Luke 7
7
Jesus Ɔkɔk Eyen Ufɔk Akamba Owo Ekɔŋ
(Matthew 8.5-13)
1Ke ini Jesus ekpepde mme owo ŋkpɔ ama ɔnɔ mben obio, mmɔ okop, Jesus ebe aka capernaum.
2Akwa owo ekɔŋ ke Rome, enyene eyen ufɔk eke emade. Ke ini eyen ufɔk odo ɔdɔŋɔde eyem ikpa.
3Ke ini centurion okopde etop Jesus, edɔŋ ikpɔ owo mme Jew ɔkɔdɔhɔ Jesus ete edikɔk eyen ufɔk nsie.
4Ke ini mmɔ osumde Jesus, mmɔ ekpe-e ubɔk ɔkpɔsɔŋ, ɔdɔhɔ ete odod nte ofo anamde ŋkpɔ eke Akwa owo ekɔŋ eyemde ɔnɔ-e.
5“Siak emade obio nnyin, ɔbup itie ukpono mme Jew ɔnɔ nnyin.”
6Ndien Jesus asaŋa ma mmɔ aka, ke ini Jesus ekperede ufɔk, akwa owo ekɔŋ ɔdɔŋ mme ufan nsie utom ɔnɔ Jesus ete, “kufina idemfo, koro ndotke nte ofo ekpedide ufɔk mmi.
7Ami ke idem mi ndotke iwɔrɔ nchiene fin, tiŋ suhɔ ikɔ, ndien eyen ufɔk mi ikokop ŋchɔŋidem.
8Siak ami ke idem mi, ndu ke idak ukara owo efen menyene mben efen eke odude ke idak mi, eke ndɔhɔde owo chied nte ka, e-ka, ndien ndɔhɔ owo efen nte di, ndien e-di, ndɔhɔ eyen ufɔk mi nam nte ndien anam.”
9Ke ini Jesus okopde ikɔ eken, idem akpa-e, ewɔŋɔde ɔdɔhɔ kpukpru owo eke odude ma-e ete, “nte idede ŋkwe mbuɔdidem eke okponde nte-e ke Israel!”
10Ke ini mme ufan nsie afiakde ɔnyɔŋ ufɔk, mmɔ okokud owo udɔŋɔ odo nte idem ɔchɔŋde-e.
Jesus Anam Eyen Ebekpa Eseri Ke Mkpa
11Ekem ke usen odo ebede, Jesus aka ke obio odo ekerede Nain, mbed nsie ma otu owo asaŋa ma Jesus aka.
12Ke ini Jesus ekperede iso-inen obio, ekut nte mmɔ obiomde okpo owo ɔwɔrɔ, akpa mkpa eke edede kpɔrɔchied eyen ebekpa eke eka enyene ɔkpɔŋ, uwak mben obio asaŋa ma aŋwan eke eyen nsie akpade.
13Ke ini Jesus okutde aŋwan eken, etua-e mbɔm, ndien edɔhɔ aŋwan ete, “kutua.”
14Esaŋa ekpere mmɔ ɔkɔtuk ubiom okpo, ndien mme obiom-okpo atuak ada. Jesus ete, “akparawa, daha ke ɔnyɔŋ.”
15Ndien akpa mkpa adadaha etetie, ɔtɔŋɔ itiŋ ikɔ, ekem Jesus ayak-e ɔnɔ mma nsie.
16Ede ndik anam kpukpru mmɔ, mmɔ otoro Abasi, ete, “Akwa asiak uduak adadaha ke otu nnyin” mmɔ ete, “Abasi edi ediche uben nsie.”
17Ndien etop nsie asuana ke kpukpru Judea ma ŋkan-ŋkuk.
John Ɔdɔŋ Mbed Nsie Utom Ɔnɔ Jesus
(Matthew 11.2-19)
18Mbed John emen ŋkpɔ eke Jesus akanamde atiŋ ɔnɔ ete ufɔk mmɔ.
19Ndien John osio mbed nsie, owo iba ɔdɔŋ ete, mmɔ ekebup Jesus ete, ndefo ede owo eke enyenede idi, mme nnyin idori anyin ke owo afin.
20Ndien mme isuŋ utom ebine Jesus, ɔdɔhɔ-e ete, “John Baptist ɔdɔŋ nnyin utom ke itie mfo, ete, ibip fin nefo ede owo eke enyenede idi, mme nnyin idoranyin ke owo afin?”
21Ke ini odo Jesus anam udɔŋɔ ma idiɔk odudu ekwere uwak owo, afiak anam mme nnan okud usuŋ.
22Jesus ɔdɔhɔ mmɔ, “ika ikebuk inɔ John se mbufo ikutde ma se mbufo ikopde ete, nnan okud usuŋ, mbuŋɔ asaŋa isaŋ, akpamfia asana, inan okop ikɔ, akpa mkpa eseri, efiak ɔkwɔrɔ etimbuk idaraechid ɔnɔ mme ubuene.
23Ede afafan ɔnɔ owo ekedede eke ikwe iduɔ ke ntak mi.”
24Ke ini mme isuŋ utom John ɔnyɔŋɔde, Jesus ɔdɔhɔ mme otu owo abaŋa John ete, “mbufo ikɔwɔŋɔ ikeche nso ŋkpɔ ke nchad isɔŋ nde nyanyaha eke ofum enyeŋede?
25Ede ikɔwɔŋɔ ikeche-nso, nde owo eke esinede ɔfɔŋidem eke eyiede, ma mben eke odude nkokoŋo uwem ede mmɔ eke esinede ɔfɔŋidem mbɔŋ, odu ke ufɔk mbɔŋ.
