini kpukpru owo akaŋde, Peter ma mmɔ eke odude ma-e ɔdɔhɔ ete, “Ete ufɔk mme owo adiana ndien efik fin ke idem, ndien ofo ete ne-etuk Min?”
46Ede Jesus ɔdɔhɔ ete, “owo chied ɔtuk Min. Siak mɔdiɔŋɔ ke odudu ɔwɔrɔ Min ke idem.”
47Ede ke ini aŋwan odo okutde ke emɔ imedubeke. Edi ma nyekidem ediduɔ Jesus ke iso, awiri ukpono etiŋ ntak eke eketukde Jesus, ma nte udɔŋɔ nsie ekwerede ini chied.
48Ede Jesus ɔdɔhɔ ete, “eyen aŋwan, mbuɔdidem mfo akanam fin okop nchɔŋidem, nyɔŋ ke odu ke emem.”
49Nte esuk etiŋde ikɔ, owo oto ufɔk ɔbɔŋ itie ukpono mme Jew edidɔhɔ ete “eyen mfo ama akpa, kufina aba ete ufɔk.”
50Ede ke ini Jesus okopde, ebɔrɔ ete, “kufɔhɔ ndik, suk num ke akpanikɔ, eyen mfo ikokop nchɔŋidem.”
51Ke ini Jesus ɔdukde ufɔk, iyakke owo chied-chied ebe ɔduk ebede Peter ma John ma James ma Ete ma Eka eyen.
52Ndien kpukpru owo ɔsuk atua eyed ma eseme, Ede Jesus ɔdɔhɔ ete, “idop eyed, koro eyen ikpa-akpa, adidab.”
53Ede mmɔ asak-e nsahi, siak mmɔ ɔdiɔŋde ete ke eyen ama akpa.
54Ede esio kpukpru mmɔ ke aŋwa, ndien Jesus omum eyen ke ubɔk, okuod ete, “eyen aŋwan daha ke ɔnyɔŋ.”
55Ndien spirit ɔtɔŋɔ ntak ɔduk eyen ke idem, edaha ke ɔnyɔŋ ini chied, Jesus ɔnɔ uyo ete, mmɔ ɔnɔ-e ŋkpɔ edia.
56Idem akpa ete ma eka eyen, ede Jesus ɔdɔhɔ mmɔ ete, mmɔ itatiŋ se okotubede inɔ owo chied-chied.
Currently Selected:
Luke 8: UKQ
Highlight
Copy
Compare
Share
Want to have your highlights saved across all your devices? Sign up or sign in
Ukwa Bible by Beyond Translation is licensed under Creative Commons Attribution-ShareAlike 4.0 License.