26Ede ikɔwɔŋɔ ika-nso? Nne asiak uduak ntoro, Ntiŋ ke akpanikɔ nnɔ mbufo nte, enye okpon akan asiak uduak.
27Ami ede owo eke ewed-de abaŋa-e ke ikɔ Abasi ete,
Che-che mmɔdɔŋ isuŋ utom mi obom fin iso,
Eke ɔdiɔŋde usuŋ utom inum ɔnɔ fin.
28Ndɔhɔ mbufo nte, ke otu owo eke iban amande, owo eke okponde akan John idue, ede owo eke asiŋde akan ke obio ubɔŋ Abasi, okpon akan John.”
29Ke ini kpukpru mben obio ma mme ɔbɔ etube (publican) okopde ikɔ nsie, mmɔ ɔdɔhɔ ete, Abasi enen, siak mmɔ akanade uduɔk mmuɔŋ ke ubɔk John.
30Ede mme pharisee ma mme ekpep-mbet, eke ikana uduɔk mmuɔŋ John, anam uduak Abasi ke idem mmɔ akabade ɔwɔrɔ ikpuikpu.
31Ndien Jesus ɔdɔhɔ ete, “Mkpada mben emana eken ndomo ma nso; mmɔ ekpebied nso ŋkpɔ?
32Mmɔ ebied nditɔŋ eke etiede ke aŋwa udua okuod mben mbre mmɔ ete,
Imofuri ufiom inɔ mbufo,
Ede mbufo ineke unek,
Imatua eyed inɔ mbufo,
Ede mbufo ifuhɔke.
33Koro John Baptist ekedi, idia-a ata udia, iŋwɔŋke mmin, ede mbufo ite enyene idiɔk odudu.
34Eyen owo edi esie, adia ŋkpɔ, ɔŋwɔŋ suhɔ ŋkpɔ, ede mbufo ikuod-e, adia udia ma ama mmin, ufan mme ɔbɔ etube ma mme idiɔk owo!
35Ede kpukpru nditɔŋ eke enyenede eti ibuod Abasi, awiri ete eti ibuod afan eti-eti.”
Jesus Efen Idiɔk Ŋkpɔ Aŋwan
36Ndien owo mme Pharisee chied ekere Simon, okuod Jesus ete, edidia ŋkpɔ ma emɔ, ndien eka ke ufɔk odo ɔsuhɔde etetie ke itie udia.
37Ndien, aŋwan chied eke odude ke obio, eke edede anam idiɔk ŋkpɔ, ediɔŋɔde ete Jesus ke etie ke itie udia, ke ufɔk owo Pharisee odo, emen ufuɔŋkpɔ ke otu Alabaster.
38Ada Jesus ke edem ke ukod atua eyed, ndien etɔŋɔ edɔŋ, mmuɔŋ eyed nsie edebe Jesus ukod, eda ided ibuod nsie ɔchɔhi Jesus ukod, efip ukod Jesus, efiak ada ufuɔŋkpɔ eyed Jesus ke ukod.
39Ndien ke ini Pharisee odo okutde ŋkpɔ eke akade iso, ndien edɔhɔ ke echid nsie ete, “mese owo eken ekpedede asiak uduak, ikpidiɔŋɔ utɔ owo eke aŋwan eken edede, siak mme owo adade aŋwan odo nte anam idiɔk ŋkpɔ.”
40Ndien Jesus ɔdɔhɔ Simon ete, “menyene ŋkpɔ eke ntiŋde ma ofo” Simon ete, “andikpep tiŋ.”
41“Owo ebuɔd chied ekenyene owo isɔn iba, chied akama-e bɔn ikietion, owo efen akama bɔn abamaduop.
42Siak mmɔ inyeneke se mmɔ adade osio isɔn odo, efen ɔnɔ mmɔ mbaba. Ke otu owo iba eken ndenye ima-e ikan?”
43Simon ɔbɔrɔ ete, “nkere nte, ede owo eke efende enɔ-e ke isɔn eke okponde akan.” Jesus ete Simon, “ɔmɔtum ɔbɔrɔ.”
44Ekem Jesus akabade eche aŋwan ɔdɔhɔ Simon ete, “Omokud aŋwan eken? Nkɔduk ke ufɔk mfo, ofo unɔŋɔ Min mmuɔŋ nyed ukod ikpono min, ede enye ada mmuɔŋ-eyed nsie eyed Min ukod, afiak ada ided nsie ɔchɔhi Min ukod.
45Ofo ukɔkɔmke min ke ido ntum inua, ede tɔŋɔ nte idi eda inua nsie afib Min ukod iwiri ukpono.
46Ofo uyetke Min arin ke ibuod, ede eda ufuɔŋi ŋkpɔ eyed ukod mmi.
47Mɔdɔhɔ fin nte, efen mme idiɔk ŋkpɔ nsie kpukpru, ndien ima nsie okpon, ede owo eke efende ke iyeyen ŋkpɔ, ɔwɔrɔ ima nsie ikponke.”
48Ndien edɔhɔ aŋwan odo ete, “efen mme idiɔk ŋkpɔ mfo.”
49Ndien mmɔ odo eketiede ma-e ke itie udia ɔdɔhɔ ke echid mmɔ ete, “nne-ede owo eke efende idiɔk ŋkpɔ?”
50Jesus ɔdɔhɔ aŋwan odo ete, “mbuɔdidem mfo ama aŋyaŋa fin, nyɔŋ kodu ke emem Abasi.”
Currently Selected:
Luke 7: UKQ
Highlight
Copy
Compare
Share
Want to have your highlights saved across all your devices? Sign up or sign in
Ukwa Bible by Beyond Translation is licensed under Creative Commons Attribution-ShareAlike 4.0 License.
